عشق المومنين(أبناء الساده)

((بارت خمسه وعشرون))ج٢

صباح الخير

عن الإمام علي بن أبي طالب عليه السلام:
يَا أَيُّها النّاس اقْبلُوا النصيحَةَ مِمَّن نَصَحَكُم وَ تَلَقَّوْها بِالطّاعَةِ مِمَّنْ حَمَلَها إِلَيْكُمْ وَ اعْلَمُوا أَنَّ اللهَ سُبْحانَهُ لَمْ يَمْدَحْ مِنَ الْقُلُوبِ إِلَّا أَوْعاها لِلْحِكْمَةِ وَ مِنَ النّاسِ إِلَّا أَسْرَعَهُمْ إِلى الْحَقِّ إِجابَةً وَ اعْلَمُوا أَنَّ الْجِهادَ الْأَكْبَرَ جِهادُ النَّفْسِ فَاشْتَغِلُوا بِجِهادِ أَنْفُسِكُمْ تَسْعَدُوا وَ ارْفُضُوا الْقيلَ وَ الْقالَ تَسْلَمُوا وَ أَكْثِرُوا ذِكْرَ اللهِ تَغْنَمُوا وَ كُونُوا عِبادَ اللهِ إِخْواناً تَفُوزُوا لَدَيْهِ بِالْنَّعيمِ الْمُقيمِ
.......

ان هواي ايام من التعب جسمه ينشل وميكدر يتحرك واحيانا يبجي لكن من يبجس بس كدامي ميقبل كدام احد يدمع..

حسيت بتأنيب ضمير قااتل وواحباط مرعب الدمعه وكفت بعيني من هالخبر

ثواني واجاني صوت زمخ من باب غرفة الطبيب..

ـ نوااار مايصيررر بنتت نوااار رجااال ويضللل رجاااال وهااااي هييية الدكتور ويايه شاهد

وكفنة انا واخوي ارشد نسمع لابوي دفع الطبيب الكرسي وكف متفاجا عبر الميز يريد يهداء الحجي

_حجي على  كيفك مايصير هيچ

ابوي عاط بقوه

_وشنوو. اليصير برئيك جااااي أگلك ابني زلمه من ظهر زلمه وانت تگول ابنيه

_حجي اسمعني ترى مووو أنا أکووول الاطباء ويايه والتحاليل جاي تأگد ليش العناد والگبرر

__ووولك ثمن گلامگ ياااا دگتورر زمانك أبني زلمه فااااااااهم

خليها گطن بأذنك وبأذنك جماعتك نوااار زززززلمةةة ورجااال واياااااااني واياااااك اسمع حچاية ثانية من هالخراابيط التحچيي بيهاااااا

رد الطبيب
ـ ااهداء ياحجي وترى ماگو داعي لعصبيتك العند ابنك حالة طبية مرضية شي مو بأيدة ولا بيدك

تقرب ارشد من ابوي وگاااال

ـ ياحجي اذا الطب هيچ يگول بعـد أحنا نسگت

عاط بنتر

ـ لاااااااااااا طب ولا نعااااال بوووية هذااا أخووووك
هذا ابني نوار رجااال مابي شييي وهاي سوالفهم كلهه حتى يسوون عمليات وياخذون فلوس فوك فلووسهم ليش مانعررف الطب صاير تجارة هناااا
ناس عصابه لااااذمه ولا ضميررر

گال الطبيب

_الحچي مو هيچ هاي مهتنه محترمه مالنه علاقه بلي يشووهون سمعة الطب

أندار أبوي على الطبيب

_شوووو ابو مهنه ودافع عن مهنتك الشريفه ياطبيب زمااانك اذاا اعرف اانت والويااك من الدكاترة جايبين سيرة ابني بين هالناس وتشيعوون هو ابنيه احسبهه صارت شغلتنه عشائرية ومتفض بعددد للأبد

رد الطبيب متفاجأ

ـ عشائرية ومتفض؟! 
لعد خلص براحتكم ابنگم وانتو احرار بي واحسبني انا والوياية من الاطباء لاشفنة وسمعنة ولا عرفنة شي وانتم أعرف بمصلحته

رفع أبوي ايده

ـاااااي مااالگم غررررض كل اسمائگم الرباعية يمي وعشايرگم عرفتهاااا هم.. 
اااااااااااااااي كلمة تطلع على اااااابني انتو المسؤلين ومتخلصون من ااااايدي..
يلة يوولد ااااامشوو جددامي وچلمـة بهالسالفة ماريد ااسمع بعدد

وكفت ممستوعب الاسمعه لا من الطبيب ولا من ابوية ممستوعب نوار بنية اخوي نوار ولد طول عمره ولد شنو هالخرابيط لا مستحيل الطب بالعراق فاشل اكيد هذول مخربطين
اي خربطه صارت بين نوار وبين تحاليل ثانية

المصايح بين ابوي والطبيب وارشد يهدي الوضع أما أنا بقيت ساكت ماحچيت ولا كلمه ألى أن طلع ابوية اشر اليه ارشد نطلع احنة وراه طلعنه سوه من الباب

بس انا عفت ابويه ومشيت سريع بحرگه اريد اشوف
أخوي نوار وصلت لردهه نوار دخلت الغرفه مالته
أجهزة الأوكسجين والتنفس عاليه وجهاز تخطيط القلب يوتر ويحرك الگلب

الغرفه سگونها مرعب اله اصوات الاجهزه تقربت على نوار المغذي وايرات مشگله على طول ايده اتناوع ليه اتمعن بملامحه

مديت ايدي العب بشعره السبل وگذلته الطويله حتى بشرت وجهه نااااعمه مثل بنات لاااا مو مثل بنات هو
طبيعته يعتني بوجه گل يوم خلطه وسيروم شگل

شلت ايده بستهااا أعز أخوتي هو مو أنا الأذيك خويه
حتى لو أعرف أبيع سيارتي واخذك للخارج أهم شي
تصحى وهدوئك وطيبة گلبك ترجع تنور حياتي

أخذني الفضول أشيل الغطوه بس دخلت السستر للغرفة وشافتني

گالت

ـ عيني ترى ميصير هيچ تتقرب عليه المريض بهيچ حاله ميصير عندة مناعه وهو بغيبوبه يتاذى وينتگس

ابتعدت شوي وكعدت يمه على الكرسي..  ماريد اطلع من الغرفة اريد أبقى يمه

الممرضه گالت

ـ مسموحلك الزيارة وتجي يمه بس لا تتأخر يمة خمس دقايق واطلع

بلا ماارفع راسي جاوبتها

ـ تمام..

على گعدتي بقيت و السستر تفتر حطت مغذي اله بدلت كيس البول وطلعت بقيت كاعد يمه اتمعن بي
احچي وية نفسي واتمنى يسمعني گتله

'شديصير بيك نوار معقولة السمعتة عليك
أشلون ماحسيت بشي بمراهقتك وليش ماحچيتلي
مو أنا صاحبك وعلمودك هواي نضربت بدالك لش ماا
چنت تحچيلي

هزيت راسي هو مايسمع اليه بس اي انا اتذكر مياعته من چنت اضربة على ضهرة وهو يكمز من الوجع ويبقى يولول
لو من اشيل اثقال واجبرة يشيل وياية واگله شد ايدك واسترجل لاتضل ماااايع يالكعبة معقولة نوار مامعقووووله نوووار بنت

أي لان مووو مو قياس أگو هواي ولد مايعين قابل كلهم بنات  زين ليش أي تذگرت من چنا نلعب بلبستان چان (دراره) تختلف عنة چنه نوگف نتبارز منو أطول(يدر)

مسحت وجهي أستغفر الله شنو هالافكار  اي أنا لازم اساعده لا هذول الباردين البرة عايفي بهالمستشفى العاوية وية اطباء ميفتهمون.. 

رحت عليه بست راسه وطلعت من الغرفة اركض اريد اشوف صورة حل  صاح بية الوالد..

بويه رعددد وين رايح

انداريت عليه  بينه مسافه اربع اقدام

ـ رايح اشوفلي چارة لاخوية

ـ لااااااااااااتتخبل شنو شبيك ماصدگت تسمع هالكلمتين عن اخوك

تفاجات بحچيه بعز الوضع ويريد يحور الموضوع على غير اتجاه تقربت منه معصب

ـشتقصد شنوووو  شبيية؟! شنو شبية ترى اناااااااااا جدامك ماااااابيه شي  انتو الشبييكم   انتم الوراگم لغززززز  شلون عايفين نوار بهالمستشفى وأنت عندك خيرررر من ألله وشامره هنااا؟

رد ارشد.. 
ـ چا وين ناخذة يعني
وبعدين شبيهه هالمستشفى ترة زينه ماشي حالهه

ـ ااررشد احنة ماجايبين واحد بطنه اسهال حتى تكلي حالته زينة ولا موزينه

رد ارشد
ـ يعني وين ناخذة طلعو الرصاصة منه ودخل بغيبوبة وفاجئونه بهالحچي الجديد غير ننتضر يكعد ونتصرف

ـ لا هواي قصرتوو وياه من دخل بغيبوبة انقلة لغير مستشفى ومن عرفتو بهالسالفة اجيب اكبر اخصائيين شلون هيج عايفي ترة هذا حالتة خااصة ماااا جاي فتهم شنوو بي غير تاخذوو لأخصااىيين من عرفتو هيج حالته غير تعرضو على اطباء فاهمين ومو طبيب واحد لاااا المفرووض اكثر من طبيبب تااخذو

رد ابوية

ـگلششي مابي چنة العافية بس يكعد من غيبوبته بخير وسلامه يصير مثل الحصان معليك بالاطباء

ـ واذا هيچ ممقتنع بالاطباء ليش ما اخذته طبيب مختص

ـ اهوووو يارعد دائما تحط اانه بالموضوع كافي يا ابني گافي ياوليدي اسچت واستجن

شديت على شعري من ورى متعصب  رجعت التفت

ـخووووش أنطيني فلوس يابة محتاج چم فلس

ـ كلك فلوس گول شگد محتاج

ـ فد تلث اربع ملايين

ـ ليش خير ياستار شنو عندك ديون

ـ  ياديون
اريد اخذ نوار لاخصائي واكيد الاخصائي ابغداد لو باربيل يعني مصاريف وتحاليل

ـ ليش ولك
احسن الاطباء يجون ألكربلا هنا بمستشتفى الكفيل عليمن  تريد تاخذة لغير مكان

ـ هم صح اروح اسأل شوكت يجي اخصائي لحاله نوار حتى نحجز

ـ شتحجز؟

صفنت على ابوية هذا شبي معقولة مديفهم كلامي.. 

_العفو أااشبيك بويه شنو مفهمت شحجيت

ـ اخوك لا تعرضة ع طبيب ولا تاخذة ولا تجيبة..  اخوك مبي شي

ـ تنطيني فلوس لو لا

ـ لو عندي ماقصر

رد ارشد
ـ شنو لو عندي ماقصر مو قبل چم يوم داينت ابن اخوك سبع ملايين

ـ اي انت ك
گلتهه داينته يعني ماضلت فلوس جوة ايدي

ابتسمت بخيبة امل.. 
ماضلت جوة ايدك فلوس اداوي ابنك!!
الله لا يعوزنه يالشيخ
يلة انا رايح ارشد...

عفتهم وطلعت ماگدرت ابقى بنفس المكان وياه
اخذت سيارتي للمعارض بيش مجان ابيعهه..
طلعت التلفون خابرت ولد اسمة لؤي من اصدقائي

شال التلفون

_,لؤي ريد اعرض السياره يم صديقك ابو المعرض حتى لو بشدة ونص بياع

ـ ليش خير شعجب تريد تبيعهه بهيچ سعر

ـ والله صار عندي ضرف مستعجل واحتاجيت فلوس
.
ـ بس مو هيج يا رعد السيارة تسوالهه اكثر لك هاي بهبان شدة ونص شنووو كل عقلك

ـ مستعجل عليهه ووالله لو بيدي ما ابيعهه تعرفني احب هالسيارة بس شسوي

ـ يابه گلي شگد محتاج واني انطيك بين مدبر روحك

ـ موو المشكلة ماااااعرف شگد محتاج بس اقل شي بيدي لازم عشر ملايين لان السالفه جبيرة

ـ وتريد تبيعهه بشدة ونص وانت محتاج اقل شي عشر ملايين عمي اصبرلك فد چم يوم بلگي تلكه شراي ينطيك سعرهه

ـ مو خاف اطول السالفة

ـ متطول ولا شي هالسيارة سوگهه ماشي اصبرلك چم يوم لا تخسرلك خسارة جبيرة

ـ زين يابة زين..  انت وين

ـ طالعلك للمعارض ما اتأخر عليك

ـ يلة نتلاكة هناك سلام..
سديت التلفون وكملت طريقي
وصلت للمعرض وبقيت برة مادخلت انتضرت لؤي ودخلنة سوية عرضتهه يم صديقة وطلعت

بقيت دايخ مين اجيب فلوس اغيرلة المستشفى فكرت بسلمان اداين منه فد مليون بس اتذكرت يريد يعرس واكيد مفلس خطية

عصرت دماغي اكثر الولد الاعرفهم لو متصوبين ونايمين مستشفيات لو بالجبهات وعدهم مسؤليات..
هو هااي جماعتي وين الساحكهم الوري

سلمت امري لله ورجعت للبيت بلگي نگدر نقنع الحجي ينطينه فلوس

اشرت ألتكسي طول الطريق السايق يسوولف وانا اكره ماكره اسوالف السواق

بين مارجعت للبيت عقلي وكف على الفلوس

دخلت لگيت ابوية واخوتي موجودين گلهم بالديوان برة وصادق رايح للمستشفى يبات يم نوار

عفتهم وفتحت باب المطبخ وراسا كعدت
احس بروحي كلش هلگان من التعب جسمي كوة احركه همزين الديوان بعيد عن المطبخ مسافة ميتين متر

اتلكتني ام ريتاج واكفه يم الطباخ

ـ يااهلاااااااا والله ستوة البيت نور

ـ هلا ام رتوجه بوجودج

ـ اكيد جوعان

ـ لالا ابد ما اشتهي

ـ لعد نشرب ببسي سوية

ـ لا ام ريتاج ماريد ببسي بس اريد چاي ثكيل مهيل ومدوزن من ايدچ رحمة لذاك الاب بلقوري الفافون ماريد بلغلايه

ـ اي مو تدلل ياخوية ..

حضرت القوري وحطته على النار

گتلها
_خوش خويه بس اشطف من ريحة السجن وارجع
تمشيت الغرفتي ونوار مسيطر على تفگيري دخلت اخذت بدي اسود وداخليات وبجامه رصاصيه رحت للحمام سبحت زين بقيت هواي جوه الدوش

أفگرر محتار بگل الجاي يصير راسي صدع بسرعه نشفت وبدلت ملابسي وجهي للمرايه لحيتي كلش ثخنانه وشعري طولان'لازم اروح للحلاق اوووف يراد واهس وخلك وثنينهن ماعندي بسبب التفگير

خليت الخاولي على رگبتي وطلعت حتى مامشطت رتبت شعري بيدي لان اريد چاي

رحت للمطبخ,ام ريتاج واكفه يم الميز مخليه صينيه
عليها كواب اثنين وصحن كليچه سحبت كرسي وكعدت هي جابت القوري وگعدت يمي گالت

ـ يابطل سولف أشلونهه ايام السجن

ـ السجن للزام لاتخافين على العتوي

ـ ههههه وانا الفطيره اختك الماجابتها أمك چان بالي يمك شلون مخلصهه بين هالنماذج طلعت عادي عندك

ـيمعوده حتى السجناء كل واحد بيهم همة شكل وملتهين بالهموم..

ـ اگلك صدك اگيد عرفت بگلشي

اتنهدت وجاوبتهه

_ اي

ـ زين شراح تسوي على شغلة اخوك لان اعرف البقيه
عدى ارشد راح يطبگون ويه عمي

ـ ام رتوجه عرضت السيارة للبيع بس احصل فلوسهه اخذة لاطباء اختصاص بحالته

ـ يااااااا سيارتك ليشش حرامات يمعود فايدتك وانت شگد تعبت يله حصلتها

ـ لا فدوة لاخوي بس يصير زين أوگف على علته

ـ زين اخذو من عمي عنده گووم

ـ عوفي على صفحه عمچ لاتذكري اصلا

ـ اووف الله يساعدكم.. يلة الله كريم..  ان شالله خير
بس والله شغلته تحير

ـ الله لا يحير عبدة.. بس گلبي ممطئمن للاطباء

، ـ يا ليش شبيهم

ـيمعوده لاعلم ولا فهم والخير بيهم طلع والزين باقي محد بحاله ويجوز تحاليله مختلطة وية شخص ثاني شمدريچ شيصير بالمستشفيات العراقية يمعودة الصاحي يموتو

ـ اي والله هم صدك..

حكيت خشمي وبتوتر سألتها

ـ اكلچ شخبار مريم

ـ يااااا رعد شخبارهه خطية بس تبچي وتگول رجعوني لاهلي

اتنهدت ورددت استغفر الله

گمت خذت باگيت جكاير من فوك الثلاجه سحبت جگاره وورثتهه رجعت گعدت جابتلي استكان الچاي.. 

_اييه عاشت ايدج خيتي

ـ الف عافية.. أگل أگليچه وياه
بس صدك يارعد يعني اذا نوار طلع مثل ميگولون شنو يكون مريم مصيرهه بنية مطلكه لو متنحسب متزوجه والله موقفهه صعب يهد الحيل

ـ ما اكدر اسبق الاحداث الا بجواب قطعي من الاطباء الاخصائيين بوگتهه  هي تاخذ القرار التريدة  بس هسة لا..
كلشي مواضح فمنگدر نسوي شي و تبقى حالهه حالجن بهالبيت چنه

صوت وراي فززني حتى وگعت الجگاره من حلگي

ـ وحضرتگ وحضرتگم  تقررون عني وكأنو اني اثاث بهالبيت

أتفاجئت من عرفت مريم واگفة يم باب المطبخ

وكفت على حيلي طفيت الجگاره حتى  اسمعهة تخلص حچيهه

شكلهه كلش متغير وذبلان عيونهه الحلوة تعبانه وجهه الضاحك صاير حزين بشرتهه الصافية واضح عليهه اثر الدموع
من هيچي شفتهه بهالوضع تعبت اكثر
دنجت عيني عنهه ماعرفت شأحچي وياهه..
دخلت تتمشى للمطبخ بخطوات تعبانه وحايرة

الحجاب منزلته گلش على وجهه ورغم لابسه گلبيه
لابسه عبايتها

گالت وبحقد تباوعلي

ـأنتم مجرمين طاغين لاااااااااااااا تسالوني لاااااااااا تاخذون رأيي بالديصير لا احد منگم عبرني أاااالكل حاير بالديصير ألنوواااااااااااار وووانه منوو عدگم
منوووو انيييي هاااااا

درت وجهي عنها الموقف صعب الانسانه التحبها تشوفها تشکي وانت ساگت ماتحچي وتبين قوي مامهتم صميت ايدي حييل طکيت الميز گاتم غضبي

ردت ام ريتاج

ـ ياااااعيني يامريومه غير هوووو صاحب المصاب

باوعت عليهه وردت باوعت علية وگالت بغضب من بين أسنانها وتأشررر على صدرها وطك حيل

ـ لااااااامو نوار صاحب المصاب
اني صاحبة المصاب
اني ام المصيبة  بس عدگم منو اني

اااني گله من اهلي تربيت على گلمة العيب والمايصير
وهااااي النتيجه لاززززم أسگت وعيب اطلع حچي العياااال جدام الناس

أني منووو اني الي جاي أحاول أضغط على نفسي حتى يگولون بنت حموله وخووش متربايه ومؤدبه

أني منووو اني الي إجت من عائله تخاف الله عائله تعرف الله العائله حدها بس الصلاة ويه الله

أنيي واني ولأن اني لاززززم أبقى اني لازززم اسگت واتحمل واکل خره ومااافتح حلگي

بس انتووو محد منكم معبررني ولا شايفيني بعينكم اصلا همگم ابنگم وبسسس

ـ لا مو هيج يامريم والله انت متعرفين رعد شگد گلبة طيب مجان يقصد شي بحجية

ـ ميقصد! 
هووو شنو السواه ومتقصد بيه.....ترى  لو ميقصد چااان على الاقل ااخذ رأيي سألنيي
ياانااس على  اقل حسوو بية
ااني ممتقبلة ووضعي
ممتقبلةةة ووضعي

عرفت اعصابهه تعبانه من الصار عصبيه وتحچي بقهر ونرفزة
مردت گلببي مرد عليهه حقهه بگل شي تحچي بس لازم انتضر كلام الاخصائيين يبة نحكم كلتلهه بهدوء
تصنعته لان جوايه نار

ـ ااااااأااهدئي مريم بعد منگدر نحگم

تقربت خطوه وگعت العبايه على چتفهه

ـ تريدنيي اهداء ؟  گليييييي أشلون اهداء بلا زحمه عليك
بسس گليي شلوون يصير الهدووء

ززين اانت گليي شسووي من تكتشف انت متزووج من ررجاال مثللك  شسووي شلون تتصرف گليي  احچييي تبقى هاديء

ـ ما اگدر احچي واحگم بهالشي ياابنت الناااس الطب بالعرااق فاشل ماااگدر اعتمدد على گلام الاطباء وبمستشفى حكوومي فوگااهه

فتحت ايدها وتلطم على وجهه

ـ طبعاااا طبعااااااا مااااااااااتنطيي بااخوووك طبعااا
بس انييي بس انيي اريد اهلي

بقت تضرب وجهه حتى جرى دم من خدها

ركضت عليهه ام ريتاج ولزمتهه تحضن ايدها لان خرمشت وجهه

_ووووچ وووووچ مريم اهدي مو هيچ

تدفع مريم بيها وتصيح

ـ لااااااااااااتكوليليي ااهدي لاتحچون هااااي الگلمه شووفي ابن خالتج شديحچيي بس گليلي انتي او هوو شرااح تسوون بمگااني

أنتي اطلعين مزوجه ابنيه گوووولي گوووووولي

بقينه ساكتين واحد يناضر للثاني محد من عدنه حچى ماكو كلام يوصف الموقف الاحنة بي ومريم بي..

مريم//من بقو ساگتين عرفت اني الغريبة البيهم ومتعاونين كلهم عليه محد يعترف بخطأ اهله لان همة اهل وايد وحدة حتى الچنت احبه خذلني للمره الثالثه

انهاريت على نفسي وصرت احچي اي كلمه تجي بطرف لساني دفعت ام ريتاج واضرب نفسي حتى ياخذوني الاهلي عطت

ـ طبعااااااا تسكتون اااااااني الغريبةة البييييگم ااني المالي قدرر وقيمه بيناتكمم

عاط رعد واشررررر وهو يقترب مني

ـ ااااااااااااانا الحد الان لازم اعصابي عنج لان اگول الضرف ميسمح والمرريتي بي فوق طاقة التحمل بس لاتضلين تشمرين حجي متفهمين معنااه لاااا تحچين عليينة

باوعتله بكرهه

ـ ااااي اااي  ايييي احجچيي طلع لساانك علييه هو هذذا الاقصدةةة اانا الغريبة البيگم ومحد معبررني

ردت ام ريتاج

ـ يمعودة مريمم شنو غريبة شنو هالحچي اذكري الله ترة احنة ااهل

ـ شلوون اهل؟
ليشش اانتوو منوو
ترةة انتو غرربة بالنسبةة اليه واصلاا لليشش ااني يمگمم
شصيروون مني حتى ااضل يمگمم

گعدت للگاع سندت جسمي بيدي أبچي وجهي ضل يحرکني لان تخرمش والدموع مالحه گال رعد

ـ لاتگووووولين غربة
احنة مو غربة عنچ ولا انتي غريبة
تبقين مرة ااخوية نوار

رديت بخنگه وكوة طلع صوتي ومنزله وجهي للگاع
مگدرت ارفع راسي متأذيه صحت

ـ قصدك مرة ااختك نواار
لاااااااااااااااااااااتغشمم رووووووووووحگ

نصى عليه

ـ كااااااااااااافي تصيحين مرريم شبيچ

باوعت عليه

ـ لا تسالوووووني وتغشموون نفسسكمم لاتكلوولي مجنتو تعرفون بحاله اابنگمم ورغم المصيبةة زوجتووو من وحدة شفتوهه على كد ايدگم لان حضرت ابوك متفضل على أبويه وابويه يحبه

اتقربت عليه ام ريتاج لزمتني من جتفي وحضنتني

ـ شبيج عيوني مريومه ليش هيج صار حالچ بسم الله الرحمن الرحيم عليچ

ابتعدت عنهه ومسحت دموعي بايدي گمت عفتها

ـ عفية لاتعاملوني مثل المخبلة والمحتاجه
ترة بعدني ما اتخبلت حتى تتصرفون بهالشكل وياية
ليش مهونين السالفة وهي چبيرة ليش تتصرفون عبالك مصاير شي

شفتهه هواي منهارة رديت عليهه

ـ منو كل حااااااااااسبيج مخبلة؟
ومنو كلچ مهونين السالفةة
ااي ليش هيچ تحجين ياابنت الناس ماهوو وضعچ
وضعنا

حچيت هل کلمه ورجعت للگرسي من القهر عليها مگدرت أوگف نصيت راسي لان نظراتها وهي تلومني

عاطت وتصرخ ولاول مره تصرخ هيچ چانت بس. تصيح بس حدود صوتها ولأن ناعم ممبين بس هسه صرخت وعاطت

ـ سالو نفسكم وشوووفو شلون دتعاملوووني
تررة بعدني مااااااااااااااتخبللت حتى هيچ تسوون اانتتوو دتفتهمووون شداحچي اااني متزوجه بنييية بنييةة ابنيه

الله واكبررر عليگم الله واكبر الله واكبر

رجعت گامت تلطم وتملخ بوجهه أكثر كمت دفعت الکرسي عفت مگاني ورحت  عليهه حاولت الزم ايدهه لان تضرب حيل والجروح بوجهه گامت تتفتح

بس ماخلتني بقت تضرب بوجهه وتملخ بي دفعتني طگت صدري حيل

_عووووفني عوووووفني

ابتعدت خطوه ورجعت بضافرها تضرب اضطريت الوف جسمي عليها من ورى وحضنهه من ضهرهه واجتف ايدها  يلة كدرت اسيطر عليه والزم ايدهه وهي تصرخ

ـ عوووفني لا تلزمنيي كاااافي طلعتوني من طوووي
ووخرر عنيي وووخرر عن اييدي عووف ايديي
عووووفني

بقت تحرگ جسمها ودوس على رجليه بشحاطه لابستها بس أناااا حاضن لفيت ايدها بعبايتها گتلها

بهمس مايوصل الام ريتاج لان تبچي عليها

ـالله عليچ لااااا تعذبيني بس اااااااااااهدئي واعوف اييدچ شريد منچ لاتضلين تلطمين على وجهج ترى

عاطت بيه

ـ معلييييييييييك الطم على وجهي ااااااممممملخه ة معليييك وووووخر

نترت بيهل

ـ ووچ ششششبييچ اتخبلتيي مريييم ماااااچنتيي هيييج هذاا مو طبعچ ولاثوبج هيچ تجزعيين اذكري الله اذگري الله

ـ لاااااااا تسالني شبيية وخر عنييي وخررررررر

كوة لازمهه وهي تصيح وتصرخ عليه وام ريتاج طفرت بالحچي

ـ وانت عيني مين تعرف طباع مريم 
شنو جنت تعرفهه قبل

ـ ااانت ووين تحچيييين ام ريتااج اناا وين انتي وين تعالي لزميهه ويايه لاتاذي وجهه

ـ اي ياعيني مريم اصبري صح الضرف الانتي بي صعب بس ترة شدة وتزول

ابتعدت منها واحنة ونحچي صاح ارشد على ام ريتاج وکالت

_گاااافي مريم هسه ارجع وانت ابقى يمها لان عمي لايسمع وتصير مشگله

راحت ام ريتاج وهمزين مسدود ومخلين بيه عازل لان خطارنه هووواي بعدني لازم ايدها

عليهه وحچت بحقد ونبرةة غضب بصوت ناصي

_روووح وعووفني لا اصرررخ ههناا بنص اهلك وواكلهم تحرش بية ابنكم الشريف

بقيت حاضنهه وصاك على ايدهه

_ يلة صرخي صدگيني ماعاد يهمني شي أنتي هسه أبين ايدي وجاي أحميچ من أذيت نفسچ والضروره تبيح المباح

سگن جسمي گله دفو صدره وايده عيني دمعت من هالموقف اتمنيته بالحلال وهيج يحضني محتاجه احضنه وابجي على صدرة

همست بصوت مذنبه من الموقف

_الله يخليك وخر عنننني والله ايدي اذتني انت جاي
تگسرهااا مو تحميها

ـتودعديني ماتأذين نفسچ

_أاااي بس وخرر عني

_ صاار يابةة صااررررر

أبتعد مني وگال وهو يعض ايده عضت المتعاجز ينتر

_لاااااااا تبچين رحمة ال الله رحمه الله لاتبچين

هسة انتي شتريدين بالضبط والتريدي اسووي واناا والله اسوي بس أهدأي

گالت

ـ اريد اروح لاهلي شعندي باقية يمكمم

ـ يجرالچ..  امشي غيري ملابسچ واني اخذچ لاهلچ

ـ وبعد ما ارجع لهنا

جاوبتها

ـمريم ترى انا قبل الحادثه أغلب ملابسي نقلتهن البيتي حتى أحميچ واحمي نفسي من هذااا العذاب وحتى لاااا تشوفيني ولاااا اشوفچ وابري نفسي جدام الله انا جاهدت گلبي ونفسي الاماره بسوء

_شتقصد

_اقصد يعني هل موضوع مو يمي تتفقون انتي ونوار على هالشي هالامر بيناتگم أنتي وزوجچ

دمعت عيني گعدت على الکرسي سحبت من الباگيت جگاره ورثتها جريت نفس گتلها

_يله رووووحي گاعد هنا انتضرچ تخلصين واخذج لا تتأخرين..

بقيت گاعد ادخن واشرب بالچاي البارد ثلج وهي راحت  بعدني احس بدفو جسمهه
الحمد لله مافقدت عقلي بهاللحضة حب هالبنت مبني بداخلي بناء من فولاذ ما اعتقد بيوم راح يتهدم

اتعوذت من الشيطان ورديت شلت الجاي اريد اشرب بس ماعرف شلون وكع عليه ودمر ملابسي
غسلت ورحت لغرفتي اغير بين متخلص مريم..

مريم///عفته ورحت للغرفة الم بغراضي أبچي على حضي أخذتلي جنطة صغيرة خليت بيهه ملابسي ولبست عباتي  اباوع على الغرفة
ماحسيتهه غرفة عرسان من يوم التزوجت حسيتهه قبر
رحت يم المراية اباوع لروحي رغم مكسورة بس اشوف نفسي بكسرة صغيرة باقية منهه
وجهي مشوه بيهه مثل حضي على السريعه رشيت مي ورد وخليت باودر اغطي اثار وجهي المخرمشه

امسحت دموعي وطلعت من الغرفة وية طلعتي طلع رعد من غرفته بگل مكان صرت اشوفه
ايام حبنة جانت شوفته حسرة بگلبي وكل شهر اشوفة مرة لو مرتين لان يستحرم

بس هسة صرت يومية اشوفة چدامي
لا الشيطان تارگني ولا رعد تارگني
ولا الحياة تارگتني الاختبار صعب واني خايفه منه

رعد//ماگدرت الزم دموعي من شفته حاولت اضمهه بس فضتحني عيوني

ـ لبست تيشرت وبنطلون على السريع وطلعت لكيتهه واكفة يم باب غرفتهه
شافتني وبچت
صح عيوني مابجت بس گلبي احترك وگابلهه ينوح
تربيت على كلمه الرجال عيب يبچي
اتقربت عليهه وسالتهه.. برود

ـ اذاااا كملتي.. حتى نروح

ردت بحقد
ـ لا...
ماكملت دعاء عليك

كزيت على اسناني ماحچيت وياهه عفتهه تحچي الي بخاطرهه گتلها

_يله أدعي قبل لا نطلع

ـ اي ادعي ووووولا راح ابطل ادعي عليك
حسبي الله ونعم الوكيل
الله يطلع حوبتي بيك يا رعد
دمرتني واستهزأت بمشاعري
ذبحتني وعفتني انزززف ومارفلك جفن
خربطت حياتي كلهه
وختمتهه بسكوتك عن زواجي بأخوك وانت تعرف بحاله

جريت نفس من الجگاره جاوبتها

ـ تمام وبعد شسويت بيچ

ـ حقك تستهزاء
الكل هنا محتقرني وانت اولهم
هسة عرفت ليشش مادافعت عن حبك الي وليش سكتت
وليشش كذبت عليه

غدار لان غداروعيشتني بأمل انك نهيت الموضوع وووو غيرهه من الذكريات التعيسسة
من اتذكرهه واربطهه بالاحداث الدتصير كلشيي يتوضح جدامي انت مجرم مثل ابووووك

مديت ايدي وطفيت الچكاره بيها حتى أحس بلسعة النار ومانجرف جاوبتها وجع الحرگ ترس وجهي

ـ وتالي وياچ يامريم

ـتااالي  اتمنى الله ياخذ امانتي واموت وارتاح منك

ماكدر اضل عمري كله عايشة بهالصدمه ودمار الاعصاب اتمنى انساگم واطلعگم من عقلي وافتح صفحه جديدة ومافگر بيگم اتمنى تتبخرون من حياتي
اتمنى انضرب براسي واعيش بغيبوبة وانساك وانسى اهلگ وجبروتهم وياريت افقد الذاكره ولا كل احيا بهالتعاسة والاشمئزاززززز
ياريت لو يرجع بية الزمن

وووبذييچ اللحظة الوكفتني بيهه تريد تسالني عن الطريق االبسك ولا أحچي وياك و ما ادليك على شي ولا چني شايفتك

ولك مو عوادي اررد على بشر بالشاررع شلون وكفتلك وحطيت وياك
شنو هالصدفة الخلتك جدامي

شنو هالمصيبة الخلتك تصير صديق اخوووية وابوك صديق ابوية
ياريت يرجع بية الزمن لااحبك ولا اشوفك بعين واحسك بكلب
ياريت وياررررريت
بس الياريت كلمه زرعوهه مااخضررت كلمة يتمنوون بيهه ومايحصلوو

ـتمام مريم  اذا انتي شايفتني بهالطريقة
ومتريدين تصدگين كلامي ودفاعي عن نفسي و ندمانه على الماضي العشناه سوية
ف خلي ابالچ انا ابد مندمان ولا يجي يوم راح اندم لان مسوينه شي خطأ بالعكس

وهسه ماگدر ادافع عن نفسي جدامج لان اعرفچ مستحيل راح تصدكيني

ضحكت تستهزاء

ـ وبعدك تريدني اصدكگ كلامك

ـ وحق كل ذرة دمعه بچيتهه على ايامنه ماچنت اعرف باخوي هيچ حالة

ـ ماريد اسمع تبررير مارريد كااااااااااااااااااافي
عدلت عباتي ودفعته بجنطه اريد امشي وشفت عمي ابو ارشد گبالي واكف
انخطف لوني اكيد صارله هواي واكف وسمع كل حچينه

رعد//بعد المعاتب والكلام المؤذي الحچتة مريم دفعتني تريد تمشي التفتنة اثنينه لكيت ابوي واكف منتجي على عوچيته وعينة علينه يسمعلنة

ضلينة لثواني واگفين ننتضر ردة فعل ابوي عن السمعه بس ماحچى شي اتحمم واتقرب علينة اثنينة. ووكف يم مريم

ـ عمو مريم راح اعتبر نفسي مسمعت شي ولا شفت شي انتي بنتي وهو ابني
بس الاطلبة منچ لاتروحين لاهلچ

تقدمت جاوبته وخليت مريم وراي

،ـ لا خليهه تروح لاهلهه ترتاح يمهم

جاوبت مريم

ـ زين ممكن اسأل بصفتيي شنو تريدني ابقى هنا؟

ـ ياعمو حقچ بكل التحچي
بس نوار بعدنه ماعرضناه على اخصائي وحتى مااخذنه الجواب الاكيد الارجو منچ متحچين شي الى ان نتأكد من حالة ابني وذاك الوقت سوي التريدي
محد يوكف بوجهج
بس خلينة نتأكد من حالته
ولا تنسين يابنتي
اخوچ عريس
وهيچ خبر يگسر فرحته النتضرتوهه من سنين

سكتت مريم ماحچت شي  بس عيونهه تدمع وتمسح بيهن انا گلبي يدمع عليهة

رجع گال الها بثقه

ـ انا حسبة ابوچ واطلب منچ هالشي واذا تحبين ابوس ايدچ

جر ايدي عمي راد يبوسهه راسا سحبتهه منهه ولزمت أيدة

ـ لالالا عمي شدسووي مو هيج

ـ لاتفضحين شيباتي يابنتي على نهاية عمري..
بس انطينه هالچم يوم نتاكد
وراهه سوي التريدي

ـ بس محتاجه اروح لاهلي

ـ روحي بس لاتباتين ياخذچ رعد ويرجعچ
يابنت الناس ابوچ هم مريض ميتحمل هيج اخبار
وابوچ عزيز على كلبي

ـ عزيز على كلبك وسويت هيج ببنته

ـ البشر يغلط
وسبحان الميغلط
ياعمي مستعد اعوضچ عن كل التريدي اطلبي نجمه من السما تجي ليمچ..
بس هالسالفة ضميهه لاتحچيهه

مسحت دموعي واخذت نفس وكلتله
ـ صار عمي بس بشرط

ـ اذا چان نوار رجال او لا
ماريد وكمل وياه

ـ خلص التكولي يصير وذا رجال أنا أطلگچ منه أجيب فريضتنه سيد عسگر ويطلگچ
بس لاتحچين بهالوگت حتى لاتنفتح الحلوگ علينة ويكولون عافت زوجهه وهو بغيبوبه

_صار عمي راح اسکت

_يله روحي يابنتي زوري اهلچ وسلمينة عليهم وهذا ضرف بي 250 الف دينار كليلة ألسلمان هدية من عمي الك.. 
وهذا ضرف ثاني بي 100 الف دينار گليلة هذا الفضل منچ
وهديته عرسة الچبيرة يمي بيدي اخذهن اله

مريم//تفاجات مچان هيج يحچي عمي دائما بالصياح والاوامر ياخذنه بس هسة النبرة تغيرت
اكيد الصار مو هين عليه استغفر الله ربي
يارب الصبر والعفو منك يالله

اخذت الفلوس وکتله

ـ عمي يعني وعد

ـ طالما ماهاوية ابني وماراغبتة والصار بعدنه ممتأكدين منه ف  ماجبرچ على شي يابنتي بس التوقيت هسة خطأ
ميصير تتركين البيت بهي ضروف الناس ماترحم
والحچي عليچ مرجته

هزيت براسي يعني اي ميخالف لان حچيه صدك

جاي امشي گال

ـ يلة بنتي عوفي الملابس الماخذتهم ولا اتروحين بالدشداشة ادخلي بدلي هدومج ولبسي شي حلو وروحي زوري اهلچ وية ارشد

جاوبته
ـ  انا اخذهه مو ارشد اريد اشوف سلمان وابارگله

ـ اي ليش لا

وانتي يلة عمو لا تتاخرين

گلت الابوي

ـ بس انطيني سويچ سيارتك لان سيارتي بالتصليح

ـ شبيهه ليش بالتصليح الصبح جانت تشتغل

ـ بعد عطلت شسويلهه

ـروح عند ارشد السويج شوفة يجوز حاطة  على التلفزيون او بعدة يمة..

ـ هسة اشوفة..
رحت للهول لگيته على ميز التلفزيون اخذته وطلعو شغلت السيارة وكعدت انتضر مريم للان مواثق من ابويه وكلامه بس يجوز الله هداه

عفتهم ودخلت للغرفة افگر بكلام عمي معقولة يوفي بوعدة وياية شنو هاللين باسلوبه هالموال جديد والله يستر منه ...
غيرت ملابسي لبست طقم تنوره وستره وفوگاها عبائه وطلعت

سلمت على البنات وعمتي وطلعت لكيت رعد بالسيارة مشغلهه وگاعد يدخن شگد يدخن خرب

فتحت الباب الخلفية اريد اگعد وصاح بية

ـ ليـش تكعدين ليورة..  تعالي كعدي هنا يمي

ـ ماريد اكعد يمك

ـ ولچ بابا شيحچون الناس من يشوفوچ كاعدة وراية اانا حمااچ هسةة مووو عبالچ الايام الخوالي من چنت اجيج سايق..

ـ عزاااا بعينك صووووتك لاحد يسمعنه

ـ تعالي گعدي هنا وخلينة نمشي عاد

ـ اووووف استغفر الله سديت الباب وجيت كعدت يمه
صعدت وجريت الباب قوي رادت تتفلش

مشى بالسيارة واحنة ساگتين اتمنيته يحچي كلمه وحدة ويايه بس ابد مانطق رغم المسافة مو قريبة ولا بعيدة بس حسيت بيت اهلي جيرانه الطريق بسرعه خلص وياه

ليش ساكت ليش ماحچى زين اذا ميريد يحچي ليش اصر هو ياخذني معقولة بحجة يبارك لسلمان لا طذاب ماصدك اكيد عندة غاية

رعد// انتضرتهه ترجع تحچي عليه وتتحسب وتدعي حتى ابرر موقفي بس سكتت ولا كلمه نطقت
مريم ابد ماچانت هيج
جانت وردة مفتحه ومستحيل تدعي على احد
بس هي هم الهه أيد بالصار لنوار اكيد گلتله شي خلته يضرب نفسه طلقة....
استغفر الله

ماريد اظلمهه يجوز لان ماگدر يسوي شي انهار
اگيد ميعرف نفسه هو هيچ حاله وعباله مثلنه
والا چان ماقبل يتزوج لو يدري بنفسه

وصلنة لبيت سلمان دكينه الجرس هي دخلت وفتحت باب الصاله اليه

لگينه ابو سلمان سلمت على ابوهه حضنته وبوسته وبعدين راحت يم امهه وخواتهه

اجى سلمان فرحان گلامنه چان مختصر لان انا خجلان منه بقيت يم سلمان وعمي ابو سلمان
باركت السلمان  على خطوبته

سولفنة وحچينة عن السجن وصحه نوار  تقريبا ساعة ونص كعدنه وطلعنه
صعدنة السيارة وسلمنه وتحرگنه

بطريق الرجعه كلت لازم ابادر بالحچي طالما متريد تحجي وياية..

مريم// دخلت بيت اهلي ولكيت ريام هناك كعدو يسولفولي عن خطوبة سلمان من غفران وشنو الصار

ـ يمعوودة هاي صديقتج حقنةةة لاتقبل بصفگه لا تقبل بهلهووله تكولين اسم الله فاتحه عدنة مو عقد قران

ـ مو كلتلچ يا ريام هي هيج غفران هذا طبعهه

ـ طبع شنووو شنو ذنبنه متخيلنه نفرح بوحييدنه

ـ الهلولهه والبدلة والصفكه متكعد بخت وهالامور فرحه وقتية مو حقيقية

ـ كافي تتفلسفين مريم خاتون ندري فرحه وقتية ومو حقيقية بس هي همين خلي شوي تفگ هالحزن هي مو اول واحدة ترملت بخطوبتهه

ـ كل بنية طبع شكل اكو التنسة واكو المتنسة

ـ انا ادري ليش اخوچ ذابح روحه عليهه لو تشوفين شسوت بي من راد يعقد بالامام العباس يبوو عناادهه ميتسوولف

ـ الله يهنيهم يارب

ـ شيهني لخاطر الله اذا هي بعدهه تحب خطيبهه متكوليلي شلون حيعيش وياهه سلمان

ـ هي مو تحب خطيبهه الله يرحمه بس صار عدهه ردة فعل وهو يعرف بهالشي وراضي

ـ عود ماوصيييج بالعررس همين لاتجيين

بقيت ساكته واباوعلهه شحچي وياهه لا اگدر اچذب واكول رجلي نايم مستشفى ولااكدر احچي الي بگلبي
ردت امي

ـ غير رجلهه نايم مستشفى وانا هم كلتلهه مترهم تعوفين رجلچ وتجين ان شالله تعوضهه حنة وعرس..

دنجت راسي وكلت
ـ ان شالله..  الله كريم

ـ يمة خطية نوار ماگالو شوكت يكعد من غيبوبته

ـ لا ميدرون الاطباء

ردت ريام
ـ يابة الطب بالعراق زباله ذاك اليوم جيران مرة حماية دخلت تجيب كلشي مابيهه طلعت ميته المكرودة وعافت وراهه اربع اطفال وقبل تقريبا شهر ونص اخو مرة حماية بطنها كامت توجعه يروح للطبيب يكلة كلشي مبيك عندك غازات تالي طلت عندة مصران اعور وانفجر ومات الله يرحمه بابا طلعو من هالمستشفى ترة يضل طول عمررة بغيبوبة نايم.. ومايگعدو

ـ الله كريم ان شالله..
كلشي مكدرت احچي الهم رغم اتمنيت احچي واعترف واكلهم بياض الوجه الشفتو بهذاك اليوم مو مالتي عمتي مشتريته اتمنيت اكلهم بعدني بنت بعدني مثل مطلعت من هالبيت اتمنيت احچيلهم عن حالة نوار..  بس كل شوي اتعوذ من الشيطان والزم لساني..

مر الوكت وصاحني سلمان

_مريومه حبي  يلة حماچ ينتضرچ

حضنته

_حبيبي ابو الاشبال الله يوفقك بخطيبتك

باوست ابويه وامي والبنات   وطلعت
صعدت السيارة جثة بلاية روح
بقت روحي يم اهلي وابوية المريض

نفس الهدوء ونفس السكته ألظاهر خلص الكلام بيني وبين رعد وضلت بس المصايب..

گال
ـ مريم اريد اعرف ليش نوار هيچ صار حالته

ـ معقولة تسأل؟

ـ سبب وصلتچ لان اريد اسألچ حچيتيلة شي عننا؟

ـ هههههه والله ثقتك عاليه بروحك
من يوم الوعدتني وخلفت مسحتك من حياتي وماااا
شوفگ حتى ظلك مااشوفه

ـ انتي ممصمهه تخليهه براسي رغم برمضان حچينه بهالموضوع واتصافينه

ـ برمضان شي 
والصار هسة شي ثاني
نت متصورة اتزوجت اخوك ف استلسمت للامر الواقع
بس هسة انكلب كلشيي

ـ بعدة اخوية ما اختلف شي

ـ تقصد اختك

ـ مريم هالحجي سابق لاوانه
وبعدين انتي ليش مصممة هو بنت مو ولد

ـ لان شفت كلشي
بس الماعندة عقل يصدك نوار ذكر مو انثى

ـ شتقصدين شفتي كلشي؟

ـ باوعتلة بطرف عيني ودرت عيني عنه..  بلة هذا شحجي وياه استغفر الله

ـ مريم احجي كلشي لا تضمين شي لخاطر الله

ـ أنت شتريدني ااحجي

ـ شنو الشفتييي واتاكدتي نوار بنتت مو وولد

ـ صدك جذذذب متكليي شبييك شلون تريدين اافهمك هيج سالفةة

ـ اوگ اوووگ كولي فهمت شنو قابل هسة اكتشفتيي ليشش ماحجيتي ببداية الزواج ليش ماكلتي اابنكم بي خلل مو طبيعي

ـ حجيت وياه اني درايرة وجهي للشباك ماباوعتلة..

لان ماخلاني اشوفة ببداية الزواج
وصادف وراهه رمضان وكلمن بحاله
جنت احس كلامه وتصرفاته غريبة وتميل للأنوثة
مكياج تسريحة ما ادري شنو
بس بيوم المصيبة جان راجع سكران وغيرت اله
هو حس اني شايفه  شي فراد ينتحر..

من قهري حچيت الرعد وحسيت حرارة السيارة صارت الف درجه فهرنهايت الطريق صار شطولة اريد مساعه قصير الطريق

همزين راح نوصل حتى يخلص هالموضوع وينتهي..
اول ماوصلنة ما انتضرته يدخل السيارة للكراج راسا نزلت ودخلت البيت وهو دخل وراية.
.

رعد///اتفاجئت بالحجي الگالته مريم
ماگدرت تحچي بالقلم العريض بس فهمت نوار واشيائه مو قانونية والطفل البعمر سبع سنين مو مثلة

دخلت طاير لامي اسالهه معقولة منتبهت على ابنهه بس للاسف نفس البرود والامباله أتخاف تحچي

كلت ميفيد الحجي وياهم  مر يومين السيارة محد اشتراهه ولا طلبهه رحت الؤي اداينت فلوس بين متنباع مريت على مستشفى الگفيل
عرفت اكو وفد اجنبي من الخارج جاي سالت عن اختصاص امراض تناسلية ودلوني وفعلا حجزت
وكالو بعد عشر ايام يجي الوفد

هالايام تمر على اعصابي حاول ما اتواجد بالبيت كلهه يم نوار بالمستشفى مااجي للبيت بس بليل اسلم على امي وروح البيتي هاي مرت اخوي وانا مااسيطر على مشاعري

ابوي عاند يساعدني بفلوس النوار بقيت افتر على جماعتي اداين من جديد وهم لؤي دايني

ثامن يوم عرفت سلماان ووكع بشدة كلش چبيرة
ويحتاج معجزة حتى يطلع منهه سيد سلمان محتاج

أبوية عاف نوار وحالته وانخبص بسيد سلمان كأنو واحد من ولدة الوكع بهالمصيبة  ماخذ ناس وجايب ناس والفريضة سيد عسكر وياه يفتر

انا مارحت لان نوار حالته تنتكس فرحت من أنباعت السيارة وقبضت فلوسهه ورجعت الديون واجى الطبيب المختص

بسبب حاله نوار الخاصة نقلناه باسعاف للمستشفى الكفيل علة حسابنة  كشف عليه الطبيب وبقى وياه تقريبا ساعتين

من طلع ووياه طبيب عراقي يترجم اليحچي..
استقبلناه اني وارشد كعدنه بلغرفه مال الطبيب وگال

_الخبر المؤسف أخوگم مو ذگر اخوگم انثى بامتياز
گلشي بيهه جاهز لتكون انثى متكاملة
والعملية مو صعبة سهل نسويهه نشيل العضو الذكري الوهمي والعضو الانثوي نبرزة لان مختفي وشوي تجميل وينتهي الموضوع

يحجي الطبيب والصدمه مرسومه على وجوهنة

_بس دكتوور شلون تگول بنية ومن بلغ ماعندة دورة؟

_حالة اختكم تسمى ثنائيي الجنس يعني أکو ينولد وهو عنده(بظر)انثوي واضح وبارز وياه قضيب زغير أو شي کانه مقسم قسمين مثل الشفرات وهذا الشي يجي نتيجه تشوه ولادي

يصير نتيجه زياده او نقصان  بكروموسومات، بحيث يكون بعض خلايا كروموسومات XX وبعضها  XY، وهل شي يکون واضح اثناء الولاده  وتنعمل للطفل عمليه وهو عمره ايام او اشهر

لكن بحالة اخوگم تختلف رغم أگو اشياء أدل عليه انو ثنائي الجنس لگن مو بوضوح لذ أنتم ملاحضتو وبنيتو عليه هو ذكر

_زين ليش اخوي هيج حظه

_بلعگس خلال مسيرتي الطبيه اختگم محضوظه  لان أجتنا حالات ابنيه وعالجناها أكتشفت نفسها ولد اثناء زواجه ووعدم قدرتها على ألإنجاب،

وأگو هو ذگر وعاش ومات ذكر من اتوفى وشرحنه جثته اكتشفنه هو انثى او ثنائي الجنس
 

_ زين وشواربه ولحيته..   يعني صح خفيفات ماكاملات بس عندة شارب ولحية شلون تكول انثى

كال

_ هو هذا الاريد احچي بيه
اختكم عدهه كيس دموي ولازم العملية باقرب وقت نسويهه لان ممكن يعرض حياتهه للخطر

ـ وشنو سبب هالكيس الدموي؟

ـ احتمال چبير اختكم گانت تاخذ حبوب ذكرية وصار عدهه لحية وشارب لذلك الحبوب خربطة الهرمونات اثر عليها وسبر تجمع الكيس الدموي الي اذا بقى راح يكون على شگل عقده سرطانيه

ـ مستحيل نوار يسوي هيچ شي شنو هالحچي اكيد اكو غلط
جرني من ايدي ارشد وهمسلي

ـ لاتضل تعارك ذبان وجهك هاي طبيب اخصائي كشف عليه وگال هو انثى ليش هالعناد

ـ مو عناد بس

ـ بسس شنوو..
اذا على الحبوب احتمال جبيرررر ابوك جان يجيبهه لاخووك تتذكر من جان يروح يجب مجموعه ادوية على اساس مقويات وفيتامينات لنوار شمدررينه شنو جان يااخذ

وگفت ومگدرت استوعب اجرام ابوية ..  معقولة ابووية يسوي هيج ارشد ماكدر اصددك

ـ هو الوحيد بينه اليعرف حاله نوار فما استبعد هالشي

التفتت على الطبيب وكلتلة
شوكت تسوي العملية؟

ـ حاليا خلصت شغلي بكربلا باجر الصبح اطلع متوجه لاربيل اذا تحبون اني الاسوي العملية هذا عنوان المستشفى الاكون بيهه..
بس ارجع واكول لا تتأخرون بالعملية الكيس متجمع بالرحم و هو الشي مو بصالحهه

_صار دگتور

كمنا  انا وارشد بسرعه اخذت السويچ سقت طاير کلشي ولا نوار يصير بيه شي لازم استعجل گلت الارشد

_ابوك عنده افلوس ومانطاني من عرف النوار

_زين العمليه يراد الها گوووم

_ووولك مووو بعت السياره غيرر علمود نووار عرفت  اكووو انه

_الله يعوضك بس هسه شنسوي 

_انروح للبيت والله گريم

بيدنه التقارير والاشعه اخواني وامي وابويه بديت أحچيلهم حالة نوار بالتقارير والادلة

هنا عاط ابويه

ـ ماااايسوووي العملييية ااخوكمم ااااخوووكم ولللللددد ذكررررررر اااابدد موو انثى

گتله
ـ ياابة هي مو بالحجييي نواار راح يروح من ايدنه عدة كيس دموووي راح ينفجررر بأي لحضة اذاا ميسووي الرحم مالته مايتحمل

ـ كلشيي مابييييي كااافي خراابيط

،رد ارشد
ـ كلة بسبب جبرووتك واستبدادك هييج سوويت بنواار

گال صادق

_أذن أغراض أخي ستتحول الى اغراض انثى اليس گذالك يااخوتي

جاوبته اي

أمي عاطت تبچي مقهوره
عاط ابويه عليه

ـمووو بکيفك لا انت ولاااا ارشد سميي التسمييييي عمليية ماگوو يموووت خلييي يمووتت ولاا يكولون اابن ابوو ارشدد خنييييث ووولك شلون من يكعددد. اخوووك شلوون يواجه الناااااس شلووون يرررررفع راسة بين الناس بعد ماااجان زززززلمهةةة ينگلبب مرررةةةةةة اابد والله على جثتتي

ردت ام سكينة

ـ يبووو شهالفشلةة بلة هسةة هااي المرة الحاطيهه بنصكمم شنو تقربلكمم مرة بنتگم اوووع شنو هالمصاايب ربي جيرررنه من العباان نفسس

گال صادق

_نعم وضع مقرف لايستهان به ونحن سنقوم بعمليه لم تحدث في تاريخ عائلتنه النبيله وافشلتااااااااه

مريم/من ارتفعت اصواتهم طلعت اركض من غرفتي عرفت اللحظة الحاسمه اجتي كلت اشوف كال الطبيب عرفت نوار انثى مو رجل مثل مچنت متصورة

عمي رفض نوار يسوي عملية تحويل الجنس
وصار الصياح بيناتهم الگل يحجي بنفس الوكت الكل يصيح الكل عندة رأي يريد يفرضة بس اني الساكته بيهم انتضر شوكت يعتقووني

حچت ام سكينة ومستني بالحجي كلامهه صحيح بس مؤلم

شفت ام ريتاج جانت تخابر ودخلت غرفتهه الهوسة عالكة هنا والولد متمالخين بينهم

صياح عمي واصل لسابع جار

ـ كلتتتك نوووار موو  بنت مووو بنتتتت

ـ وكفت غضبان على تجبر ابويه گاااااز بين اسناني
أنت هم معتبرررر نفسك اب مثالي ياشيخ زمانك

ارشد لزم ايدي
-اهداااء رعد اهداء هذا الحجي ابونه عيب عوووفن

نكتت ايدي من ارشد واشر باصبعي اله

-لااا تخليني انسى حتى انت اخوووي

صاح ابويه 

-انت شبيك بويه رعد ترى اخوووك عنده عيب خلقي مووو ابنيه
والاطباء ميفهمون بگدي

-أنت بعدك تفصلنا على مرامك مووو شوووف لاااااا راااااح اخلي بعيني انت ابويه ولاااااا راح احترم اي صلها ااناا بيدي ااخذةة واسويله العمليه لايموت والربح بيك لا والله نوار اعز منك عندي

ـ وووولك العاالم شتحچيي عليينة ذااك اليوم زوجنااااااه وشووفنة بيااض الوجه لاهلهه شنكوووووول لاهل سلمااان مين جبنةة النيشااان ولك ماا فكررت بسمعه مرريم

ـ عوف مريم على جهةة ااانا اعالج خرابيطكممم  السويتوهه

ردت زوجة رشيد

ـ عزة الله يساعدچ يامريم شلون حالچ وانتي متزوجه مرة مثلچ شلون لعبان نفس

گتلهم

ـ عمي ااني اواجه اهلي بالصار واعترف الهم معليك بية عمي الله يخليك  اكدر ادبر نفسي واكيد راح يعذروني

ـ شلووون حجي هذااا بنتييي انتي مرة اابني لاتصدگين بكلام هالاغبياااء
.
واجهت ابويه واشر بصبعي

ـ ااي احنةة اغبيااء وخليك انت بعيد عن مريم ونوار ولاااااااتقربهم لان كاااافي دمرت حياتي مااسمحلك ادمررررحياتهمم

امشي مريم ااخذچ ألبيت اهلچ ومناك راح اسفر نوار. الاربيل وذا انت متفشل منه انا وياه نعيش بيتي..

گال ابويه

ـمريم  اتفطني ياعميى حياة اخووچ بيدي انا الراح ادفعلة حگ العطوه  وخااااااااااااف ماتعرفين ااابنت اابو سلمان
ترةة عمچ ااخو ابوچ سحب الشرركه من اااخووج سلمااان من عرف بيه اتزووج وضل اخوج بطرررك راتبة الست ميه الف مييين يسدد الدييين العلييه وينطي حگوووگ

جاوبته

ـ يعني شتقصد ياعمي

ـ يعني حيااة ااخوچ بييدي يا بنت اخووي.. اخوچ ينسجن ويروح برجلين فاااااهمه خلي بالچ وبالگم

موو ابو ارشد مووو. انااا الاخليي الناس تااكل وجهييي
مو اناا الاخلي الناس تلزم عليية لزمهه
اناا الزم لزمه على. الناس وافصل واحچي

وخلي بألچ نوار مايسوووي العملييية ويبقى الوووضع على ماهوو عليييه

رد هادي بغضب وگف وسط البييت

ـ ترى  كلام ابوي صح ادري تردون اتسون اله عنليه مافكرتوو بحچي العالم مافكرتوو شلون وولد ينكلب بنية وتالي يسمونه بيت ابو الطووط علمود نوار

وسمعتنه وسمعت جهالنا وبيتنا وابويه وتاريخه يضيع و نصيرر مثل الطايحين الحظ الي يطلعون بالفيساات هاليومين عندةةة لحيةةة وحااطلي مكيااج ولابس ستيااااان ويتمرككص

رد رعد بعصبيه

ـ. وووولك ااخووك مرريض يموووت مو مثل هذوول ااتقى الله مرييض مو بيدةةة هالشيييي

رد ابو ارشد

ـ مريض ااو لاااااا يبقى الوووضع على ماهوو عليييه غيررر هالحچييي ماعنددددي

مريم// انهاريت من هالحجي وماضل عندي دمع

اشوف بوجوه زوجه رشيد وام سكينه اموت الف مرة ماعرف شنو هالنضرات وماعرف افسررهه
اندك الچرس وكالو اجى ابوهه لام ريتاج

اسمه حجي  عسگر يصيحوله سيد عسگر
يصير ابن عم عمي ابو ارشد وزوج خالتهم وبنفس الوكت الفريضة مالت عمي..
كلهم التمو بالديوان
رحت للغرفة اخذت التلفون وخابرت امي أسال عن السمعتة

_يمه شبيهاااااا  شرررررركه سلمان صدك مسحوبه

ـ اي والله يا بنتي صح من عرف بي عقد اجتي مرة عمج تهوس وتتعارك كتلتو بنتي وهسة زوجتو ابنكم وخلت عمچ ياخذ الشركه من سلمان وصفة كلشي ماگو

ـ يعني ماعندة يدفع حگ الفريضة مال الولد الدعمة

ـ لو عدنه يابنتي ليش نخلي عمچ ابو ارشد هو اليدفع وهو اليتفضل علينه ولوما ابو ارشد چان رحنا برجلين

الله يخلي اتبرع بعد اسبوع بلگعده يشيل كل الفلوس لان يحب سلمان وحاسبه حسبت رعد وابوج ماحچى  شي

متحملت السمعته سديته بدون سلام وشهكت بالبچي   خلص ادمررت راح اااضل اسدد ديوون اااهلي بهالعااائلةة

ارتفعت الاصوات برة عدلت حجابي وطلعت لكيت عمام نوار ملتمين ونسوانهم همين موجودين
النضرات الي تضرب بگلبي ضرب
عبالك مسوية شي يخجل والكل مشمئز مني...

حجة واحد من عمامهم..
'يعني السمعنااه صحيح نوااار بنيية

رد عمي
ـ العاالم كلشي تحچييي تصدك بالغرربة لو بأخووك

ـ اااصدك بالدكتوووور يااا فهيم زماانك تدررري الطبيب العراقي الوية الطبيب الاجبني الكشف عن اابنكم نوااار شيصيررر من عنديي

انصدم عمي ابو ارشد من عرف اخو يعرف الطبيب

ـ تدرري شيقربليي مااخذ بنت ااختتهه لمررتي
ولووماا ينطي الاسمم الكاامل ويكول المريض دااخل بغيبووبة فلااا ااصدك ااابن ااخووي الصارلةة شهرين متزووج يطلع بنييية.

الدنية محتركه برة الكل واكف ومصدوم من كلام عمام نوار

رعد ضل ساكت ابو ارشد ميعرف شيحچي ارشد واخوته همين ساكتين لا يكدرون ينكرون ولا يكدرون ياكدون

ـ ززين مدگلييي على يااصخاام وجهه زووجته لابنك الخنثيي
متكلي هالبنية منو بعد يااخذهه وهي متزوجه بنية مثلهه

متگلي علىى شنوو سويتلةة ثاااالث وورة العرررس الثااالث يعني الزززلمه كدهةةةة وكددر يااخذذذ مرتةةةة

لوو مرته لااااعبة ومخلصه وية غيررة وجبتووولة بيااض وجه جااهزز لان بنت صاحبك وساتريين عليهه بعيبههه

وهيي تستترر علييگم بعيووبكم وطمطملي واطمطم اللك ياحسد

عاط ابو ارشد

ـ وووولك شلوون تطعنننن.بببنت الناااااس كددامي
هووو عفت محافظتي وجيت هنا من شرگم اشلون لحگتوني

رد

ـ.اي ضيع الحچي اااااانتوو السالفتكمم غريبةةة وعجييبة ياا كلييط كوومك

ـ ووولك اانت فاهم غلطط اابني ماااااابي شي گدرر يااخذ زوجتهه

ـ ووولك كاافي تتتچذببببب كاافي مو دكلك الطبيببب كراايبب

رد حجي عسگر

كافي عياط ووصياح واذكرو الله وستهدو بالرحمن
فكرو بالاهم

حاليا هالبنت ميصير تبقى بهالبيت بيهه اشكال شرعي لان عقد زواجهه باطل. والكل هنا غريب عنهه
زواجهه باطل گعدتها بوسط هل شباب

كل الموجودين صارو يباوعولي بنضرات شفقة او اشمازاز عمي من شافهم هيج كلهم صاح

_طلعوووو معليگم نعلعله على خوتكم صدك لو گتلو القريب عقرب

طردهم عمي بس بقى الفريضة ﺣچي ؏سگر

گاله عمي

ـ اانت شكاعد تحجيي حجي عسكررر شنو باطل

ـ مثل ما اكلك العقد بااطل لامرة ابنك ولا شي لان ابنك مو ذكر واصلا بنتت لذلك العقد باطل

گمت أكل باصابعي  من هالفضايح والكلام النحجى عني طلعوني مو زينه وساترين عليه بدون وعي رحت الغرفتي البس عبايتي اشرد انهزم منهم

رد عمي
طالما هيج الحچي وحتى لا ااخش بخطية البنية
راح ازوج رعد لمريم

قبل لا اطلع عطت

ـ شنوووو مااااريد اتزوووج عووفوووووني كااافي حلووو عنييي اانيي اريد التهاايم معليك بية. معللليكم بية ماااريدگم

عاط رعد

ـ اانت شنوو من بشر  هااااا تزووجنه بيفكك واطيح حظنة بكيفكك على كيفك حجيي ويني وين الزواج
هسه مشگلتي نوار وبس والغيره مااهتم فاهم

_تزوجهاا

_ مااازوجها وگتلك اناا هسةةة حايرر باخوووي نواار وبسس ورايح منگم اخذ افلوس واجدد الجواز

رد حجي عسكر

ـ اقتراح والدكم مابي شي على الاقل يلم الموضوع والبنية متطلع من بيتگم

وگفت بعد مااخذلها وهي ماتريدني گتله

_ابد لاتفگرون

عاطت مريم

ـ ماااريد مارييد عووفني

بقتت تصرخ والبنات يجرن بيها يريدن يهدائنها الولد بيناتهم اتعاركو بين مؤيد وبين معارض

عاطت

_راح  اتخبل من هالوضع شنو هالبيت بيت شياطين

رديت على ابويه

ـ ماتزوجهه بهالطرريقة عدهه ااهل وتاخذ رايهم معلييك بيهه. عوفها حرررام والله

ـ من تصير يم اهلهه ويعرفون الحقيقة ماراح يسامحوني وترووح هيبتي هسة حارة بحارة وراهه فترة ويقنعون يصيرون كدام الامر الواقع

ـ اانت مو كلت فزعت لسلماان  ومنها ميرفضلك طلببب عادي روووح استسمحه هو وابوه

ـ بس ابو سلماان ماراح يسامحنني بشغلة نواار وهيبتيي راح ترووح بين النااااااااااسس السالفة صارت بلسااان ااخوتي واعرفهم لاخووتي يصيدوون بالماي العكرررر

تتزوجههه يارررعد لوو لااااا

ـ لاااا ما اتزوج رعد ولاا ااريييدةة ماريد اي واحد منگ فاااهم

ـ اانتي سكتيي الحچاية مو االج يااابنت ابو سلمان
ااحچي وولك ااي لو لاا يارعد

نصيت راسي ورجعت باوعت بعيونه

ـ لا مااااااااااااريدهه

ألتفت على اخواني وکلهم

ـ خلصصص رعد مايريدها  انتو خمس وولد واحد منگم ياخذهه ويلم المووضووع

گال صادق

_ابتي ماهذا الهراء اتزوج على زوجتي لا والف لاااا انا لاااااستطيع واحده تگفي لي لا اريد

گال ابويه

_مصخم شبيك خوش بنيه

صاحت مرت صادق بعصبيه

_عميي عوووف ابنك ولاااا تدنون عليه فوووووك ماحامله حچيه و١٢سنه خبلني بگلامه وگوه رهمت أحچي. وياه فصحى تالي تاخذه مني حار ومکسب ابد والله اله شويه أگوم اعرب واشعر

گال صادق

_لا تقلقي يازوجتي لن ولم ولا اتزوج أنتي فقط حبي
يا همزه فوق الالف
يانقطه فقط النون

عاط ابويه

_انچب وگل تبن وروح من يمي ابو الفصحى منوو غير صاااق احچو

عطت
ـ. ااانتت شتحجيي يابة شنو هيي مزاااد وفااتح منااقصة عليههه روحي الاهلچ مريم ياخذچ ارشد للن انا مستعجل اريد أگمل الجواز

فرحت مريم من گتلها هيچ گالت

_واخوووي ماينسجن

_لااا ماينسجن بس انتي روحي ويه ارشد

عفتها ورحت الغرفتي وابويه عيننة تجدح  تعصب مني والشرار طلع من عينه عاف  الهول وراح لغرفته بثوان ورجع تركض وراه امي ولطمت على صدرهه وظلت تصرخ وراه

_ابووو ارشد لااااا تکتل رعد لا تگتله

ماهتميت للصياح طلعت لازم جوازي وبيدي اوراق نوار حتى أگمل جوازه ومتوتر وخايف عليه لا يموت وکفت يم ارشد احاچيه

_اريد بطاقة الگميه قبل لا تروح وانتي مريم ياخذچ أرشد

جاي اطلع  أجى أبويه  بيدة نص اخمس سحب سلاح عليه وگال ينار

ـرعد أووووگف  مووو اناااا الانفضححح مو ااناا الاانفضححح
نوااار يموووووت ومريييم تتزوج وواحد منكممم وهذااااا قرااااريي واالااااااا اااقسم بالله العلي العظييم ااخلي طلقة براااسگ يارعد
وبراسس نواار وبراسيي...

#يتبع