حتَّى النَّومُ يجيدُ الهربَ عِندما نحتاجُه، تمامًا كالآخرين!
- محمود درويش 📄
الكاتبة:نورس العزاوي.
______________
همس
- كنت أكبر بالعمر فيكبر معي الألم وكأننا توأمان ولدنا معًا وسنكبر معًا ولدتُ في هذا البلد الحزين وأنا أعاني، لم أكن بخير منذ البداية.
الايام الي اكضيها بوجود احمد خفيفة بس يبقى عقلي مشغول بس وجودة يريح اعصابي.
اثنينا اخذ الزمن منا كل شي وبقينا وحدنا اني عندي اهل واخوة يحبوني وعندي بيت ومال وجمال كل شي عندي.
بس ممرتاحة اكيد كل انسان بهاي الدنيا يعيش حياتة مرتاح احسد الي نفسياتهم صاحية برغم كل شي.
مليت من الدكاترة وعلماء النفس الي افتر عليهم مليت من فكرة ان نفسيتي معلولة وممرتاحة.
اغلب الناس الي اعرفهم او قابلتهم وعن طريق الشقة او الجد اخذو خبر عن اموال عائلتي يسالوني شتريدين على بعد ؟!
وهذا أصعب سؤال ينطرح عليه من تملك المال وخاصة اموال طائلة وتكدر تونس روحك وتسوي كل شي خصوصا ببلد مثل العراق عندك فلوس يعني ماكو شي صعب.
بس اذا العلة بالروح شتسوي الفلوس تشتريلي روح جديدة يعني هو اكو واحد يبيع نفسية جديدة. ؟
مرت هاي السبع اشهر علية بحيرة وقلق احير لان اريد اعرف همام ليش تركني واقلق على مستقبل بنتي.
اي طلعت بيه بنية وكلش حركة ومتخليني انام الليل ونستي بهاي الدنيا احجي وياها.
اسمع اغاني هادئة واشتغل على كيفي اسوي اكل لاحمد الله يرحمج ياريناد جنتي تحسسيني مسوية انجاز على ماعون بتيتة وهسه اسوي اشكال صدك الدنيا تعلم. تعرفيها
دخل احمد وبدل هدومة وطلع غراض سلطة.
همس:احمد اكعد اني اسويها انت اجيت من الشغل.
احمد:مو تعبان تعالي احجيلج عرفت سالفة الى همام.
سحبت الكرسي وكعدت صايرة فيل لازم الكرسي بعيد عن الطاولة يلا اكدر اكعد :اي احجيلي
احمد:سمعت من بنية بالشركة ان همام عايش بتركيا ويا السكرتيرة مالتها تقى تعرفين هيج وحدة.؟
همس:يمكن صراحة اني سيئة بتذكر الاسامي تعرفني.
احمد:اي اعرف على العموم يكولون متزوجها اني بس حبيت اطمن قلقج عايش ما بي شي.
همس:ما اعرف كل شخص وضروفة بس همام من الاشخاص الي تخون ماعرف بعد.
احمد :حبيبتي يخون او لا احنا اتفقنا مترجعين اذا مو سبب مفصل يبينلج ليش عافج بالمستشفى ومننسى شلون ضربج.
همس:اني احس قيس يعرف شي بس ساكت تلاحظ من تحجي انت او جدو ميقبل عليه مع العلم انت صديق همام اكثر منه.
احمد:اليوم يوصل قيس وادخلة بدورة تأديب اخلي يكت الاول والتالي راضية حضرتج علينا.
همس:استغفر الله واني اكدر ما ارضى بس شنو سالفة دورة التأديب الي الكل تحجي بيها.
احمد:هاي قبل جان اكو شي اسمة دورة تاديب تتعلمين الادب يم الحكومة.
همس:عزة وانت داخلها.؟!
احمد:طبعا اني وهمام حفظو اشكالنا من كثر منروح تصوري هناك اكو ناس كل فترة يروحون وحسب الوضع وناس اطول شهر مثلا اني اخذ غراض جديدة واعوفها هناك.
همس:ما اتخيلك يعذبون بيك يمة جسمي كزبر.
احمد:لا يابه يعذبون ونص شنو اني وحد وثانيا ترا هاي كلها لخاطر اغلاط ماكو تعذيب بدون سبب بس احنا جنا مستفلكين الوضعية هي صدك دورة تأديبية.
همس:زين وبعدها.؟
احمد:احنا نتأدب شهر ونرجع نلعب لعب ونرجع ندخل للدورة.
همس:ههههههههه شو اني ما اتذكر هيج احداث.
احمد:جنتي صغيرة وملتهية بالدراسة قبل ما انسى اليوم موعد الدكتورة.
همس:اليوم شو اني متذكرت وانت تذكر .!
احمد:يا ذكية اني حاط منبه ولا اني ذكرياتي على كدي .
اكلنا ودخل يرتاح واني بدلت وطلعت للسهولة لبست فستان طويل ولميت شعري بسكارف صغير وطلعنا.
الدكتور؛صحتة الطفل ممتازة بس انتي تعانين من سكر الحمل ووجود كيس مائي بجانب الطفل.
جنت متوترة كلش بالرغم الدكتورة زرتها كل شهر بس حسيت مدا استوعب حتى كلامها كل عقلي راح تطلب مني اجهض الطفل.
همس :يعني شنو اسوي .؟
الدكتورة:بنتي تلفونج وياج.!
همس:ها... اي اي تلفوني وياية تفضلي.
الدكتورة: لا انتي خابري على زوجج خلي يتفضل هنا.
نحرجت كلش ودمعت عيني ادور على اسم احمد وما الكة بالتلفون اكثر من خمس مرات فريت القائمة كلها وملكيت اسمه ودموعي تهل على الشاشة.
مسحت عيوني وركزت وجان اول اسم خابرته رن مرتين وفصله شوية ودخلته الدكتورة.
ابتسمت بوجهة وسالته:انت زوجها عجيب شكد بينكم شبه.!
احمد:لا اني اخوها تفصلي دكتورة شبيها همس.؟
الدكتورة:هو ماكو شي يدعو للخوف بس مشمش كلش خايفة ومتوترة.
وبقية الكلام مسمعتة عيوني غوشت وراسي صدع واختلط الواقع والوهم عندي وشفت نفسي كاعدة بشقتي بفرنسا ونفتح الباب ودخل همام يصيح مشمش مشمش.
فركت عيني اجذبها وبينت صورة همام اكثر ضحكلي وقرب وجهة مني وباس رأسي.
ومثل ايام زمان الي همام يطيب خاطري بيها وتطيب كل جروح الدنيا :مشتاقلج يبعد راسي.
مديت ايدي وردت الزمة ابتعد وياشر لا لا هسه يجي قيس ويفضحنا.
اني وين بشقتي لو بالعيادة احس روحي طايفة اشوف همام وروحي مشتاقتله اريد احضنه والزمة اعاتبة وما اسمع اعذاره اهم شي هو يمي.
وهناك شفت نفسي من بعيد الموقف القديم هاي سيارة ابوية مفتوحة من ناحيتي وهو كاعد نص ركبة يحاول يكعدني باوعت لجسمي عبالك شي غريب.
وهناك صفت سيارة الخ ونزل همام يركض علينا ومر من يمي عبالك شبح ركض على جسمي بالسيارة.
شافني ووخر ابوية من يمي وصار حجي ما فتهمته بينهم واني انقل بصري بينهم عبالك حاضرة فيلم سينمائي.
بعدين شالني وشكد عيب جنت مسويتها على نفسي من كثر الاحراج ركضت بعيد عنهم.
احس نفسي تايهة ماعرف وين اروح والمن اروح اريد احمد.
وكدامي صار بيت بالبداية خفت بس بعدين جمعت كل جرائتي ودخلت المكان جبير بشكل مو طبيعي الكراج طويل يكفي اكثر خمس سيارات مشيت بي واني اتلفت هذا وين اكو هيج بيت.؟
فتحت الباب وصار صوت مزعج يدل على صار شكد من متروك هذا البيت ونتبهت لروحي بالمراية لابسة كلابية خضرة طويلة وبدون حذاء وشعري بطول الكلابية.
وفتت للبيت ماكو احد المكان مليان ضباب وماكوبس بنات اثنين وحدة منهن شكرة ونايمة على بطنها دترسم والثانية صغيرة كلش ملفوفة بلحاف ممبين منها شي واكو ريحة دخان كلش قوية.
الطفلة الصغيرة شهكت وركضت عليها الجبيرة حاولت وياها كومة واني ركضت عليهم جنت احاول وياهم واسوي اسعافات اولية بس الطفلة زركت.
ركضنا اني والبنية الشكرة للغرفة من الغرف جان بيها مراهق شكلة يشبه قيس نايم شكد حاولنا نكعده ميكعد.
تذكرت شلون ننقذ احد بالرسومات ركضنا حطينا بالكاع بطانية وصعدنا على الجرباية ودفعنا كلش قوي وكع على وجهة بالضبط بنص البطانية.
غطينا من الجهتين وسحلنا بنص الصالة تعبت ونتبهت على الطفلة رجلها شلون تاذت وبنفس اللحظة حسيت رجلية تحركني باوعت مليانة دم ومحروقة.
ورجعنا على الولد وظلينا نسحل بي الى ان طلعنا من البيت وركضنا مرة الخ للبيت الطفل واخذناها نركض بس البنية الشكرة تعبت ووكعت ولزمتها الكحة.
نزلت لمستواها ابعد الشعر من وجهها جانت تبجي وظلت نايمة بمكانها مكدرت احركها.
وحسيت بنسمة هوى عالية غمضت عيني قوي.
وهالمرة من فتحت لكيت الكل واني والبنية الشكرة ايدينا ورجلينا ملفلفة باهمال والكل موجود حتى همام والصياح والمشاكل مهمتني ركضت على همام وكفت يمة.
ناس تذب التهمة على ناس والكل يحجي على الطفلة بصياح اخر شي حسيت مو لازم اتركها بوحدها عفت همام ورجعت يمها.
اكو وحدة ماعرفها ظلت تدعي على البنية الشكرة وكالو لو ميتة ولا بنتي ماتت عرفتها هاي ام الطفلة.
وصار صياح كلش قوي وجدو ضرب ابوية قوي على وجهة ومفتهمت شنو كال.!
بس ابوية راح على ام الطفلة وضربها قوي.
هاي امي تقربت من ناحيتنا وكالو لو ميتة احسن جان هسه ارتاحيت منج ومن ابوج وكرصتني حيل كلش كلش تاذيت.
عطت بصوتي عالي عليها كلت اي ان شاء الله اني ميته.
ابوية ندار علينا وركض باتجاهي كل عقلي حيضربني سويتها على روحي وفزيت.
وهالمرة شفت نفسي بالعناية اني والبنية شكرة واكو ناس تبجي بس معرفتهم.
ركزت بطني مموجودة تقربت حيل من نفسي هاي ليش اني مو جنت حامل.
كعدت البنية من السرير ونزلت وجتي يمي وهالمرة فتحت عيني واني بجسمي وباوعت شفت نفسي واني صغيرة ضحكتلي وكالت يلا اني نقدتج من الموت ديري بالج عليه.
______________
احمد.
"إذا تَعاظَم حُزنك أو فرحك،
صَغُرت الدّنيا في عينك."
- جبران خليل جبران
وكعت همس من السدية وركضت عليها احساس الخوف تعاظم بداخلي.
خفت تموت وتصورلي شكل ريناد بهمس.
ركضت بيها والدكتورة وراية طلبت من السكرتيرة تاجل المواعيد وعلى اقرب مستشفى وصلنا دخلنا للقسم وكملت الدكتورة ويا همس.
واني كعدت باخذلان خابرت اهلي احتاجيتهم.
شوية ووصلو وطلعت الدكتورة تطلب توقيع على عملية همس واخلاء مسؤولية.
رجفت ايدي ومكدرت اوقع ولا كدرت اوكف كعدت بالكاع وراسي وقيس هو الوقع.
بكل مرة اكون اني سندهم واطمنهم هالمرة خوفي ما اكدر اسيطر عليه ولا اكدر اطمن نفسي لخاطر اطمن غيري.
ومر الوكت والساعة اخذت اربع ساعات من عمري تصورتلي من كثرتها سنين ابوية يقرة قران وجدي بالمصلى وقيس يبسبس بالتلفون بارتباك.
كمت من مكاني وتوجهت اله حسيت ديخابر همام وفعلاً.
اخذت الفون وهمام يصيح:بس فهمني هي مو حملها طبيعي ليش هيج صار.
احمد:التفسير العلمي ما اعرفه بس عن طريق المزحة الدكتورة كالتلها مشمش.
همام:احمد طمني عليها الله يخليك قيس متوتر وكلمتين معرف يفهمني.
احمد:شنو رايك انت تجي وتشوف الى اي حال وصلت بنت عمك تدري بداخلي سؤال لو غريبة جان شسويت بيها .!
همام:انت تعرف طول عمري ماذيتها ومن ضربتها تركتها وهاي جانت اول واخر مرة.
احمد: لا لا مفتهمتني لو غريبة وماعدها احد هناك بفرنسا جان شصار بيها.؟
همام:اني اعرف قيس بفرنسا.
احمد:يول صير رجال وجاوبني.
همام:اني اسف منكم كلكم.
ونكطع الخط بحركة سريعة ضربت قيس على وجهة اكثر من مرة وعفته ومشيت محد يحس بناري اذا ماتت همس حتى قيس محد يعرف شنو يعني تموت همس.
طلعت الدكتورة وركضتلها طلبت دم رحت تبرعت وقيس هم ولازم ندبر اكثر تصورت الوضع شكد مزري.
دبرنا دم اكثر والدكتورة طلعت بايدها طفلة مثل الشمس بجمالها.
نادتني الممرضة وبشرتني بالطفلة حبيبتي ناعمة وهادئة.
راح تبقى فترة بالخدج والصدمة وكعت علية همس دخلت غيبوبة شنو.؟ وليش.! وشلون.!؟
حسيت بمسؤولية جبيرة بعاتقي وبنفس الوقت حسيت نفسي مثل شخص يجمع رمل بليلة هواها عالي بداخلي احساس يكول همس مراح تعيش .!
ومر شهر واني بين همس وبنتها ديمة الصبح مرة يجي جدو ومرة يجي ابوية واني أطلع اطمئن على ديمة وامر للبيت اشوف شنو يحتاجون ومن هناك امر للشركة.
وارجع المغرب اني وقيس اول شي اروح اشوف ديمة بعدين قيس وجدو لو ابوية يشوفها ويروحون للبيت واني ابقى يم همس افتح التلفزيون على افلام كارتون مفضلة او مسلسلات من يخلص اقرالها قصة وقبل النوم احركها على الجهة الثانية وافتح قران بصوت وليد الدليمي وانام.
بس اليوم صار شي غريب من حركتها على الجهة الثانية لزمت ايدي قوي بالبداية كلت اتوهمت بس بعدين طلبت منها تلزم ايدي ولزمتها..!
____________________
سلسبيل
أعتقد أنني أحببتك بكُل الطرق
حتىٰ بالصمت .
بعد الي سمعته حرت وحيرتي جبيرة وبدون تفكير خابرت احمد ابلغه وافهم منه.
سلسبيل:هلو احمد صباح الخير اكلك اعرف همام بي سرطان.؟
احمد:صباح النور شبيج خرطتي هذا الحجي كله اي وصلني خبر بي سرطان بالدم وهسه ديتعالج سيف حجالج مو.!
سلسبيل:اي بالغلط دنحجي وانتبهت عفيه هسه شنو اسوي.؟
احمد:شوفي سلسبيل اني ما حجيتلج شلون وصلت همس لهاي الحالة بعدما كعدت من الغيبوبة جانت تنسى بشكل مو طبيعي واحيانا حياتها تكون مخربطة وهذا طبيعي لكل شخص دخل غيبوبة وقرر همام يرجع وتقابلنا اكثر من مرة بدون علمها طبعا وعرفت شنو مبتغاه طلب مني نسوي تحليل للبنية عسى ولعل نكدر نسوي زرع نخاع العظم.
سلسبيل:اي وشصار.
احمد:اني مقبلت نسوي التحليل بس همس وافقت الطفلة كلش صغيرة خفت مايتحمل جسمها وطلعت النتيجة ومطابقت ورجع همام خال الوفاض.
سلسبيل:معقول زين مسال عليهم.!
احمد:هو بيا خال لخاطر يسال عنهم بس وراها واحد من الدكاترة بالخارج نصحة ياخذ طفلته للخارج ويسوي التحليل مرة ثانية ولان اني مقبلت اخذة بدون علمي وشفتي شصار بهمس ما حاجة احجي.
سلسبيل :يعني الطفلة يمه. !
احمد:لا مكدر يسافر بيها لان كلش صغيرة وثانيا قيس جان هو الكابتن واخذها منه على العموم لتصورين اني قاسي او حقير والله كل لحظة ادعيله هذا عشرة عمري وكل ذكرياتي بس همام اذاها لهمس واهلي هم واني دا ارتب حياتها هنا بتركيا نعيش هنا احسن مكان اي بشر تعرفه مموجود .
سلسبيل:خطية ميستاهل ولا انتو تستاهلون.
فصلت الخط وتفاجات من كمية الاحداث وظل بداخلي سؤال ليش همام ترك همس حلوة وشهادة ومؤدبة وسكوتية ويحبون بعض.
من طلع الصبح محجيت ويا اي احد اخذت تلفون جديد للزهراء من رجعت من الكلية وشفت عرض على شغل خطرتلي فكرة.
من رجعت ركض على غرفة زهراء كعدتها وكعدت احجيها.
سلسبيل:اسمعي زهراء نتفق بيناتنا علمود متحسين بإي حساسية اني هسه من دا ارجع للشقة شفت اعلان على شغل غسل مواعين يعني ميحتاجون لغة شنو رايج نتفق وانتي تبدين تجمعين فلوس مو احسن.
زهراء:عساس راح استفاد كلها راح تروح على الايجار.
سلسبيل:اني مراح اخذ منج ايجار اصلا وهسه.؟
زهراء:وشلون ونائل.؟
سلسبيل:اكلج حياتي اني موجودة والبنات وخالة معقول كلنا منكدر نشيلة اني اكول توكلي.
معرفت بهاي اللحظة جنت دافتح ابواب جهنم كلها علية..!
خسارة.!
______________
زهراء.
- لا عذر لمن أدرك الفكرة و تخلى عنها .
فكرت بالموضوع وقررت صدك اباشر بالشغل اقلها مبلغ يملي ايدية.!
بعدها فزيت من الاحلام على علبة حطتها بايدي سلسبيل جانت ايفون ظليت مبهوتة اني شايفة هيج تلفونات وفترة من حياتي تلفوناتي كلها جانت اخر موديل.
بس بهتت بوجها لان متصورتها هلكد قلبها طيب وثولة يعني لو اني مسوية وحدة الي سويته بيها بالمستشفى جان مستحيل اسامحها.
قررت مستحيل اخون ثقتها وبادرت باول محاولات الاصلاح شاركت الكل التنظيف وحسيت نفسي رجعت زهراء قبل الزواج.
سويت للغدة تبسي ونظفت وياهم وحتى ميارصالحتها ولو مبين علينا وحدة ما اطيق الثانية بس لخاطر عين تكرم مدينة.
ثاني يوم رحت للشغل جان غسل مواعين بدون لغة حتى فهمتني سلسبيل على كل شي وبديت اشتغل.
ورا ما خلصت شغل كعدت اكل شوية واكو رجال ضخم يم المدير.
اشر الية الولد وحجة:يبنية ترا بعد ساعة يخلص شغلج. !
زهراء:اي اعرف شكرا على المعلومة.
شلون بشر فضولية كلش معجبني تدخلة المهم اخذت الفلوس وطلعت انتظر سلسبيل ورجع وكف يمي وحجة يعرفهم نفسة:اني علاء واسمج شنو.؟
زهراء:وانت شعليك شنو هالفضول.!
علاء:عراقيات حتى هنا عكرة وخشمج شايلته وهم لو حلوة.
زهراء:ديلا يا توم كروز وخر من يمي .!
علاء:مو توم كروز بس انتي شايفة تفسج ترا مجرد حبيت اساعدج.
زهراء:وبشنو تساعدني اسم الله.
علاء:اني صاحب مؤسسة خيرية وحبيت اساعد بس الظاهر انتي مو وجه نعمة.!
ترددت وهو يبتعد وبعدين صحته باسمة وسالتة شلون ممكن يساعدني.؟
علاء:مثل مكتلج مؤسسة خيرية يعني تجمعات وانطيها للاشخاص النفس حالاتج الي شغلهم تعبان افتر على المحلات واساعدهم احيانا اكون تبرعات مالية واحيانا ملابس ومواد غذائية.
عجبتني الفكرة وسجلت واستمريت اشتغل واتواصل ويا علاء كان يتجاوز حدودة احيانا اسكت واحيانا ارد علية.
ومشت فترة طويلة بدون احداث تقريباً شهر وعلاقتنا صارت تخبل حسيته صدك يحبني حبني لخاطري مو لان اني اريد.
حجيتله قصتي وشكد دور على فهد ووصة ناس وفهد فص ملح وذاب.
تعاطفه زاد وياية وبديت اطلع ويا ونتمشى وناكل حتى نائل يعرفه.
وقرر يخطبني.!
.
.
.
_____________
هلاو اتمنى يعجبكم البارت مثل ما ذكرت انتظر الاحداث.
الرواية باخر بارتات يشعر بالفخر 😌
اعذروني على السحكات والاغلاط.
الصور هاي بيها شبه من ميار وهمس بس مو طبق الاصل شبه متوسط بس نفس لفة السكارف.
تكدرون تتواصلون وياية وترسلون قصصكم على الانستا:nrs.998
الكاتبة:نورس العزاوي
قرائة ممتعة.
بيباي ياحلوين 💚💚✨