صفحات والأخبار قالوا ان فى مطر وغيوم ولما اني قاعده فى البيت ف أخري فى الأكشن اقف في البلكونة واقول ( يااا لو نزلت الشارع فى الوقت دا ) وطبعا مش هينفع لان مينفعش واحده شاحطه زى تجري وتتنطط تحت المطر ولو عطست هتكون الليله عليا ولا ايه ، ف اختصارا للكلام هقضيه تحت بطانيتي حبيببتي تدفيني وتحتويني فى هذه الأجواء، الساعة ٩ و الدنيا مطرت جامد وانا كنت نايمة وموبيلي كان بيرن بيرن بيرن بيرن بيرن بيرن .. انا كنت فاكراه موسيقي تصويرية للحلم ، الفيبريشن رخم عليا واتحرك لغايه ما خبط فى عيني وقلقت .. بصيت ع الرقم وكنت هشتم علشان ما صدقت انام وقلقت .. لاقيته هو .. الساعه ٩ الصبح وبيكلمني ليه ؟! المفروض انه فى الشغل طول اليوم ؟! يبقي شاف بوست امبارح لما قولت انى سينجل ، يبقي خناقه ع الصبح يبل ريقه بيها ، والله ما قدرالك ياعم كفايه الل انا فيها..
عملت من هناك وبعدت الموبيل ولا اني شوفتك حاجه .. لاقيت رساله واتساب روحت بصيت عليها من برا ، محبتش اتقفش انى فتحتها وتبقي الخناقه دبل وانا مش قدراله ع الصبح والله . لاقيته باعتلي وقالي :
- لو مردتيش دلواقتي هتندمي لشتا إللى جي ..
ندم وشتا مفهمتش كلامه وقولت ولا شوفت حاجه وارجعي نامي ، بعت رساله تانيه :
_ انا عارف انك شوفتي الرساله فبقولك هتندمي للشتا الل جي ..
إصراره غريب ع الندم لا الموضوع فيه حاجه .
الموبيل رن ومن تاني رنه رديت :
- صباح الخير
= كل دا نوم .. اصحي
_ والله البقره حلبتها ووزعت لبنها خلاص ورويت الارض واكلت المعيز ..اصحي ليه بقي
_ ماشاء الله عليكي ايه النشاط دا
_ انت ايه الروقان دا .. عاوزه انام ؟
_ لا فوقي كده .. ربع ساعه وتكوين قدامي
لما بيقول كده يبقي خناقه وش لوش وانا مش قدراله والله ..
_ خير يا حبيبي فى حاجه مهمه.. وكاله ناسا طالبه حضوري شخصيا..
_ لو منزلتيش هتندمي لشتا الل جي ..
_ هو ايه حكايه الندم هو الشتا عامل خصومات ع الندم و هيغلي فى الصيف ولا ايه ..
_ ارغي كتير كده وهتندمي اسمعي مني
_ يعني عاوز ايه فهمني انا مش قدرالك والله ؟
_ انا تحت العماره مستنيكي فى العربية ربع ساعه ومنزلتيش هطير وافتكري كلامي هتندمي للشتا الل جي ..
قولت لا كده فى حاجه وبما اني فى الحالتين هندم سواء نزلتله ومعجبنيش الندم الل يقصده او لو منزلتش وهندم .. رغم أن انا مكنتش قدراله والله والبطانية محتوياني ومدفياني قررت أتنازل عن احتواء البطانية علشان اشوف الأستاذ .. لبست ونزلت وكانت بتمطر لقيته بيقولي بسرعه اركبي العربيه.. حسيته بيخطفني بسرعه ركبت العربيه :
- انت هتخطفني ع الريق كده ولا ايه طيب كنت استني اخر اليوم كنت اكلت المحشي الل ماما هتعمله انهارده وحته البطه ..
_ همك ع بطنك يعني لو بخطفك بجد مش فارق معاكي
_ مش كتير .. وبعدين هتخطفني ليه واحنا لبسنا فى بعض طول العمر كتب الكتاب الل اتكتب دا ايه كنا بنسمع الفاتحة لبعض ونشوف مين الشاطر الل حافظها .. خلاص لبسنا بعض فهتخطفني ليه ..
_ عندك حق .. هو ينفع ارجع فى كلامي
_ طبعا يا حبيبي براحتك قول بس الل نفسك فيه وعيوني وسكاكيني الل اشتريتها امبارح متغلاش ع رقبتك يا حياتي ..
_ لا مقدرش يا حبيبي .. ربنا يستر ..
_ ها منزلني لييييه
_ هعيشك يوم بتحلمي به
_ هروح المالديف ..
ضحك : فرع وسط البلد ..
اتحرك بالعربيه واتجهنا لوسط البلد والمطر كان شغال ووقف العربيه وقالي :
- انزلي يلا
_ انزل فين ؟
_ انزلي اتنطنطي تحت المطر اجري طيري اعملي الل عاوزاه ..
_ انت بتتكلم بجد ..
_ ايوه .. انا قولتلك قبل كده كل حاجه نفسك فيها تعمليها معايا ومعايا بس .. مجنونه نصيبي وراضي .. ف دى فرصتك ها تنزلي ولا راجعك ع البيت ..
فتحت باب العربيه من غير تفكير ونزلت وقفت والمطر نازل جامد بصيت للناس بتجري من المطر ومعرفش ليه بيجروا يستخبوا منه ، انا بقي فتحت دراعي واستقبلت المطر بكل حب وجر يت واتنطنطت واتفتجئت به مشغل منير :
في الليالي البرد قربينا لبعض
ايد تطبطب ايد تداوي صوت يوانس بالحكاوي
لملمينا من الدروب واسرقينا من الغروب
اتفاجئت اكتر بالاغنيه هو عارف انا بحب منير جدا وعرفت انه لاحظ اغلب الاستوري الل بنزلها الفتره دي كانت اغاني منير ودي اكتر كوبليه كنت بحطه بمناسبه الشتا وكده .. لاقيته على الصوت وقرب مني ومكنتش اتخيل انه يعمل كده لانه كان فى اعتقاده دا جنون وتفاهه مسك ايدي ورقصنا تحت المطر والناس بتتفرج علينا لكن مكنش مهم عندنا انا مكنتش شايفه غيره ولا حاسه بغير اللحظه دي ..
اتبلينا ودخلنا العربية قولت هرجع البيت بمشهد جنون .. :
- انتى فاكره كده اليوم خلص ..
_ هتعمل ايه تاني ..
_ هنفطر طبعا انتى فرهدتيني ...
_ تعالي البيت اعملك احلي فطار علشان إللى عملته دا ..
_ لا انا هفطرك فى اكتر مكان بتحبيه رغم اعتراضي
_ قول والله هنضرب فول بالزيت الحار والشطه وطعميه محروقه طالع عينها وبتنجان متعذب وبيتحاسب بالدقه ..
_ ومايه سلطه مولعه علشان تبلعي ..
_ ومعدتك انت كنت تعبان من يومين والدكتور قالك مسلوق بس ..لا تعالي نفطر اى حاجه هات اتنين باتيه راضيه
_ لا متوبظليش اليوم وانا متقلقيش عليا كله تحت السيطره ..
_ وهتيجي بعدين تتعب وتقولي انتى السبب
_ وهو انتى فاكره اننا مش هنتعب دور برد محترم بس هيكون دور برد للذكري ..يلا بينا
ضحكت وجمله دور برد للذكري لمستني ، هي ممكن تبان عاديه لكن انه خطط حتي اننا نتعب مع بعض اول مره اسمعها عن مرتبطين .. علي صوت منير وهو
بيغني :
شيء من بعيد ناداني
و أول ما ناداني
جرالي ما جرالي
مش بأيدى يا ابا
ده مش بأيدى يا ابا
ناداني من يميني
ولسة بيناديني
بيقولي حصليني على بلد العجايب
حسيت فعلا انه يوم عجيب واننا ندهتنا النداهه ، هو الرزين الل بيفكر فى الحاجه الف مره يعمل كده هو بيكره العشوائيه لكن بيحبني .. شغل الدفايه فى العربيه وكان مجهز بطانين وجواكت بتاعته كانت ورا اخدت واحد وحطيته عليا والعربيه اتبهدلت طين بس اشطه هو الل قالي انزلي وانا مكنتش قدراله والله .. وصلنا العربيه فول عم رضا .. افخم عربيه فول فيكي يا تحرير.. المطره كانت وقفت شويا والناس بتفطر تحت التنده عند عم رضا .. :
- استني مكان يفضي ونروح المكان زحمه ولا تعالي نجيب فطار من اى مطعم ..
_ لا هو عم رضا .. وبصي هنفطر ع العربية ..استنيني
نزل وراح العربيه عم رضا ورجع بصينيه وحطها ع العربيه وشاورلي اخرج .. من حماسي خرجت والفطار كان سخن ويشهي وانا بفطر لاقيته جابلي جاكت من العربيه وحطه عليا ..
_ خايف عليا يا روحي
_ اتفقنا نتعب ع اخر اليوم لان اليوم طويل يا حياتي
_ اموت فى رومانسيات العيانه دى
_ يلا افطري وادعيلي
_ يخليك ليا انت وعم رضا يارب
_ عم رضا دا اد جدك لو اصغر كنت هشك فيكي وحبك له دا ..
_ عليه تحويجه طبق فول ديناميت قنبله ذريه يابا
_ افطري افطري يا آخر صبري ..
فطرنا واحنا بنتكلم وبنتريق ع بعض وخلصنا فطارنا وروحنا ل أطعم كوبايه شاي بالنعناع من ايد ام سعيد .. قاعده ع الكورنيش فى نصبه كده .. طلبنا كوبيتين شاي بالنعناع وحبسنا ..
_ ها نروح ولا لسه ..
_ لا لسه يلا معايا ..
مسك ايدي واتمشينا واشترالي ترمس وحمص وبلاليين ومطرت السما تاني واحنا ع كوبري قصر النيل .. البلاليين طارت مني والناس كانت بتجري لكن انا وهو ماسكين ايد بعض وكان فى كراسي روحنا قعدنا وضحكنا بهستريا ضحك واتصورنا .. وبعدها كملنا مشي تحت المطر .. راح لمحل ايس كريم واشترالي ايس كريم ليمون وشوكليت وكنت مستمتعه جدا وهو كان بيستغل اندماجي وعمل يصورني بيغفلني يعني وبعدين ما يغفل ماهو لبسني خلاص مفيش راجعه.. صورني كام صوره عدله كده ل الانستجرام والفيسبوك رغم انا بحب الصور العشوائيه جدا واتفاجئت انه محرمنيش منها ولقط كام لقطه حلووين .. اتصورنا ورجعنا مشي للعربية والمطر زاد قعدنا فى العربيه وضربنا حلبيسه حمص الشام وكانت مع صوت منير بتدفينا :
جى من البلاد البعيدة
لا زاد ولا ميه
وغربتى صحبتى بتحوم حواليا
وانتى تقوليلى بحبك
تحبى ايه فيا وده حب ايه
ده اللى من غير اى حرية
قعدنا شويا وبعدين قعد يلف بالعربيه بينا واشترالي غزل البنات واتطافس معايا رخامه :
_ جعانه ..
_ جدا ..
_ يلا بينا
_ يلا بينا
اتحرك بالعربيه و روحنا عند الرفاعي بتاع الحواوشي انا كنت مبهوره لاني كنت عاوزه اروح بجد ، لاني قولتله عاوزه اروح اجرب الحواوشي بتاعه لاني مدمنه حواوشي لا انا مدمنه اكل شارع بحب العك اوي .. دخلنا وطلب لينا اتنين حواوشي وواحده فطيره سجق اكسترا جبنه .. بصلي وقالي :
_ قومي هناخد الاوردر وناكل برا
_ يلا بينا
أخدنا الاوردر وقعدنا فى العربيه وكان الجو مغيم والاكل كان دافي والأكتر دا الل حسيته وجوده معايا اليوم بالنسبالي كان حلم ..:
_ كده العربيه هتدعي عليا
_ وعليا . انهارده كل حاجه احنا الاتنين
_ قولي بجد انت اخدت ايه ع الصبح ولا قبل ما تنام
_ مااخدتش حاجه غير علاجي وانتى عارفه .. دا انتى الل فكرتيني به كمان
_ طيب هو ..
قاطعني : لا هو ولا هي .. كلي الاكل سخن متضيعيش اليوم فى تساؤلات .. بعدين ابقي اسألي
_ ع رأيك هنروح من بعض فين ..
اكلنا واحنا متمزجين ومدفيين بالأكل وبوجودنا مع بعض ، خلصنا اكل واشترالي ميراندا يوسفي وهو اشتراله بيبسي .. هضمنا لاقيته باصللي :
_ مش نفسك تحلي
_ حبيبي انا محليه الوقت كفايه انا عليك
_ مش نفسك فى ام علي
_ يااااه وهى طالعه سخنه كده
_ يلا بينا ع الحسين نضرب سحلب وام علي
راح بينا ع الحسين وقعدنا ع قهوه عادية وطلبنا ام علي وشربنا سحلب وقعدنا مع فرقه موسيقيه كانت بتغني وقضينا وقت جميل وانبسطنا .. جوعت ونفسي كان فى كشري رحنا اكلنا كشري وبعدها اتمشينا رغم الطين لكن كان عادي الشوارع وهى مبلوله وريحه المطر فى الجو كانت واخدانا لمكان تاني .. طول الطريق ماسك ايدي وحاططها في جيب الجاكت ، اتصورنا فى شارع المعز الصور العشوائيه دى ورجعنا للعربيه كنا خلاص العشا أذن :
- متحركتش ليه ؟
_ نسيت حاجه مهمه
_ ايه هي ؟
_ سندوتشات الكبدة والسجق
_هو بصراحة مينفعش نيجي هنا ونعديها بس كفايه
_ مش عاوزه ..
_ لا الف مره كفايه عك معدتك هتدعي عليا
_ لا عادي مش مهم
_ لو مكنتش تحلف .. يلا بينا
نزلنا وروحنا عند باب عبدة وضربنا سجق وكبده مشطشطين وكان فى حد بيعمل قهوه ع الفحم .. قالي :
_ تيجي نقفل اليوم بواحد قهوه ع الفحم
_ يلا بينا
طلبنا القهوه واخدناها معانا وطويل الطريق بنسمع منير ومندمجين وقف قدام العماره ومعايا شنطه مليانه كاندي وشوكليت دارك كتير وهنزل رجعت قعدت وبصتله :
_ اليوم كان جميل بشكل لا يوصف رغم بجد مكنتش قدرالك والله وحقيقي دلواقتي مش قدرالي شخصيا اطلع البيت والله ..
_ علشان تسمعي الكلام بعد كده ان لو مكنتيش نزلتي كنتى هتندمي يوم زى دا طار كده ولسه هتستني الشتا الل جي ..
_ اه بصراحه رغم كنت جاهزه لخناقه ، بس قولي بصراحه ، انت هتسيبني ، هتطلقني يعني ، شوفت حد تاني غيري فحبيت نختم علاقتنا بخروجه للذكري وكده ..
ضحك: والله مجنونه .. هى دى شكرا بتاعتك
_ اصلك ملكش فى عك الشارع + مبتحبش تمشي فى المطر + انهارده كان عندك ميتنج فى شغلك ووقته كنت عندي + هو انا بحلم..
_ اليوم دا يومك انا خصصته ليكي حبيت نعمل ذكريات لينا نفتكرها ونحكيها ل أولادنا ، ايوه انا مليش فى العك بس بحبه معاكي + مبحبش المطر لان مبحبش اتبل لكن بحبك انتي + كان فى ميتنج وأعتذرت واجلته لبكره علشان اقضي اليوم دا معاكي لان انهارده اخر يوم شتا فيه مطر مفيش أمطار تاني غير بقي الشتا إللى جي واكيد اكيد كنتى تتمني تقضيه فى الشارع وانتى كل مره بتكوني فى البيت ومبيرضوش ينزلوكي فخطفطك من اول اليوم ..
_ يعني انت عملت الحاجات دى علشاني
_ وهو انا عندي غيرك اعمله .. انا عارف اننا مختلفين عن بعض فى حاجات لكن ع الاقل زى ما بتشاركيني اهتماماتي وبتستحمليني أشاركك جزء من اهتماماتك ، زى ما انتى بتحاولي نتقرب لبعض انا كمان أحاول معاكي ، وبصراحه انبسطت لان اليوم زى ما خططت انه تكوني مبسوطه وانا فرحان علشانك ..
_ يعني مش هتسيبني متاكد
_ الل زيك ميتسبش خلاص لبسنا
مكنتش عارفه اقوله ايه كنت عاوزه اترمي فى حضنه كلمه كمان منه وكان هيلقيني فى حضنه، مسكت نفسي ومسكت جاكت بتاعه الل كنت لابساه ومدفيني وعطست :
_ يلا اطلعي واجهزي بقي لدور البرد الل باين اهو
عطس وضحكنا وحسيت فعلا ان نصيبي حلو بوجوده وان مهما اعمله قليل لان الل بيعمله معايا كتير .. سألته سؤال عجيب معرفش سألته ليه :
- بتحبني ؟!
ابتسم وقالي اسمعي منير هيقولك ايه :
من بين كتير حكايات
حكايتنا دى حكاية
ساعات احب حاجات
ما يحبهاش غيرى
فى الرايحة فى الجايات
اغنى مع طيرى
طمنى اطمن
فى القلب راح اسكن
وطول هواكى معايا
ادفى واطمن ..🧡
" فى العلاقات مش شرط يكون شريكك شبهك ، عادي لو مختلفين، لأن الإختلاف دا هو الل هيقربكم لبعض ، كل واحد هيحاول يقرب لتاني بطريقته وهتوصلوا لنقطة تجمعكم ، لكن لو الإختلاف مفيش فيه اى إندماج هتبقي علاقة فاشلة اهرب ، ببساطة نجاح العلاقة لما الاتنين سواء شبهه بعض او مختلفين عن بعض انهم يشتغلوا ع علاقتهم وينجحوها مع بعض لأنهم ببساطة عاوزين بعض ف الإختلاف هنا هيكون مميز فى علاقتهم مش عائق "
- يارا سمير
اعتبروها اإسكريبت من الأجواء الشتوية واتمني تكونوا انبسطتوا معايا فى الخروجة🧡😂
رأيكم 🧡☺