( أبو رعب )
... القسم الثاني
بقلم نورس
.....................
أميرة: ولك شبيك يمة .. احجججي وكعت كَلبي .. شبيييه يوووسف ؟
ليث: عشيرة ال(..) متحضرين وبيدهم سلاح راح يدكون بيت عم يوسف
كامت تدك وتلطم وتصيح
أميرة: ولككك يمة اخوووك مو بالبيت .. يووووسف يممة راح وليدددي
لزمت ايدها بس اريد اسكتها واحجي وياها اهديها
خلتني اتندم لان كتلها ..
سمعنه صوت الرمي من برة ..
عفتها تصرخ وطلعت اركض تليفوني بيدي اخابر عليهم محد يجاوب
لحد ما دك عليه رديت بسرعة
ليث: لككك ووووينك ؟؟ صار ساااعة ادك عليك الف حسبة وحسبة اجت براسي
يوسف: شكوو شصاير ؟
ليث: ما سمعت صوت الطلق .. ذولة اجوا يدكوكم ردت بس احصلك حتى اكلك تفرغون بيت عمك
يوسف: فرغناه من اول ما صارت السالفة محد بيه
جريت نفس براحة وكتله
ليث: وينك انت هسه .. امي متخبلة عليك تكدر تجي
يوسف: لك وين اجي واعوفهم .. روح الها للبيت و هسه اخابرها ، اني مو بعيد ببيت عمتي
......
يصيح ويفشر وكل ساع يطفر يريد يطلع وكوة لازمينة
اني كاعدة بالغرفة وصوت صياحهم يوصلني من الصالة
.. كلها تصيح وكوة نفتهم الكلمة عود هاي هم كاعد يتناقشون
أكرم: طااايح الحظ ليشش ركضت بالسلااااح .. هم بدوستهم لبيتنه ركبهم الغلط من راسهم لرجليهم ونكدر نفصلهم فصل مربع
مصطفى: المسدس حاااطة برااسي ويجرجرون بيه بنص بيتي والبيت مابي بس نسووووان .. شتررريدني اباوع واسسكت
أكرم: لتصيييح بوووجهي ابن الكلللب
صارت هوسة جوة ومشاحنات بين مصطفى وعمو أكرم
واسمعهم يهدون بيهم ..
انفتح الباب وطلع مصطفى شايط ركض وراه عمو جهاد ولزمة جرة لغرفة ثانية وكعد يحجي وياه
مصطفى: فووك الصااار يمد ايدة عليه ؟؟؟ عمي رحمة لاهلك عووفني خلي اووولي
جهاد: اكعععددد ووين تروح ابووك هذا واذا ما ضربك
اكعدد واكصر الشرر هم ما يعولون يلزمونك وينهشون لحمك
مصطفى: وطبنييي مررررض .. اني هذا الرجااال بعد ما اتحمممل ابقى وياه بمكان واحد
جان يقصد ابوه بكلامة .. صاح بيه عمو جهاد وكعده كوة
جهاد: كااافي عيييب هل حجي .. اكعد واستجن وكبرر عقلك وخلي بالك احنه اصحاب الحك واحنه المتفضلين عليهم وهم الغلطانين .. ما راح نسكت الهم هل مرة على دوستهم حرمة البيت
الفهمناه عمو ما راضي ع اللي سواه مصطفى ومن ضال يحجي كام وضاربة كدامهم ومصطفى متخبل
ضلوا على هل حال ل12 بليل كل ساع تكب عيطة .. قسور واكف بالطارمة وما سمعتله صوت ومخلصها جكاير
اخر شي سحب سويج سيارتة وطلع ومحد يدري بيه وين ..
ضلينة على هل حال لوجه الصبح محد غفت عينة واجاه النوم .. لحد موصلنة خبر انو الشرطة حاجزة ع اللي دكوا بيت عمو أكرم
من ضمنهم مرتضى واخوه وشكو واحد لزم سلاح وشارك بالدكة لزمهم وشمرهم بالحبس ..
راح تكولون منو هو ؟ .. هه ليش اكو غيرة ( أبو رعب )
بس ما فضت على هاي ..
عمامي ما قبلوا الا يفصلون وعلى كولتهم
.. نحسمها ونحط النقط ع الحروف
دازين اهل مرتضى ناس واخذوا عطوة من عدنه والخبر وصل لولد عم ابوي وانطوهم مهلة اسبوع ويفصلوهم ..
صارت الناس تروح وتجي بالديوان مال بيت جدو قبل الفصل بكم يوم بس محد يبات بذاك البيت
جانت تروح وحدة من عدنه كل يوم حتى بس تسويلهم الجاي والمي .. اباوع للبيت مزرفينة تزرف
ربك ستر وطلعنه بيومها قبل ليدكون البيت ..
صافنة وبالي بغير مكان ..
صاحت عليه عمتي
سهير: الجاي فار عمة طفي
لبوة: ها اي
طفيتة بسرعة ومشيت اصب بالاستكاين .. اجاني صوتة واكف بباب المطبخ
قسور: يلا جايج وووين
ردته عمتي
سهير: عمة شجاك بس تصيح .. هريتنة هري بصياحك هو هيج
أشر على خشمة وكال
قسور: واصلة ليجاي وحق علي .. اتجفوووا شرري
مشيت انطيته اله بدون لا اباوع بوجهة ..
للمغرب يلا كفت رجل الخطار ..
تحضرنة ولبسنة حتى نرجع لبيت عمتي
كالت ..
سهير: هم عندج ملابس تاخذيهن .. خاف محتاجة شي ما دامنة هنا
هزيت راسي ب لا ..
وحجيت
لبوة: لعد شوكت يرجعون للبيت هاي راح يصير 5 ايام ع السالفة
سهير: يمعودة هو عمج ومرتة بوخة متشوفين جيهان اجت بس لمت ملابسها وركضت لاهلها .. خلي يعدي هل فصل على خير ويرجعون
سمعنه صوت هورن برة
استعجلتني عمة حتى نطلع
.. طلعنه وجان عمو جهاد منتظرنة بالسيارة وواكفين يمة قسور وعمو أسر يحجون وياه
صعدت السيارة واني احاول اتجاهل نظرات عيونة وهو مركزهن عليه .. رفع عمو ايدة سلم وطلع متوجيهن لبيت عمتي
.. بيوم الفصل
كلها صايرة اعصاب وبس يصيحون واحدهم ميحاجي ذبان وجهة ، وكل ساع وطبوا علينه للبيت
وصاحوا جيبوا جاي جيبوا مي
اني وعمتي وعمة أميرة وريناد وما ملحكين ..
نصبولهم جادر برة وحطوا كراسي ..
لان هواي ناس اجت وشيوخ حاضرة من غير العشيرتين
وجايبين سيد يشهد ع الفصل
..
كاعدين بالمطبخ واني كاعدة ع الدرج وايدي على خدي
وريناد كل شوي وطافرة للباب لو تباوع من الشباك ، اجت لعمتي
ريناد: دخليني اطلع بس اسمعهم شيحجون
صاحت بيها عمتي
سهير: اكعددي وانجبي وووين تطلعين الزلم تارسة الباب .. كون يطب واحد من الولد ويشوفج اله يطيحون حظج
ريناد: يعني واذا شكو بيها ؟
أميرة: ميصير حبيبتي الباب الرئيسي مفتوح على حيلة والولد طابة طالعة .. متشوفيهم خلوا بردة على باب المطبخ
سهير: غير كون تحجين وياها وتسمع وتكعد .. الا تترزل يلا ترتاح
اجت عليه واني صافنة ..
جرتني من ايدي وحجت بصوت ناصي
ريناد: دكومي خلي نصعد للسطح ونباوع عليهم
وخرت ايدها ورديت
لبوة: وخري مني ريناد مالي خلكج
ريناد: اهووو شبيج انتي متنحسة دكووومي
سهير: وووين تكووم ؟
خزرتها عمتي وهي خلت وكعدت بصفي
.. مرت ساعة ومحد فات من الولد حتى يكول النه شصار
......
طول الكعدة محد حجة من عدنه وجان شيخ عشيرتنه هو اليحجي .. واحتراما اله محد فتح حلكة حتى عمامي الكبار
صار بيها طرف ثالث وواحد طول الكعدة بس يهوبز ويصيح .. ما خله احترام لا النه ولا للشيوخ الكاعدة
رادوا بس يسكتونة
صار صياح واحد يجر طول والثاني يجر عرض
.. جماعتنة كلها فارت اعصابها كام وكف عمي أكرم وصاح
أكرم: من رخصة شيخنة ابو رعد .. احنه طول الكعدة ساكتين احتراما لشيخ عشيرتنة وهاي الوجوه الطيبة و الشيوخ الحاضرة .. انه الداسوا حرمة بيتي وانه ابو الآنه تسمحلي بهل كلمة ابو رعد ؟؟
اشرلة عود احجي ، كال
.. انه ما راح احجيلك بالدكة وزارة الداخلية ما قصرت جزاهم الله خير .. وكام يعددهم بالاسماء فلان وفلان وكمل كلامة
.. بس دوسة البيت عليها فصل جبير وغير ال500 مليون ما نقبل
صار حجي وردة فعل ع المبلغ .. احنه نفسنة جنة مصدومين من الطلبة .. واكف اني ليورة وكدامي كاعدين قسور وعمي أسر وعمي جهاد واحد بصف الثاني
شفته وصلت حدها وياه وفرك وجهة ، اعصابة صارت براسه .. كلهم
قسور: هذا الكواد تكعدونة لو اكوم ادفنة واسوي فرجة لخلك الله
كام عمي أسر وشاور عمي أكرم وكعدة ..
وكام واحد هو وعكالة يحجي معترض ع الفصل
ويريد يوكعولة
شاورني مصطفى : هذا شيخ ز*** لحيتة نص ردن
يوسف: جنه امنحوتب .. العكال راح يوكع وتعال هم سويها كعدة شكلك وكع عكالي بفصل البو رعب
مصطفى: هذا منين جايبينة ؟
يوسف: اندري بعد اخوك .. هي صارت بيد المزعطة
ما اظنة شيخ
كام وكف قسور وحمحم وحجة بصوت خشن جهوري يسمع الكاعدين .. وكال وهو يرفع ايدة يلفت الانتباه
قسور: من رخصة عمامي ..
صار هدوء و صوتة هو الواضح بالكعدة .. كمل
.. اول شي السلام عليكم .. انه قسور أيمن علوان
(البو رعب) للناس الما تعرفني كلامي موجه للأخ اللي صار ساعة يصيح وخابصنة .. هاي قلة تربية العكل كاعدين وحاطيلهم زعطوط ميعرف يحجي .. خلوا قيمة للناس المنكولة
كام يريد يحجي صاح بوجهة واشرلة بيده
.. اسسسسكتت خلني اكمل
كعدوا غصبا عنه ..
وكمل كلامة
.. بوية العشاير بخت مو ياهو الاجه ولبس عكال وكال انه شيخ ولا ياهو لمله مية نفر كال انه عشيرة اليحجي يحجي حظ وبخت .. وبعدين تعال شو انت بطول قندرتي وجاي تحجي وعمامك الكبار ساكتين مبينين ما راضين عليك .. ترة شيخ العشيرة رمز واكو شيوخ محترمة يعرفون الحك من الباطل
كام واحد من الحاضرين رجال معكل لحيتة مشيبة مبين عليه الوقار وكال
: عمي من رخصة الكاعدين .. انتم ناس اجاويد واهل كرم وخيركم سابق من ايام الشيخ علوان الف رحمة على روحة .. ابو رعب انت شتفصل احنه نلبس
قسور: الله يسلمك .. الدم بالدم والصواب بصواب ، لا فصل ولا بطيخ حكوك منريد فلوس ، الفلوس والنعال حشى السامع .. احنه اصحاب حك والحجي النه وابو الحك مدلل مو جايني ب25 تدافع على باطل اي كلام ما اسمع كولتن واحد ثنين ثلاثة وفضت
الجان الهم ايد بالدكة هسه بضيافتي .. اما عن دوسة البيت احنه متنازلين ع الفصل وما نريد تعويض مادي اهل خير والله كافينة .. بس بالمقابل حتى نكصر الشر
بيت ابو مرتضى يشيلون من المطنقة لو نتفكهم بطريقتنة وهاي خلي الكل يسمع غيررر هل حجي ما عندي
......
طبوا مصطفى ويوسف يتضاحكون كامن عليهم عماتي يسألون بيهم شصار ..
كعدوا بالصالة وحجة
يوسف: فضت يابة .. خلصت برفع دعوة قضائية على اهل الدكة وسحبوا من عدهم السلاح وقسور المتكفل بهل شغلة
سهير: يااا جا شفصلتوا ؟
يوسف: وكعنالهم الفصل
مصطفى: خرب هبل غير هذا العمدة ما انطه مجال لواحد يحجي .. الا ابوي جان راسة والف سيف لو تنطوني 500 مليون لو تنطوني فلوس .. جان هم حصلنالنه كم فلس نستفيد عاد
سهير: امدة الفلوس التجي من الطلايب .. لا عيني لا نريد فلوس ولا شي منهم احسن شي سويتوا من وكعتولهم الفصل
مصطفى: بس عجبني ابوي والله ولو اني ما احاجي الساقط
حجاها وهو يفرك بركبتة اثر الضربة ..
يوسف: تكبر وتنساها ابن العم
لبوة: ومرتضى حيطلع ؟
يوسف: لا يابة شيطلع هذا سالفتة عويصة حيل هو والوياه .. عاد قسور ما قصر هو المتكفل بهل شغلة خلي يخيسة بالحبس جم سنة
مصطفى: بعد بيتي مستلمهم اكس مربع
زفرت نفس بارتياح ..
الحمدلله من خلصنة وفضت على خير
دخلوا عمامي للديوان يحجون يمهم زلم .. خوال يوسف هم جانوا حاضرين وواحد جبير وياهم يصيحولة الحجي
ضلوا عدنه لليل وبقوا ع العشة ..
ما لحكنة نسوي شي جابوا الولد اكل من برة واحنه بس حطيناه بمواعين
بعد ما نكلوا الاكل وكعدوا ياكلون .. انطتني عمتي خاوليات كالت
سهير: روحي بعد عمتج اخذيهن علكيهن ع المغسلة البرة .. هسه يطلعون يغسلون ويحتاجوهن
اخذتهن منها وطلعت ليبرة .. الديوان صاير على جهة من الحمامات مال خطار
مشيت علكتهن وجاي ادير وجهي لكيت واحد واكف بعيد عني مسافة وبيدة تليفون بس صافن يباوعلي.....................................
❄❄❄❄❄❄
توقعاتكم?؟