( أبو رعب )
... القسم الثاني
بقلم نورس
........................
جيهان: ياا ولج متدرين
خليت ايدي على كَلبي ورديت بفزع .. : شكووو ؟
كالت
جيهان: اجه عمج بليل كال دخلوها للعمليات وسقطت ابنها وهسه بالانعاش الدكتور كلهم لو تصبح لو لا
......
حاسبت واخذت الجاي ورحت الهم
التليفون بجيبي ما بطل اتصال ..
وصلت الهم
جانوا واكفين يسولفون وقسور جكارتة بحلكة ويحجي وي صديقة .. انطيتهم الجاي
قسور: اي يابة بوكته
وانطيت كلاص للضابط اللي واكف بصفة .. كال
.. تليفونك يدك
يوسف: ادري حركوني
مد ايدة بجيب البنطرون طلعة ومدلياه .. خطف نظرة ع الاسم رجع جرة وكال
قسور: انه راح ارد .. هذا من البيت
مشة بسرعة بدون حتى لا يكول منو المتصل
.. مشيت طبيت للمستشفى وبيدي كلاصين ، وصلت كبال الغرفة وعيني اجت عليه
كاعد بالكاع مدنك وحاط راسة بين رجليه .. كعدت بصفة
يوسف: كوم خوية .. اخذ اشربلك كلاص جاي عدل راسك من البارحة وانت على هذا حالك
رفع راسة عيونة حمر و رد
مصطفى: ماريد شي ..
يوسف: دخذ من ايدي يمعود .. ترة العيون عليك حماها وعمها واكفين وحتى قسور انتبهلك
مصطفى: وشسويلهم يعني ؟ مو كافي ابنهم الكواد مسكطها ودزاها النه .. شيردون يحجون خل يحجون
يوسف: مو هيج راح تأذيها هي ويكومون يطلعون حجي
كام وكف على حيلة وكال
مصطفى: اخر همي
كمت وكفت وتنهدت واني اباوعله .. اعرف مصطفى ما راح يسكت
يوسف: شتريد تسوي ؟
باوعلي وكال
مصطفى: خلي الزم ذاك السكط وتعرف شراح اسوي .. اذا ما خليت دمة بطولة فلا اتسمة مصطفى
يوسف: انتظر خلي نشوف عمامك وقسور شراح يسوون .. لتتصرف من راسك ونكون بوحدة نصير بثنين .. ترة مرتضى هم مشراني وما يسكت
مصطفى: على روحة هل دثو كدرتة بس ع النسوان بيه خير خلي يطلع روحة ويجي يوكف كبال واحد بينة
يوسف: شيطلع روحة .. تلكه اهله هسه مخبوصين وحايرين وين يضموه ، متشوف اخوه وابوه لازمين المستشفى يدرون بأبنهم ما راح يطلع منها سالم
مصطفى: وهو هذا الراح يصير .. لان كافي بعد وصلت حدها
جاي نحجي واجه قسور ملامح الغضب معتلية وجهة وبيدة التليفون انطانياه وصاح بمصطفى
قسور: امك اخابرهة ليش ما جاي ترررد ؟
مصطفى: شكو شبيها
قسور: رايحة مخابرة لبوة وذابتلها الاول والتالي وهذيج متخبلة خابرت تصارخ تريد تجي
فرك وجهة بحيرة وكال
مصطفى: هاي تلكة ابوي كايل الها
قسور: عود انه وصيت وكلت لحد يحجي شي بالبيت
يوسف: وهسه شنو .. راح تروح الهم ؟
قسور: لا .. عمي أسر هناك خابرتة وراح هو يجيبهم ويجي
صارت بال10 كلها التمت كبال المستشفى ..
اجه رجل عمتي وعمامي أكرم وأشرف ، وقسور موصي محد من النسوان توصل للمستشفى .. حتى امها ما خلوها تجي
خابرتني عمتي ..
طلعت برة ورديت عليها .. وكامت تسألني على حور
يوسف: طلعوها من الانعاش قبل شوي عمليتها زينة .. بس ما مخلي عظمة بيها صاحية البنية متكسرة وحتى ايدها ما تكدر تحركها
سهير: حسبي الله ونعم الوكيل عليه حيوان هذا مو بشررر
يوسف: حشاه للحيوان .. هم ما يسوي سوايته
سهير: وشكال الكم الدكتور
يوسف: يكول للآن وضعها مستقر بس الطفل نبضة ضعيف
سهير: ياا جا شلون تكول جيهان سقطت
يوسف: اويلي عليها جيهان كاتتهن كلهن ما مخلية واحد ما كايلتله .. عمليتها اصلا مو ذيج الخطورة بس من الضرب الماكلته والنزيف ما متلاحكين ونازل واحد من التوم والثاني نبضة ضعيف
سهير: يا صلاوات تووم !
يوسف: عمة يا صلاوات .. اكلج واحد منهم مات
وتعاي شوفيها البنية حالها يصعب ع الكافر وابنها الثاني هم مهدد بالاسقاط
سهير: دخيلك ربي .. شنو المصايب تمطر عليها هل بنية سودة عليه ولا ارتاحت الها يوم من وكت ما تزوجت ولهسه
يوسف: شنسوي بعد حظها الوكعها بيد واحد ما خاف الله بيها
سهير: ما لكيتوا ؟ كالت جيهان بابهم مليان زلم ولهسه ماكو خبر عليه
يوسف: ليش هو لو لاكينة جان خلوا عايش لهسه ؟ والله يسحلونه ويعلسوا ومحد يدري بيه .. الهنا كلهم متحلفيلة وعلى اعصابهم بس منتظرين تكوم حور بخير وسلامة ويتصرفون وياهم
سهير: هم احد من اهله وياكم ؟
يوسف: اجوا من البارحة ابوه واخوه وراحوا بليل وقبل شوي هم اجوا وذولاك هم واكفين
سهير: وعليمن جايين فوك صخام وجهم ومصيبة ابنهم
يوسف: والله عمة واحد يحجيها لله .. الرجال مبين ما راضي على ابنه يمشي ومدنك راسة
سهير: بعديش يعمة .. جا وين جانوا من لزم البنية وكسرها شكالت الهم روحهم .. وهسه هو فوك كتل مرتة كتله واحد من جهاله هيج واحد الزمة واحركة بتيزاب وحتى الموت قليل بحقة
حجيت اشاقيها
يوسف: ولج سهوة شو صايرة عدوانية وتحجين بالكتل والحرك .. شغيرج
ذبت حسرة و وردت
سهير: والله محروك كَلبي عليها من كلي جهاد ولهسه كوة عليه واكفة على رجلية .. هم يخلون احد يفوت عليها اريد اجي اشوفها
يوسف: هو حتى لو يصير قسور ما راح يخليج .. مشدد ع الكل محد يجيب وياه مرة
سهير: يبوو على قسور وضيمة .. ديلا بعد عمتك لتنساني شيصير عود خابرني
سديته منها .. ورجعت دخلت للمستشفى لكيت مصطفى يتصايح وي وائل وابوه .. صرت كبالة اريدة يسكت
مصطفى: وين تظمه يعني ؟ اطلعه لووو من جووة الكاع والله ومرررتضى موتة على ايدي .. اني كتاااله
دفعته واحجي وياه
يوسف: كااافي عاد الناس منا
اجه قسور وعمامي والناس تباوع صارت هوسة
ابو مرتضى: ابني والله حقكم شما تسوون وتحجون ادري بيكم كَلوبكم محروكة على بنيتكم .. وهذا ال**** لو الزمة اني اطيح احظة
قسور: خلي يووولن حجي .. يعني شنو تريد تقنعني راح تنطي بابنك لخاطرنه ؟ انه اكول لو تمشي منا وتخلي وجوهنه تتلاكة وكت الكعدة احسن ما اتصرف غير تصرف
وائل: شو انتوا تهددون ؟ شنو لحمكم غالي واحنه رخيص .. الصار محد محسبلة واحنه اصلا ما راضيلة بس مصختوها كل ساع واحد جاي يصيح ويهوبز علينه
بعدة ما مكمل حجايتة وصار مصطفى فوكاه تلازم وياه .. انكلبت المستشفى وصوت قسور رج المكان رج ، كوة جرينه مصطفى من الولد وجروا طلعوه برة
اندفع عليه واعصابة كابة ..
لزمة من ياخته ويحجي وياه بتحذير
قسور: تاخذ ابوك وتتوكل منا لا اشوفكم وجهي الثاني .. تريد تعتبرة تهديد ؟ اي اهدد واكسر راسك وراس عشيرتك واحد واحد .. خاف ذيج المرة خلصت على حبس اخوك هل مرة اشيلكم انت واهل بيتك كلهم واشمركم بالحبس اخليكم تخيسون نسوان وزلم وحق حور اطلعة من عيونكم والسماني أبووو رعب
دفعة وجرهم ابو ريتاج حجه وياهم وابو مرتضى اخذ ابنه وراح وعيونهم هي الجانت تحجي .. كامت ادارة المستشفى تحجي ع الهوسة الصارت ومن وصلوا لقسور كلب المستشفى عليهم لان كلولة اطلع لوما صديقة طلعلهم الباج مالته وسكتهم
للظهر تقريبا بال1 اجاني ابو ريتاج ..
خله سويج السيارة بيدي وكال
جهاد: اخذ عمي السيارة وبوجهك لبيت عمتك سهير تجيبها لهنا .. ووصيها خلي تجيب ملابس من البنات لبنت عمك
يوسف: كعدت ؟
جهاد: اي هسه طلع الدكتور وكال النه
يوسف: وقسور خاف يضل يحجي
جهاد: معليك بيه كتله .. البنية كعدت تريد واحد يعينها يوكلها لكمة خوما تضل لوحدها واحنه بس زلم
درت وجهي اريد امشي رجع صاح عليه .. وووينك
درتله وكمل كلامة .. خابرها خلي تحضر شوربة اي شي خلي تجيب وياها
يوسف: وصل ..
اخذت السيارة وطلعت لبيت عمتي ..
وصلت هناك لكيتها متحضرة بس واكفة تحضر بالاكل
.. استعجلتها كالت
سهير: ولك عمة صبرك عليه .. غير اكمل الاكل
يوسف: هم يلا اخذج وارجع للبيت ارتاحلي كم ساعة .. تعبان الليل كله ما نايم
سهير: دتعال اكعد احطلك لكمة اكل بين ما اخلص
يوسف: اووو يعني سالفتج مطولة
حطتلي غدة كعدت اكلت ..
ومن كمت اغسل واكف ع المغسلة اجتني ريناد
ريناد: شلون صارت حور
يوسف: زينة
ريناد: هو شنو زينة ؟ تضحكون علينه .. غير عملية وامه عربية
يوسف: ترديني اجذب عليج ؟ .. يلا يابة مو زينة
ريناد: لا صدك شلونها
يوسف: لا حول ولا قوة الا بالله .. والله زينة وكعدت مو جاي تشوفيني راح اخذ عمتي واروح الهم
ريناد: لبوة خابرت امي وتبجي .. وماما حجت الها كلشي
يوسف: هي بعد تنضم ؟ جيهان سبقتها اصلا وكالت الها
.. بس وينج اذا اجوا وسألتج كليلها ما بيها شي وراح يطلعوها هاي مخبلة ترة يروح يصير بيها شي
اخذت عمتي ورجعت للمستشفى ..
وصلنة هناك جانت كلها رايحة وباقي بس قسور ومصطفى .. سلمت عليهم وكالت
سهير: لعد جهاد وين ؟
قسور: كال عندي شغل شوي ويجي
باوعت على مصطفى وواكف بصفة احجي وياه
.. حجت وياه عمتي
سهير: ولك عمة وجهك مبلوع .. ارجع للبيت اكل وارتاح ناملك ساعة ميصير هيج
مصطفى: خلوني بس كاعد ما رايد شي
يوسف: ميفيد وياه من الصبح واني احجي لحد ما مليت وهو قافل
قسور: شنوو بكيفة ..
صار كبالة وصاح بيه .. كوووم لك ترة وجودك مثل عدمة ارجع للبيت وعود العصر تعال .. وشوفلي بدربك بيت هذا الكواد شبيه وخابرني
هو جنه ما صدك من جاب طاري مرتضى .. كام وكف بهمة رجع لزمة ودارة عليه
.. اسممع ما اريد مشاكل وطلايب .. خلي تطلع حور من المستشفى وبعدين نتصرف وياهم
ابتسم طرف شفته وكله
مصطفى: مو تدلل ..
وعافنة ومشة اشرلي
قسور: يوسف روح وراه ولتعوفة ابد .. مالي خلكة هسه اضل اروكض وراه
......
فتت عليها تون بصوت ناصي ومغمضة عيونها
.. كعدت يمها ودموعي نزلت من شفت حالها
وجهة مورم من كل صفحة وما معروف لا هو ازرك ولا احمر من الضرب ..
سهير: كسر بيدة كون ..
خليت ايدي على راسها واحجي وياها .. ولج عمة
.. حوور
ما افتهم منها شي بس تون ..
فات قسور شافني كام يحجي
قسور: هي مال دك ولطم ؟ رحمة لاهلج البينة مكفينة .. كوميها خليها تغسل وتاكل
اجت وياي سستر عاونتني وكومناها للحمام .. طبيت اني وياها غسلت الها وبدلت ملابسها وشبعت بجي عليها .. من يا صفحة الزمها تصيح وبس دموعها تصب
رجعت اخذتها ع السدية وخليت مخدة وره ظهرها وكعدتها .. طلعت شوربة من الحافضة اللي جبتها وكعدت اوكل بيها
اكلت شوية وكالت بعد ماريد ، اشرت ع المي شربتها ورجعت مددت وصافنة ع السكف وعيونها مغوركة
كمت لملمت الغراض ..
طلعت جان واكف ع الباب اول ما شافني اجه عليه بسرعة ويسأل
.. ها شلون صارت ؟
سهير: شلونها يعمة على حالها
قسور: اكلت ؟
سهير: كوة لكمتين خليت بحلكها .. خاوية فد مرة ضالة جلد وعظم
هز راسة و رد
قسور: ترجع ان شاءالله لحيلها هي شدتها بس اول ايام
سهير: هم سألت شوكت نطلعها
قسور: هي لو تضل بس عليها جان اول ما كعدت طلعناها للبيت ندير بالنه عليها هناك احسن من دوخة المستشفى .. بس لان حامل وضع الطفل حرج ينراد نبيتها جم يوم هنا
سهير: هي تدري بيهم توم ؟
قسور: لا ما اظن .. وخليها لتدري احسن ولحد يجيبلها طاري اصلا حتى لو تسأل
سهير: وين الله ويثبت حملها ويفرح كَلبها بهل جاهل
ضليت وياها للعصر ..
خلصتها نوم .. تكعد شوي تبجي بدون صوت وترجع تنام .. نحجي وياها مترد ، اجه ابوها يبوس بيها من ايدها ومن راسها رادها بس تنطق
.. ميسون تدري ؟
دارلي
أشرف: اي من البارحة .. بس ما خليتها تجي تخلصها تنوح فوك راسها وهاي رايحة روحها
سهير: احسن .. خلي حور تكوم بسلامة على حيلها وجيبها تشوفها
أشرف: اي وهو هيج
كاعدة اخابر بريتاج وانفتح باب الغرفة وفاتت لبوة .. كمت وكفت من شفتها
سهير: ولج هاي شجابج
ركضت على اختها ملهوفة ودموعها مغركة وجهة وتحجي وياها وتبجي
لبوة: الله لا يوفقة .. كسررر بيدة ان شاءالله .. الله يطلع حوبتج بيه بجاه كلمن عنده جاه
فتحت عيونها وهذيج الثانية من شافتها كلبنها مناحة وثنيهن يبجن .. مشيت عليها واسكت بيها وكَلبي معصور عليهن من جوة
سهير: كولي يا الله يا عمة .. نوب انتي تزيدين عليها همها هاي بدال ما تصبريها .. كومي امسحي دموعج
لبوة: شوفي الحيوان شمسوي بيها .. انطيناه مجال مرة ومرتين صارت ايدة والضرب .. كتلكم لترجعووها ميستاهلها لحد ما وكع الفاس بالراس .. خطيتها بركبتكم انتوا
ءأشرلها بعيوني .. اعظ بشفتي اريدها تسكت و ماكو فايدة .. لبوة وانهدت وجيب اللي يسكتها بعد
خليتها كاعدة يم اختها بعد ما شفتهن سكتن .. طلعت لكيت أسر جاي سلمت عليه وقسور واكف يحجي وياه بلوم
قسور: المن جبتها ؟
أسر: ولك اكلت راسي ما انطتني مجال افك حلكي
قسور: جان عفتها واجيت
أسر: لا خطية انت ما شفت حالها شلون فرفحت من كتلهم رايح للمستشفى
ضاج وكام ينافخ ويروح ويجي
سهير: هسه انت شيمك يا عمة .. خليها هنا احسن هسه يلا ردت العافية لوجه حور من شافت اختها
قسور: متشووفين طركاعة الله المستشفى مليانة ** زلمم .. وين اخليها بنصهممم ؟؟
سهير: يااا على حجيك هذا بعد محد يجيبله مرة للمستشفى خلي العالم نسوانها تموت ببيوتها
قسور: يمعودة متشوفيها كلها دكاترة طابة طالعة .. غير اخاف عليها
سهير: انهجم بيتك .. شو اني من اجيت هنا محد حجة شنو مو مرة لو شفتوني كبرت ؟ .. ترة هم اني رجلي يغار عليه وما يقبل اضل بنص الزلم
باوعت لأسر ضحك ودار وجهة
.. شفته ابتسم وكال
قسور: انه وين وانتي وين
سهير: ها ولك جن الحجي ما عجبك .. لو هو بس ع اللي يلوحك
قسور: والله لو تبقى عليه حتى انتي ما اخليج تجين .. بس الظروف تحكم شنسوي
سهير: سولفها ع الدبه بعد عمتك .. بينت نيتك ذيج هي
قسور: هاي شلون طلابة اليووم .. اولي برة اشرفلي
سهير: تعال ولك احجي وياك
عافني وطلع اشرلي أسر
أسر: شو انتوا تحجون بالالغاز .. شكو ؟
سهير: بعدين احجيلك .. اله تعال كلي هاي شصاير شو راجع شباب
أسر: اهووو بدت رحمة الله .. سهير احجي من الاخير وين تردين توصلين
سهير: بعد روحي والله بس انت تفتهمني .. دباوع شوف هاي الدكتورات مطشرة هنا بلكي توكعلك عينك على وحدة حتى نتوكل
باوعلي بطرف عينه
أسر: عبالي عندج سالفة بيها حظ .. اروح الحك ابن اخوي
عافني ومشة ورة قسور
.. هم مو صوجهم
ضليت يمهن لليل واجه جهاد .. ولازم وحدة تضل بالمستشفى تبات وي حور
لبوة: روحي عمة اني راح ابقة هنا
هي حجت هيج وقسور كمز
قسور: وين تبقييين ؟؟ تررحين وياهم متضلين هنا
لبوة: عمة خطية تعبت من الظهر هي هنا خلي تروح ترتاح
قسور: وانتي هم روحي وياها
لبوة: لا بله ؟ ومنو راح يضل وي حور ؟؟
قسور: انه موجود
لبوة: يعني شنو حتنام وياها بنفس الغرفة
كام يخزر بيها ..
جريتها بسرعة وراي وءأشرلها تسكت
واحجي وياه ادري بيه طلعته عن طورة
سهير: عمة دخيل بختك شو انت هم مسويها فد مرة .. اني لو بيه حيل جان ضليت ما عندي شي بس رجلية تكسرت وما اعرف انام بغير مكاني .. خلي لبوة الليلة تنام يم اختها ، البنية اصلا تستحي خليها عاد اختها تمون عليها تكومها تغسللها
قسور: وما لكيتوا غير لبوة ؟؟ خلي امها تجي
أسر: يابة دنيا نص الليل منين نجيبلك امها هسه
لبوة: وبعدين شبيها لبوة معاجبتك ؟
قسور: لبوة اكلبي وجهج لا ابتلي بيج هنا كدام خلك الله
أسر: شو انت كدرتك على هاي الفقيرة
باوعله يتصنع الصدمة وأشر على لبوة
قسور: هاي فقيرة !
لبوة: لااا عاد ترة مصختها واني لحد الان ساكته ومحجيت شي
كاموا واحد يرفع والثاني يكبس بنص المستشفى
صاح بيهم أسر وسكتهم
أسر: معليج بيه عمو ابقي نامي يم اختج .. والباجر اخلي وحدة من البنات تجي بدالج حتى ترجعين ترتاحين وتتناوبون عليها
قسور: هذا اللعبان نفس انه ماحبه
ودار وجهة ومشة وهو يدردم ما عاجبة
.. باوعلي واشر عليه
أسر: هذا شبيه ؟
سهير: عوفة يمعود .. محروك كَلبه على رزقة
دك تليفون أسر وراح وكف على جهة يخابر
درت على لبوة ..
تقربت منها وحجيت بصوت ناصي
.. وانتي مدام .. اعصابج صايرة بارود شنو نعديتي من ابن عمج
لبوة: عمة نرفزني .. كلشي حجة وكال لبوة ولبووة ما عندة غير سالفة .. ليكول متسجلة بأسمه ويريد يمشيني على مرامة
سهير: شبيج ولج غير يخاف عليج بعدج صغيرة
لبوة: اي صحيح .. ركعيلة لابن اخوج متقبلين عليه
ضحكت وكتلها
سهير: ولجج يغار
دارت وجهة وكالت
لبوة: اي يغار .. حقج متدرين بشي .. هذا ابن اخوج محد يعرفة بكدي اني ، واحد متعجرف ويحب يفرض رأيه ع الكل ويريد يمشي كلمته براسي
سهير: انهجم بيت راسج .. هو انتوا ضالين واحد ينفخ ع الثاني دضلوا ناركم تاكل حطبكم عليمن مدوخة راسي .. اني طفيت راح اروح لبيتي اسبح وانام وانتي ضلي هنا حركان اعصاب انتي وابن عمج
اجاني أسر .. كال
أسر: يلا بعد اخوج .. جهاد خابر منتظرج بالسيارة
سهير: يلا عيني جاية
......
ضلينة بالمستشفى بس اني وقسور وي حور
ضليت كاعدة بالغرفة يمها وما طلعت ابد .. وهو هم بعد ما شفته
كعدت يم راسها اوخر خصلات شعرها المتناثرة على وجهة .. فتحت عيونها وشافتني
لبوة: شلون صرتي حبيبتي
ما حجت شي واكتفت بالايماء براسها .. سألتها
.. جوعانة تردين اجيبلج شي ؟
هزت راسها بالرفض وردت بصوت واهن ومبحوح
حور: لا ..
حسيت عليها كامت تتنفس سريع وتريد تحجي شي
.. لزمت ايدها باردة ثلج
لبوة: بحلكج حجي .. كولي اسمعج
همست
حور: ابني .. لبوة ابني شصار بيه
حجتها ودموعها نزلت رأسن ..
رديت بسرعة
لبوة: زين والله زين وما بيه شي .. اكو دكتورة نسائية هنا تداوم اكثر من مرة حجينه وياها وجيكت وضعة كالت تحتاج راحة حتى يثبت حملها
باوعتلي وبعيونها نظرة بصيص من الامل .. تريد تتأكد
حور: مدا تجذبين عليه مو ؟ ابني عايش
لبوة: والله وداعت غلاوتج عندي ما مجذبة عليج بكلمة
الطفل ما بيه شي بس انتي يحتاجلج راحة ولازم تاكلين زين حتى ترجعين تكومين على حيلج
خلت ايدها على بطنها وذبت حسرة طويلة وكالت
حور: شفت الموت بعيني والله .. كلت بعد ذيج الضربة مستحيل يبقى بيه نفس
لبوة: احجيلي شصار ليش مد ايدة عليج
حور: اااااااخ لبوة شحجيلج وحدة ثنين .. كله من ذيج المسمومة مريم
هي راس البلة كله وهو مثل العربانة بيد امه واخته منين ميجيبنة يندفع....
حجتلي كلشي صار .. وي كل كلمة تذبلها حسرة شكبرها
ودموعها ما سكتت ، كمت افور عليها بس ما ردت ابين الها .. ما بيدي غير اسكت واصبر عليها
خليتها تنام وكمت طلعت من الغرفة .. اختنكت
.. ريحة المستشفى والديتول كلها لعبت نفسي منها
شافني قسور جان واكف برة الغرفة اجه عليه
قسور: ليش طلعتي
سكت شوي وركز بعيوني .. كال
.. ليش البجي نوب
لبوة: اختي رجلها اعتدى عليها وعنفها وجان سبب بأنو يخليها تسقط واحد من اطفالها .. بهل حالة برأيك اني شسوي ؟ بيدي شي واكدر اسوي ؟؟ دا اشوفكم انتوا ترحون وتجون ساكتين ومكملين عادي ولا جن اختي طالعة من حلك الموت
قسور: ومنو كلج احنه ساكتين ؟؟
لبوة: محد كلي .. دا اشوف بعيني
قسور: لج بابا انتي تدرين اني صارلي يومين النوم ما لايح عيوني ؟ تليفوناتي ما وكعت من ايدي كل ساع اخابرلي واحد من المركز حتى عسى ولعل يجيبولي خبر عن مرتضى .. شسووي اروح احرك بيتهم ؟؟ هم كاعد مربط ما بيدي شي ..
لبوة: يستاهلون الحرك .. كل واحد بهذاك البيت اله ايد بأذية حور مو بس الجلب مرتضى .. اختي انطعنت بشرفها وبدم بارد وصلت بيهم يشككون بيها عدها علاقة بحماها
فتح عيونة مصدوم وتقرب عليه وكال
قسور: منو كلج هل حجي ؟؟
لبوة: حور
قسور: انتي متأكدددة
لبوة: شبيك قابل دا الفق حجي من عندي هي بلسانها كلتلي حماتها صار فترة تحوم فوك راسها وتسمعها حجي وكايلة لرجلها مرتك ذابة روحها على وائل والشفيه مصدكها
قسور: اشششش صووتج العالم منا .. طبي انتي جوة ولتطلعين من الغرفة .. انه طالع شوي وارجع
لبوة: وين رايح
ما رد عليه وطلع مستعجل وهو يخابر مدري منو بالتليفون ..
اليوم الثاني فزيت على صوت السستر .. كمت ركبتي متشنجة ومأذيتني حيل
باوعت على حور بعدها نايمة
باوعت للتليفون .. جانت الساعة ب8 الصبح
رحت للحمامات غسلت ورجعت لكيت مصطفى واكف
.. هاي شجابك
اجه عليه وسألني
مصطفى: شلون صارت ؟
تنهدت وكتله
لبوة: الحمدلله شوية احسن
باوعت للمكان وسألته .. شو قسور ماكو ؟
مصطفى: عنده شغل .. اجيت اني بمكانه
حجاها وراح كعد على كرسي .. حسيته يعرف شي ثاني بس ميريد يحجي ، ما لحيت عليه
طول ما هو موجود ما فات على حور ابد .. دك تليفوني طلعتله
لبوة: ليش مفتت للغرفة ؟
غير الموضوع وكال وهو يمدلي بأيدة علاكة صغيرة
مصطفى: دورت مطاعم هنا ما لكيت .. دبري روحج بهذن لبين ما نرجع للبيت
لبوة: للبيت ؟ ما ارجع
مصطفى: مو بكيفج هسه بس يجوون ابوج ومرتة اخذج ونروح
لبوة: اهووو وشكو جايين
مصطفى: غير بنتهم ! راح يجيبلوها وياهم اكل .. بقيتي بس انتي راح اخذج لبيت عمتي
لبوة: جدة بعدها هناك ؟
هز راسة بدون ليرد ورجع وكف على جهة ..
مرت ساعة تقريبا لبين ما انفتح باب الغرفة ودخلوا ابوي وميسون .. ركضت على حور تبوس بيها وتبجي
صار كبالي وحسيته متردد .. كال
أشرف: شلونج بابا
ضليت ساكته للحظات واني اباوعله .. نظراته تتنقل بيني وبين ميسون اللي عيونها تريد تاكلني
مشيت سلمت على حور وكتلها
لبوة: راح اروح .. ارجعلج بليل ابات وياج
هو اني حجيت هيج وهاي نطت
ميسون: وووين تباتين ؟؟ اني اضل انام وي بنتي لتعبين نفسج ما محتاجيج
زمخ بيها سكتها
أشرف: صووتج كافي العالم منا
عفتهم ومشيت .. طلعنه اني ومصطفى صعدنه بالسيارة وحرك رايحين لبيت عمتي
حس عليه ضايجة كال
مصطفى: شبيج ؟ شو من وكت ما اجوا وجهج مكلوب
لبوة: تدري شيكولي ؟؟
باوعلي مستغرب وكملت
.. ( شلونج بابا ) هه لا والحلو شنو .. يحجيها ويباوع لمرتة اخاف مترضالة
مصطفى: هسه انتي جديدة عليهم ؟ هاي هي انسي بعد لتضلين تضوجين وتحركين بروحج على اقل كلمة
بعد مرور 4 ايام كتبوا خروج لحور وطلعناها من المستشفى .. رادوا ياخذوها لبيت بابا بس جدتي اعترضت كالت هناك تدوخ من طلايب نسوانه وهي مرة صاحبة عملية
ومن هذا كاموا وجابوها لبيت عمو أكرم حتى اني ادير بالي عليها .. لان من يوم المشكلة ما رجعنه بعد للعمارة
وجدتي ضلت ببيت عمتي ، هم ينراد الها واحد يداريها
عمامي رادوا يسوون كعدة بس قسور ما قبل كلهم الا مرتضى يحضر يلا ..
ومرتضى من يوم المشكلة محد شافة
مر كم يوم ..
عمتي سهير وميسون يترددون علينه .. ومرتين اجتنه عمة أميرة تشوف حور ..
لحد ما بيوم
جنت كاعدة يم حور بالغرفة نسولف وسمعت صوت مصطفى وامة تحجي وياه
حور: هاي شكو ؟
لبوة: ما ادري .. هسه اكوم اشوف
كمت بسرعة طلعت وراهم لكيتها لازمتة بالطارمة وتكله
جيهان: غير تكليي وين رايح ؟ ليش تخلي كَلبي معلك بهل ليل
مصطفى: مو كتلج طلعتلي شغله .. خليني ارووح ولتعرضيلي
جيهان: شغلتييش هاي بنص الليل .. كللي وين راايح والله كَلبي لاعب من طلعتك هاي
كام يستغفر ويفرك بوجهة شافني واكفة .. صاح عليه
مصطفى: يابة تعاي اخذيها جووة خليني اووولي
مشيت واني هم جنت ما مرتاحة من شفت حالته شلون مستعجل .. كتله
لبوة: دكول وين رايح والله ومحمد وياك .. ليش تخلينه بقلق دنيا نص الليل هي هاي هم طلعه
مصطفى: نووب انتي عليه ؟ هاي عود اني اكلج سكتيها
جيهان: ولك يممة احجيي لتووجر كَلبي
صاح بنفاذ صبر
مصطفى: لقسووور رايح لقسوور يريدني .. هسه ارتاحيتي ؟
صفنت شوي وكتله
لبوة: بس قسور بالعمارة
مصطفى: ادري .. وهو اني رايحلة
لطمت على خدها وصاحت
جيهان: يمممة وشيوديك للعمارة بهل ليل .. مخبل عااقل شو دكعد واسكت اني هسه اخابر ابوك واخلي هو يشوفلي حل وياك
مصطفى: شتردين تسوين سوي اني رايح
حجاها وراح بسرعة
وعاف امه متخبلة وراه .. كوة جريتها ودخلتها للبيت
لبوة: دكولي يا الله مو كلج رايح لقسور بعد شكو
كامت تضرب على فخذها وتحجي
جيهان: اني هل ولد الا يجلطني ويموتني يلا يرتاح
عفتها ومشيت لحور اللي تسأل شصاير .. وحجيتلها اللي صار كالت
حور: شيريد منه قسور ؟ لا ونوب للعمارة
لبوة: والله ما اعرف اني هم ضل بالي
......
الساعة 3 ونص الفجر .. طبكت السيارة كبال البيت
ونزلت بسرعة الباب جان مفتوح
طبيت صار بوجهي .. صحت
مصطفى: ووووينة ؟؟
يوسف: انت الثاني لتخليني اتندم لان كتلك .. هذاك هو مربط جوة بس بالهداوة وياه ترة ما ضال على حاله حال مكسر من فوك ليجوة
وهو يحجي مشيت وطبيت للبيت ..
لكيته بغرفة واكع متمدد بالكاع ايدة ورجلي مربطة بحبل وبس صوته وهو يون مسموع
اباوع على حاله شلون مزورك وآثار الضرب واضحة على جسمة .. مشيت وكفت يمة ودرت راسة برجلية
مصطفى: كوووووم
فتح عيونة بصعوبة وشافني ضل ساكت ويباوعلي .. دنكت عليه ولزمتة من شعرة وحجيت
.. لكيتك يكواد
......
واكف بباب الغرفة ايدي بجيوب بنطروني واباوعلهم
.. دماه تدمي وكل ما يتعب يكعد شوية ويرجع عليه
كام جر الحزام من بطرونة ولفة على ايدة وصاح بيه
مصطفى: كتلتها بالحزززام ؟؟ هي هاي كدررتك ؟ خلي اشوفك كتلة الحزام شلون تأذي
درت وجهي .. كل ضربة يضربها اله يصيح بوجع من كل كَلبة ، مشيت عليه
يوسف: كااافي مصطفى فطس بيددك
مصطفى: لكك عووفني كَلبي ما شفى منه
دفع ايدي ورجع ضربة .. احجي وياه ميفيد
لحد ما اجانه صوته من ورة
قسور: بسسسسك عووفة
مشة عليه جرة من ملابسة ودفعة ليورة وصاح بيه
.. انه وياااامن احجييي
مصطفى: والله الا اطلع برووووحة .. لك عووووفني
اشرلي قسور .. اخذتة وطلعت برة كعدتة على جهة من البيت وشمرتله بطل مي
يوسف: اخذ غسل
اخذة فتحة وذبه كله على وجهة ويتنفس سريع ..
.. ها ؟ هسه ارتاحيت
باوعلي وكال
مصطفى: والله لو اطلع روحة بيدي هم ما يفوخ كَلبي منه ..
يوسف: هو انت بقيت بيه روح .. اذا يضل على هذا حاله منا لباجر ما يصبح
كمت طبيت جوة لكيته كاعد يدخن جكاير ومرجع راسة ليورة .. كتله
.. شلون هذا يبقة هيج ؟ لو ناخذة مستشفى
قسور: اخذة لجهنم
يوسف: يابة الولد راح يموت
قسور: خلي وابو زايد
درت وجهي بعد ما يأست منه .. واباوع لمرتضى ميحرك لا ايد ولا رجل .. كتله
يوسف: وشراح تسوي هسه ؟ هاي صار فوك الاسبوع وانت ساكت
قسور: تاخذونة تشمروا كبال بيت اهله
يوسف: وشلون لو وكفتنه سيطرة ع الطريق
قسور: تكلهم مسوي حادث وناقلينه لبغداد وانه راح اخابر مؤيد يجي وياكم وهو يتصرف بالباج مالته بسرعة يمشووكم
......
كعدت الصبح ..
البيت نظيف بس لملمته منا ومنا
عمة جيهان اخذها عمو من الصبح وراحت للسوك
.. كمت سبحت حور وغيرت الها البلاستر مال عملية وكعدتها ترتاح
لبوة: شسويلج اكل ؟ مشتهية شي
حور: هو انتوا شتاكلون اكل وياكم
لبوة: ميصير غير مرة صاحبة عملية
حور: والله موتيني كلما حجيتي وكلتي مرة صاحبة عملية .. ادري شنو اول وحدة تسوي عملية
لبوة: لا والله نووب فوكاها .. دضلي طبج طوب
كامت تضحك وكالت
حور: تدرين انتي ضعفانة
باوعت لنفسي ورديت
لبوة: من الخير خية
حور: شكو صاير شي مضوجج
تنهدت وكمت منها
لبوة: ماكو شي
طلعت من الغرفة انفتح الباب وفاتت جيهان للمطبخ خلت العلاليك بالكاع تلهث وحجت بسرعة
جيهان: هم سمعتي شي من بيت ابو مرتضى
استغربت من سؤالها ورديت
لبوة: لا .. ليش شصاير عدهم
جيهان: ما ادري شو هسه لاكتني جيرانة بالباب كالت ابنهم شامرينة مدمة ببابهم
لبوة: مرتضى ؟!
جيهان: جنت انزل بالمسواك ما افتهمت منها .. هسه خلي يجي عمج راح يشوفهم
وي حجايتها فات عمو أكرم للبيت .. ركضنه ثنينة عليه بفضول .. كال
أكرم: هذا مرتضى يكولون مخطوف واليوم ذابينة باب بيتهم مكسرينة تكسر .. نقلوا هسه للمستشفى
جيهان: حييييل بعد ايدي .. هاي حوبة البنية حور ما تتعداه
ضليت ساكته ودرت الها
لبوة: عفية عمة لتحجين شي كدام حور
بعدني ما مكملة حجايتي وفاتت جوة وهي تحجي
جيهان: وليش خليها تدري .. بلكي يفوخ كَلبها من رجلها شوية
اركض وراها اريدها تسكت ..
فاتت للغرفة وكالت الها
.. كرة عينج عمة حور .. حوبتج طلعت بمرتضى لازمينة ناس مطيحين حظة وهسه بالمستشفى ضال بس النفس
ضربت كصتي
لبوة: عود هاي اني وصيتج
فزت من مكانها بتوتر
حور: لبوة شجاي تحجي عمتي .. صدك ؟
كعدت يمها وحجيتلها الكالة عمو ..
ما ابدت اي رد فعل ورجعت خلت راسها ع المخدة
لبوة: لتدوخين نفسج ولا تفكرين اصلا .. شوفي شمسوي من مصيبة وهيج عالسينة
حور: وعليمن افكر بيه .. خليهم نارهم تاكل حطبهم
ضليت كاعدة يمها نسولف اغير جو عليها .. بس اني ادري بيها من تضوج تضل بس تصفن
.. اجت عمتي سهير هم واصلتلها الاخبار كعدت يمنه بالغرفة
لبوة: منو كلج .. جيهان
سهير: لا مصطفى ويوسف اجوني للبيت
باوعتلها مصدومة ورديت
لبوة: مصطفى من البارحة كال رايح للعمارة .. شجابة
سهير: اي هو جان هناك .. واجوا هو ويوسف الصبح
ضليت صافنة .. هو ويوسف ؟ وبالعمارة ؟؟
شغلتهم مو خاليه .. الا اذا جان الهم ايد بسالفة مرتضى
من اشك بشي يطلع شكي بمكانة واحساسي ما يجذبني ابد .. بليل التموا عمامي كلهم بالبيت الجبير واجه عمو جهاد هم وكعدوا يحجون بسالفة حور اللي جانت متأجله لحد ما بين رجلها
مرت فترة العرفنا ..
مرتضى مطلعينه من المستشفى بس مودينة لبيت خاله
ما جابوا لبيت اهله ..
لان عمو أسر محاجي ابوه وكايلة اذا واحد من ولدنه شافه بالشارع ما راح يسلم من ايدهم ..
..
البيت هوسة ومخبوصين .. عمتي والبنات يمنة
صاحت عليه
سهير: لبوة طلعي شكري الاستكاين
اخذت الشكر وصرت اخلي بالاستكاين .. قوري الجاي ع الطباخ منتظرتة يفور حتى اصب
طب قسور بالزي العسكري ..
توة راجع من شغله تلكته عمتي
سهير: ها عمة الله يساعدك .. هاي جيتك من الشغل ؟
قسور: ويساعدج .. اي والله خابرني عمي كال الناس ترست الديوان وانت ماكو .. هم ياله اروح ابدل واكعد وياهم راح يجي السيد
جانت عيني عليه وهو يحجي .. شافني ، رأسن درت وجهي منه وسويت نفسي ملتهية اصب بالجاي
اجه مصطفى صاح الجاي شلتله الصينية وانطيتها اله
مصطفى: بس انتي جايج ساعة ونص
لبوة: لا والله شو واحدكم ما عاجبة العجب
مصطفى: دمشي من وجهي لا ابتلي بيج
هزيت ايدي واني اضحك وعفته ومشيت ، واكفة ع الكاونتر
اجه يمي وكال
قسور: الحكيني
قبل لا اعرف شيريد عافني وصعد فوك
.. ضليت واكفة اجت عليه عمتي
سهير: ولج دصعدي شوفي .. متشوفين اعصابة صايرة براسة لينفجر علينه
لبوة: وشسويلة على رو.......
بعدني ممكملة حجايتي
واجاني صوتة صاح
.. لبوووووة
كلها انتبهت لصوتة ..
خزرتني عمتي واشرتلي اروح وراه
صعدت فوك واني لازمة كَلبي بين ادية ..
شفته بالغرفة القديمة .. وكفت يم الباب وحجيت بتوتر
لبوة: شتريد
قسور: طلعيلي الدشداشة
لبوة: وليش متطل.....
زمخ بيه خرسني .. مشيت مثل الحبابة فتحت الكنتور
واباوع
.. فارغ
قسور: جوة اكو علاكة طلعي البيها واكويها وجيبيلياها
باوعتله وضليت ساكتة .. كال
.. ها ؟ خاف ما عاجبج
زفرت نفس بنفاذ صبر اخذت العلاكة الكال عليها .. طلعت دشداشة جديدة ورحت جبت الاوتي ووكفت اكويها اله
حسيته مو طبيعي وتصرفاتة غريبة ..
كل شوي يجي يوكف يمي بحجة يعلمني شلون اكويله الملابس
.. لجج مو هييييج
فزيت من مكاني وخليت ايدي على كَلبي من علو صوتة
.. كال
.. اسم الله ابوي
وكف كدامي وبيناتنه ميز الكوي .. خله ايده فوك ايدي اللي لازمة بيها الآوتي ويحرك بيها ويحجي وياي ..
بس اني وين .. كَلبي حسيته راح يطلع من القفص الصدري .. سرت رعشة بكل جسمي من لزمة ايدة
وعطرة احسه ترس ريتي بدال الهوى
سحبت ايدي منه ورفعت راسي .. لكيته صافن بوجهي
شحيت نظري عنه .. بلعت ريكي بتوتر وحجيت
لبوة: كملتها
تنهد وكال
قسور: هاهيه روحي
مشيت بسرعة نزلت جوة ..
وحاولت اكمل شغلي وي البنات وابين طبيعية
.. شوي ونزل هو لابس الدشداشة بيدة سبحة لافها على ايدة وفات من المطبخ وطلع .. ريحة عطرة ترست المطبخ
واني عيني وراه .. ندستني عمتي وحجت بصوت ناصي
سهير: عينج على شغلج
اجه السيد واجوا ناس معكلة من عشيرة مرتضى
وياهم ابو مرتضى وابنه .. انترس الديوان زلم والاصوات كل مالها تعله
نحجي وي الولد نريد نفتهم منهم محد حجة خلصوها علينه .. لحد تطلع ولحد تطلع
صار صوت صياح وكل شوي تكب عيطة صوت قسور واصلنة ليجاي .. انفتح الباب وطب علينه صاح
قسور: صيحوووا حووور
خلت عباية على راسها ركضت عليها بيدي تليفون واحجي وياها
لبوة: عليج الله اخذي التليفون وسجلي الحجي ار.....
بعدني ممكملة وعاط بيه اجه كَلبي يوكع بين رجلية .. جرتني عمتي كالت
سهير: روح عمة معليك بيها جاهل اني اتصرف وياها
اخذ حور اللي ترجف وتمشي وراه .. دارتلي وتحجي عليه
.. شبيج عمة انتي صاحية ؟
لبوة: وهسه اني شمسوية
درت وجهي ضايجة وكاعدة على اعصابي ..
اموت واعرف شنو ديحجون هناك
......
قبل لا افوت لزمت طرف ردانة وامتمت
حور: عفية ماريد افوت
قسور: شبيج بابا لتخافين .. انه واكف يمج وعمامي كلهم جوة محد غريب .. بس السيد يسألج جم سؤال وجاوبي
هزيت راسي وفات هو للديوان واني امشي وراه ومدنكة راسي ..
رفعت راسي شفته بوجهي انصدمت !
.. وجهة متشوه ولا عبالك هو مرتضى
سلم عليه السيد وسألني شلونج واني جاوبتة .. كال
السيد: اسمعيني بنتي وهاي راح احجيها كدام ابوج وعمامج .. انتي هسه بحسبة بنيتي لا تخافين ولا تترددين بكلمة .. انه سمعت من الولد كال هي مقصرة وياي وبحقي وذب الصوج بيج .. انه ماريد اظلم بختج كتلج عديتج بحسبة بنتي الله شاهد واعرف اهلج عشرة عمر واعرف شنو تربيتهم حسب كلام رجلج كالي البنية ملسنة وراعية مشاكل ترد ع الجبير والصغير ويكول ما تنطيني حقي وعلى ساعة شيطان صايرة مشكلة بيناتكم وهو ما متحمل ومد ايدة عليج...
هو مستمر يحجي واني دموعي عشرة عشرة
.. كرهت روحي وبالساعة اللي عرفت بيها مرتضى من كال ما تنطيني حقي
.. انتي شتكولين ؟ اريد اسمع منج .. هل حجي صحيح
عندج مشاكل وي عيالج ؟ احد يضوجج هناك
حور: والله ما بدر مني قصور .. ما اكول اني معصومة بس الله اليدري شكد تحملت منهم بذاك البيت واجي لبيت اهلي حتى ما احجي اكول حتى لو ما انطي بيهم بحسبة اهلي وتجنبا للمشاكل ..
السيد: زين هو حسب كلامة يكول هي مقصرة وياي وبواجباتي
حور: سيد الله وكيلك شاعلة العشرة شمع واذا طفت شمعة وحدة وضلن تسعة يعوف التسع شمعات المعلوكات ويدور ع الوحدة ليش طفت .. ما قصرت وياه بشي وتحملت ضيمة ومخابراته واعبر واسكت واخاف اكول لواحد من اهلي ادري بيهم ما راح يرضولة
.. وهذا عمي كدامك اسألة كم مرة اجيته حتى يحجي وياه بلكي يعدل
السيد: ها ابو مرتضى شتكول
هز راسة وهو مدنك وكال
ابو مرتضى: صحيح
السيد: بهذا حجيك انت تأكد كلام البنية .. والخلل بابنك والبنية ما بيها اي قصوور
ابو مرتضى: يابة البنية بنيتنه مثل ما هي بنتكم واحنه بعدنه رايدينها وشارينها .. واني وياكم على ابني شتفصلون احنه نلبس
طفر من مكانة وصاح
مرتضى: جذااابة يابة وانت مصدددكها
ما حسيت اله مصطفى صاير فوكاه .. كوة فاككوهم وطلعوا برة ، اباوع لمرتضى لازم حلكة كام يصب دم
أسر: شو انت بنص بيتنه ودايس بساطنة وتصيح جذابة كدام اهلها .. جا وراها شتحجي
اشر السيد لعمو وكله
السيد: امسحها بوجهي .. احنه جايين نريد نفض السالفة ونوصل لحل وسط
قسور: مالها غير حل .. يطلكها والغايب مالتها يوصل للبيت وينطيها كل حقوقها .. ووراها يولي منريد منه شي وليشوفنة وجهة بعد
السيد: انه رايد اسمع من البنية .. كولي بنتي انتي موافقة ع الطلاك ؟
مسحت دموعي ورديت
حور: كولشي ماريد منه حتى الغايب والذهب متنازلة عنه .. بس يجيبلي ورقة طلاكي
......
طبيت للغرفة شفتها كاعدة على كرسي يم الشباك وايدها على خدها
مشيت يمها وكمزتها .. دارتلي
حور: عابتلج خوفتيني
لبوة: شبيه ضايج الحلو
حور: مضايجة
حجتها ودارت وجهة .. حجيت اقلد كلامها
لبوة: " مضايجة " .. وحدة غيرج تكوم تدك وتركص بهيج يوم خلصت من واحد مثل مرتضى
حور: اهووو لتجيبين اسمه كبالي
لبوة: حقج دادة حقج .. طاريه يغث
كعدت كبالها ..
.. تدرين ؟ المفروض نسوي حفلة بمناسبة طلاكج
حور: بس اني اسوي حفلة لان راح اتطلك ؟
لبوة: عادي وشكو بيها
حور: لبوة وخري مني والله مالي خلكج وبعدين مصار شي لهسه لازم ننتظر ورة ما اجيب
لبوة: عادي دادة ننتظر قابل شورانة المهم اول وتالي نخلص منه .. بس لا صدك ترة خوش فكرة نجيبلج بدلة سودة او لا ليش سودة .. نجيب بيضة حتى تصير بداية لحياة جديدة الج
حور: مو مهم .. اهم شي اني مرتاحة هسه خليني ادير بالي على ابني وعلى نفسي وماريد شي بعد
لبوة: ليش مترجعين تكملين دراسة ؟
باوعتلي متفاجأة
.. شبيج تباعين هيج .. مو هو اللي بطلج وما خلاج تكملين ؟ هسه عناد بيه قدمي على كلية وكملي
حور: ما اعرف ممفكرة بهل موضوع
لبوة: فكري بيه .. فرصة واجتج لا مرتضى بعد بحياتج ولا عيال ولا هم يحزنون .. اذا مو لنفسج للي بطنج .. الباجر عكبة يصير عندج جاهل وتحتاجيلة مصرف تصرفين عليه
تنهدت وكالت
حور: الله كريم ..
كمت وكفت كبال المراية وامشط بكذلتي .. اجاني صوتها
.. شوكت حترجعون للعمارة
لبوة: الباجر لو عكبة .. قسور كال هل يومين
حور: لترحين ابقي يمي
درتلها
لبوة: وين ابقة يم ميسون ؟ اله اطك واموت والله
حور: هسه ليش تحجين هيج .. ترة ماما متكرهج
ضحكت ضحكة طويلة وما رديت .. كالت بتوسل
.. ابقي لخاطري اني .. ما عندي خاطر يمج ؟
لبوة: يا حبيبتي يا عيني اني تعودت هناك اصلا .. لو بيدي جان خليتج انتي تجين ويانة بس قابل نروح كلنه نتكوم بذاك البيت ؟ هم الرجال شيكول علينه انعم الله عليه من خلاني كاعدة ببيته
كامت حضنتني وبصوتها غصة كالت
حور: راح اشتاقلج
لبوة: يا عيني قابل اني وين رايحة .. اجيج والله بين فترة وفترة
رجعنه اني وجدتي وي قسور للعمارة وحور راحت لبيت بابا ..
......
عدت فترة من سالفة حور والطلابة الصارت
.. مرتضى صدف مرات اشوفة طالع من بيتهم
عمامي منبهين علينه ومشددين محد يتقربلة بعد ..
واني على هل اساس جنت اغلس عنه امشي بالشارع ولا جني شايفة
لحد ما بيوم جنت كاعد بالكهوة ..
وامي حركتني ع التليفون كل ساع تدك
باوعت للساعة شفت الوكت صدك تأخر .. جاوبتها وكتلها جاي
كمت اخذت تليفوني وطلعت اتمشة لبيتنه .. الشوارع ظلمة وفارغة
قبل لا اوصل لبيتنه بعد كم شارع حسيت بحركة وراي
.. درت وجهي بسرعة وشفته هو ووياه ثنين
ضحك باشمئزاز وكال
مرتضى: اخيرا اختليت بيك
ما حسيت الا على ذول مجتفيني .. صحت
مصطفى: عووووووف ايدي لكككك
مرتضى: لو تصيح منا لباجر محد راح يسمعك .. والله لطلع الكتل الاكلته منك انت وذاك ال**** ج قسور
مصطفى: تاااااج رااااسسسسكك يالسكط .. بيك خيير صير رجال وخلي نتواجه واحد لواحد مو جايب هل مزعطة وياك
تقرب عليه وضربني ببطني بقبضة ايدة .. خليته صار كبالي وجريت ايدي من اللازمني وضربتة بنص وجهة ارتد ليورة ولزم خشمة
لزمت ذولة واحدهم جنه سلبوح بسرعة اجوا بيدي .. ركعت راس براس ودفعتهم عني
غير عود يسكتون ؟ درت وجهي جاي امشي واجتني دفرة من ورة .. درت وجهي شفته واكف وطلع سجينة من جيبة
ابتسمت طرف شفتي وكتله : لا يا عار ..
مرتضى: والله لخلي امك تطلع بالشارع تصرخ عليك .. تعاال اذا انت زلمة لتشرررد مثل النسوان
استفزني بكلامة .. تلازمنة اني وياه
وايدي على ايدة اللي لازم بيها السجينة يريد يخليها بطني وتلاويت وياه ..
لحظات ، نزل ايدة وخر من عندي واباوع لايدي كلها دم!...............................................
❄❄❄❄❄❄
توقعاتكم?؟