"يقول اسمي في منتصف الكلام
مثل أب يمسح على رأس طفلته
ينطقه بطريقة لا تثير بي سوى المزيد من الكآبة
يقول اسمي بطريقة تجعلني أشتهي
أن أبكي
كل عمري
بين ذراعيه."
________
همس.
ثُم يأتي لك اللّٰه بشخص يتحدث بإستمرار عن لمعانك رغم أنكَ تبدو باهِتاً .
فتحت عيني بازعاج صوت خرخشة عجيبة تأفافت بضجر ورجعت غمضت عيني بازعاج بس الصوت موكف فد قليل ذوق واحساس الي دخل الغرفة.
وفجأة شهكت وكعدت الغرفة منو فايت لغرفتي ركزت شوية اني مو بغرفتي بالمستشفى وعمو احمد نايم على الكرسي وقيس رسمياً نايم بصفي اول مرة اشوف هيج .
الممرضة ضحكت بوجهي كالت:ترا من اول البارحة همه على الحالة والغرفة اخذوها مخصوص علمود يظلون اثنينهم.
ضحكت على كيفي باستحياء يمكن اول مرة اكون محاطة بمثل هاي الكمية من الاهتمام صح يمً امي مجنت ادخل مستشفيات مثل هنا بس مجان اكو اهتمام.
حركت ايدي على وجة قيس ضحك وهو نايم يمة كزكرت علية لو اكدر الا انزل اعض خدودة شلون يبتسم عبالك طفل رجعت زعجتة مرة لخ هالمرة كرمش عيونة وبعد ايدية بهدوء .
كعد وهو يهمس:صباح الخير،يممممة واخيراً كعدتي ؟!
همس:اي كعدت لتعيط هسه عمو احمد يكعد.
احمد:كعدت يالارعن اكو واحد هيج يعيط بالمستشفى الناس هنا مجاية متعافية مثلك مرضى مرضى.
قيس:شبيك حبيبي تفاجئت بيها من كعدت تعالي احضنج روحي الحلوين اكلج عيني مسوية روحج الأميرة النائمة احنا اختنا محد يبوسها غيرنا.
احمد:يا اغبر اكو واحد هيج يحجي ويا اخته.
قيس:ليش نيتك مو حلوة بيه وهلكد الثقة بينا معدومة قصدي يبوسها من خدها.
اثنينا اني وعمو احمد بنفس الوكت صحنا:يابريئئئئ .
ضحك ورجع شعرة لي ورة وبده يتثاوب شو هذا اندار يتمطى ووكع ههههههههه لو تشوفون شكل الدكتورة من فاتت وشافته لازم ظهرة ويسوي صوت طفل يتنعوص وهو يحاول يفهمها الموقف جان شي خيال .
ظليت للعصر وطلعت من المستشفى بعد ما اخذت طن ادوية لفقر الدم ونقص الفيتامينات واخذوني ناصبين علية من المستشفى للبيت وكل شوية واحد صايح ادري بمجاعة أفريقيا كاعدين.
من وصلنا جان الكل موجودين وهمام جان موجود كعدت يم جدو وسكتت جنت احس بارهاق وخمول مو طبيعي ومن اكوم الدنيا اسود بعيني الدكتور نبهني على هاي الحالة لان اساسها فقر الدم.
فتت للغرفة على اساس ارتاح بس اوبس اكتشفت الراحة من العصر كعدت من النوم ساعة ٣الفجر لكيت نفسي مغطيني هاي اكيد واحد من اخوتي.
حسيت بجوع رهيب وعطش نادراً ما امر بهاي الحالة.
طلعت واني مطمئنة اكيد هسه همام كاعد جان اكو صوت بداخلي يكول همام كاعد اي بس مو علمود الاكل مثل كل مرة لا هالمرة كاعد لخاطرج.
يمكن غرور زايد مني هذا الاحساس بس اني اعرف ومتاكدة من هذا الشي زائد اتمناه.
ويا همام احساسي غير ما انكر اني بنية حلوة صح مو احلى شي بس شايلة روحي بس ويا همام ونظراتة احس نفسي اجمل وحدة.
مشاعري غريبة بس مثل ما توقعت فعلاً همام جان كاعد بالصالة منتجي بظهرة على التخم وثاني رجلة يم صوبة نفطية طرت من الفرح حسيت نفسي مثل طفل فرحان بغراض المدرسة.
سويت لفة حتى ما اتذكر مكوناتها وطبعا عصير الخوخ وهمام سويت لفه وقوطية كولا ورجعت للصاله المكان هدوء وهو ساكت بطريقة غريبة بس مليانة جاذبية.
ورا دقيقتين تقريبا ندار على الاكل وضحك باستهزاء.
همام:ذكرتيني بالاكل.
همس:مو انت كاعد استحيت ما اشاركك.
همام:شنو رأيج تشاركيني شي غير الاكل مثل ذكرياتج شغلج دراستج اشياء حياتية اكثر صح اني اموت على بطني واقرب طريق لقلب الرجل معدته بس ترا اعجبج من ناحية الاشياء الحياتية.
همس:يعني شنو احجي ماعرف استحي انت اسال.
همام:زين سين شنو جان اكبر احلامي.؟
همس: اني بسيطة اكبر احلامي ان اظل ممتنة لحياتي.
همام.ممتنة.! ليش مو سعيدة ليش ممتنة.؟
همس:السعادة يختلف مفهومها من انسان لانسان اني مفهومي عن السعادة هو الامتنان والراحة النفسية وانت؟.
همام:من اشوفج تضحكين.
دفعت جتفة بايدي بضحكة وهو لزمها لأيدي وظل ساكت قربها من ايدة المعاكسة اليمنى وشوية نصة جسمة وتقرب على الصوبة.
همس:لتشاقة لا جديات شنو تعبيرك عن السعادة.
همام:حقج متصدكين هذا شي طبيعي بس اني تعبيري عن السعادة ضحكتج.
همس:حتى لو اجيت وياك فرضا حجيك صحيح بس انت شقاوجي اليشوفك يفتهم ان سعادتك مو ضحكتي.
همام:تعرفين شنو اكثر شي اعاني منه وهو اقناعج ان انتي شخص جميل ومهم بحياتنا.
همس:احساسك غلط اني اعرف قيمتي يمكم .
همام:مو واضح هذا الشي بالمناسبة فعلياً احس بسعادة وانتي تضحكين مع العلم انتي بخييييييلة بضحكتج.
همس:لا وين اكو والله اضحك.
همام:مشمشة مجاوبتني على بقية الاسئلة.؟
همس:دراستي تعرفها هندسة معامرية بالنسبة لذكرياتي مو كلها اتذكرها يعني بذكريات اذب خيط وخيط شغلي من اطيب ارجع اشتغل ودراسة مفكرة بيها بس عاجبني ادرس اختصاص جديد.
همام:مشمش اذا تقدمتلج تقبلين بية.
سحبت ايدي منه بخجل وحسيت خدودي اشتغلت نار رجع حاول يسحب ايدي هالمرة زحفت لمكان ابعد ضحك وتقرب واني ابتعد هاي وحدة من اصدق الابتسامات الي ابتسمتها بالدنيا.
همام:ما احرجج اكثر بس انطيني كلمة اشارة اي شي تلكيني الباجر من الصبح اني خاطبج .
همس:عفية مو هيج انطيني صبر.
همام:عندج وقت من هاي الساعة لباجر متعرفين شسويتي بيه هاي الايام اللي راحت من تمرضتي لج بابا اريد اني ادري بال عليج اسويلج تحاليل واعتني بادويتج .
همس:وعد راح افكر.
كلتها وركضت واني بداخلي أضحك شلون تمثيل وعد راح افكر واني اصلا قبل ميحجي موافقة بس يلا الثكل صنعة على كولت جدو.
_______
ميار.
طوال عمري ارتب الكلمات واختبر النبرة ،اختار الوقفة واحدد لحظة بدء والانتهاء وفي الاخير التزم الصمت لان شيئا ما بداخلي يمنعني البوح.
اخذت همس واخذت خالة ورحت للفندق الي حاجزة بي اغلب العمال بي اتراك صح اني ممشيت على توصيات الدكتور باجر اروح للمعالج بس قررت .
احسسها احنا بورطة واشوف اذا تستجيب كان بها اذا متستجيب اني اصلا حاجزة.
كعدت كدامها لزمت ايديها الاثنين بين ايدي باوعتلي ومال راسها شوية.
ميار:اسمعي همس احنا تورطنا هنا اني حاجزة غير فندق والجو برا سيئ منكدر نطلع وانتي وخالة حالاتكم خاصة احجي وياهم اني اعرف تعرفين تحجين تركي.
مجاوبت غمضت عيوني وعصرتها عصر اريد دمعتين اخر شي شفت نفسي لا احساس ولا ضمير ولا قطرة دمعة بعيني استحضرت موقف وتصورت حسن يخوني والله نفعت الدموع عشرة عشرة نزلت.
ميار:همس الله يخليج ساعديني مداكدر اتحمل مسؤوليتكم ولا اكدر ادبرها.
تململت ورجعت سكتت كلت احاول اخر مرة عسى ولعل.
ميار:لخاطري اني حامل بداعت بنتج احجي وياهم.
شهكت وعيونها صارت حمرة دم شوية وحركت راسها بالموفقة غير احس اريد اهلهل يمة صلاوات على محمد واخيرا راح تحجي.
ركض جبت العامل التركي بس قبلها فهمته على السالفه يطول بالحجي وياها وميجفص ويكوللها احنا اصلا حاجزين الولد متعاون كلش.
طلع صوتها بالبداية تأتأة وبعدين حركت راسها مرتين تلاثة واخذت نفس وحجا يمة صوت بلبل مو انسان والنبي عربي بلبل.
همس: هل بامكاننا ان نحصل على غرفة من فضلك.
ندارت علية ووجهتلي الحجي واني ممصدكة شنو هالصوت.
همس:ميار كم يوم راح نبقى.؟
ميار:فديت الصوت يومين.
همس:اريدها ليومين فقط.
رجعت ندارت علية وسالتني:تريدين اكل صحي علمود الطفل،وخاله تكدر تاكل اكل لو شوربات.؟
ميار:عادي اني اكل كل شي وخالة الافضل شوربة عدس او دجاج.
همس:نريد عشاء كذالك ارغب بشوربة دجاج واكل صحي ارجو اننا نستطيع ان نذهب للغرفة التي حجزناها.؟
اكدلها وساعدني دلاني على الغرفة ووصل الاكل وهمس جانت ساكتة اكلنا وهي جانت ساكتة فد نقهرت ليش رجعت سكتت وكلتها لميت الغراض وساعدتها انام على الجرباية حالتها مريبة بشكل عصبت على نفسي وحسيت بغلطتي مو المفروض اجبرها.
جانت الغرفة نظام جرباية نفرين وجرباية نفر خالة حطت راسها على جرباية النفر ونامت .
عدلت همس وساعدتها بتبديل هدومها وبدلت لبست تراكسوت مريح تاكدت من الباب الغرفة وغسلت اسناني وسويت روتين لوجهي فكرت لو اسوي لهمس اني شكلي بهاليومين راح اطيح حظي وحظ البنية بس يلا .
خليت مخدتين وراها ولبستها بوند وردي كيوت ياربي شكد كيوت حطيتلها ماسك وسويت سكراب لايديها اول شي دورت لكيت جيس فرشته جوة ايدها منتبهت ان هي تبتسم الا من شلت الماسك.
ابتسامة تخبل خلتني احس مسوية انجاز عظيم بس لان ابتسمت الية.
كملت العناية باخر قطرة سيروم وطلعت تضوي فرشتلها سنونها واخيرا رجعت كل شي لمكانة وندثرت يمها لزمت ايدها وغفيت بسرعة اليوم ركضت ركض مو طبيعي.
بنص الليل كمت وديتها للتواليت من رجعنا هي بادرت ولزمت ايدي ابالي تريد تنام بس فاجتني من همست بصوت ناصي.
همس:تدرين هاي طبيعة زوجي من ينام الا يلزم ايدي.
بنفس النبرة جاوبتها:زوجج حلو.؟
همس:اي حلو بشكل عام احنا الاحفاد كلنا حلوين بس الجمال مو كل شي بهاي الدنيا.
ميار:صحيح ولو تدخل يعني بس احجيلي عن زوجج وعلاقتكم.؟
همس:ههههه لا عادي علاقتنا جانت حلوة اني مو من النوع الي ارد علية من يعصب اسكت وهو يبرد ويراضيني بس شوية شوية اني بديت افقد اعصابي ورا ما اجهضت اكثر من مرة وماكو سبب واضح.
ميار:زين هو جان يستحملج ويحبج او تركج ورا ما شاف شكد تجهضين.
همس:لا بالعكس جان يواسيني ويقنعني بس اني جنت اريدلي سند بهاي الدنيا اريد احد اضمن وجودة وياية وعلى فكرة همام كلش حنون ويلاحظ ادق التفاصيل يعني مرات من جنت اتمرض كل شي الكاه كدامي حاضر الفراش والاكل والمكان يسوي دافي والعلاجات بوقتها يعني جان يحبني ويهتملي .
ميار:شنو اكثر شي تحبي بي.؟
همس:قبل منتزوج جنت احب حبة الية جنت اريد احس احد بهاي الدنيا مهتملي ويحبني لان اني همس بدون واسطات مو لان حلوة ولا لان شريفة ولا لان اهلي واصلي وفصلي اريده يحبني اليه بدون شروط هسه دوري انتي متزوجة مو.؟
ميار:اي متزوجة حسن ابن عمي.
همس:تحبي.؟
ميار:اي حسن رجال يعتمد علية شهادة ومال وجمال وابن عمي بعد اكثر من هيج ماكو.
لزمتها نوبة سعال قوية لدرجة تقيئت ورآها هدئت ارتاحت ورجعت سألتني :لا قصدي تحبي مو لان هو صفات الزوج المناسب،ويعاملج حلو لو لا.؟
ميار:المعاملة صعب هسه اكلج احنا صح متزوجين ونحب بعض بس القدر خلانا عبالك مخطوبين ماكدر احكم على شخصيتة بس هو هادئ بشكل مزعج اني العكس خبصة وهوسة ورنة هو غثيث يوغف على الكلب اني كيوت.
كملت الحجي ونفجرت ضحك بصوت كتمته بايدي خاف خالة تكعد ورجعت كملت.
ميار:لا اشاقة هو يحبني واني هم بس شايفة الشخصين الي عكس بعض بكل شي مثلا صار موقف ودخلنا اثنينا راح نحلها بس هو بالهدوء اني اخذه حقي مو مهم هدوء لو صياح هو ينتظر الادلة اني عيني دليلي وانتي شنو اختلافكم.؟
همس:اختلاف جبير ماكو بينا بس الغيرة والقوانين الزايدة الي عندة قاتلة تخنك واني احب اظل على راحتي يعني وحدة من القوانين ممنوع احد يخابر عليج ورا التسعة بليل ممنوع اشوف امي ممنوع آحضن احد اوووو قائمة طويلة بعكسي اني جنت مخليته على راحتة وهذا غلطي.
سكتت شوية وراها لزمت ايدي ووكعنا بنومة عميقة.
____________
سلسبيل.
الخلاَف الطَويل يعنِي : أنّ كِلاَ الطَرفين عَلَىْ خَطَأ
- فولتير.
تشكرت من سام مرة الخ ورحت على سيف منظرة يخوف صح هادئ بس اني اعرف ان هذا الهدوء ما قبل العاصفة وصلت يمة لزم ايدية وسحبني جنت بالمعنى الحرفي اركض ورا ركض مو طبيعي .
حسيت قلبي صار بمعدتي صح هو محذرني ما اقوي علاقتي ويا الطلاب بس ميستاهل هذا الغضب كله بس لا عرف بهمس مستحيل اكول على مكانهم مستحيل اخيب ظن احمد.
وصلنا للغرفة وبدون تفكير اكيد هاي غرفتة يعني نزعت الادوات الي تخص التزحلق ونزعت الجفوف وهستوني انزع الجاكيت وعتني من ايدي وهو يصيح.
سيف:اني من شنو منبهج ؟
سلسبيل:سيف اولا اني ما احب هذا التعامل عبالك طفلة مذنبة شنو لازمني وتريد تضربني احنا اثنين واعين نتناقش مو تضربني مثل الحيوان.
سيف: ومازال انتي مو حيوان ليش تخالفين الحجي.
سلسبيل:حيلك حيلك تخالفين شنو موقف عفوي تشكرني على موضوع ووكعت يعوفني بالكاع لو شنو.؟
سيف:انتي فد وحدة ادبسز وعندج لكل شي جواب.
قبل ما يمد ايدة علية وخرت وذكرتة:اولا اني كلتلك اني مو حيوان وانضرب وثانيا لتنسى نفسك وتعيط هسه يشتكون ويطلعوك من المنتجع وثالثا والاهم اذكرك بحجيك من كلت احميج واصونج ومادري شنو هسه موقف تافهه وصلت بيك تريد تضربني احلم بعد ان عندك خطيبة اصلا.
تركته وطلعت ركض.للاستراحة اخذت من كارولين المفتاح ولبست حذاء وجفوف لان عفته هناك وطلعت افكر وين الغلط بينا.
بعد ساعة تقريبا من التفكير حسيت شكد خطئنا بحق بعض لا المفروض اني جوابي هيج لان هو محذرني لمصلحتي ولا هو يشك بية صح المنظر الي شافة غلط بس هذا الشي مو بيدي ولا اني ذبيت نفسي بحظن سام.
طلعت اخذت كهوة اثنين ورجعت رحت لغرفتة دكيت الباب ودخلت جان كاعد بنهاية الجرباية وحاط راسة بين ايدية رحت حطيت الكهوة على ميز التواليت ووكفت يمة شوية ورفع راسة جان حاط كلينكس على خشمة اكيد صعد ضغطة ونزف باوعلي ورجع نزل راسة.
ورا شوية الظاهر وكف النزيف كام وتوجهلي ذب الكلينكس ووكف كبالي بالضبط.
سيف:اني اسف ردة فعلي محلوة
سلسبيل:اني غلطت جان لازم ابررلك الموقف بس اني ما احب احد يعاملني عبالك طفلة مذنبة الموقف عفوي.
سيف:خلص درس صار النا اثنينا لا اني اتسرع بالحكم ولا انتي تستكتين ومتبررين الية .
سلسبيل:خلص اتفقنا هسه اشرب الكهوة علمود نطلع نتونس.
شربنا كهوة وتغدينا وبعدين اخذنا غراض التزلج وطلعنا نتعلم اشكالنا تضحك نكوم ونوكع وسيف ميقبل المدرب ولا سام يساعدونا واني انتهيت ضحك.
يسكتني واني مبتسمة صح قبل شوية صار بينا خلاف المهم حالياً كاعدة اتسابق ويا بقدراتي واضحك واتشاقة صح يسكتني وميقبل بس مهان علية خاطري وفشلني كدام العالم.
وهذا الشي يسوى عندي الدنيا واهلها.
__________
زهراء.
لو رأيت كيف يرتجف الواحد منا خوفًا أن تغادره الأشياء التي وضع قلبه فيها لقَضيت حياتك بأكملها تطمئنه.
- داليدا عوض الله.
مرت الاشهر واني وفهد عقدنا عقد سيد يمً شخص ولا يشبه السادة هههههه.
وسافرنا للدولة الي يريدها فهد استقرينا بشقة طابق رابع وتعرف على شباب عراقيين وجانو كاعدين بالطابق الخامس شقة شباب عزابية.
فهد من الصبح لليل يمهم بطبيعه الحال وين يروح اني فتت بحجة الدراسة هو دراسة ومكمل.
كل ليلة احط راسي على مخدة واسال نفسي نفس السؤال الي بالكم ليش فهد العاقل الرزن الحلو ياخذ وحدة مثلي اقل ما يقال عنها عادية.
هذا السؤال ينهش بعقلي صار فترة طويله وبدت الايام تقرب على موعد ولادتي جنت خائفة ومرتبكة وفهد وجودة زي عدمو من يكعد الصبح يتريك ويصعد يم الولد مينزل للاربعة الفجر ومرات يبات.
اليوم ١٢/٢٣/٢٠١٧
الضربات الي احس بيها والالم مو طبيعي عرفتها هاي التشاليع مال الولادة صعدت فوك ورا ما لبست وعدلت حجابي اسال على فهد.
اصعد الدرج ونفسي ضيق بلكوة اخذ نفس واحد احس روحي راح تطلع هسه وكت المصعد يخرب كعدت على الدرج ارتاح شوية وبديت اكمل سورة مريم لتسهيل الولادة اقراها عشر مرات.
وصلت للشقة وطولت واني ادك الجرس فتحها واحد غريب سالتة وين الشباب كال :العفو أنا المستأجر الجديد لقد غادر الشباب منذ اسبوع.
مصدكتة دفعته وفتت ادور عليهم بالشقة يعني اذا صارلهم اسبوع فهد وين يروح .
طلعت من الشقة بدون اعتذار احس عقلي مو يمي ولا براسي وصلت لنص الدرج وتذكرت رقم واحد من اصدقائة يمي خابرتة.
سالته واستفسرت على فهد وحلفلي ان فهد صار اسبوع من مشايفي وجان ناوي يسافر لسليم فتت للشقة واني بطني تكطعني احسن روحي تريد تطلع قررت أروح للمستشفى بوحدي وراها اشوف سالفة فهد لان الالم مو طبيعي.
احس باي لحظة ممكن اجيب بس بين ما اني ادورعلى جنطة الولادة كلت خلي اخابر الاسعاف مابية اطلع واخذ تكسي واصلا اني ما افهم بس شوية الاسعاف اسهل.
كمت ادور على جوازي والاوراق اللي تثبت احنا عايشين بهاي الدولة وعدنا اقامة وللمفاجئة ماكو الاوراق كلها ماكو غير نسخة من الاقامة والجواز جانت بطن سترتي.
رجعت خابرت صديقة وحلفتة ونخيته اخر شي حجة وكال فهد رجع علمود يتزوج وعلمود يضمن ان مستحيل تكدرين ترجعين اخذ كل مستمسكاتج.
حسيت الخبر وكع علية هو وهموم الدنيا لعد فهد وين وليش هيج يسوي اصلا وهو يعرف حتى اذا تزوج ميهمني .
حسيت انتهيت رجعت خابرت الاسعاف وفتت على البرنامج مال حسابي البنكي طلع صفر هاي اخر نقطة عقل ظلت عندي وراها.
اغمى علية وكعدت جان الممرضات يركضون بية واني على السدية نايمة ليش مدا احس بوجع مع العلم طول اغمائي حسيت بطني تكطعني.
مديت ايدي تحسست بطني وهمست ظل قاوم لخاطر امك حبيبي اني بمحنة اريدك وياها .
من كعدت جنت بس اني والممرضة شايلة الطفل ظلت تعلمني علية وتفهمني وساعدتني بالرضاعة ارتاحيت من حطيتة بحظني كلشي مابي حسيت بشعور سعادة صافي.
اي ياماما واخيرا اجيت تستاهل كل التعب الي تعبته لخاطرك بوستة ودموعي تكت وقررت اسمي نائل عسى ولعل انال خبر عن فهد .
________
تاخرت عليكم بالبارت بس عادي مو مشكلة تقروة بالعطلة احسن من ينزل ويا خبصة الامتحانات.
اسفة على السحكات والاغلاط من هسه اذا موجودة.
هذا حسابي على الانستا اذا تريدون تضيفوني :nrs.998
شنو رايكم بتصرفاتهم بالمناسبة ابد لتصرفون مثل ميار ويا همس لان هذا شي مو علمي وغلط وممكن يجيب نتائج سلبية مو كل الحالات مثل همس.
سلسبيل وسيف صح تصرفهم لو غلط؟؟
وزهراء وصدمتها بفهد راسك نائل شكد حلو؟
وهسه تصبحون على خير❤️
الكاتبة نورس العزاوي💚✨