السلام عليكم ورحمة الله وبركاته.✨
-----
المُشاركة من فئة: صنوان.
كُتِبت بواسطة: مَريم
السّلام عليكم.
عايزة أقول إنّه حقيقي حقيقي من أهم الحاجات اللي لازم نتناقش فيها هنا في الكتاب دا، ألا وهي الكيبوب.
لو سألت أي بنت في أي سن في أي مكان عن الكيبوب هتقولك مين ميعرفهوش أصلًا!، والسبب ببساطة استحلال الحرام بشكل جنوني وبالذات الفترة دي، وصراحة أنا مش فاهمة لحد دلوقتي سبب الإنتشار الرهيب دا، ولكن بغض النظر عن الأسباب والمُسبّبات، فإحنا لازم نتكلم عن الموضوع ولابد فعلًا، فهنقسّمه لأكتر من نقطة عشان تبقى كل حاجة واضحة وإن شاءالله يبقى فيه إجابة لكل الأسئلة اللي ممكن نسألها.
وأول نقطة هي غض البصر، ممكن بعض الناس تفكّر إن غض البصر واجب على الرجال فقط، ودا طبعًا غلط تمامًا، لإنّه ذُكِر في سورة النّور وجوب غض البصر للمرأة كمان في الآية دي:
وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِن.
يعني غض البصر واجب على النساء كمان؟، أيوة واجب، طيب ايه السبب والحكمة من دا؟، ببساطة، حفظًا لقلبك من الفتنة!، يعني احنا بنشوف أصناف كتير من البنات المهووسات بالشُّبان المشاهير أو حتى الرجال الأربعينيّين، ودا سببُه برضو بكل بساطة إن ملامحهم جذّابة وحلوين وماشاءالله عليهم، فالبنات بيبصّوا عليهم في الصور والفيديوهات والمقابلات وكل الكلام دا وبيُعجبوا بيهم لحد الهوس المرضي، وبذكر الهوس، ناس برضو بتقول إنّه لا إحنا مُعجبين عاديّين مش مهووسين ولا حاجة وإحنا ضد دا والكلام دا كُلّه، وهنا لازم نقول إن مش دا السبب أصلًا في منع التحديق وحفظ ملامح الفنّانين، وإنّما عشان دا حرام، بس كدا.
تاني نقطة هي مظاهر الفنّانين، تعالوا نفكّر كدا شوية، تفتكروا مظاهر الفنّانين الكوريّين، الذّكور بالذّات، ترضي ربّنا؟
صبغ الشّعر، المكياج، الباروكات، اللبس، تفتكروا كل دا يرضي ربّنا؟
لا طبعًا، لإنّ ربنا لعن المُتشبّهين من النّساء بالرّجال والمُتشبّهين من الرجال بالنّساء!، يعني لما راجل يصبغ شعره ويحط مكياج ويحلق لحيته وشنبه دا يبقى ايه؟، لسه برضو راجل؟
الخواتم والحلقان والسّلاسل، دي ترضي ربّنا برضو؟
أمّا البنات، فبرضو عايزة أُشير لـ "مش عشان أنتِ بنت تقدري تشوفي جسم بنت زيك"، بعض النّاس مفكّرين إنه طالما أنا بنت خلاص عادي أشوف جسم بنت زيي يعني، ولكن العورة تظل عورة حتى لو أنتِ بنت، يعني لازم تغضّي بصرك كمان عن أجسام البنات وعوراتهم، ودا اللي صراحةً مستحيل يحصل مع بنات الكيبوب، ملابسهم كلّهم بلا استثناء فاضحة وكاشفة للعورات وأنتِ كبنت جاية ببساطة جدًا تتفرّجي عليهم لا وتدعميهم وتدّيهم مُشاهدات وتشاركيهم مع الناس كمان، يعني مش كفاية ذنبك لوحدك، لا كمان ذنب كل شخص هيشوف البنات دول!، يا جماعة والله الواحد عنده كفايته من الذنوب، فاللي لسه مُصر إنّه يتفرّج عليهم ويتابعهم على الأقل القليل جدًا اتفرّج عليهم لوحدك وبلاش تاخد ذنبك وذنب النّاس اللي هتشوف الصور والمقاطع اللي أنت بتنزّلهالهُم، وآه، فيه نقطة صغيرة كدا عايزة أذكُرها وهي النّاس اللي بتحط صور البروفايلات بتاعتها صور "البايسات" بتوعهم، مينفعش تحطّي أنتِ كبنت صورة ولد عشان كل بنت هتبص عليه هتاخدي أنتِ ذنب، ومينفعش أنتِ كبنت أو أنتَ كولد تحطّ/ي صورة بنت عشان كل ولد هيبص عليها هتاخدي أنتِ الذّنب!
يعني الفضول لوحده ممكن يخلّي البنت أو الولد -وخاصّةً المراهقين واللي سنّهم صغير- يدخلوا يشوفوا ايه ده، مين دول، وبالتالي أنتِ أو أنتَ هتكونوا السّبب في بداية طريق الحرام ليهم وأنتوا قاعدين في بيوتكم في أمان اللّٰه ولا حاسّين بحاجة!
وبرضو النّاس اللي لمّا حد يسألهم يقولّهم ايه ده ولّا مين دول يقولولهُم وبكل سرور دول الفرقة الكوريّة الفلانيّة، روحوا وتابعوهم دول حلوين جدًا وأغانيهم مُؤثّرة ويا اللّٰه على جمالهم وجمال أصواتهُم، دي جنّة الأرض يا جدعان!.
فيه شاب على اليوتيوب اسمه ياسر ممدوح فعلًا ربّنا يجازيه كل خير على الفيديوهات بتاعته حلوة جدًا وقصيرة ومناسبة للمراهقين اللي غالبا مش بيحبّوا الفيديوهات اللي تتجاوز حاجز ال 10 دقايق ويمكن أقل، فهو الشخص دا بيعمل فيديوهات لا تتجاوز الخمس دقائق في الغالب ولو تجاوزت فبيبقى كحد اقصى 10 دقايق ودي قليل جدًا جدًا لما بتحصل، وفعلًا فيديوهاتُه مفيدة جدًا وجميلة، هحطّلكُم رابط القناة بتاعتُه على منصّتي، ادخلوا شوفوه، ولكن أمانة عليكم يا بنات متبصّوش عليه عشان احنا مش عاوزين ناخد ذنوب، زي ما قلت في البداية إن غض البصر واجب على البنات، فإنتِ تُغضّي بصرك عنه يا حلوة وتسمعي صوته بالهاند فري اللي كُنّا بنستعملها في الحرام قبل كدا، أو تحطي سمّاعة الموبايل جنب وِدنك بدون ما تُبصّي عليه.
وبصّوا كدا معايا على الفيديو دا لأمير مُنير بيتكلّم فيه عن حُكم الموسيقى:
-أمانة يا بنات متبصّوش عليه-
في ناس كتير حلوة جدًا زي أمير منير وزي ياسر ممدوح وزي شريف علي، كل الناس الحلوه دي نقدر نستثمر وقتنا اللي بنضيّعُه على الاغاني اللي بتركّبنا ذنوب دي ونسمع حاجات مفيدة ونتثقّف ونعرف اكتر عن ديننا.
كنت من كم شهر كدا منزّلة بوست على المنصة بتاعتي بتكلم فيه عن الموضوع ده ولكن طبعًا مقدرتش اتكلّم بشكل تفصيلي لإن عدد الكلمات كان محدود و كنت منزّلة أكتر من ملف فيهم اسكرينات عن أسباب وأدلّة تحريم الأغاني من مواقع مختلفة عشان بس موضوع التحيز، بس تقريبًا محدّش شاف البوست ده غير بنت واحدة بس، فحبّيت أشارك معاكم الملفات دي تاني بعد تنزيل الفصل ده على المنصّة عشان طبعًا اللّينكات مبتشتغلش في الكتاب، بحيث توصل لأكبر عدد من الناس بعد ما يشوفوا الفصل دا.
وافتكروا، من تركَ شيئًا للّٰهِ،
عوّضهُ اللّٰهُ خيرًا مِنه.
هدانا اللّٰهُ جميعًا، في أمان اللّٰه 💗.
--------
رأيكم بالفصل؟✨
سبحانك اللهم وبحمدك، أشهد أن لا إله إلا أنت؛ أستغفرك وأتوب إليك.
و سلام!💫