( أبو رعب )
.. بقلم نورس
....................
طلعت صار بوجهي وهو طالع من الحمام ويكف بردانات الدشداشة
اني جمدت بمكاني وهو ضربلة صفنة بوجهي من شافني .. خزرتة وصحت بيه
سهير: هيييي وين تباوع نزل عينك
هو انتبه لنفسة بسرعة نزل راسة وهو يدير وجهة ويحجي
جهاد: اعتذر اختي ما.........
عفتة يحجي وركضت جوة الهث من الهبطة واباوع بوراي اخاف شافني أسر ..
بعدين استوعبت !!
شفتة .. والله شفتة ، خب اي هذا هو
واني انطيتها اله بالوجه
.. وين الانوثة وين الحركات وين الكشخه؟
تمشيت لغرفتي واني اغم بنفسي واحجي .. صارت بوجهي أمي
زهدية: يا يا فلك كون .. شبيج تخبلتي ولج ؟ تمشين وتغمين بروحج
سهير: ماكو شي يمة .. اغم حظي المصخم
زهدية: صخموا عيشتج كون دمشي جدامي للمطبخ حضري الغدة وي نسوان اخوتج ، ابوج على جية كون كبل لا يجي الاكل مصبوب والسفرة ممدودة .. خوش ؟
سهير: اي خوش خوش
زهدية: انه رايحة كاعدة يم المرة .. عيب ضالة لوحدها
حجتها وراحت ..
واني توجهت للمطبخ لكيت صبا وجيهان يحضرن بالمواعين .. لزمت صبا ماعون ووكفت يم الطباخ تريد تصب
جيهان: اوكفي اوكفي عيني هاي وين ؟
صبا: شبيج دا اصب الاكل
جيهان: لا مو على كيفج
حجتها وهي تجر الماعون من ايدها واخذت مكانها
.. بعدج ما صارلج يومين من طبيتي لهذا البيت .. مو تردين تسويلج مكان بيناتنة وعود شوفوني اني نادرة بشغل البيت
صبا: شهل همجية اشو دجيبي .. اني اخذت الماعون قبلج واني اللي حصب الغدة
جيهان: خايبة شو دميلي من وجهي .. بعدج ستوج هاكدج اني الجبيرة هنا
كل هذا واني واكفة اباوعلهن وهنة يتعاركن وصوتهن بدة يعلى .. اجت صبا تريد تردها تدخلت وقربت منها وحجيت
سهير: حبيبتي اكعدي انتي احنة نكمل الباقي .. اصلا انتي ما عندج بس هل كم يوم ترتاحين بيهم ، عود ورة السبعة تعاي وكولي أنطوني اريد اشتغل اله تعضعضين اصابعج ندم
كوة سكتتهن وحضرنا الغدة بدون مشاكل .. بس احسها هي ضاجت وبس تخزر بعيونها .. اجوا ابوي والولد كلهم طبوا سوة وصبينالهم سفرة بالديوانية .. واحنة كعدنة بالصالة
اله صبا ما قبلت تكعد ويانة ..
بعدها ضايجة
واجة أشرف شافهة ووكف يراضيها بباب المطبخ .. واني اباوعلهم الباب صاير كبالي
واجة لاف ايدة على جتفها وهو مدري شيحجيلها وهي تضحك .. سلم ع المرة من بعيد واشر لمرتة حتى تكعد
.. وكعدت ولا كأنو شي صار
وهو رجع للديوانية
كملوا اكل وكمنة نلم بالمواعين المفروض المواعين على جيهان .. صبا طبت لغرفتها وي رجلها وهاي اخذي ابنج واصعدي فوك
واني ضليت صافنة .. عود هاي صدك تحجي ؟
رحت كلت لامي وراحت هدت عليها وخلتها تنزل للمطبخ تكمل شغلها .. واني طبيت لغرفتي اشوف يوسف
ما ضلوا الخطار للعصر وراحوا لبيت كرايبهم ومناك يرجعون للعمارة .. برغم اصرار اخواني وابوي انو يباتون الليلة يمنة وعود الباجر يروحون .. بس الأفندي جهاد قفل نروح يعني نروح
بعد مرور اسبوع :
جنت اتمشى بالحديقة وشايلة بأيدي يوسف واناغيلة ، عمري صاير يضحك وعيونة بيهن لون وضوة الشمس يضرب عليهن يبين زراكهن
سهير: فدوة لله شهل جمال .. عليمن طالع ولك ، شو ابوك راسة مربع
واني احجي ما حسيت اله على باب الكراج ينفتح وفاتت سيارة أسر للبيت .. انتبهت على هذا اللي فتحلة الباب
وضل صافن وهو يباوع بأتجاهي .. ضليت ابلعم وكلبي يدك بكل قوتة وعيوني تتنقل بينة وبين أسر
اللي احسة عيونة صارت بكصتة وهو يباوعلي .. خزرني واشرلي براسة ليجوة
.. واني طكيتها ركضة .. زين وما وكع مني الجاهل
ختلت بالغرفة ما هي الا لحظات واجة علية وبضوجة
أسر: انتي شتسوين طالعة برة متكليلي ؟
سهير: يووووه واني شمدريني اشم ايدي انت وجهاد راح تجون
أسر: ما تنردين .. تعاي سوي جاي
سهير: زين زين جاية
مشة طالع من الغرفة واني وراه ويسأل
أسر: جا أمي وين ؟ شو ماكو حسها بالبيت ؟
سهير: راحت اخذت مرت أشرف للمجمع تسوي تحليل .. يمكن حامل
فتح عيونة مصدوم
اسر: لا عليج الله ؟
سهير: والله شبيك .. غير هي كعدت من الصبح خلصتها علينة عوع وعوع ولازمة المغسلة وامي مصفكتلها وتكلها وين الله وتطلعين حبلة
اسر: اخوج لازم ما ينطي مفكة
سهير: اي وداعتك هاي صارلهم 10 ايام ملازمها الغرفة
ابتسم طرف شفتة
أسر: شو احسج ضايجة
سهير: يمعود تتنعوص علينة صار كم يوم شوفتنة الويل .. غير عود عشتو قسمنة الشغل اني وياها وجيهان .. الا هي ماشية بدرب التغليس اوي ضهري واوي راسي واني عود اكول خطية بعدها عروس
أسر: اويلي من سوالفج .. ادري بيج بارود على ساعة تهدين عليها وتكتليها فبعد اخوج اكعدي واستري علينة ما عوزنة مشاكل
سهير: لا والله اني الها عبالي تطلع فقيرة ، عمي اني الفقيرة بعد ماكو فقير بهل دنيا .. وهسه تشوف حتى سالفة الحبالة هاي تطلع جذب بجذب وكول سهوة ما كالت
ضل يضحك علية واني احجي بحركة أعصاب .. رحت سويتلهم جاي ووديتة الهم ، واسمع صوت هذاك اللي مطيرلي عقلي .. اووووف جهاد هم يجي ذاك اليوم ونصير جوة سكف واحد
رجعت امي ووراها صبا مبوزة وبوجهة لغرفتها وامي تدردم عليها
سهير: ها بشري شطلع بالتحليل ؟
زهدية: خايبة شطلع ماكو شي .. مرت اخوج تتعاير اكلت راسي صار يومين مصدكة روحها حبلة
سهير: مو كتلج وين اكو وحدة تشيل طفل ورة 10 ايام من عرسها .. بس انتي هم فطيرة رحتي ركضتي بيها للتحليل
زهدية: اي يبعد امج انه مخفتة خليت الندارة الج .. مبين عليج خبرة بهل سوالف
كمت وكفت وسويت انسحاب تكتيكي
من شفتها كامت تخزر بية وتنتر بحجيها
.. واذا اوكع بلسان امي بعد شيخلصني
....
اباوع لامي اللي عيونها مليانة دموع وتباوعلي بحنية
زهدية: والله وشفتج عروس يسهوة
باوعت لنفسي بالمراية ، فستاني الابيض القصير المناسب لهيج مناسبة ، عيوني اللي جارتها بكحل تزيد جمالها ، ومخلية احمر خدود خفيف لخدودي وشعري عايفتة على طولة وخليت جيهان تكوي الي
درت للبنات للمرة المليون واسألهن بابتسامة
سهير: حلوة ؟
جيهان: يبوووو عمي والله حلوة تخبلين
صبا: لا عاد من صدُك سهير .. طالعة تجننين وعليج عيون سحبتها تخبل
همست .. ايه بدت اللواكة
حسيت على ايد أمي وهي تديرني الها .. شفتها خلت بأيدي ثنين بتوت ذهب واني اباوع لايدي باعجاب من جمالهن
حجت : هذني ناذرتهن الج بيوم عقد قرآنج اخليهن بيدج
ابتسمت بفرحة واباوع لجيهان وصبا نظرات الغيرة تشع من عيونهن .. برغم رجولتهن ما مقصرين عليهن ومدندشات ذهب من فوك ليجوة
اجة أسر كال يلا راح يعقد السيد
حسيت كلبي زادت دكاتة .. لهل لحظة ما مصدكة اليوم خطوبتي على الرجال اللي تمناه كلبي لسنين
..
سواها وجاب اهله وعمامة وطلبني من ابوي ، والحمدلله مشت امورنة بسرعة وصار العقد والخطوبة بنفس اليوم خلال أسبوع واحد بس !
وكفت ورة الباب جابتلي امي كرسي كعدت عليه وخلت على راسي الكبوس الابيض وخلت رجلي بطشت بيه ماي وبعض من أوراق نبتّة الياس ، وخلت بين اصابعي حبات الهيل وكدامي صينية بيها شموع وبخور وحلويات واكواب مال شكر
وبدة السيد يردد بالعقد من ورة الباب لحد مكمل سألني وكال : رددي وراي بنتي ( نعم قبلت ، وانت وكيلي )
لحظات من الانتظار ثواني وبعض الحروف حتغير مجرى حياتي .. ما اخفي توتري وخجلي رجع ردد مرة ثانية وامي تأشرلي بعيونها
لحد ما اخذت نفس ورددت ورة السيد وانطيت الموافقة
.. واسمعة بدة يسألة وهو يردد
: جهاد فريد ال..... زوجتك موكلتي سهير علوان ال.... على كتاب الله تعالى وسنة نبيه الاعظم صلى الله عليه وآله وسلم ونهج اهل البيت عليهم السلام نهج الحق وعلى المهر المعلوم بيننا الذي معجله (..) ومؤجله (..) فأن قبلت يا جهاد على التزويج بموكلتي سهير فقل أمام الحظور والشاهدين " نعم قبلت "
رد موافقتة بصوتة الرجولي اللي صار يلعب على اوتاري انترس البيت وتعالت أصوات الهلال والهوسات ..
والجوّ اعتلك بالرمي
كعدوني بالصالة واباوع للبنات اللي يركصن وامي تدبج وياهن بالنص بفرح واني فرحانة لفرحتها
دقايق ودخل معشوكي مدنك راسة وتلكوا أمة وخواتة بالهوسات وهو يبتسم بخفة وبرزانة ..
صار كبالي واني مدنكة راسي ميتة بدمي .. عبالك عايشة بحلم ، باسني من راسي واجت عيني بعينة .. انرسمت ابتسامة تكاد تبين على شفايفة وهمس
جهاد: حلاتج فاقت كل توقعاتي
احس روحي سحت .. لبسني الذهب ووي كل قطعة يلبسني ياها همسة غزل تشعل خدودي نار
خلص هل يوم وخلصت وياه لحظات وسوالف عزلتهن من عمري وعديتهن من احلى ايام حياتي
.....
أسر: واكف على سدة بحيرة تابعة لمعمل السكر بمحافظة ميسان ( العمارة ) ، قضاء المجر الكبير
كعدت جوة فياي النخلة ..
واباوع على هذاك البيت واردد كلمات اغنية صلاح حسن وادندن بيني وبين نفسي
حبيت وعيوني بجن لو ما احب احسن اذن
..
هذا الغرام شكد صعب يحمل بطياته الشجن
..
مجبور الك اني احن
أسر: بجن بجن والله بجن حبيت وعيوني بجن
جريت حسرة طويلة .. وماخذني الواهس وما احس بالوقت بحيث بقيت اردد بالاغنية واعيد بيها بال5 مرات وجنت متوقعها كاعدة تسمعني عايش دور العاشق الولهان
وهناااااك شفتها وهي تباوعلي ترسم على شفايفها ابتسامة تخلي كلبي يدك باسمها .. بسمة صدك اسم على مسمى
اشرتلي بايدها .. واني طفرت من مكاني
ما اهتميت لحرارة الشمس اللي صارت تصكع براسي
كل الجان هامني شوفت عيونها ..
لحظات واختفت من انظاري عيوني متشبع من شوفتها .. اااااه يبسمة كلبي شوكت اجي واخطبج
.. ما بيوم سويت شي مو زين وياها سنين وجانت نظراتنة هي التحجي عن حبنة .. جنت استحي وما اشوفها بس بليل حتى متشوف ملامح المستحة على وجهي
رجعت بخطواتي منين ما اجيت والمسافة جانت من بيتنة لبيتها 3447 خطوة ، بكل عقلي حاسب الخطوات جنت كل يومين اروح مشي اكول بلكي اشوفها حتى لو من بعيد بلكت اسمع صوتها .. وكل هاي المسافة وما اتعب ومن يخلص الطريق جنت اضوج
بس من انتقلنة لبغداد انقلبت علية كل الموازين .. وابوي منعنة من الروحة للعمارة بسبب سالفة عمي ومحذر علينة
.. بس انة عود اكدر ؟ جنت اجي بين فترة وفترة بالسر بدون لحد يدري عدا صديقي جهاد ..
صرت كبال بيت جهاد واباوع لبيتنة اللي على مسافة جم متر ..
مو هينة بين ليلة وضحاها تعوف بيتك وديرتك وأهلك وناسك والمكان اللي انولدت وكبرت بيه .. بس ما جان بيدي شي !
جهاد: متطب ليش واكف
انتبه لوين اباوع وطبطب على جتفي وهو يكول
.. وداعتك كلها راح تصير سوالف وتنسي والله راح يعوضكم بالاحسن ان شاءالله
هزيت راسي ..
الوحيد اللي يفهمني بدون لا احجي
.. وهذا الثاني هم احس نفسي صرت اثكل عليه
وخاصة من بعد ما صار نسيبي
حسيت روحي متفشل واني اجي وافوت لبيتهم ...
....
سهير: مر شهر على خطوبتي جان يجي بين فترة وفترة ويشوفني .. كملنة كلشي من حيث نيشان وغرفة وتجهيز
..
واكفة بالمطبخ واحضر بالكيك والعصير .. انطة خبر بيد أسر وكال راح اجي اشوفج وعندي حجي وي ابوج
بين فرحتي لأن راح اشوفة وقلقي وتوتري اللي مسيطر عليه ، شنو الموضوع اللي يريد يحجي بيه وي ابوي ؟
وهنا اندك الباب واني مثل عادتي ركضت للشباك مال مطبخ واعاينلة وكلبي يبتسم كبل شفايفي .. وعيوني تهل بشوفتة
دخلوا للديوانية .. واني رتبتلهم الضيافة وشلت الصينية ومشيت لباب الديوانية وقبل لا ادكة اجاني صوتة
جهاد: عمي تدرينة احنة ناس عرب ما نحب نماطل بسالفة خطوبة ما خطوبة .. وانة جاي اليوم احسم الموضوع وياك واكلك المرة رايدها وكون بهل الاسبوع نحدد العرس
كلبي دكاتة الف والابتسامة شاكة حلكي ..
وبودي يصير عندي جناحات واطير
لكن سرعان ما تلاشت ابتسامتي واني اسمع ابوي يرد ببرود
علوان: بس انة عندي شرط.....................................
❄❄❄❄❄❄
توقعاتكم?؟