بارت جداااا طووويل
الحلقة الواحد والسبعون
#ليلة_من_فبراير
العبرة بالخواتيم
❤️
ياسر ـ بدون وعي فتحنة الباب واطشرنة برة
انتبهنة علئ روحنة كلنة مصابين والدم من فوك ليجوة تارسنة وعلي جان يطفي بنفسة
ملابسة اخذت نار ووياه فاضل يطفي بي
ردت اتحرك من مكاني مكدرت
الم كلش قوي بجسمي
مادري مكانة وين
بثواني صار الرمي علينة من كل مكان بشكل عشوائي
جرني عبدالقادر وبقية الشباب احتمينة ببناية واكعه
باوعت لنفسي اريد اعرف ليش ماكدر اتحرك وشنو هذا الالم
لكيت رجلي اليمنة مكطوعه من الساق وبعد متر ونص عني ..
مستوعبت الشفته
اني بمكان
ورجلي بمكان
الوجع ينخر بالجسم
اخذني عن جو الاكشن الاحنة بي
اباوع لرجلي مشمورة هناك
اتمنيتهه تجي وتمشيلي
حتئ ترجع لمكانهه بجسمي
حسرة بكلبي تعصرني
انضافت لبقية الحسرات
المرت عليه
جزء مني هيج مشمور
قبل دقايق جان من ضمن هالجسد
اتجي عليه واتحرك ومحاس بنعمتي الجبيرة ..
باوعت الدم يتطافر من كل مكان ورجلي تضخ دم ضخ
عبالك صوندة وانفتحت
يمكن هاي نهايتي الدم النزفتة هواي
اول ثواني ماحسيت بالم
بس بعدهه الوجع سيطر علئ جسمي صرت مثل المشلول و بس الوب
كلنة انحصرنة بداخل هالبناية
القناصين اشتغلو رمي علينة
ثانية وحدة ماسكتو
ولا نطونة مجال
كأنو واحد يحجي
والثاني يجاوب
جماعتنة مكدرو يوصلولنة
لان جنة اخر سيارة بالمجموعه
ويمكن اتصور استشهدنة ..
او بسبب الرمي لان جان كلش قوي وماكدرو يسعفونة
ماعرف بس الاعرفة ماكو احد ويانة وبقينة اربع جنود مصابين لوحدنة
البناية مكشوفة ضلعين من الخلف
وضلعين محتمين بيهن
السكف فوكانة يترنح وية طلقات الشاجور.. كأنو يرقص علئ الحانهن
فاضل وعبد همين مصابين
بس اصابتهم اخف مني ومن علي
من الالم صرت ماحس بألم
خدر جسمي واتبندت بمكاني
علي محترك نص جسمة..
الجتف والاذرع والصدر والضهر ولخيته اخذت نار خطية ويون من الوجع ويتلوئ مثلي
فاضل وعبدالقادر احتارو ويانة شلون يواسونة ويسكتونة
صرت من الوجع احبس انفاسي واضغط علئ نفسي حتئ لا ينسمع صوتي بالونين
وعلي نفس الشي
ركضو عليه الشباب
واحتارو شيسوون حتئ يوكف النزف
عدة الاسعافات الاولية بالسيارة
والسيارة احتركت ماضل بيهه شي
نزع النطاق فاضل وشدة علئ رجلي بس ماكو فايدة النطاق قوي مو مرن واذاني بالزايد
راسا عبدالقادر فتح ملابسة ونزع الفانيلة شككهة وشدهه ع رجلي
ماكدر اكول راح الوجع
لان يدك بالكلب
بس استسلمت
لان هذا اقصئ شي يكدرون يسوو الشباب الي
رغم مصيبتي برجلي المشمورة بعد متر عني
بس من شفت علي يتلوئ من الحروق هواي انقهرت عليه
الجو بارد نهاية شهر 12
وبمحافضة نينوئ يعني البرد قوي
والمفروض النسمات الباردة تخفف شوي من الحروق وتخثر الدم
بس ماحاسين بالجو
بالعكس احس صار الجو خنكة فد مرة
شعور مختلف عن كل الازمات المرينة بيهه
تقريبا ربع ساعه يلة الرمي شوي خف
فاضل ـ شباب ماشايلين باتريات احتياط للاسلكي
عبد ـ مو حجينة بي قبل لايصير الانفجار
وين باترياتة
ـ وكع مني واطشرت
مو زين كدرت اجرة قبل لا يقنصونة
ياسر ـ طالما خف الرمي معناهه راح يجون علينة
علي ـ اني ماكدر اتحرك روحو وعوفوني
ـ ولا اني اكدر اكدر اتحرك من مكاني
ومن النزف دخت
وبعد مبية اسند نفسي
روح انت وعبد انفذو بجلدكم
احتمال جبير يجفتون علينة بأي وقت..
فاضل ـ لاتضلون تتفلسفون وتكلبوهه درامة
كلنة راح نطلع منا وعايشين همين
و غصبا عن خشوم الدواعش
ـ احنة بنصهم وماعدنة غير الاسلحة الخفيفة بشنو نقاتلهم
عبد ـ لو يجون جماعتنة
لو يجي ملك الموت ياخذنة
ـ طلع عبدالقادر رمانتين من ملابسة ولزمهن بيدة
فاضل ـ شدسوي
عبد ـ حتئ لاياخذونة اسرئ
بس اشوفهم نفجرهه علينة وعليهم
ـ عاشت ايدك زين تسوي
لو نموت بشرف
لو نعيش بشرف
ولا نوكع اسرئ بيد هالكفار
ـ مر وقت بس ماعرف شكد
استسلمت لمصيري
يمكن راح اموت هنا واحنة محاصرين
حتئ علي الجان يون ويتألم هداء وسكت وكتمنة اذيتنة بكلبنة
عبدالقادر وفاضل يراقبون الوضع
و كل واحد عينة بمكان معين
لا يفاجئونة
بـــس الميخـــاف مــو بــشر
واعترف ..
جنة كلنة خايفين
مو خايفين من فكرة الموت لا ابد
بس من طريقة الموت
لان جانو الدواعش يتفنون بالقتل
الهدوء بهيج اجواء مزعج
طالما اكو رمي يعني نكدر نحدد همة وين بس هالهدوء متعرف شنو وراه وشكد مسافة واكفين عنك
ثواني وحسينة بحركة خفيفة من جهه الانقاض
عبد وفاضل يحجون بهمس واشارات بيناتهم ..
فاضل ـ يجوز حيوان
عبدالقادر ـ الحركة مو كال حيوان انتبه
ـ راح اتقدم واشوف
ـ لاتجازف خاف فخ النة اصبر
ـ حضر رماناتك وانة شايل سلاحي
ـ كلنة مترقبين هاللحضات
قهر بكلبنة ينبض
لان ماراح نشوف احبابنة بعد
دائما افكر بهاللحضات القاسية للموت
شلون عاشوهه اهلي من استشهدو
وشلون عاشوهه اصدقائنة الستشهدو
هي دقايق
بس حسيناهه ساعات وايام متنتهي ..
ثواني ومن بين الانقاض والحياطين المفلشة طلع النة طفل صغير ناعم هزيل
يمكن عمرة سبع سنين او اصغر ما متأكد
ضعيف فد مرة وعيونة غايرة
ملابسه شكد صغيرة ومشككة متهرئة
بس صايرة واسعه عليه من الضعف
شعرة اصفر مثل خيوط الشمس الذهبية
عيونة ذبلانة من الجوع
وشفايفة مفطرة من العطش
حالته تبجي الصخر
احمد ـ امشو معايي عمو انا اخذكم لمكان مابينو داعش
فاضل ـ لك انت منو وشسوي هنا
وين اهلك شلون طلعت بهيج رمي
ـ ماعندي اهل كلم ماتو بس انا واختي الكبيغه بلبيت
ياسر ـ خاف علاسة الوضع مو امان
عبدالقادر ـ ما اعتقد..
طفل وينو وين العلاسة
شجابك هنا عمو
ـ غشعتكم ( شفتكم )
من بعيد وقلتو اجي عليكم
عبد ـ ومين فتت والرمي فوكانه شلون وصلت النة
ـ من الطاقه ( الفتحات )
الي بين البيوت غشعتوكم من بعيد وجيتو عليكم
ـ ولك ارجع عمو ارجع الوضع مو امان
ـ انا جايي عليكم لاني خايف بس انا واختي هوني..
امشو معايي كوي هسه يجون الدواعش ياخذوكم
علي ـ عبد الرمانات بيدك
ـ اي
ـ هية لو بالهدف لو بالنجف
بس بقأئنة هنا غلط
مكشوفين وماكو شي يحمينة
ياسر ـ يعني بالحالتين ميتين
فاضل ـ اتفأئل يمعود شبيك
عبدالقادر ـ امشو نروح وياه
هي لو تصيب لو تخيب
ـ ساعدني فاضل وعبد بالمشي لان جسمي ما احس بي وعلي كدر يمشي لوحدة
جانت خطواتنة كلش ثكيلة
ونحاول نحسبهه حساب
لا نخطيئ ونروح كلنة بشربة مي
خايفين لان رايحين للمجهول
بس مجبورين
وصلنة يم حايط بي فتحات صغيرة
بقينة مترددين شلون ندخل
منعرف شكو ورة الحايط
يجوز دواعش وجيناهم برجيلنة
ويجوز خلاصنة
الله اليدري
عبد ـ فاضل الزم هاي رمانة بيدك
وهاي بيدي واني راح ادخل قبلكم
فاضل ـ لاتجازف يمعود
احمد ـ عمو والله ماكو شي بس انا واختي
عبد ـ اوك حبيبي عمو اني جاي وياك..
ـ دخل عبد قبلنة يتفقد المكان
الوكت بدة يظلم
ونهار شتئ يصير كصير ..
من اتاخر جوة عبد
كلنة ارتبكنة
خفنة لا صاير عليه شي
بقئ فاضل يراقب
واني وعلي همين نراقب وياه
الئ ان مر اكثر من ربع ساعه يلة طلع عبد و اتنفسنة الصعداء بجيتة
ـ الموقع مؤمن
ادخلو ماكو شي
فعلا بس الجهال موجودين خطية
ـ دخلنة من الفتحة
صغيرة يعني علئ كد بشر يدخل منهه
دخل عبد قبلي وسحبني
ودخل علي يلة فاضل اخيرنة
بقينة ندخل من فتحة ونلكة الثانية
وصلنة غرفة واكعه نصهه
بيهه كومة اانقاض
وخشبة جبيرة واكعه بالكاع ماعرف يمكن ضهر كنتور او شي ثاني
راد يسحبهه الطفل وساعدة عبد
وخلوهه ع جهه
وجواهه باب مثل باب السرداب
رفعهه ونزل الطفل
و فاضل واحنة وياه وبعدين عبد ..
دخلنة للسرداب
جان مكان رطب و اظلم
.بي هواي كراكيب واغراض ..
نسينة اني وعلي كل وجعنة من شفنة هالمنظر
طفل بهيج عمر صغير عايش بهيج مكان موحش وكئيب واظلم هو واختة ..
اتصورنة اختة جبيرة ونايمة متدري بينة
بس من ركزنة عليهه طلعت طفلة متتعدة عمر العشر سنين
اتمددت بالكاع بعد ماكدر اوكف
وكعد يمي علي بس مبتعد عننة
خاف نطخ بي ويتأذة
فاضل ـ عمو انت شلون هنا عايش لوحدكم انت واختك
ـ قلتولكم اهلي كلم ماتو بالقصف
ـ لا اله الا الله..
زين شبيهه اختك
ـ من اهلي كلم ماتو بلقصف كنا برة البيت فـ بقينا بس انا واختي
طلعنا مهزومين نركض لبيت جدتي
لانو خايفين
لكن بالطريق اختي وقع عليها حايط من البيوت الي كن تفلشت
وقع على غجليها ( رجليها )
وماطاقت تحركم بعد وبقيتو اجغ بيها ماتقدر تمشي
وبس وصلنا غشعتو بيت جدتي هم ويقع ومااعغفتو وين اخذا والرمي فوق غوسنا وانا خايف وابكي ما اعغف شسوي جبتوها ودخلتوها
بلرهرا ( سرداب)
مال بيت جدتي
عبد ـ لا اله الا الله
شهالمصايب
لاتخاف عمو منعوفكم هنا انتو ويانة..
زين شكد صارلكم هنا
ـ صيغلنا اسبوعين هوني
فاضل ـ الله يساعدكم ..
الوكع بيهه الجهال خطية ..
زين عمو عندك باتريات هنا
ـ هذا اغراض جديتي كلشي تلكة بي
ـ خلي ادور..
ياسر. ـ بقئ فاضل يدور بالرفوف وعلئ الكومديات
جانت اكو كواني بيهه بقايا تمن وطحين فتات كلش قليل خلصانة ماباقي بيهه شي
هالمكان يذكرني بالبيوت القديمة وسراديبهه بالافلاام الاجنبية
سرداب قديم من بيوت اهلنة القديمة…
ضل يدور فاضل بس مالكة شي
عبد ـ زين انت شسمك عمو حبيبي
واختك شسمهه
ـ اختي فاطمة واني احمد
ـ زين شتاكلون شتتشربون اذا كلشي خلصان عدكم منو يداريكم
ـ اني اداري اختي واساعدهه تقوم
وهي من بيهه حيل تسوي اكل علئ هاي اللمبة
ـ شلون تشغلوهه ماخفتو تحتركون
ـ نشغلهه بس من نريد نعمل اكل نقتصد بالنفط مالتهه
عبد ـ شلون
والبرد والظلام والاكل الخلصان
الله ينتقم من الكان السبب
ياسر ـ مأساة حياة هالاطفال
ذنب هالناس والاطفال بركبة منو
شنو ذنب هالناس هيج تعيش
وشنو ذنب اطفالنة هيج تعاني من داعش
وشنو ذنب بناتنة يسبوهن هالكفار
وشنو ذنب اطفالنة يبيعوهم
وووو الخ من التسأئلات البراسي
بس السبب واضح
مبيوعين وخلص
كلهه لعبة سياسية
لتسقيط فلان
ورفع فلتان
والواكع بيهه الشعب الفقير
الي لا الو ناقة ولا جمل بهالمعمعه كلهه
كعدت الطفلة فاطمة واتفاجئت بينة
خوفهه بشوفتنة
خلاني اكره روحي اني والشباب
جانت تحجي كلام ممفهوم بس اخوهه حضنهه وهدأئهه
بعدين عرفنة جانت تتوسل بينة لانئذيهم
دموعنة ماوكفت من حالتهه المسكينة
ماعرف نبجي علئ حاللنة
لو حال اهلنة المنعرفهم ووين
لو حال هالاطفال المرعوبين وماشافو شي بحياتهم
بهالاثناء فاضل دبر باتريات من الكراكيب الموجودة بس همين ما اشتغل الاسلكي
لان الباتريات منتهيات الصلاحية
شغل اللمبة وخلة مي ووانتضرة يفور وحط الباتريات بي
حتئ نمتص اخر طاقة بالباتريات ونستغلهه
علي ـ اشتاقيت لجهالي الخمسة اشتاقيت لوكاحتهم وهوستهم وعركاتهم وتكمزهم مثل لقرودة
ـ حالي من حالك همين اشتاقيت لجهالي بس الفرق شايفهم بالنت مو وجه لوجه
فاضل ـ تدرون بية عانس ماتزوجت لاتثيرون المواجع علية
عبد ـ هههههه منو لازمك
غير انت متقبل تتزوج
ـ عاد انت عريس وفرحان بروحك
ـ عريس وربعه يدفنونة
ـ انجب بلة لاتحجي هيج
ـ قابل جذب
ـ انت صوجك
بلة هذول متزوجين قبل دخلو داعش منكدر نحجي وياهم
بس انت اكو احد يسوي سوايتك و يعرس بهالزلك
ـ شلون يعني نجوز منخش دنية غير نجيب ولي العهد بلة استشهدنة
ـ وگ عليمن وتالي نرملهن خطية
ـ لك رب الاحباط انت
ـ حقك عريس وفرحان بروحك ماصارلك شهر ونص من اتزوجت
ياسر. ـ علئ اساس لو طاحت بيدك فرصة الزواج تفوتهه
ـ لا والله مافوتهه
بس غير اهل الاحبهه انذال
مقبلو ينطونياهه لان عسكري
ـ تشرفهم ياخوي
علي ـ حقهم يخافون علئ بنتهم لاتترمل لو بنتي ما انطيهه..
فاضل ـ هسة من حور بنتك همزين بعدهه طفلة
ياسر ـ رغم المنة ووجعنة
بس جنة مرات نضحك ونحشش بيناتنة
ولو بصوت كلش ناصي
نخاف لا ينسمع صوتنة
بس رغم كلشي الضحكة ماغابت عن وجوهنة..
كمل فاضل الباتريات وصارن يشتغلن
وبقينة حايرين شلون نراسل الضابط والفوج الجان ويانة ..
ليش متخليهه للفجر علئ الاقل نعرف جماعتنة يطلعون دوريات هيج وقت
علي ـ كلامة صح ترة
خلي ننتضر للفجر هسة ظلمه ومنعرف منو واكف برة
عبد ـ الليل طويل شيخلصة
فاضل ـ جيب ليل واخذ عتابة . .
شلونهه جروحكم شباب
علي ـ بقت يم الله
ـ بعدنة مقاومين لاتخاف
اتقرب فاضل علئ الطفلة فاطمة وكلهه شنو يوجعج وهي بدت تشرحلة
كأنو رجليناته ميتة خطية
لان صايرة سودة وابد متتحرك
منظر يكطع الكلب
الشباب سهرو الليل كلة
بس اني ما جنت انام
لان عبد وفاضل يكعدوني ميخلوني انام يحافون لا افقد
ورغم هذا جان يغمئ علية احيانا
و اصحئ علئ كابوس دخول الدواعش لبيت اخوتي واعدامهم
رغم صار سنتين علئ استشهادهم
بس ابد ماحلمت بيهم
بس هالليلة هواي تكرر عليه هالحلم
شفتهم من دخلو عليهم ومن اسروهم ومن عدموهم وحتئ اخوية حيدر شفتة شلون سحلو وشمرو برة لان مشلول ميكدر يمشي
كأنو حقيقة كدامي مو حلم
وشفتهم من اخذو البقية
طول الحلم اني مكبل ايد ورجل
وما اكدر اتحرك
ماعرف هل هذا واقع وفعلا هيج سوو وياهم لو مجرد تعب عقلي وجسدي واترجم لكوابيس
لليلة كلش متعبة
جسمي نمل وخدر وحسيت ببرودة قوية
علي مثل حالتي الحرك مأذي كلش والشباب يهفولة لان جسمة مديتحمل
الاطفال ماعدهم مي كلش قليل واكل ماعدهم
حسيت بنفسي كتلني العطش بعد ماكدر اتحمل كمت اون بدون شعور مني ..
عبد ـ ياسر ياسر لا تنام ياسر
ـ همهمت بكلمة وحد ..كاعد
ـ لا تنام اصحئ دير بالك تنام
ـ عطشان حلكي يبس
فاضل ـ من النزف اذا تبقئ هيج راح ياثر ع كيلتك
عبد. ـ اشررب هالمي اخذ شووي بلل حلكك
فاضل ـ المي كلة كبريت وهو دينزف خاف يأثر عليه
ـ خلي يأثر .. بعد ماكدر اتحمل العطش انطوني اشرب
لزم المي عبد بيدة وشربني
شربت كلش قليل علئ دفعات اشرب مو جرة وحدة
ماعرف شلون طلع علينة الفجر
وفجر الشتئ وية ساعة ستة او ستة ونص الصبح كلش باردة وبيهه ظلام..
صعد فاضل وعبد فوك حتئ يكدرون يتراسلون وية الجيش لان جوة بالسرداب ماكو ارسال..
بقت عيونة عليهم
كل دقيقة نكول راح يجفتون علينة الدواعش
ثواني ونزلو يركضون كالو سمعنة صوت مندري دواعش او جيش
ماعرف لشوكت راح نبقئ هنا
بقو الشباب يسمعون الاصوات
الئ ان راحو
طلع فاضل وشايل الموت علئ جف ايدة اتفقد الوضع ماسمع صوت ولا لمح احد
ورسل اشارات مشفرة للجيش
نطاهم احداثيات مكانة ورسلولة الجواب ونزل
ـ راح تجي قوة علينة شباب اتحضرو
ـ معناهه حتصير اشتباكات
عبد ـ اكيد لان القناصين بكل مكان
فـ لازم نتحضر للاسواء
ـ ورة ثلث ساعه بدة الاشتباكات
نسمع رمي قوي بين الجيش والعدو
كل شوي تصير طبة قوية
حتئ هاونات استخدمو
بس الله حفظنة
استمر الاشتباك اكثر من ساعة ونص بس اتاخرو اكثر من ساعتين يلة اجوي علينة
اضاهر ديسوون تمشيط للمنطقة
فاضل وعبد صعدو فوك ماعرف وين صارو..
ورة الساعتين اجئ عبد وفاضل كالو اجوي علينة فرقة الانقاذ
بهالخبر يلة كدرنة نتنفنس مثل البشر وحسينة نكتب النة عمر جديد ..
فاضل شال البنت والولد
وعبد ساعدني اصعد واطلع من السرداب
وعلي طلع ويانة
صعدنة السيارة وشفنة بقية الهمرات طابكة واطلع ناس ابرياء من البيوت
اغلبهم نسوان واطفال جان يحتمي بيهم العدو
بعد ما مشطو المنطقة وقتلو القناص الاوكراني بس الثاني انهزم للاسف ومكدر يقتلو..
من صعدنة السيارة واطمئنينة علئ الاطفال وعلئ نفسة
فقدت الوعي تقريبا بسبب التعب والنزف وماعرف بعد شنو صار وراية….
ــــــــــــــــــــــــــــــــــــ
نونة ـ مرة الايام عادية ماكو جديد
شهاب جان دائما يجي يمنة
اسويلة اكل و نكعد نسولف مرات
بس هو بهالفترة جان ذاب روحه علئ الشغل والدراسة لان يريد يكون نفسة
عرفت منة ابوه اتزوج وحدة ثانية
علمود اخوتة الصغار
اختة ام تسنيم زوجته حتئ ما انتضرو سنوية ام اركان تخلص ..
هي الزرعت الكره بكلوب الناس تجاهه وتالي حصدت ..
وشهاب جان يطمئن علئ اخوتة من يحاجيهم بالنت ..
يكلي كلهم ولد مينخاف عليهم صغيرهم عمرة 13 سنة مو كلش صغير يعرف يقيم بنفسة ...
واضاهر صدك
البنية مو مثل الولد بهالبلد
حتئ لو تشرد مينعاب ويبقئ ولد ماعليه شي
بهالفترة بديت الاحظ نضرات شهاب لنغم بيهه ان ..
. وهو دائما يسألني عنهه ويريد يعرف كلشي يخصهه
ودائما يختلق فرص حتئ يسولف وياهه
بس هي ابد مناطيته وجهه
حتئ تضوج منه ومتحب وجودة ويانة
الئ ان بيوم صارحتني ..
نغم ـ بعد لاتخلين شهاب يدخل هنا
ـ ليش نغم شسوة شهاب
ـ يريد يشوفج التقو برة ماكو داعي يدخل للبيت
ـ بس اني اختة وهذا بيت اختة
ـ هاااا ..
واني قابل غريبة عنج؟
ـ شنو هالحجي انتي همين اختتي بس غير افتهم ليش هيج تتصرفين
ـ ما ارتاحلة دائما يباوع علية وعيونة تلحكني وين ماروح من غير سوالفة المالهه طعم هو موود ديين ليش يباوع علية
ـ ترة شهاب حباب والله وكلبة طيب وخوش انسان اكيد اذا باوع عليج مو قصدة شي مو زين
ـ اني ماكلت عنة مو خوش
ووكفتة ويانة ما تنسي
بس اافهميني يا نونة مارتاحلة ..
الله يخليج اذا تريدين روحي لبيتة وشوفيه مو عندة بيت وحدة
ـ زين واذا كلتلج هو يحبج
ـ ياحب ..حبتة الحية
ـ لاتغلطيين نغم
ـ كل الزلم اكرهم
اني مو شكول حب وزواج ولا هالخرابيط ..
اني طالبة علـم
وعندي طموح واريد اوصل لشي براسي
ـ بس شكو بيهه اذا شفتي الشخص المناسب وصارت القسمة
ـ لا قسمة ولا زائد
من بعد سواية رجل وداد مستحيل افكر برجال والدنية ترة متوكف علئ زواج ورجال ..
وترة هواي بنات ماتزوجن وعاشن احسن عيشة
ـ لا حبي غلطة
هاي مرحلة وراحت
وانتي الحمد لله مابيج شي
ـ جسديا مابية شي لان كشفت عليه الطبيبة
بس نفسيا بية اثرر جبيرررر ميمحي
لو الف طبيب نفسي
اي شي ماكدر انسئ من الصار
يومية من اغمض عيني اتذكر كلشي كأنو فلم كدامي ينعاد
بس ما احجي لاحد
ابقئ ابجي الئ ان اتعب وانام
ـ سودة عليه ياعمري
بس ترة والله مو كل الرياجيل هيج وهذاا شهاب كدامج وياسر خير مثال
ـ اخوة اااي
بس غير شي لا
ـ ليش تحرمين نفسج من تكوين اسرة وبيت وجهال
ـ يابيت ياجهال
اني بعيدة عن هالامور
واذا علئ الجهال عندي جهالج بالدنية كلهه
نونة خصم الحجي
كولي لاخوج يبتعد عن طريقي
اذا امشي بفرع خلي يمشي بغير فرع
لان ماحب اتعارك وياه واكسر خاطرج
كليلة لايضل مراقبني بطلعتي ودخلتي للمدرسة ترة اخبر عليه الشرطة واخليهم يشيلو
ـ لالا يمعودة ياشرطة استهدي بالله
ـ العلية سويته وانطيتج خبر
حتئ هو يصير عندة علم وميسوي شي ميعجبني ..
يلة حبيبتي اروح اقرة تحتاجين شي
ـ سلامتج حبي اخذي راحتج ..
راحت نغم للغرفة تقرة
الله يساعدهه بعدهه متأثرة بالصار رغم اخذتهه لطبيبة نفسية وياية
بس ماقبلت تكمل العلاج يمهه
تكول مابية شي بس عوفوني ..
ما اعرف شلون اخليهه تطلع من هالماضي القذر العانت منة
خلصت الشغل ومر شهاب لبيتنة
صبيتلة غدة وكعدت اسولف وياه
ـ اكلج وين نغم اشو ماكو
ـ اشو بس نغم تسأل عنهه
ـ لـ لا عادي سؤال بريئ
ـ يابريئ .. هههه كول شتريد منهه
ـ لا هيج بس اسلم عليهه
ـ احجيهه لغيري حبيبي اني ما اقتنع
اعترف شتريد من نغم
ـ شريد يمعودة لاتذبين مصيبة براسي
ـ اشو عيونك دائما تلاحكهه
ـ عادي نونة ليش مركزة هيج
ـ لا مو عادي
واركز لانك اخوية و المفروض تعرف الله ومتباوع علئ البنات
ـ والله ماباوع عليهه بغير نضرة
بس ..
ـ بس شنو
ـ اختج دخلت كلبي من يوم الاجيت لهلبلد
ـ همممم اي كمل
ـ شفتهه كلش مثقفة وواعية
البكدهه ملتهيات فيس ونت ومدري شنو
بس هية غير شي اهتمامهه
اسلوبهه وكلامهه وثقافتهه تجبر المقابل ينجذب الهه..
وانجذبتلهه اكثر من عرفت بيهه تقرة كتب
ـ ههههههه هذا صاروخ الي لان ماحب اقرة
ـ لا مو هيج قصدي
بس هية تحب تقرة وتتطلع تتطور متحب تبقئ علئ نهج واحد
بيناتنة هالشي مشترك
ـ اوك يعني شتريد منهه بالضبط
ـ يعني بعد شريد منهه اكيد رايدهه بالحلال
ـ . ترة هي كلش بعيدة عن هالموضوع
ـ كل بنية مصيرهه للزواج هاي سنة الحياة
ـ مو وقتة شهاب ..
اختي واعرفهه اكثر مما اعرفك لاتسولف لاتحجي بهيج موضوع وياهه
ـ ليش شنو السبب
ـ يعني
الضروف المرينة بيهه مو طبيعيه
خلتهه تفكر بس بدراستهه وشهادتهه و متثق باحد
ـ زين هية ماعرفت اني شنو
معدني شنو
ـ تحبك گ اخ وبس مو اكثر
ونصيحه مني الك
اذا تريد تكسبهه عاملهه گ اخت
يعني لا تهتم زيادة بيهه
احجي وياهه مثل متحجي وية صبا ووياية
لاتميزهه لاتحسسهه عيونك تلاحكهه
ـ ماكو بنت متحب الاهتمام
ـ اختي متحب الاهتمام
اختي من هالنوع
وترة نغومة بعدهه صغيرة
يادوب عمرهه 17 سنة
وانت هسة يلة عمرك 21 سنة
الحياة. طويلة كدامكم اذا صدك رايدهه اسمع كلامي وسوي مثل مكلتلك
ـ ليش هية حجتلج شي
ـ لا ماحجت شي
بس اختي اني مربيتهه علئ ايدي واعرفهه من نضرات عيونهه
ـ خلص اذا الله كاتبلي قسمة وياهه متصير لغيري وراح تقبل بية
ـ اكيد والنعم بالله
اتمنئ هالشي لان انتو الاثنين احبكم واحسكم لايكين لبعض
بس الافضل تركز ع دراستك وشغلك وتكون نفسك وبعدين فكر بهالامور
ـ هو اني جنت هيج مقرر
يعني مو اخطبهه اليوم واتزوجهه باجر
نونة ـ وردة حبيبي الله لايحرمنيي منك…
ـ ويحفظج النة ياغالية
ـ مرة الايام ثكيلة
ياسر صارلة فوك الشهرين ممتصل ولا مخابر علينة
اراسل اخابر عليه ماكو خارج التغطية
بية سولة كلما يتأخر الزك علئ الاخبار ابقئ اراقبهه ..
الئ ان بنهاية شهر 12 من سنة 2016
جنت نايمة واجاني اتصال من رقم غريب بس من العراق
جاوبتة لكن ماسمعت شي ثواني وانقطع
بدون تفكير رديت اتصلت عليه ..
الو نعم
ـ اني رسلان اخو ياسر
ـ رسلان اهلا ..
اهلا وسهلاا شلونك اخوية
ـ بخير..
بس ياسر حلفني لازم اخابرج واطمنج عليه
ـ ياسر .. وين ياسر شبي
ـ اتصوب برجلة وصار معاق للاسف
ـ شنووووووو .. هووو وين هسة ارريد احجي ووياه
ـ بالمستشفئ نايم مبي يتحرك وكلياته متاذية لان خسر هواي دم ..وتقريبا فاقد ميكدر يحجي وية احد
ـ دكيت وبجيت ولطمت
كلتلة انطيني العنوان وين هو
اخذت اسم المستشفئ
وبدون تفكير
ركضت علئ نغم كلتلة ديري بالج علئ الجهال رااح اطلع
ـ اي عادي بس شنو صاير شبيج
ـ يااااسر متصووب وحالته موزينة
اااني رااايحة
ـ اااوكفي
ـ عفتهه وطلعت اركض
رحت لنادين هي تساعدني بهيج مواقف كلتلة اريد احجز للعراق بس ماعرف وين اروح
من عرفو هيج صاير بياسر كلهم اتعاطفو وياه ودعولة بالخير ..
عود رحت اريد احجز بس كلشي مماخذة ويايه ولا ورقة ثبوتية ولا جواز رجعنة للبيت واخذت اوراقنة
نغم ـ اوووكفي فهميني شدسوووين
ـ يعني شسوي اروح احجزز للعراق اريد اشووفة
ـ شلون ترجعين للعراق
ـ يمعوودة درووووحي
ابقي انتي وخواتج هنا وشهاب يمكم
واني وجهالي نروح للعراق
ـ تاخذين الجهااال
ـ وووخرري عنييي يمعووودة
نادين ـ لاتتلبكي الحجز عن طريق النت كمان اهدي شوي
ـ لعد متكعدين تحجزيلي شمدريني عبالي الا نروح
ساعدتني نادين احجز الي وللاطفال
لان اطفالي مسجلتهم باسمي بالمستشفئ وكملت اوراقهم وحتئ جوازاتهم من زمان
هنا كلشي سهل وسريع بالاجرائات
و الطفل اله حقوق لان يعتبرو بشر
مو حاله حال الحيوان ومجرد رقم بالبيت ..
ووفوكاهه كلمته ممسموعه مثل ماديصير بالعراق ..
اتصلت بشهاب وكلتله راجعة للعراق لان ياسر اتصوب ..
راد يجي وياية بس ماكدر قنعته يبقئ يم البنات هنة يحتاجنة اكثر…
وكلتلة ما اتاخر اروح وارجع بسرعه
صار وقت السفر وحضرت نفسي اني والاطفال ودعت خواتي واخوية بالمطار
اول مرة اطلع مسافة بعيدة بس اني وجهالي لوحدنة
جنت خايفة من الطريق ومن السفر ومن والعراق ومن كلشي
بس ماهتميت المهم اوصل واشوف ياسر
وصلت واخذت تكسي وطلعت من المطار
الجهال تعبو من الطريق واني هلكت لازمتهم واسحل بيهم
ولو عندي عربانتهم بس همة كبرو وصارو وكحين يريدون ينزلون و يمشون مدكدر اسيطر عليهم
من الخوف والتعب كمت ابجي بالطريق
كلت للسايق يوصلني يم فندق سعرة مناسب مو غالي ..
اخذت غرفة وخليت اغراضي وارتاحيت اني والاطفال طلبت اكل ووكلتهم شبعو ونطيتهم ممياتهم
طلعنة من الفندق وبالطريق اشتريت سيم كارت ورصيد واتصلت علئ الرقم التصل عليه من جان ياسر بالمشفئ
من خابرت رسلان اتفاجئ من عرف بية اني بالعراق..
كلي نقلناه لغير مستشفئ هنا بكردستان ونطاني العنوان ..
اخذت تكسي ورحت طايرة للعنوان لان اني اصلا بكردستان نزلت
ماعرف شلون وصلت المستشفئ
صح تعب وهلاك بس وصلت للاريدة
دخلت اني والجهال ونطيت اسم ياسر وانطوني رقم الغرفة ..
دكيت الباب ودخلت
لكيت يمة اخته لارا
شايفتهم كلهم بالصور عند ياسر
فعرفتهه من شفتهه ..
لساني نعكد ولزمتني الغصة من شفته هيج
بقيت واكفة بالباب وصافنة علئ ياسر نايم وميدري بشي
لارا ـ منو انتي
ـ شلونج لارا
ـ اهلا وسهلا
ـ أ.. أني .. نهاوند
باوعت عليه ورفعت حاجبهه
ـ هممم .. هذول حيدر وازدهار
ـ اي ..هاي ازدهار وهذا حيدر
ـ ميحتاج تحجين مبينين…
عافتني واتقربت علئ الجهال ثنت رجلهه وكعدت يمهم وباستهم وكامت تلاشيهم
عفتهه هي والصغار ورحت لياسر
اشوف رجليه اليمنه مكطوعه ومكانهه فارغ مصدكت بقيت ابجي
خطية حتئ وجهه متأذي ايدة مجروحه..
ـ عوفي متصوب ومتاذي لاتكعدي
ـ لا ماريد اكعدة بس اريد اشوفه
ـ من بعيد شوفي مو الا تلزكين بي
ـ ابتعدت خطوتين عنة وبقيت واكفة اباوع عليه
ياسر ـ حلمت نونة والجهال جايين يمي للبيت يشوفوني واني ممصدك بيهم سمعت صوت الجهال ولزمتهم العب وياهم
فتحت عيني ولكيت نونة كبالي
نونة!!
ـ يااااسر ياااعمرري حبيبي شلونك شلونن صرت
لارا ـ لاتضلين تصيحين احنة بمستشفئ
ـ اسفة والله مو قصدي
ـ شوكت اجيتي شلون وصلتي
ـ اول ماكلي رسلان راسا حجزت واجيت
كلي ديوجعك شي
الله عليك لاتضم عليه
لارا ـ طبعاا يوجعه هو هذا سؤال رجليه المكطوعه ترة
جربي تنجرحين وشوفي شيصير بيج
ياسر. ـ علئ كيفج وياهه لارا ..
سمعت صوت صغار يناغون عدلت كعدتي وشفتهم كدامي من يوم النولدو مالازمهم ولا حاضنهم ..
همييت عليهم مثل المجنون بس اريد احضنهم
جيبيتم جيببهم
ـ خاف مو زين عليك هاي الصوندات بجسمك
لارا ـ لاتشيلهم خاف يسحبون هالصوندات مالت غسل الكلئ ووتاذة
ـ ميخالف بس خلي الزمهم
نونة ـ لارا شالت حيدر واني شلت ازدهار وقربناهم عليه ضل يبوس ويشم بيهم ويبجي واحنة نبجي وياه ..
اتضايقو الصغار وكامو يبجون
خلتهم لارا بالعربانة وطلعت..
وين ماخذتهم لارا
ـ ترة اني عمتهم ماراح اخطفهم
ياسر ـ لا تخافين عليهم اكيد رايحه تشتريلهم شي
ـ طلعت لارا والجهال وياهم
وبقينة اني وياه سوية
شصاير بيك كلش متغير
ـ العسكرية للزلم
ـ شد حيلك وارجلعنة سالم الله يخليك
ـ كلهه جم يوم واطلع
ـ ونرجع سوية للوكسمبورغ
ـ لا ما ارجع
ـ اااانت رراح تخبلننني شعندددك بعد بااقي هناا معقوولة راح يبقوك تخدمم بالعكسرية
ـ سرحوني من الخدمة ..
بس ماكدر اسافر نونة
اريد اعرف مصير خواتي
نسوان اخوتي بناتهم وين صارو
ـ شكد صارلك بالعراق و ماعرفت شي عنهم وجودك هنا او بالخارج ماراح يأثر بشي
ـ مو مهم
المهم احس اني يمهم
وقريب عنهم
يجوز يطلقون سراحهم الدواعش
يجوز يحرروهم الجيش
لازم كون هنا واستقبلهم
ـ ماريدك تيأس بس
ـ ما أيأس ..
وراح ابقئ منتضر طالما صارت هيج حالتي وما اكدر احارب مثل قبل
كل الاكدر اسويه انتضر
ـ بالخارج راح يعتنون بيك من تدخل بالمستشفيات لان متطور الطب عدهم ومجاني تقريبا
بس هنا الطب غالي و مو ذيج العناية
ـ تريدني اسافر واعيش متنعم
وماعرف عرضي وين وبيا كاع
ـ بس انت سويت العليك
وقاتلت وخسرت رجلك ماقصرت بشي
ـ ااااخ وية عمليات التحرير هيج يصير بية شكد جنت منتضر هاللحظة وتالي برمشة عين اخسر كلشي
جنت اتمنئ ابقئ لاخر شبر بالتحرير
علئ امل الكاهم
مو شرط كلهم لو جم نفر منهم
متتخيلين من نحرر الناس الابرياء من قبضة داعش احس حررت اهلي
كل يوم جنت اوهم روحي واكول باجر الكاهم وية هالناس
من 80 نفر بس 3 اشخاص يعيشون
ـ الله كاتب عليهم هيج يشوفون
وهمة شهداء لان انقتلو بدون سبب
الله يخليك اقتنع
ـ لاتضلين تلحين
ما ارجع يعني ما ارجع
اخذي جهالج وسافري ماريدكم تبقون هنا العراق يومية طلابة
ـ صدك تحجي انت
ـ اي
اني اصلا مابقئ بية شي
وصحتيي دتراجع
الكلية جانت صاحية
بس بسبب النزف تلفت
اني رجال موات
اذا ارجع راح يتعودون حيدر وازدهار عليه
وماريد هالشي لان ماضل بالعمر شي
ـ عزااا انت شلون هيييج تحجييي
الاعماار بيد الله
ـ محد كال غير شي
بس كلتلج ماريدهم يتعلقون بية وبعدين يتاذون علئ فراقي
ارجعي انتي وياهم
اني عندي ثقئ جبيرة بيج راح تربيهم احسن تربية
ـ غصيت بالبجي اريد احجي نعكد لساني كوة جريت نفس وحجيت..
منو يدارييك هنا
ـ عندي اهلي وبعد عندي رجل وحدة. وايدينات اثنين
ـ خلص ابقئ يمك واداريك ماعوفك
ـ تبقين بصفتج شنو نونة
ماريد ارجعج علئ ذمتي
ـ مو شرط زواج
ابقئ يمك اداريك حالي حال خواتك
اني ام جهالك مو غريبة عنك
ـ ماريد
وهسة انتي غريبة عني
و لا اريد اورطج ويايه
ولا اريدج تبقين هنا
تبقين يومين وترجعين انتي والصغار
ـ ماحبيت اضغط عليه واضل احجي اعرف بي يتعصب فـ سكتت..
انتبهت الصغار اتاخرو ولارا مارجعت ..
وين لارا اشو تأخرت
ـ لحظة هسة اخابرهه…
اخذت التلفون ودكيت عليهه
ها لارا انتي وين
ـ ابيت رسلان
ـ شوداج لبيت رسلان
ـ يشوفون جهالك شنو متريدهم يشوفوهم
ـ اي طبعا يشوفوهم بس غير تحجين تكولين تنطين خبر
جيبيهم حتئ يروحون وية امهم
ـ خيلهم يمنة
ـ يعني شلون تخليهم يمكم ؟
ـ مو وكت حجي ياسر انت هسة مريض وعود من تصير زين نحجي
ـ انطيني رسلان
ـ اوك .. رسلان يريد يحجي وياك ياسر
ـ شنو هالحجي رسلان
ـ ماصار شي ترة خليهه تشبع من ولدك قابل وين ماخذتهم هي عمتهم وهذا بيت عمهم
ـ بس الاعرفة انتو متريدوهم
ـ القناعات تتبدل وية الزمن..
ماكو واحد بقئ علئ قناعه وحدة
خليهم هنا اليوم
ـ ترة الاطفال رضع ومتعودين علئ امهم اشكالكم غريبة بالنسبة الهم هو اني ابوهم واستغربو مني
ـ اذا ماكدرنة نسكتهم واستغربو
ننطيهم لامهم..
ـ بس اليوم رسلان
باجر الصبح يرجعون
نونة ـ عزا ياسر وين جهالي
ـ اصبري ..خلصت حجي وسديت التلفون
نونة خليهم اليوم يم عمامهم
ـ يعني .. ياسر ممتعودة يباتون بعيد عني
ـ اتحملي بس هاليوم لخاطري
ـ يعني راح يداروهم
ـ شنو هالحجي بلة
ـ مو قصدي شي ..
بس تدري همة ميعرفون اوقات رضاعتهم وميعرفون شنو يريدون
ـ نونة ترة لارا ام وعدهه اطفال
وزوجه رسلان اولادهه كبار
ماراح تجين تعلميهم يتعاملون وية اطفال .. اهدئي لاترتبكين
ـ اني هادئة اصلا ممسوية شي كاعدة وساكته
ـ ارجعي للفندق وارتاحي ولمي اغراضج حتئ تحجزين وترجعين انتي والاطفال
ـ بقيت كاعدة وساكته ماتحركت من مكاني اجوي السسترات وانطو الدوة الياسر وقبل لينام همين كلي ارجعي للفندق
بس اني كلبي مينطيني اطلع
لا جهالي ويايه ولا اكدر اترك ياسر هيج نام وبقيت كاعدة يمة
صار الليل وبعدهه لارا ممتصلة
ردت اموت من القهر بقيت الوب
معقولة جهالي مبجو عليه معقولة ميريدوني معقولة ما استغربو منهم
شنوو ديصير ياربي ..
تقريبا ساعة سبعه ونص بالليل دخل رسلان للغرفة كمت علئ حيلي واستقبلته وسلمت عليه
واخذني وطلعنة برة الغرفة مبين يريد يحجي شي
ـ جهالج يمنة لاتخافين عليهم
ـ معقولة مابجو علييه
ـ البنات يعرفون يتعاملون وية الاطفال
اسمعي يابنت الناس
اخوتي الاستشهدو ماجانو راضين علئ هالزواج
بس بعد صار وصار بيناتكم طفلين
بس دينة ماراح يستقبلهم ترة
ماراح يكونون ايزيديين
ـ اي اعرف
ـ بس رغم هذا يبقئ ياسر ابوهم
واحنة عمامهم
اني حاليا خسرت كل اخوتي ومابقالي غير ياسر ونرمين ولارا
وماريد اخسرهم همين يكفي الخسرتهم
ـ مفهمت يعني شنو مطلوب مني
ـ ياسر ماريدة يبقئ هنا
لان بالخارج افضل اله
وبنفس الوقت ماريدة يرجعلج
ـ ترة احنة مطلكين
ـ اعرف ..
واتمنئ تستمرون هيج منفضلين
ـ اي عادي .. اهم شي راحته
ـ اذا احنة متفقين هسة
لارا. ـ علئ شنو متفقين رسلان
ـ فزيت منهه ماعرف مين طلعت النة
باوعت علية من الطول للطول ودارت وجهه
ـ جهال اخوية يبقون يمنة هنا
رسلان ـ وين يبقون يمج
وبعدين نسيتي انتي ساكنة المانيا
ـ من يصير زين ابوهم يسويلي توكيل واخذههم ويايه لالمانيا
ـ هههه انتي تتشاقين
ـ لا ما اتشاقة بهيج مواضيع
رسلان ـ البنية اجتي برجلهه النة وية جهالهه فماكو داعي لهل كلام
تعرفين بية مريض وعندي قلب وصحتي علئ كدي
ـ بنص هالخبصة سمعت صوت ياسر عفتهم ودخلت عليه..
ها ياسر كعدت
ـ شنو شصاير شنو هالاصوات برة
ـ دخلت لارا ورسلان وصارو يحجون بلغتهم اتلاثتهم..
بس ياسر عصب علئ لارا
اكيد ياسر ميقبل يحرمني من اطفالي ..
بقيت كاعدة علئ جهه اريد افتهملي جملة ماكو
ياسر ـ هذا الامرر ديري بالج تدخلين بي
جهالي واني حرر بيهم
واخر كلمة احجي وياج لاا تدخلين بحياتي
لارا ـ هاا يعني هيج
ـ اي هيج
ـ الله يسامحك يا اخويا..
خلص راح تخلص مني
نونة ـ ماعرف شنو صار بس لارا طلعت والدمعه بعينهه
ياسر ـ روحي وية رسلان اخذي الجهال
وياريت ترجعين بهاليومين لاتبقين هنا
رسلان ـ مابية حيل اتحرك
هسة اخابر ابني يجيبيهم
ـ وفعلا رسلان خابر ابنة
ورة تقريبا ثلث ساعه جابهم ولد جبير عرفت هذا ابن رسلان
ركضت عليهم وحضنتهم كأنو صارلي سنين مااشايفتهم…
من هالموقف خفت ابقئ بالعراق
ياسر رافض يرجع ومصمم يبقئ هنا
ورة خمس ايام توادعنة اني وياسر
واخذ الجهال وبقئ يحضن ويبوس بيهم واخذ صور وياهم وفديوات بالمستشفئ
ورجعت لخواتي واخوية…
جانت تجربة صعبة مو سهلة
لوحدي ووياية طفلين اقطع هالمسافة كلهه والضروف الصادفتني هنا مو هينة..
بقينة وية ياسر علئ اتصال سكايبي …
ياسر ـــ من رجعت نونة ورسلان اكل كلبيي يريدني ارجع اهاجر
لان حالتي النفسية والصحية هنا ادهورت
ـ اسمع اانت اابد مدتاخذ حجي
كل مرة تاخد قرار من راسك ومتستشير احد وشوف وين وصلت بعنادك
هالمرة غصبا عليك تسمع كلامي
اطلع ياسر ارجع للبلد الاجيت منهه
ـ واهلي
ـ عود من يرجعون ارجع
هاي اذا رجعو
مدتشووف يومية مكتشفين مجزرةة جديدة
ولا تخاف اي خبر يجيني اراسلك
وجودك هنا مابية نفع
بالعكس اذية عليك
لاتزيد المواجع عليه
انت حالتك الصحية مو تمام
واني مثلك
العلاج هنا مكلف
علئ الاقل هناك راتبك يسوة
تكدر تتعالج براحه
مو تركض والعشة خباز وممدبر لكمتك
ترة ماراح يبقئ احد من عدنة بعنادك هذا .. ارجع ياسر واسمع كلامي
ـ سكتت ماحبيت اجادلة لان مريض
وفعلا اخذ اوراقي ومشه بيهن
هواي ساعدني رسلان بتقديم اوراقي والروحه والرجعه لان صارلي سنين عايف دوقية لوكسمبورغ
ولازم كتابنا وكتابكم وهواي اجرائات يلة ارجع
لان الرجعه مو بسهولة لهيج دول
واتاكدو مني جنت بالجيش واصابة جيش مو ارهابي يلة سمحولي ارجع وانطوني اوراقي
اتعودت امشي بعكازة
لان رجلي جانت كلش توجعني مكدرت اللبس قدم اصطناعية
الئ ان اجئ اليوم وودعت اخوية وعائلتة وسافرت
من نزلت بالمطار خابرت علئ نونة…
نونة ــ جنت طالعه ودك تلفوني رقم من داخل الدولة راسا جاوبت ..الو
ـ هلو نونة ..
ـ نصدمت من سمعت صوتة.. ياسر؟!
ـ اي ستوني وصلت
ـ لاالااااا صددددك
ـ اي والله
ـ ماصددك ليش ماااحجييت
ـ حبيت افاجئكم ..
جيبي شهاب وتعالي لان مابية اوكف
ـ دقااايق واحنة يممك..
سديت التلفون وخابرت شهاب
اتفقنة علئ مكان نلتقي بيه ونروح عليه
عشر دقايق وشفت شهاب كدامي صعدت السيارة وانطلقنة للمطار
صارلة خمس اشهر
او شوي اكثر من اتصوب
اول مرة اشوفة يمشي علئ عكازة
من جنت اخابرة بالعراق دائما كاعد
بس متت قهر علية
راح يركض شهاب وساعدة بالمشي
مجنت مصدكة عيوني
ياسر رجع وترك العراق
شهاب اخذة يمة بالبيت
والبنات خابرتهن وكلتلهن عله الخبر وهواي فرحن بجيتة وجابن الجهال واجني
وبالطريق نغم نطت خبر لنادين وجاد
طبعا ملحكت اطبخ شي
فـ وصة شهاب من المطعم علئ اكل بهالمناسبة لان كلنة ملتمين..
كعد الجهال بحضنة وضل يبوس بيهم
صار فترة ماشايفة ضحكتة
جان دأئما مقهور وكئيب
بس هسة غير شكل وجهه يضحك
الف الحمد لله والشكر
ياسر ـ حاولت ارجع لحياتي السابقة
قدمت علئ شغل وقبلوني
لان حاليا من ذوي الاحتياجات صرت
سهلت الامور الي
هنا يسهلون كلشي لذوي الاحتياجات
ميعرقلوهه
جنت اتنقل بين بيت شهاب وبيت صديقي جاد والشباب الجنت اعرفهم
الئ ان كدرت أجر شقئ لوحدي واستقريت
وبسبب وضعي نطوني شقة ارضية مو بالطوابق المرتفعه
راسا راجعت علئ رجل اصطناعية العكازة تعقيني بالمشي
هنا عناية حقيقة و باسعار رمزية
عالجو الندبة البرجلي
هي جانت تعيقني من البس رجل اصطناعية.. بس هسة نشكر الله هواي احسن من قبل..
رغم غسل الكلية هواي ياذي
بس شوفة اولادي تهون عليه هالالم...
جنت اشتغل ليل نهار حتئ انسة الشفتة بالجيش وانسئ شنو ممكن مسوين باهلي الدواعش ..
وبقيت متأمل خير علئ امل الكاهم…
نرمين ولارا خواتي
واثيل ودانا وداليا اولاد رغداء الله يرحمهه جانو يجوني بأستمرار
يعني كل فترة شهر اكثر يجي واحد منهم يمي يبقئ عشرة ايام ويرجع…
وبهالفترة يبقون الصغار يمي يتعرفون عليهم ..
جانو هواي يلحون علية اتزوج بس رافض هالفكرة
يكفي عندي اثنين اولاد اعيشهم وائمن مستقبلهم ..
ومستحيل افكر بغير نونة تكون زوجه الي
نونة ـ بقت علاقتنة حلوة اني وياسر
دائما نطلع سفرات عائلية وويانه شهاب ونادين وجاد وخواتي …
بس بقيت احب هالشخص ماكدر اتخلئ عن حبة
اعرف بي ميقبل نتزوج لان حالتة الصحية تعبانة ..
واصلا شهاب ميقبل علئ زواجنة
اني ماشفت ياسر شخص انقذني وبس اني شفته رجال
بزمن مالكيت خيال رجال يسندني ويوكفلي ..
علئ العموم هيج حياتنة همين حلوة واحسهه كاملة
مو شرط نكون متزوجين
يكفي نكون اصدقاء
يستشيرني واستشيرة بكل شي
وناخذ رأي بعض
الاحترام بيناتنة ينضرب بي المثل
ممخلي اولادي محتاجين شي
دائما اطبخلة او اسوي حلويات وادز بيد شهاب او اوديه اني يعني اتنغصلة
اني اشتغل وهو يشتغل ومكفيهم للاطفال خير من الله
نغم بقت علئ رأئيهه تشوف شهاب اخ وبس حاله حال ياسر
شكد هالولد حاول يتقرب منهه بس هي كلش رافضة هالامر…
مشت السنين ماكو شي جديد
بس الاطفال يكبرون وسنين تروح من عمرنة
بس الحمد لله المهم عايشيهه صح وحلوة
وابد ماكو مقارنة بينهه وبين حياتنة بالعراق …
بهالفترة الحياة اخذتني وانقطعت تماما عن خاله ام عمر ..
هية همين فيسهه نغلق وماعندي رقمهه راح وية الارقام الراحن
والحياة اخذتني ومادورت عليهه بعد بس كل الاعرفة
عمامي شالو من بيت جدي
وهي بقت علئ تواصل وية عمتي كميلة
الئ ان صارت سنة 2019
وكل خواتي بلغن سن الرشد
وصار عمري 27 سنة
وياسر 42 سنة
ونغم 20 سنة
صبا 19 سنة
الحان 18 سنة
وشهاب 25 سنة
وحيدر وازدهار
صار عمرهم اربع سنين وكم شهر
جنة محتفلين بعيد ميلاد لحونة كلنة طالعين احنة وشهاب وياسر ونادين وعائلتهه لحديقة عامة واحتفلنة بيهه كملت 17 ودخلت 18..
خلصنة كلشي ورجعنة متونسين
بس ثاني يوم نغم فاجئتني بكلامهه
نغم ـ صار الوكت نونة نرجع لبغداد
ـ شنوووو شترجعين ووين ترجعيين
ـ اصبرري افتهمي شتريد
مو نرجع نستقرر
لا ..
اريد حصتنة من ورث ابوية وامي
ـ ورث؟!
وشفطنج بي
ـ وشتريدين نعوف حقنة لهالخايسين
ـ يمعودة ياورث
غير اذا يلكفونة يموتونة
ـ ميكدرون ..
هسة احنة بالغات سن الرشد
وعدنة جنسية بلد يحترم البشر
اي حركة منهم اكلب الدنية فوك راسهم
واخليهم يتندمون حجو ويانة
لان مو كل طير ينأكل لحمة
يكفي نهشو بينة بطفولتنة
هسة كلشي اختلف
الا اخذ حق امي من عيون نبيل ونعيم
ـ اني خايفة من هالخطوة و ممرتاحة
ـ لاتخافين ميكدرون يسوولنة شي
بس نحتاج فلوس للسفر والمحااميين ومن هالامور
ـ عندي فلوس بس ماعرف تكفينة لو لا
ـ المهم توصلنة لبغداد ونكدر ناخذ حصتنة من ورث ابوية لان اكيد بالقاصرين حاطي
لازم اول منوصل نمشي بيهه نطلع الفلوس ونذبهه علئ محامي يطلعلنة حصة امي ..
ـ اي صح حصة امي اكثر بالف مرة من حصة ابوية
ـ اي وماريد اعوفة لليلئ بنت نبيل لو تبارك بنت نعيم لو رجل وداد النكس
هاي حصتنة وحقنة ومن عيونهم ناخذة
ـ يعني قررتي خلص
ـ اي طبعا..
خلي نحضر نفسنة من هسة لان الامتحانات راح تخلص
وتبدي العطلة فـلازم نستغلهة..
لان ماريد اخسر سنة دراسية يكفي الخسرتة بسببهم
ـ شفتهه مصممة تريد تاخذ حقهه وحق خواتي من خوالهه…
كلتلة. انطيني يومين احجي وية شهاب وياسر ..
وفعلا ورة يومين حجيت وية شهاب وكلي رجلي علئ رجلكم ما عوفكم تروحون لوحدكم ..
نروح سوية وبالمرة اروح اشوف اهلي صار هواي مشايفهم..
وخطية كلي مجمع مبلغ نوعا ما زين ينطينا..
مابقئ غير ياسر انطي خبر ونحجز حتئ نسافر
خابرت ياسر وحجيت وياه عن هالقرار
ياسر ـ هالفترة شوي متأذي من غسل الكلية ..
واحس روحي تعبان
بس ماحجيت لاحد
ماريدهم يقلقون علية ..
بس اكتفيت بشغل الصبح ماتعب روحي بالشغل طول النهار..
مثل كل مرة تخابرني نونة علمود الجهال يحجون ويايه لو يريدون يشوفوني
من جاوبتهه عرفتهم يرويدون يرجعون لبغداد علمود ياخذون حقهم ..
اذا تريدون تروحون بقو الجهال يمي
ـ شلون ابقيهم يمك انت كل اسبوع تراجع مستشفئ
ـ ماعلية شي راح تجي نرمين يمي واكدر اخابرهه واخلي تأجل جيتهه وية روحتكم ..
ـ زين واذا اتاخرنة شلون
ـ ميأثر الصغار يفتهمون يعرفون كلشي ومتعودين عليه بس لاتاخذيهم للعراق اخاف عليهم
ـ والله هية ورانة فرة طويلة والجهال يخبصون بس كلبي مينطيني اعوفهم واروح
ـ احسن نونة عوفيهم يمي وروحي راح تنخبصين بيهم..
ـ اهم شي ميتعبوك
ـ قابل راح اركض وراهم
اخليهم كدامي ونكعد نلعب سوية
زين شوكت تسافرون
ـ ماعرف بعدنة محاجزين اصلا..
ـ اوك لعد نبقئ علئ الاتصال
ـ ان شالله ..
مشت الايام وخلصت الامتحانات واحنة جنة حاجزين ضبطنة امورنة
ووديت قبل يوم الاطفال يم ابوهم..
ـ باجر تروحون
ـ اي الفجر نطلع
ـ ديري بالج علئ نفسج نونة
ـ بقت يم الله شمكتوب نشوفة
ـ اول متوصيلين خابريني لاتبقيني قلق
ـ اكيد ان شالله..
ياسر لاتعب نفسك وية الجهال
ـ هههه لاتخافين نرمين يمي
ـ صدك هية هنا
ـ اي هنا بس الافضل متشوفيهه
ـ بعدهه ماخذة مني موقف
ـ كل واحد وعقلة نونة
منكدر نفرض رائينة علئ الناس
ـ صح ..
اشوفك بخير واذا صار شي علية
دير بالك علئ الجهال
ـ لاتخليني امنعج من السفر
ـ هه
ـ لاتحجين هيج..
ان شالله ماكو شي
الاوضاع ابغداد هسة زينة ماكو هواي تفجيرات
وانتو همين اي تجمع تشوفو لاتمشون بي
ـ ويانه شهاب هو قائد المجموعه هو ياخذنة ويرجعنة ..
ـ توصلون بالف سلامة
ـ بوست الاطفال وودعت ياسر ورجعت للبيت
وية الفجر صلينة وطلعنة
بس كلبي جان معصور علئ جهالي
اول مرة اعوفهم
وفوكاهه ماعرف شكد راح اتركهم
الطريق كله ساكته واتصفن
وشهاب يسولف وية خواتي عن ماعرف شنو
بالي مو يمهم
بس انتبه عليهم من نغم تجاوبة وتراددة
دائما تدخل وياه نقاشات عن العلم وتغلبة
بس نقاشات الدين محد يغلبة بيهن
فهو صار يعرفهه
بالعلم ميناقشهه
بس بالدين دائما يسولف وياهه ومرات يسكتهه وهي متحب هالشي متحب احد يغلبهه بالحجي فتتركة وتروح تلتهي بغير شي…
وصلنة مطار بغداد
اشوف بعض الناس مو كلهم
اول ميوصلون يبوسون ارض المطار بعتبار تراب الوطن
بس اني ماعندي هيج احساس
يمكن بية الخلل
لان حتئ شهاب همين باس ارض المطار
خلصنة كل شي وطلعنة من المطار
شهاب ـ فندق لو عدكم مكان معين
نغم ـ منو عدنة لا خوال ولا عمام بيهم حظ .. للفندق علمود الجنط نخليهن ونكدر نتحرك
ـ ليش من اليوم تريدين تتحركين
ـ بلة هذا سؤال
اكيد مو اليوم لان هسة الضهر
بس من باجر لازم نروح للمحكمة
ـ اسفين عمي اكلتينة. وشربتينة
ـ لا طعمك مطيب منو كال اكلتلك
نونة ـ ضحكت لشهاب وغمزلته ..
صعدنة سيارة تكسي وطلعنة لمركز بغداد .. سألنة ابو التكسي عن فنادق مناسبة ودلانة ..
اخذنة غرفتين النة ولشهاب حطينة الجنط وارتاحينة
الحان ـ امشو خلي نتمشئ بشوارع بغداد من جنت صغيرة لا شايفتهه ولا اذكر طالعين بيهه
نونة ـ ليش متتذكرين من جنت ابيت ام مهند و طلعتكم فريتكم
ـ حيييل بيا سنة هايي وين اتذكر
صبا ـ اني اتذكر ردت تشتريلي لعبة ومقبلتي ههههههه
نغم ـ هية هم لعبة عاوية مثلج
نونة ـ مابية حيل اطلع
نغم ـ لا منطلع خلي تصير شغلتنة
يلة نطلع ونتونس
بس هسة لا متفيد ..
ـ خواتي خلصن اليوم يتفرجن من الشباك الحان تكول بغداد حلوة ونغم تكول لا ماحبهه وتعلك بيناتهن
صار ثاني يوم ورحنة للمحكة وويانة اوراقنة وهوياتنة
كل شوي يدزونة علئ مكان
وهلكونة بالروحه والردة
بالاخير كلي الموضف انتي متزوجة من غير دين..
جاوبته اي
كلي مالج حصة بالورث
وحصتج تتصادر لدولة
استغربت بالبداية من كلامة
لكن بعدين من عرفت القوانين ماهتميت
هي هم تفاليس متسوة
بس ماسوينة شي بهاليوم فقررنة نخلي محامي ولا هالدوخة ..
سألنة عن افضل محامي الكل دلانة علئ محامية اسمهه نبراس يحلفون براسهه وكلناهه عن هالقضية حتئ اطلع ارث خواتي من الدولة..
كملنة كلشي وبقت يم المحامية ..
اخذت تكسي وطلعت لبيت جدو باالاعظمية
وصلنة للبيت لكيناه متفلش ومبني جديد مابي حديقة كلة بناء ..
رجعت بيه الذكريات بهالشارع
التفتت شفت بيت خاله ام عمر ..
خلي اشوف بلكي بعدهه بنفس البيت
شهاب. ـ وين رايحه
ـ هاي جيرانة خوش مرة جانت اداريني اصبر بلكي موجودين..
رحت ودكيت الباب عليهم
البيت بي هواي تغييرات
ماعرف مرممي لو باني جديد
طلعتلي طفلة صغيرة عمرهه يمكن ست سنين ..
سمرة وملامحه اتجنن رغم عيونهه صغار بس كلش حلوة وشعرهه كيرلي او كناكر نسمي ..
هلو ياحلوة
ـ هلو
ـ أ .. ام عمر .. خاله ام عمر هنا
ـ ننة تريدين
ـ لا هي اسمهه ام عمر
ـ ولج هاجر منووو
ـ ننة هاي وحدة تريدج
نونة. ـ عرفت هذا صوت ام عمر اتقدمت شوي ومديت راسي .. خاله
ام عمر. ـ يااااااا نهااااوندددددد
ـ خاااالة حبيبتي
ركضت عليهه وحضنتهه وحضنتني بكل قوتهه واثنينة كمنة نبجي
ـ ووولج هذني منوو. كليلي ياهي نغم ياهي صبا ااانتي اكيد الحاان موو
ـ اي خالة اني الحان
ـ ووولج ياعيون خالة شلووون صاايرات تعالوو تعالوو ادخلوو
نونة ـ لا خالة غير وكت
ـ ووولج ياوكت تعاالن صدددك جذذب حفيدااات حجي حمزة يمي ومنو نوونة يايمة شلون كبرانات وشكد متغيررات
ـ هي هاي الدنية خاله
ـ سودة علية خالة ذاك اليوم جنتو هالكدكم بس اشكد شفتو اذية وظيم
اوكفي منو هذا الولد برة
ـ خاله هذا اخوية
ـ اخوج؟ منو
ـ هذا الحجيتلج عنة شهاب ابن رحمة
ـ يااااا شووف شكد عيب بقئ واكف بررة
وووك عمررر يمة ووينك خاالد تعالو دخلو هالولد اخو نونة واكف برة…
ـ دخلتنة خالة لبيتهه
وشفت جناينهه شكد حلوات
الله رازقهم حفيدات بنات بس يخبلن من الحسن
تغدينة يمهم وكعدت تسولفنة عن عمامي
شلون اتاذو من باعو البيت كالت كل واحد راح بمكان لكن متندلهم كلهم بس تعرف مكان كميلة لان اتزوجت
ـ صددك اتزوجت
ـ اي والله اتزوجت همين واحد ارمل
ـ وجهالهه وين عافتهم
ـ ياجهال صارو زلم ونسوان مثلكم وبعدين ماعافتهم اخذتهم وياهه
ـ زين وين بيتهه
نغم ـ وشتريدين نروحلهه
ـ اي لان بالاخير صارت زينة ويانة
ام عمر ـ اي صح هية دوم بذكراكم ..
هسة انطيج عنوانهه وتروحولهه..
ـ سألتهه عن اخبار نسوان عمامي ماقبلت تحجي كالت كميلة كلشي تسولفلج اضبط مني
حسيت صاير شي بس متريد تحجي
اعرف بخاله ام عمر تخاف تاخذ غيبة او تجيب سيرة ..
الفضول عندي صار يقرة الف
اخذت عنوان كميلة ورقمهه واترخصنة من بيت خاله وطلعنة
شهاب ـ ها نرجع للفندق
ـ يافندق اريد اشوف شصاير بعمامي
نغم ـ خليهه باجر تعبنة ترة رجعنة من المحكمة لبيت خالة
ـ روحو انتو اني بعدين اجي وراكم
شهاب ـ هاي انوب شنو
ـ لعد شتريدون .. لو تجون وياية لو ترجعون واني الحكم بعدين
ـ اوك نجي وياج امرنة الـ الله..
ـ اخذنة تكسي ونطينا العنوان
وخابرتهه بالطريق .. الو مرحبا
كميلة ـ ياهلا ومرحبا
ـ عرفتيني
ـ اهووو اذا مخابريني علمود شهريار زمانة
ترة لعبتو نفسي منة
كرهتة والله العظيم من وراجن
ولجن علئ شنو اطوركن وراه
اشو حافي منتف نعالة اني اشتريلهيااا
جيييبة فارغ ولجن عيييب استجننن عاد
ـ عزة هاي عليمن هالحجي
ـ عليييج ام الرجووولة يومية مخابرتني من رقم جديد علموود رجال بكد ابوج
ـ يمعودة عمة كميلة اني نهاوند
ـ نهاوند؟
ـ اي
ـ صدك والله
ـ هههههههه معجبات رجلج هواي ااضاهر
ـ ولج اانتي ووين
ـ هسة نزلنة اباب بيتج فتحي الباب
ـ لاا بشررفج
ـ دطلعي وفتحي الباب خلي نشوفج قبل لانروح
ثواني وطلعتنة حافية تركض ..
ـ ووولج نوونة وخواتهه
ـ حضناهه وسلمنه عليهه رادت اتضيفنة بس مقبلنة ندخل لان الوكت صار غروب ومنريد نكلفهم ولا نتأخر ..
كعدنة بحديقتهم شوي وكعدت يمنة
ـ سولفيلي وووين صرتي مين جيتي
ـ سالفة طووويلة متخلص بيوم وليلة
انتي احجيلي وين صفة الدهر بعمامي
ـ ياعمام يا ليش هو بقئ احد
ـ شنو صار بناصر وعائلتة
ـ يووو سالفة طويلة
بس والله يابنات فؤاد بيجن حوبة شكبرررهه بالعافية. عليجن
ـ كلبي كام يطكطك اريد اعرف شنو صار.. احجي عاد شنو صار
ـ متنحجي بهيج كعدة ..
هذا منو الولد
ـ اخوية من امي رحمة
ـ شنووووو وين لكيتي رحمة
ـ ااضاهر خاله ام عمر ماحاجيتلج
ـ هية هااي تحجي شي
تخاف تحجي لا تصير غيبة
اذا هيج الحجي
يرادلنة نطلع سفررة و نشوي بيهه سمج ونكعد نحش اني وانتن وتسولفولي كلشي واحجيلجن كلشي
ـ اتفقنة نطلع للزوراء
وكلتله نجيب خاله ام عمر وجنانيهه وولدهه
وصدك ورة يومين ماجان عدنة شي وسوينة هالسفرة ..
همة اتكفلو بالاكل خطية ماقبلو نجيب شي بعتبار عازمينة
الشباب وحد واحنة السنوان وحد
حجيتلهه عن امي وشلون التكيت بيهه وشنو صار وراهه
ـ عزةةة يعني رجلج من غير ديين مو مسلمم
ـ اي
ـ صدك والله
ـ اي والله وعندي منة اثنين جهال
ام عمر ـ بس اطلكو من زمان
كميلة ـ وانتي ليش ماحجييتي يمة تخافين تكليلي
ـ اي ياكميلة دسكتي تحشرين نفسج بكلشي
ـ بس ترة زواجكم حرام ياعمة
ـ اعرف اخوية. كلي
ومو هذا مووضوعنة ..
لان الحجي بي هواي تشعبات
ماكلتيلي
شبيهم بيت عمامي شصار بيهم
ـ ارشد وبناته شالو لغير محافظة
لان سمعتهم صارت بالكاع
ـ ها وين راحو
ـ فوك بغداد ..
بس حياته صعبة لان البيت ماجاب فلوس ونصة راح لعمة سهيل
والنص الثاني حصتكم وحصة خواته واخوته وحصة جهالي فـ كل واحد طلعلة تفاليس
ـ اي صح
ـ من سافرو بعد ماعرفت اخبارهم لان عيني مرتة تعرفيهه ام خشم اليابس انفة متخابر ولا تسأل واني همين كطعت ياهم…
اما ناصرر فهذا سالفتة سالفة
ولدة الصغار كلهم هاجرو سوية بهاي الهوسة مالت الهجرة وداعش ومدري شنو..
كلهم طلعو رغم صغار 16 والاخ 15 جان عمرة والاه مدري شكد بس طلعو وضاعو وية هالوادم واستقرو بالخارج..
ـ ودعاء ؟
ـ هاي سالفتهه سالفة
ـ احجيهه
ـ اتزوجت واحد حبيب امة
عود كيفت بي عبالهه علئ كد ايدهه
وماراح يسألهه عن بنات عمهه تشوفي لاشخصية ولا منضر كلشي ماكو وصلة وعدهه رجلينات وتمشي
خطبهه وعقد عليهه وكمل وتالي انكشف رجلهه يمشي بكلام امه وعماتة ومرمرات حياتهه مسمماتهه اتسمم
ـ عماته؟
ـ اي مو ام الولد عايشة ابيت اهل رجلهه وعماته بيهن متزوجات وبيهن لا
ـ وشلون قبلو بيهه اذا يمشي بشور اهله
ـ ياخالة انتي اذا تشوفي تكولين هو هذا شنو من بين الزلم
بسوك الزلم تفلة ميسوة واضاهر خاطباتلة قبل وماصايرة وقبلت بي دعاء وتكربس براسهه
ـ تحجي كميلة واتشوفني بالصور
هواي متغيرة دعاء مو هية عبالك وجهه المتفح ذبلان ابوهه شعرة كلة شيب امهه كلش مبهذلة صايرة.. زين وين كاعدين ناصر ومرتة
كميلة ـ وين كاعدين سكنو الشوارع
ـ لالاا صددك تحجين
ـ اي والله
ماعدهم فلوس يدفعون ايجار
واخوه ارشد عافهم وسافر لغير محافظة
وخوات منال ميريدنهه
راحتلهم فترة وصارت مشاكل تعرفين النسيب ميحمل
وانوب اخوهه همين طردهه هية خبيثة متكعد راحه متعرف تعيش بسلام
وهسة بالتقاطع تشوفيهه خصوصا تقاطع درويش ومرات يم الجامعه هي هاي اماكنهه
بس ناصر مادري بي وين بس جان مريض فد مرة اخر فترة
ـ وعمي اللي بالخارج
ـ انتي كلتي بالخارج والبرة ميرجع بعد متختخ علئ العيشة الحلوة
ـ يعني صارت منال تجدييي
ـ اي تجدي
ـ ووين تنام
ـ ماعرف بعد وين تنام خو مو ابقئ اراقبهه شلي غرض بيهه
ـ ودعاء؟
ـ شسويلهه البنية همين متزوجه من واحد ابن امة متكدر تحجي وياه
ياخالة ماكـــو بشـــر يــشيل بشــر بهــالزمن كلـــمن يكــول يــاروحي
ـ سبحان الله
شمرتنة بالشارع من جنة صغار وتالي هية انشمرت ..
زين ولدهه الي بالخارج
ـ يمعودة كلمن لاهي بروحة ابني يكلهم امكم تجدي بالشارع يطفون النت يكولون والله فصل النت
بشرفج وين اكو نت يفصل بالخارج هسة لو بالعراق بيهه باب وجواب…
بس همة ميردوهم وعايشين حياتهم وخلصانين منهم
ـ الشماتة حرام
بس مو بيدي فرحت بهالاخبار
خلصنة اللمة الحلوة مالتنة وتسالمنة وكل واحد راح لطريقة
بس بقت الذكريات تجمعنة
طول فترة وجودي ابغداد عيني علئ الشوارع اتمنئ اشوفهه لمنال
استلمن خواتي حصصهن من ورث ابوية
ونفس المحامية وكلتهة نغم علئ ورث امهه…
اتصورنة يرادلنة طلايب ورث امي لان نبيل جان كلش صعب ..
بس ورة اسبوع من الدعوة لكينة نبيل جاي للمحكمة
نفس كشختة وعطرة من باب المحكمة نشمة نافخ نفسة يباوع تك عين
كلنة خفنة منة واتراجعنة ليورة
بس شهاب تقدم ليكدام من عرف هذا نبيل و نغم بقت واكفة ورة شهاب وتباوع عليه عين بعين
نبيل ـ كبرتن يابنات ازدهار
نغم ـ لعد تريدنة نبقئ صغار وحقنة يبقئ ابطنكم
ـ مثل لسان امج الخلف مامات
ـ امي انقتلت ماماتت موتة طبيعيه
ـ ضبي لسانج
جاي احلهه باللتي هي احسن
نغم ـ شلون
ـ انطيكم مبلغ محترم ونفضهه
ـ حق اامي كاامل اريدة
ماوراية. شي كاعدة هنا واطالب بي
ـ يعني مصممات
ـ اكيد
ـ وانتي ياجبيرتهن عقليهن احجي وياهن اني خالهن عيب يسوون هيج وويوكفونة محاكم
نونة ـ هذا ورثهن مو ورثي مالي حق امنعهن من حقهن
ـ كلجن متفقات
ـ اي خواتي واسندهن باي شي يردينة ..
ماحجة ويانه وعافنة ودخل بغرفة بالمحكمة ماعرف مالت منو
المحامية كالت لاتخافون القضية محسومة لصالحنة…
مر اكثر من 3 اشهر
تقريبا راح تخلص العطلة واحنة بعدنة محاكم
بهالفترة شهاب راح لكركوك يشوف اهلة ورد رجع
واحنة بدال الفنادق اجرنة شقة صغيرة شهر بشهر ندفعهه احسن من الفندق ..
وحدة من الروحات للمحكمة شفنة وداد
بقت صافنة علينة واحنة صافنين عليهه
كلشش متغيرة صايرة حلوة وملابسهه انيقة ومرتبة ...
اجتي علينة وتسالمنة
هي حبابة نوعا ما احسن من غيرهه
بس نغم سلمت عليهه وراحت وكفت بعيد مو يمهه
هية همين جاية تريد حصتهه من ورثهه من سمعت بخواتي رافعات دعوة ..
بقالنة ايام ونرجع للوكسمبورغ
جنت صاعدة تكسي اني وخواتي
الجو حار ويسمط بالعراق
وشباك السيارة اندك عليه
رفعت راسي ماركزت بملامحهه
عرفت هاي مجداية تريد فلوس
طلعت مبلغ وفتحت الشباك حتئ انطيهه واجتي عيني بعينهه…
هاي منال
اول ماشافتني فزت مني
وراحت تركض بعيد عني وتتلفت مثل المجنونة
شكد متغيرة عن قبل
وجهه صاير يخوف من الشمس او التجاعيد ماعرف
او يجوز اعمالهه السيئة انعكست علئ وجهه ..
بس تحقق حلمي وشفتهه بهيج حالة
اجئ طفل يمسح جام السيارة وانطيته الفلوس وطلعنة..
وقبل لانرجع بيومين خابرتنة المحامية وكالت خالكم قبل ينطيكم حصة امكم
ماعرف شنو استجد وليش قبل الله اعلم
ميهمنة المهم يقبضن خواتي
مددنة بقائنة بالعراق لكم يوم بعد لان سالفة تستاهل
طول هالفترة اشوف جهالي صوت وصورة عبر النت
بس بالليل افطن مكانهم خالي
واكعد ابجي عليهم
ياريت لو اكدر اعوف خواتي وارجعلهم
وبشهر العاشر خلصنة وخواتي قبضن حصتهن وواودعنهه بالبنك..
وحضرنة نفسنة حتئ نرجع..
صعدنة الطيارة وودعنة ارض الوطن الام
ونزلنة بالوطن الثاني
واخيرا صرنة بارض الوطن لوكسمبوررغ
بالمطار لكيت ياسر كاعد ينتضر
والجهال وياه وونادين وجاد
شمرت كلشي ورحت علئ اطفالي حضنتهم …
ولهنا تكون خلصت حكايتنة وان شالله استمتعتو بيهه …… 🥀
جنود ايزيديين بحرب الثمانين لكل شخص يكول الاقليات ما خدمت بالجيش