( أبو رعب )
القسم الثاني ...
.. بقلم نورس
.....................
يوسف: اني جني اجنبي ؟
انصدمت من درت بية كاعد
.. جرت ايدها بسرعة وشردت
.. ضحكت على حركاتها
كمت عدلت ملابسي .. واباوع للساعة ، حيييل هاي شكد صارلي هنا ؟
دخلت للغرفة
.. شافتني اجت بلهفة عليه
أميرة: ها حبيبي ليش كمت
يوسف: انتي ليش كمتي .. مو تعبانة ؟ حتى المغذي ما مخلص
حجيتها واني اباوع للمغذي اللي معلك
وباقي ع النص..
أميرة: بعد ميحتاج .. ما دام انت رجعت ، رجعتلي عافيتي
لزمت ايدها بستها
يوسف: ميخالف امي .. لتهملين صحتج لأي سبب .. واكلي زين حتى المغذيات ترة متفيدج .. اني راح اروح عندي كلية وصار كم يوم متغيب عن الدوام .. لتخلين بالي يمج
أميرة: وراح ترجع ؟
يوسف: اكيييد بعد عندي حجي هواي وياج .. بس اروح ارتب وضعي وارجع
أميرة: لا هيج هم راح يضل كَلبي معلك يمك
يوسف: زين .. لعد خلي اسجل رقم تليفوني عندج وخابريني شوكت متردين
أميرة: اي هيج احسن
باوعت بالغرفة ..
كالت
.. ما ادري وين خليت التليفون
باوعت من باب الغرفة ..
شافت ام لسان مرت صاحت عليها
.. اووكفي وتين
اجتي كدامها
وتين: ها عمة
باوعتلي ودارت وجهة بسرعة
أميرة: انطيني تليفونج
وتين: ياا عمة ليش
اميرة: اسجل رقم يوسف بيه
هي حجت هيج وهاي شهكت
وتين: يا عمة عفية اخاف ابوي ميقبل احط رقم واحد غريب بتليفوني
أميرة: ولج يا غريب .. غير ابن عمتج .. انطيني التليفون بله .. هو اني لو تليفوني بيدي يذبني الحظ عليج
وتين: لا لا اخذي بس لتزعلين .. بس اني والله علمود ابوي كلت خاف يضل يحجي
اميرة: معليج اني اكله .. هو اصلا بس اسجلة ومن الكه تليفوني عود أمسحي الرقم من عندج
واكف اباوع واسمع المحادثة اللي بيناتهم بصمت
.. سجلت رقمي عدها ، واني هم اخذت رقمها بدون ما اكلها .. ادري بيها بسرعة راح تمسح الرقم ومتتصل
كملت وانطيته الها ..
يوسف: هاج ام لسان
جرتة بنتره وتباوع ما عاجبها
وتين: لتعيب الأجنبي
حجتها وراحت وسط نظرات امي المستغربة
من طلعت سألتها
يوسف: شبيها هاي ؟ .. شو مستلمتني من اول ما شافتني
أميرة: بعدك متعرفها .. هاي عراكة توكعك بمصايب تخليك تفر براسك .. كونك ابني وجب احذرك منها .. ترة هاي بنت داوود مو حي الله
يوسف: بنت داوود ؟ يا صالح الله
أميرة: يوسف لتنسى ترة هذا خالك
درت وجهي وحجيت باستهزاء
يوسف: ايي خالي
درت وجهي شفت ليث واكف بالباب مال غرفة .. كال
ليث: خوالي يردون يحجون وياك
يوسف: شيردون نوب
قبل لا امشي لزمتني وحجت بتوسل
أميرة: فدوة اروح لطولك .. اني ما صدكت رجعتلي وكحلت عيوني بشوفتك ، لتسوي مشاكل وي خوالك ولتتلاغه وياهم بالكلام
ليث: وليش حتى يتلاغه ؟ ليضل بالج اصلا ابو رحمن هم موجود ما راح يصير شي
مشيت للاستقبال وهي اجت وراي
.. لكيتهم كاعدين
اشرلي الخال اكعد
يوسف: خير ان شاءالله ؟ اكو شي
ابو رحمن: لا ابوية لا ماكو الا كل خير .. انه حجيت وي خوالك وكلت لو نسوي عزيمة ونعزم بيها عربنا ، حتى الوادم يصير عدها علم ابن اخت داوود البجر رد لخواله
توفيق: اي وانه من رأي خالي .. احنه خطارنة هواي ومنا وجاي انت راح تصير رجلك بهذا البيت حتى تشوف امك .. متخلص من لسانهم وراح يطلعون حجي شكلك شاب غريب يفوت ويطلع عليهم
.. والا شرايك انت ؟
يوسف: ما ادري سوي اللي تريدوا
توفيق: خوش اذا هيج الحجي نخلي يوم الخميس الجاي نجيب ذبيحة ونسوي العزيمة
يوسف: لا الخميس ما اكدر اجي .. اني اصلا راجع اليوم لبغداد وامتحاناتي ما بقالها شي بس هل اسبوع
.. اكمل امتحاناتي يلا اكدر اجي للعمارة مرة ثانية .. بس اذا انتو مستعجلين عادي سووا عزيمتكم
داوود: لا ما ترهم .. اذا هيج نتانيك كمل امتحانات ومن تجي نسوي العزيمة .. احنه مسوين هذا الشي اصلا علمودك حتى الناس تشوفك وتعرفك
كام وكف الحجي وكال
ابو رحمن: جا خوش بوية اذا هيج الحجي .. سالفة العزيمة اجلوها بين ما يرد يوسف .. وهاي انه كدام خوالك احجيها بعد منا وجاي اي شي تحتاجه احنه موجودين تجي علينه .. لا تظن نفسك غريب انت بين اهلك وخوالك
تشكرت منه سلم وراح
.. هميت اني اريد اروح .. جانت اصلا دنيا الضهر لزموني ع الغدة بس اني ما قبلت وطلعت
.. صار بوجهي ليث
يوسف: ديربالك على امي
ليث: ديلا اليسمعك يكول هي مو امي اني هم
يوسف: ادري وكلش زين هم .. لهذا جاي أوصيك انت بالذات خليك قريب عليها ورقمي عند رحمن اصلا اذا ردت تخابر
اخذت نفس وحجيت بهدوء
.. شوف ادري علاقتنه سطحية وثنينة ما متقبليهة .. بس خلي نطي لنفسنة فرصة وكل شي راح يتغير شوي شوي .. ماشي ؟
هز راسة وكال
ليث: نشوف
باوعتله نظرة اخيرة
.. عفته ومشيت ..
اجرت سيارة ع الشارع ورجعت لبيت عمي
لكيته هناك اصلا وكعدت احجيله اللي صار
أسر: عفية .. زين اللي سويتة ما راح يفيدك هسه لا عتاب ولا تروح تعارك .. هسه انت مو لوحدك خلي ببالك صاروا وراك عائلة امك واخوك من جهة .. ومن جهة هم خوالك اذا جنت تاخذ بحجايتي وتريد رأيي .. اكسبهم لصالحك .. كوم طب واطلع عليهم سويلك مكان بيناتهم وأثبت نفسك
يوسف: ما اعرف .. احسهم ما متقبلين وجودي .. ولا اني
أسر: اجبر نفسك حتى لو ما متعود عليهم .. اول وتالي يبقون اهل امك وهم نفس الحاله مجبورين يتقبلون وجودك .. كل المحتاجه تكسر هل حاجز اللي بينكم
مسحت على وجهي بتعب ورديت
يوسف: الله كريم
أسر: راح ترجع اليوم لبغداد ؟
هزيت راسي .. كال
.. خوش انه ارد وياك
استغربت
يوسف: ليش ؟ يعني شو بسرعة مو عوايدك
أسر: اريد اروح اشوف امي ومن جهة عندي شغل وي جهاد .. تحظر انت وخلي نطلع بليل على فرغة الطريق
......
جنت ستوني مخلصة غسل مواعين الغده
.. وسمعت ابوي يصيح على جاي ، اجت حور للمطبخ تركض
درتلها
لبوة: شبيج تركضين
حور: بابا يريد جاي .. وراي قراية هم يلا الحك
تحجي وتطلع بالستكاين باستعجال
لبوة: عوفي من ايدج .. اني راح انطيهم انتي روحي كملي قرايتج
حور: لج فديت
انطتني بوسة بايدها بالهوى وراحت صعدت لغرفتها
.. خطية امتحاناتها بعد يومين وملتهية بالدراسة ،
واني ابدي امتحانات وراها
اخذت قوري الجاي ذبيت منه شوي بالسنك شفته خدر
.. طفيت الطباخ وشلت الصينية ورحت للصالة
لكيتهم كاعدين ..
بابا عينه ع التلفزيون يباوع اخبار
وميسون كاعدة تخابر
صبيتلهم وانطيتهم .. وقبل لا اطلع صاح عليه مدلي تليفونة
أشرف: هاج بابا خلي التليفون ع الشحن
اخذته منه ومشيت ..
جانت الشاحنه بغرفته
توني وصلت الكيبل مال شاحن بالموبايل .. ضوت الشاشة ولفت نظري دتوصلة اشعارات مال واتساب
.. ما اهتميت دا امشي ورجعت وصلت رسالة جديدة
صارت كدامي ( حبيبي شوكت تجي ) ..
ضليت متصنمة بمكاني
.. حبيبي ؟؟
باوعت للأسم .. مكتوب سعد
.. كَلبي ضل يلعب ، بقيت لازمة الموبايل والف شغله وفكرة اجت ببالي
.. بعدة بيدي ووصل مسج من نفس الرقم كاتب
( لتتأخر عفية )
سمعت أصواتهم من برة
.. عفت التليفون بمكانه وطلعت بسرعة
صعدت لغرفتي
ضليت اروح وارجع بالغرفة القلق والتفكير اكل راسي .. الرقم مكتوب سعد .. بس طريقة كلامه من خلال المسجات يعني مبين مو مال رجال
وكفت اخذ نفس وحجيت : والله يا خوفي سعد يطلع سعدية
.. صارت دنيا العصر نزلت على صوت ابوي يصيح علينه
لبوة: ها بابا
أشرف: وينجن ؟ صارلي ساعة اصيح
لبوة: ها مو ما سمعتك وحور يمكن نايمة خطية تعبانة جانت تقرة
أشرف: زين تعاي اكويلي الدشداشة البيضة راح اطلع
نزلت اسوي الكال عليه
.. ميسون جانت بالحمام تسبح
طلعت الأوتي وكمت اكوي بالدشداشة بغرفتة
.. طول ما اني اكوي بيها عيني عليه واراقب بحركاته
واكف على ميز تواليت ويمشط بشعرة بعناية ، ورجع اختار واحد من العطور اللي تارسة الميز وسبح بيه سبح ..
ابوي حييل يحب يهتم بروحة ومداري نفسة بحيث اذا تطلع شعرة مشيبة براسة يركض للحلاق يصبغة و نظيف بشكل ، ويدقق على اقل شي .. ومو لأن ابوية بس هو اصلا احلى اخوته فشوي اهتمامه بنفسة زايد
المشكلة ما اكدر اشك بيه من ورة هيج شغلات .. لان هو هذا طبعة من زمان
.. كملت الدشداشة وانطيتها اله
جانت عينه بموبايلة .. كتله
لبوة: محتاج شي بعد ؟
رفع راسة باوعلي
أشرف: ها .. لا لا روحي
هزيت راسي وطلعت من الغرفة بس عيني عليه ..
اول ما طلعت سد الباب بوراي
ركضت خليت اذني ع الباب واسمعه يكهكه ويسولف بخفوت .. بس مدا اكدر افهم شي من كلامه
اجاني صوتها من وراي
ميسون: هاي انتي شتسوين هنا ؟
درتلها بسرعة .. حسيت كَلبي وكع بين رجلية
اخذت نفس ورديت
لبوة: عيني وين جنتي ؟ بس انتي حمامج ابو ال3 ساعات ؟ بابا صار ساعة يصيح عليج يريدج تكوين ملابسة
ميسون: اشو بلة اشوفج نقصتي ايد رجل .. واذا ما كويتيهن انتي اله .. شنو طاح نصج ؟ غير ابوج هو
طلع هو من الغرفة ع الصوت كال
أشرف: شبيجن تتعاركن
ميسون: تعال عيني شوف بنتك جاية تشتكي والله شلون اني كويت ملابس ابوي ولكيتها واكفة تت..........
بعدها تحجي وقاطعها ببرود وهو يفوت للغرفة
أشرف: ديلا ما صار شي .. وانتي هم حضري ملابسي من وكت ما معتمد عليهن ميعرفن هن انتي احسن
طبت وراه وبعده صوتها يلعلع
.. واني ميته بداخلي همزين تلاحكت للموقف
مرن يومين ..
كاعدة اعزل بملابسي واخليهم بالكنتور
اندكت باب الغرفة
صحت .. تفضل
ماكو صوت ورجع الباب يندك
كمت اشوف منو ماكو احد .. صارت بوجهي حور وهي تطلع من الحمام
لبوة: هاي وين جنتي ؟
حور: جنت اسبح
لبوة: لعد منو هذا دك باب ال.........
سكتت ما كملت وتجمعت الف فكرة براسي
حور: شبيج شكو ؟
لبوة: ماكو شي ماكو شيي .. عبالي الباب اندك
حجيتها وفتت للغرفة وعفت الباب مفتوح
.. كَلبي يدك سريع وتنفسي يضيق
اذا حور بالحمام وميسون اصلا مو بالبيت يم جيرانة وبابا نايم جوة بالغرفة
.. منو دك الباب ؟
لزمت وجهي عركت برغم الجو زين
.. كمت غسلت وجهي بمي بارد ونفضت هل افكار من راسي
استغليت الفرصة وصار كبالي موضوع ابوي .. نزلت جوة ، جانت دنيا الضهر .. ابوي متعود ورة الغدة هيج وكت ينام نومة الضهر ولو تنكلب الدنيا ميكعد .. نومة ثكيل
فتحت باب الغرفة على كيفي ، مثل ما توقعت جان نايم وصوت شخيرة واصل لسابع جار ..
فتت امشي على أطراف اصابعي وبهدوء حتى ليحس .. يسويها حظي ويكعد
لكيت تليفونة يمه ع الميز .. اخذتة جان قفله ع البصمة
.. وتعالي هسه شيفتحه
تقربت منه شوي .. بلعت ريكي ورفعت ايده بصمته بأصبع الإبهام .. انفتح !!
اجيت اكمز من الفرحة ..
خفت ليكعد بسرعة طلعت وسديت الباب وراي ولا كأنو شي صار .. وركضت صعدت لغرفتي وقفلت الباب وراي
اول ما دخلت ع الواتساب ..
صرت اكلب بالأرقام لكيته .. سعد
بس ما لكيت ولا محادثة
ماسحهم ..
والله يبوي طلعت مو هين
رحت ع الماسنجر كلبت بالاصدقاء ..
لكيت وحدة مسميه صفحتها ( الوردة البيضاء ) ومخليه صورة بنية
دخلت وشفت محادثات بينها وبين ابوي
.. جان الكلام قليل عبارة عن ( مشتاقتلك )
( شوكت تجي ) ( عادي اخابرك ) وهو يرد عليها أي ولا
لو ( لتخابرين هسه اني بالبيت )
بس المصيبة من شفت الصور الدازتها
.. وكف عقلي
بنية شابه تجي بكدي لو بكد حور يعني مبينة صغيرة
اخذت تليفوني وطكيت صور للمحادثات ولرقمها
.. دورت بيه وما لكيت شي بعد .. بس العرفته البنية اسمها فاطمة
قفلته ونزلت رجعته لمكانه وهو على نومته
.. رجعت ركضت للغرفة
ضليت احوص بمكاني .. ما اعرف اسكت
اجه على بالي اكول لحور ، بس بعدين تراجعت .. هي اصلا منا عدها امتحانات واجي اني ازيد عليها الهم
ما صارت كبالي الا عمة سهير .. كمت دكيت عليها ردت ، سلمت بسرعة وحجيت
لبوة: عمة عندي خبر الج بالباكيت
سهير: خير يا طير .. الله اليستر من اخبارج انتي
لبوة: ها عمة ليش تخليني اتندم لأن خابرتج
كامت تضحك
سهير: لا لا احجي .. انتي اخبارج تسوي اكشن
حجيتلها كل الصار
.. ودزيتلها الصور مال محادثات وصور البنية
.. فلك فلكج خاف ولج هاي وحدة من مسلسلاتج وجايه تحجيها براسي
لبوة: والله والقرآن مدا اجذب .. شتعرفيني انتي ؟
سهير: تعزيت وتصخمت يأشرف
لبوة: عمة يا تعزيت .. ابوي طلعت وراه سوالف ومصايب بس الله اليعلم بيها ، مو اني من زمان اكلج ابوي وراه شي بس انتي ما تصدكيني
سهير: والله وطلع كلامج صحيح واني هم مدري شبيه معمي على عيوني .. بس تعاي هو ميسون مو مسويتلة عود عقد لسان
ليوة: هاي شبيج عمة .. هو ابوي لو حط براسة شي يلزمة سحر ؟
سهير: هم صدك .. هو أشرف اخوي لو غيرة
لبوة: مو كتلج .. وهسه شراح نسوي
سهير: دوكفي خلي اخذ نفس من الهبطة .. فلك فلكج وفلك اخبارج وياج ما يجي وراج بس المصايب
لبوة: اي ايي لأن فقيرة هيج تحجين .. بس عمة بداعتي خلي اخذلي كم يوم اشمت بميسون ضاله حسرة بكَلبي
سهير: اكعدي وانجبي .. انتي رايدة روحج لو لا ؟ والله لو درت ميسون تحركج انتي وابوج بليلة ظلمة
لبوة: لعد شنو حنبقى ساكتين هيج ؟
سهير: لا عمة شلون خلي نروح نشهر ونكول ابوج عاشكله وحدة بكد بناته .. هو انتي رايدتها من الله على الله
لبوة: اي والله
سهير: وجعه من الله .. اصبريلي هل كم يوم خلي افكر والكي حل لهل مصيبة .. بس عمة اذا الي خاطر عندج لتكولين لاحد وخلي الموضوع هسه بيناتنه لحد ما نشوف وين تصفة
لبوة: والله عمة تعذريني اني لساني ما اكدر اتحكم بيه .. بس راح احاول اسكت لخاطرج بس
سهير: لبوة استري علينة ولج عمة
لبوة: استغفر الله .. يابة والله راح اسكت ارتاحي
سهير: زين انتظري تليفوني لبين ما اشوف شراح نسوي
نسد الموضوع وبقى بيناتنة اني وعمتي ..
.. مرت فترة امتحانات حور وبديت اني هم امتحن والتهيت بالقراية
لحد ما اجه الاتصال اللي جنت منتظرتة
.. خابرتني عمة على سالفة ابوي وكالت : اني حجيت وياه وضليت احجي عليه هواي بس ابوج ما ينرد .. راسة والف سيف هل بنية ما يعوفها وازيدج من الشعر بيت طلع عاقد عليها عقد سيد وحتى حاضر وغايب مخليلها
لبوة: اي عمة قابل هو زواج لو لعبة غير مفروض حاضر وغايب على حسب الأصول .. ترة ابوي ما يظلم احد ويمكن حتى زفة يطلع مسويلها من ورانة واحنه مندري
سهير: ااااخ منك أشرف .. شكد حجيت وكتلة لو ميسون درت ما راح تسكت بس ما رد عليه
لبوة: وهم سألج منين دريتي ؟
سهير: اي بس قابل راح اكولة بنتك ام الصايب .. كتله وحدة من جوارينة شايفتك وي بنية واجت كلتلي
لبوة: وهسه شلون
سهير: شلون يعني شنسوي .. ننتظر بلكي هم كم يوم وارجع احجي وياه بلكي يقتنع يطلكها ولو هو جنه قافل
عمتي جان كل همها شلون تخلي ميسون وجدتي ميحسون ..
بس اني جان ببالي موال ثاني
ابوي شغله الصبح ويرجع الضهر يتغده وينام .. ويرجع العصر يطلع يكول عندي شغل .. بس اني متأكدة يروح الها
خابرت مصطفى .. كتله الباجر تعال اخذني لبيت صديقتي ودكيتله اليتيمة يلا قبل
ثاني يوم صادف يوم جمعة
عطله ما عندي امتحان ..
بدلت وانتظرتة يجي ..
اجتني ميسون
ميسون: خير ان شاءالله .. وين رايحة خاتون
لبوة: لصديقتي وكلت لأبوي .. عندج مانع ؟
ميسون: اي عندي
.. سمعت صوت هورن سيارة برة
لبوة: خوش لعد ابلعي واشربي وراه مي
كمت اخذت جنطتي وطلعتله
.. صعدت وياه وحجيت
.. شلونك ابن عمي
مصطفى: لا هلا .. شنو السايق مال خلفوج اني ؟ مو هاي سيارة ابوج بالباب
لبوة: هي هنا العله .. ماريد ابوي يوصلني حتى نلحكة
مصطفى: نلحكة ؟ ليش شعندج ولج من مصيبة
لبوة: اهووو لتبدي انت الثاني .. هسه بس امشي صير على جهة ولا تبين السيارة ومن يطلع بابا امشي وراه
مصطفى: غير اعرف شكو ؟؟
لبوة: بعدين افهمك بعدديين
راح وكف بنهاية الشارع واني عيني على باب بيتنه منتظرة ابوي يطلع ..
وهذا اكل راسي
مصطفى: اسمعي لج .. تحجين لو اشمرج منا واعوفج واروح
اخذت نفس بنفاذ صبر وحجيتله كُلشي بشكل مختصر
من كملت اخذلة صفنة
.. والله عمي طلع مو هين
لبوة: بس ها ترة بيناتنه مو تروح تحجي .. واصلا محد يدري بس اني وعمة
مصطفى: افا عليج بنت العم سرج ببير
لبوة: اييه خايفة لا يطلع هل بير نافورة ويطش الخبر
بعد ربع ساعة من الانتظار طلع بابا شغل سيارتة ومشى
.. كتله
.. ولك يلا صوفة راح يروح
هو بسيارتة واحنه وراه
.. ضل وكت هواي يمشي ، تقريب بالساعة بحيث طلعنه من منطقتنه .. نزل لفرن معجنات ورجع بيدة علاكه وصعد لسيارتة
مشى لعشر دقايق ووكف كدام بيت ..
واحنه وكفنه بعيد عنه
مصطفى: وهسه شراح تسوين ؟
لبوة: شسوي يعني .. ننتظر لبين ما يطلع
مصطفى: هاي شلون دوخة
لبوة: اسمع لك إذا معاجبك روح .. واني عود ارجع بتكسي
مصطفى: اي ليش لا ...
ضل هواي وكت بالبيت .. بعد مرور ساعتين يلا طلع .. حجيت بسرعة
لبوة: طفي الاغاني طفيهاا .. هذاك هو طلع
شفته صعد سيارتة وراح ..
خليت تليفوني بجنطتي وكتله
.. اني راح انزل .. ما راح اتأخر عليك بس انطيني ربع ساعة وارجع
مصطفى: ديري بالج .. اني اكول لو انزل وياج اخاف يطلع اكو رجال بالبيت
لبوة: لا لاا ماكو .. هي اصلا زعطوطة اشوف شنو فلمها واجي بسرعة
مصطفى: ماشي لتتعطلين
نزلت بسرعة
وكفت كدام باب البيت ..
دكيت الجرس ، مرة مرتين يلا فتحته الي
اول ما شفتها عرفتها .. نفسها اللي بالصور
ابتسمت وحجيت
لبوة: مرحبا
صايرة ورة الباب ومادة راسها وتباوع بخوف
فاطمة: مراحب .. منو انتي ؟
لبوة: هنا بالباب ؟ خلينه نفوت ونحجي
فاطمة: لا ما اكدر افوتج .. زوجي ميقبل
اجيت اجيبها بطراك اغير معاني وجهة .. ونوب الكشخة والكعب تروح ع الخالي بلاش
اخذت نفس طويل .. وكتلها
لبوة: اقدملج نفسي اني لبوة .. البنية البجر لابوي اللي هو زوجج
دخلتني للبيت وكعدت بالصالة
.. اباوعله برغم صغير بس مرتب وبنيانة حديث
اجت جابتلي مي وكعدت كدامي .. أخذته منها شربت شوي وكعدت خليت رجل على رجل واباوعلها مبتسمة .. وهي مبينه خايفة وتباوع يمنى يسرى
فاطمة: شتردين ؟
لبوة: سلامتج مرت ابوي .. بس اجيت اريد اعرف اخبارج اشوفج شلون عايشة .. خما ابوي مقصر عليج بشي ؟ الله عليج بس احجيلي واني اكوله ترة هو ياخذ بكلامي وحيل يحبني
بكَلبي كلت .. الله يسامحني على هل جذبة
فاطمة: وانتي شلون عرفتي ؟ يعني هو شروفي كال يضل الموضوع بيناتنه ومراح اكول لاحد من اهلي
اني عفت كُلشي وحصرتني الضحكة من كالت (شروفي)
.. كوة سيطرت على روحي وحجيت
لبوة: مو كتلج اني بنته المدللة ميضم عليه شي .. وبصراحة اكولج ، ترة مرت ابوي الأولى لو درت تسود عيشتج انتي وبابا شروفي .. اجيت احذرج بس وما على الرسول الا البلاغ
فاطمة: ليش وانتي امج وين ؟
لبوة: اني امي وابوي منفصلين من زمان .. عوفج مني بس خوفج من مرت ابوي ترة متعديها سلامات لو وصلها الخبر اني علمودج دا احجي
فاطمة: وليش اجيتي كتيلي
لبوة: شوفي للصدك من شفتج اني انقهرت عليج .. يعني بعدج صغيرة والعمر كدامج عفتي الزلم كلها اجيتي ورة ابوي ؟ والله ميسون تسود عيشتج
فاطمة: مو احبه
صحت بيها
لبوة: حبتج حيييية
شو هاي كمزت .. واجت مرة تمشي على عربانة على صوتي
ام فاطمة: هاي شكو ؟
كامت ركضت الها وتحجي وياها
فاطمة: ماكو شي ماما .. عدنه خطار ، هاي بنت أشرف
اجت جرت عربانة امها وكعدت قريب منها ..
اني كل هذا اباوع مصدومة .. وفوكاها مكعد امها وياها
مرة جبيرة ومبينة تعبانة .. كالت
ام فاطمة: اهلا وسهلا بيج خاله
استحيت منها بصراحة ، احسن من بنتها النغويصة
.. رديت بهدوء
لبوة: خاله راح اعوف بنتج واحجي وياج انتي كونج امها
ام فاطمة: كولي خاله شكو .. خوفتيني
لبوة: خاله بنتج صغيرة وما شاءالله حلوة يعني الف من يتمناها .. شلون قبلتي تنطيها لرجال جبير بكد ابوها ؟
ذبت حسرة وكالت
ام فاطمة: شنسوي يخاله العوز يجبر .. اني مرة وحدانية ما وراي لا رجال ولا عندي ولد يشتغل ويعيشني ، وبس هاي البنية .. كبل جنت اشتغل خياطة واخيط وابيع واطلع هل قاسمة الله بس هسه شوفت عينج لا بعد الي حيل أعين روحي ولا رجلين اكدر اشتغل واخيط بيها .. كلت عاد ازوج هل بنية اخلص من صفحة وصار كدامنه ابوج الله ينطيه الصحة والعافية .. كعدنه بيت وتكفل بعلاجي وعايشين على حب الله
لبوة: خاله يا حب الله .. تدرين وراه عائلة وعشيرة لو يدرون يهجمون هل بيت على راسة
صارن يتبادلن نظرات القلق هي وبنتها .. كالت
ام فاطمة: هو كال ما راح احجي لاحد من اهلي
لبوة: هو ميحجي بس إلى متى راح تضل مضمومة .. الا ما يجي يوم وتطلع
ترخصت وكمت .. اجيت وبالي شي وهسه طالعة واني الف حسبة براسي .. ما توقعت تطلع امها وياها ونوب مرة مقعدة
وصلتني للباب وهي توصي بية وتتوسل ما اكول لاحد .. رحت للسيارة تلكاني مصطفى باسألته
.. يووه صوفة اصبر خلي اشرب مي من الهبطة .. طلع ابوي يساهم بأعمال خيرية واني ما عندي علم
مصطفى: احجي بله .. شعرفتي
......
سهير: متكعدين راحة .. مو كتلج اكعدي واستجني ليش متسمعين الحجاية
لبوة: هسه نوب فوك ما اجيبلج اخبار
تنهدت
سهير: ولج عمة والله اني احجي علمودج .. بلة لو درة ابوج رايحة لبيته وشايفة مرتة شيسوي بيج ؟
لبوة: ميسوي شي .. لان لو حجه ينفضح ، نسيتي ميسون موجودة
سهير: والله ما وراج بس المصايب .. انتي عاد هم اسكتي مو ترحين تلعلعين واي شي يصير خابريني
سديته منها
.. واني بالي يمها
درت وجهي لكيت امي وراي ..
ركضت عليها
.. ليش كمتي جان صحتي وحدة من البنات تعينج
باوعتلي وكالت
زهدية: احجي شضامة من مصيبة يسهوة
سهير: خير يمه متحلمة بيه .. ماكو لا مصيبة ولا شي
زهدية: خايبة تعلميني بيج يبنت بطني .. اعرفج من عيونج .. صارلج جم يوم انتي وهل مدهربة تليفونج ما يوكع من ايدج .. شعدجن ؟
سهير: يبووو يا يمة مو اكلج ماكو شي.........
بعدني احجي وسمعت صوت جهاد يصيح عليه
.. ركضت اشوفة ، اتهرب من اسألتها
بليل كاعدين بالصالة
.. امي نايمة بغرفتها متضل لوكت متأخر
والبنات كلمن بغرفتها وبس ريتاج كاعدة يمنه
صاح عليها
جهاد: بابا ريتاج كومي جيبيلي كلاص مي
كامت هي وهو يباوع وراها
.. تقرب مني سألني ونصة صوته
جهاد: اكلج اخوج عنده بيت ثاني ؟
بلعت ريكي وحجيت
سهير: منو منهم
جهاد: أشرف
توترت وكوة جمعت الكلام
سهير: ما ادري...
هز راسة بدون ليكول شي ..
كتله
.. شكو ؟ انت شايف شي ؟؟
جهاد: واحد من جماعتي شايفة كالي نسيبك يفوت ويطلع على بيت بالمنطقة
كمت اكل بروحي بس ما بينت شي
.. ااخ منك أشرف ما تنلام امي بيك من تكول ولدي ما بيهم خير
......
كاعدة اقرة بغرفتي
وسمعت صوت ابوي من جوة يصيح عليه
.. بصوت عالي
نزلت اركض اشوف شبيه .. لكيته واكف بنص البيت وعيونة نار ، طلعت ميسون من المطبخ من صوته وحور نزلت من غرفتها ..
شافني صاح
أشرف: انتي كتيلهاااا موو
ضليت متصنمة
لبوة: شنو شكلت
لزمني من جتفي ويعت بيه .. كال بصوت ناصي ميريد يسمعهم
أشرف: انتي حجيتي العمتج عن فاطمة ؟
لبوة: لا
ضربني راشدي بقوة
.. ارتديت ليورة ركضت عليه حور بخوف
وسط نظراتهم المستغربة
ميسون: شكو عيني شصاير .. شمسوية نوب هل مسمومة ومخليتك هيج مورث
أشرف: ماكو شي .. بس ضوجتني تفرفر بكيفها واني موصيها من ترجعين من امتحانج ارجعي للبيت
ضليت اباوعله مبتسمة .. وبداخلي افور
.. بسيطة والله ما اسكتلك على هل راشدي
......
طبيت للبيت فتحت الباب وامشي على كيفي
.. ميسون بالمطبخ وابوي بشغله استغليت الفرصة ودخلت للغرفة
طلعت الصور من الجنطة وطشرتهم ع الجرباية بأهمال
.. وطلعت بدون لا أحد يحس .. مشيت للمطبخ ابتسمت واني اباوع لميسون
: شروفي مو؟ انت الجبتها لنفسك يبوي..........................
❄❄❄❄❄❄
توقعاتكم?؟