مبعثر فيك ماللحزن لايشفى

البارت الثالث عشر

البارت الثالث عشر

ـآصويحبي لاصرت أحبه ومغليه
‏تموت حساد الهوى في مهلها ..
والله أحبه حب ماني بمخفيه !
‏حب سكن بأقصى الضماير دخلها .

طلع الصبح بعد ليل طويل ..
اعتدلت مهره من نومتها ع الكنبه الجانبيه .. حركت رقبتها بوجع .. من نومتها الغلط ..
انتبهت لسيف اللي جالس على الكرسي .. ويطالعها ..
دلكت كتفها وذراعها ..: صحيت ..؟!
سيف : وانا عرفت انام ..اغفي واقوم ..
مهره تحرك رقبتها تحاول تصقعها ..
سيف: وراك نايمه فيذا .. ؟!
مهره بنص عيون : عاجبتن الاريكه .. ع الاقل مايكون جنبي واحد يستغفلني يقول . مسافر لحاله .. وهو معه احد ..
ضحك سيف بتهكم:
ياشيخه ..! .
ناظرها : ماشاء الله ركزتي صح في كلمة فارس هذي ..
مهره تقوم وتسفط البطانيه ..:
يعني انا انسانه ماكنت بعارض لو بتاخذها معك . بس ماهو حلو .. تقول رايح شغل .. وانت جالس .. تسوي ايام عسل مع نوف ..
سيف : يعني انتي مصدقه اني خذتها معي .. وقلت لك اني رايح لحالي ..
مهره هزت كتفها : هو يعني فارس جايب كلامه من كيسه .. اكيد درى .. فانورني ..
سيف يشعل سيجار . ينفخ دخانها :
نوف جات لحالها .. ولاهو بشوري .. ولا انا كنت مرحب بجيتها.. ظلت ليله .. ورجعنا.. ماكانت معي من اول الرحله ..
مهره والغيره تذبحها .. بس زوجته ..
زوجته اللي بتعطيه كل شي ..
زوجته الصح .. !
مو مثلي مع وقف التنفيذ ..
سيف حرك يده قدام عيونها : الووو ..
مهره تحركت من شرودها :
يومك تكلمني وظلينا ساعه وشوي .. كانت جنبك ..
سيف : ايه . وكانت نايمه ..
مهره .. والقهر ياكلها .. مالها حق للاعتراض .. ابد ..
بس عشان تفرغ عصبيتها :
عادي يعني كان قلت لي .. ع الاقل قفلت من باب الذوق ..
سيف طفى السيجار ووقف ..:
ماكان فيه صالح من اني اقولك واعكر جوك .. جات ورجعنا .. وانتهى ..
مهره بعصبيه تحط البطانيه في الدولاب :
وليش يتعكر جوي .. زوجين ومع بعض .. ايش فيها يعني ..يتعكر جوي لما اتصل بالليل .. واصير عذول .. يعني جد آسفه .. حسيتني لاراحمه ولا مخليه رحمة ربي تنزل ..

راقبها سيف وهو وراها.. تضبط الشغلات الي طاحت من الدولاب بعصبيه .. وتكمل :
الحرمه جايه .. وتبي تسوي مفاجأه لك .. وتعيش معك اجواء .. يالله لو يرجع الزمن ان كان ماتصلت .. ليت انكسرت يدي ولا دقيت .. احراج والله ..
فاجئها سيف ضمها من وراها .. وخبى وجهه برقبتها همس :
ماعاد فيني يامهره .. ماغيرك يهزني والله .. كسرت خاطرها .. ماقدرت .. اذا مخك شطح رجعيه ..هذا انا وعلى حطة يدك...

ارتجفت بين يدينه .. همست: صدق ..؟!
سيف ويهمس في اذنها:وليش اكذب عاد ..
لفها ناحيته وطالع عيونها :
مابغيت احوسك .. واضيق صدرك .. والله .. نوف .. وجودها كان محبط لها .. بس السؤال .. فارس من وين درا .. وواضح ان متضايق حيل من هالسالفه .. وهو يقول كان يتكلم .. وكني طايح من عينه ..
مهره بحيره:
مادري ..اكيد سمع صوتها وقت يكلمك .. او هي متواصله معه ..
سيف : ماصار بيني وبينه مكالمه وهي جنبي .. وحتى نوف ايش مصلحتها تقول له ..
مهره حطت كفها على خده وببتسامه:
خلاص انتهى الموضوع .. انا ببدل .. وبروح اشوف فارس كيف وضعه ..
سحب يدها وحب باطن كفها ..
التقت عيونهم في نظره عميقه ..
ابترتها مهره ..
وهي تروح ..!
تنهد سيف ويضغط عيونه باصابعه .. !
........
سعود وموضي ع الفطور ..
موضي : ايه راحت .. وقلبها وراها .. مانامت وهي تهوجس على ولد اخوها ..
سعود :حسبي الله ونعم الوكيل .. هذا جيل .. تيم ولد علي ماوصل العشرين .. بس ولد ابليس ..الله يلعن من رباه ..
موضي : الله يهديه ..ولايوجع اهله فيه .. حفر لهالغافل .. وهو اللي سقط بحفرته ..
جاهم صوت فارس : وين جوالي ..
التفتوا اثنينهم .. ابتسم سعود : يالله حيه .. شلونك يبه ..
فارس بصد : زين ..
موضي قامت وباللهفه : تعال امي ..افطر دامك صحيت .. مابقى فيك دم ..
فارس بجفا : ماني جايع ..
وراح يمشي ناحية الكنب .. ولاحظت موضي انه يعرج: وش فيها رجلك ..
فارس واضح يدور جواله ع الطاولات .. والكنب : جوالي وينه ..؟! ..
موضي بعصبيه : رد علي فارس .. احد يطنش امه كذا ..
فارس ويده بجيب الجاكت .. ورافع قبعته على راسه ..قال ببرود.. وهو مستمر يدور :
لما جيت البارح .. اكيد جوالي وقع من جيبي .. لقيتوه ولا ..
موضي زفرت : مالقيناه ..
مرت جودي .. فارس : تعالي انتي ..
جودي : ايووه ..؟!
فارس : روحي مكتب ابوي .. يمكن تلقين جوالي ع الارض جيبيه ..
جودي : انا سوي تنظيف .. مكتب .. مافي شي ..
فارس جلس ع الكنب ..لان واضح مو قادر يوقف اكثر من رجله ..
موضي : قل لي يمه .. وش فيها رجلك .. وش يوجعك ..
فارس .. ويده تضغط على ساقه .. بدون يناظرها:
مايوجعني شي ..
موضي رجعت ع طالة الفطور .. ومو غريب عليها تصرف فارس ولا جفاه .. ولاحدته .. ربت ثلاثه كلهم نفس الطينه ..

سعود بخفوت وهو يشرب قهوته :
خليه .. يطخ من راسه .. ماهنا الا رووس يابسه الله يدفع البلاء ..

نزل نواف .. وكان متجهز للعمل .. جا ورى فارس ومسك راسه وحبه :الحمدلله على السلامه ..
فارس ببرود : يوم خذتني من المركز .. كان جوالي معي ولا .. ؟!
نواف طلعه من جيبه: عطوني اياه المرور .. لقوه في السياره ..
فارس ناظر الشاشه .. انكسرت .. خذه ..
نواف وهو يروح ناحية الطاوله:
انكسر بس يشتغل ..
فارس ماعلق .. فتحه.. ودق رقم .. بس ماجاله رد ..
نواف اختلس النظر له: قم افطر .. بلاك قاعد هناك ..
فارس يكرر الاتصال .. على رقم ثاني : مابي .. كل انت .. عوافي ..
نواف يداعبه: ماتمر .. لازم عشيري يقابلني .. قم ابوي .. وجهك اصفر ..
فارس و باين قافل .. ماتكلم ..

نزلت مهره وشايله سيف .. وتقول: خلاص صرت كبير .. ذبحتني ..
سيف ضامها وبمرح : مابي امسي ..ماما ساطر(شاطر) سيلني ..
ضحكت: نصاااب ..
نزلته ع الارض .. وراح بسرعه لسعود .. لقفه وشاله: هلا جدي .. هلا ..
سلمت مهره ..
والتفتت على فارس جالس في الصاله ومو على طاولة الاكل ..
راحت عنده : صباح الخير ..
فارس : صباح النور ..
مهره تحط كفها على جبينه .. وتجي تجلس ع الطاوله اللي قدامه: لاا الحمدلله .. مافيه سخونه ..
فارس بعصبيه : مهره كلمت اخو ذياب مايرد .. ولاهيثم يرد .. ابي اطمن كيف ..؟!
مهره وهي جالسه قدامه: الحين تسع يمكن الناس نايمه .. مداومين .. ماتدري وش ظروفهم .. اصبر شوي واتصل ..

فارس مد رجله بشكل مستقيم وباين توجعه ..
مهره: وش فيك ..؟!
فارس: مادري .. البارح ماكنت احس بوجع كذا .. من صحيت ورجلي توجعن حيل ..
مهره زاحت وسوت مجال جنبها واشرت ع الطاوله : حاول ترفعها هنا اشوف ..
رفع رجله ..
موضي بخفوت: وانا مايرد علي ..الله يخلف عليك ياموضي ..
نواف ياكل .. وبخفوت وابتسامه:
يعني خلينا واقعين يمه .. وقت انتي انشليتي ومو عارفه توقفين هنا .. البنت وقفت واستقبلت كف ولدك اللي فر وجهها ..
سعود ضحك :
والله انك صادق ..يانواف
موضي : يعني انا اللي غلطانه ..وانت ورى مادليت بدلوك ..
نواف مد شفته :
انا كنت مؤيد كلشي جاه وخاصه ماكنت ادري انه مظلوم وملعوب عليه ..
موضي : مادري من وين جايبين قوة القلب .. حسبي الله على ابليسكم ..
مهره ترفع بنطلون فارس عن ساقه .. وكانت متورمه شوي ..وصايره مزورقه..
نزل سيف ..وعقد حواجبه .. ومهره ماسكه رجل فارس وتخليه يحركها ..
وقف .. يراقبهم .. مهره: هي مو مكسوره .. تحركها يعني .. بس واضح انرضت..
سيف : قم نروح المستشفى ..
فارس سحب ساقه .. ونزل البنطلون .. وبجفا: مابي اروح مكان ..
سيف مسك رجله ومدها ثاني .. لدرجة عور فارس .. رفع البنطلون .. وضغط شوي عليها .. وفارس يتوجع ..
مهره : باين ملتويه او منرضه .. فارس خل يشوفك دكتور .. ويسون لك عليها تصوير ..
فارس بعناد : بتخف ..
وكان مايلتفت على ابوه ابد ..
سيف يناظره .. وهو صاد بوجهه ..
تنهدت مهره : طيب تمام .. براحتك .. قم افطر..
رجع فتح جواله:
موجوعان ..
سيف ظل يناظره ..وصله حجم الشرهه والزعل .. اللي شايلهم فارس عليه ..
بعدين ابتعد وراح ع الطاوله ..
مهره همست : وش مشتهي تاكل ..
فارس بخفوت : والله مابي شي .. مالي نفس ..
مهره تداعبه: خليني اجرب اسوي لك فطور .. والله تاكل صوابعك وراهم ..
فارس : لاتعبين نفسك مابي ..
مهره : انا بسوي شغله .. انا ابيها .. اعجبتك اكل معي .. ماعجبتك لاتاكل ..تمام .. ؟!
فارس واصلا ميت جوع :اوك ..
خلته وراحت المطبخ ..
........
فطر فارس مع مهره ..
ومشوا سعود ونواف للعمل ..
فارس ولأنه كان تعبان صعد غرفته .. ينام .. ظل نايم لمن بعد الظهر ..
صحى ..
واتصل على اخو ذياب .. وخذ منه العلوم .. قفل منه ونزل وهو متضايق .. !
وكان يكلم السواق ..
ابوه عاقد حواجبه : وين ..؟!
مارد وكان اصلا مايمشي عدل ويتمسك في الدربزين والأثاث ..
سيف بعصبيه وحده: اكلمك فارس ..
مهره مسكت ذراعه .. يعني بهدوء ..
زفر .. وكرر السؤال وفارس جالس يلبس كنادره ويربط خيوطهم :
تبي تروح مكان خليني آخذك ..
فارس بدون يرفع راسه:
بروح لحالي .. بشوف ذياب .. كلمت ريان وقال لي وين متنوم ورقم الغرفه ..
سيف : طيب .. نروح سوا .. ومنها اشوف ذياب ..
فارس : شوفه بعدين .. مابي اروح معك مكان يبه .. ممكن ..؟!
مهره ..قامت : خلاص انا بروح معك ..
رفع راسه لها : اقعدي مكانك .. ماني بزر ..
مهره .. راحت : بجيب عباتي واجي .. لاتروح ويطلع شكلي غبي ..
صعدت ..
وفارس قام يمشي في الصاله .. وكنه يجرب رجله .. بس توجعه حيل ويعرج ..
سيف يراقبه قال:
ادخل ع الدكتور .. يشوفها ..
فارس عطاه نظره جانبيه..
وراح يمرن رجله ..
سيف .. مايبي يضغط عليه .. قام وراح لركن في الصاله سحب عصا .. حق سعود ..راح عنده .. وحطها ع الأرض : تعكزها ..لاتنلوي رجلك ..
حاول يكابر ..بس خذها .. نزلت مهره ..: مشينا ..
تقدم عليها فارس : يلا ..
قبل تطلع مسكها سيف: مهره اقنعيه يدخل للدكتور يشوف رجله..
مهره : تمام ولايهمك ..
سيف: الله يحفظكم ابوي..
........
بعد شوي في المستشفى ..
مهره ظلت جالسه في كرسي على احد الممرات ..
وفارس لبسوه شغلات معقمه .. بعد توسله لهم .. ولما توسطو ابو ذياب واخوه الكبير ريان .. لانهم عارفين كيف صداقة ذياب وفارس قويه .. !

ودخلوه يشوف ذياب ..
فارس يقرب ودموعه تنزل .. ذياب محاط بالاجهزه .. والاكسجين ..
صدره ملفوف .. بعد الجراحه ..ونايم بعمق تحت تأثير البنج والمسكنات ..

تخيل .. ذياب وهو يصرخ في تيم :
لو انه صاحي ماراح معك ..
-وانت وش دخلك ..؟! .
ذياب : والله ماخليه ..
ذياب وهو يقنعه يبقى ويسحب فيه .. وهو تحت تأثير .. الحبوب
اللي حطها له تيم .. كان مُصر يطلع ويكمل الفله بره .. :
فارس ان طلعت معه بتندم .. خلك ..تكفى فارس .. استوعب اللي اقوله لاتروح .. ترى ناوي لك شر ..
تيم يسحبه .. ويركبه قدام ..
ذياب .. جا وركب .. ومُصر مايخليه ..

سحب فارس الهوا وماعرف يطلعه .. مسك كفه .. وقال بصوت مبحوح:
تكفى ذياب لاتخلين.. والله ماتصلح الدنيا بدونك والله ..ماعرف يمر يوم وماشوفك .. هالحين كيف اروح المدرسه وانت بالمستشفى .. (فارس وذياب .. اصدقاء من ايام الروضه .. لمن الحين .. فاعلاقتهم حيل قويه ..)..
.. تمنى يكلمه .. او يفتح عيونه ..

بعد اشوي..
افتحت الممرضه الباب .. تنبهه انو لازم يطلع ..
فارس باس جبينه .. وهمس:
تكفى يالعشير .. شد حيلك ..تكفى ..

طلع .. وبعد ماشال الشغلات المعقمه اللي لبسوه .. راح وهو يتعكز عصا جده .. لمن وصل لمهره ..
اسئلت عن وضع ذياب .. جلس جنبها .. وخبى وجهه بكفوفه .. : تعبان .. حيل تعبان مهره .. ماكلمني .. ولا فتح عيونه ..
مهره : سمعت اخوه وهو يقول .. انو تحت تأثير البنج .. ان شاء الله يفوق .. والزياره الجايه تسولف معه ..
فارس ارخى راسه ورى ..وبعد لحظة صمت .. تنهد وابتسم : اول اسبوع لي في الروضه .. كنت ابكي .. وخايف ورهبه .. وامي موضي تداوم معي يومين وامي سلمى يومين .. وسببت ازمه .. لمن تعلقت في ذياب .. كان يجي يوميا ً.. ويجيب معه حلويات ..وشبسات .. والعاب .. وبالنصيفه .. مع اني اجيب معي .. بس اتحمس للشغلات اللي بيجيبها لي هو.. . عدينا الروضه .. وبحكم انو ساكنين بحاره وحده .. درسنا الابتدائي سوا .. والمتوسط .. والحين ثانوي ... مهره . .تدرين لو ابتدت السنه .. وفرقونا بالفصول .. اخلي ابوي سعود يجي يكلم الإداره .. ويجمعونا سوا .. كيف يعني .. لو يصير في ذياب شي .. كيف اكمل ثانوي .. كيف اروح الجامعه ..!

مهره مسكت كفه .. تجمعت غصه بحلقها : فاول بالخير .. الولد بيصحى .. وبيرجع لك .. ادعي له امي ادعي له ..
فارس بصوت مبحوح: ياااارب ..
ظلوا شوي ومهره محترمه صمته ..
لمن رفع راسه .. ولقى هيثم واقف عند زجاج غرفه .. يناظر ..
قام قال : شوي مهره وبجيك ..
طالعته وهو يروح .. واضح ان تيم اللي بالغرفه .. ولا يقدرون يدخلون له .. !
وقف معه فتره .. وكان بينهم نقاش ..!
........
في البيت ..
وقت المغرب ..
كانوا موضي والبنات جالسات ..ويضبطون المكان .. عشان الضيوف .. لأنو انتشر خبر حادث فارس .. ومتوقع يجي اي احد بأي وقت..

طق الجرس .. رفعت جمان راسها : لا عاد بدري كذا .. من اللي بيجي الحين ..
بلقيس .: اذا احد غريب .. دخلوه غرفة الضيوف .. سيف ونواف فوق ..

افتحت الشغاله الباب ..
وموضي راحت تستقبل الجاي ..
واذ بها نوف..
جايه بباقة ورد .. وكيس فخم فيه شوكلت .. ارتبكت موضي .. بس رحبت فيها .. وهي تدخلها ..
بلقيس بخفوت لجمان: وش جابها ..؟!
جمان وماعجبها الوضع : مهره بتجي مع فارس ..والله والبنت مو ناقصه مغثه يكفي اللي جاها ..
نوف تجي تسلم .. ومسويه ملمه بالوضع وانها من اهل الدار ..
بعد ماجلسوا ..
نوف :اخباره حبيبي فارس .. والله اني ارتعت عليه..
جمان بخفوت لبلقيس اللي جنبها :
واضح .. من الروج العنابي ..
لكزتها بلقيس :كلمي سيف .. لاتجي مهره .. الحين ..
جمان وفاهمه نفسية نوف:
هي جايه تبي تشوف مهره اصلا ً .. حادث فارس حجه ..
نزل سيف وشافها .. عقد حواجبه .. وتقدم ناحيتهم : وش الرياح اللي هبت غلط واحذفتك فيذا يانوف ..
نوف تضحك بتسليك :
ماشاء الله صاير تنكت ودمك خفيف ..
سيف بعصبيه: نووف اقصري الهرج .. وش جايبك بدون حتى تقولين ..
نوف حطت رجل على رجل :
جايه اتحمد سلامة فارس .. لازم استأذن .. معروف بتفتحون البيت .. وبيجونكم الاحباب .. صح ولا ياخاله ..
موضي :
صح يابنتي .. وحياك الله .. اقعد سيف .. والحرمه جايه تقوم بالواجب ..
تلفتت نوف : وينه حبيبي فارس .. ماشوفه ..
سيف وده يطحنها ..!
فارس خلقه مايواطنها ..
ومهره بتجي .. الله يعديها على خير ..
......
سكرت مهره الباب ..بعد ماركب فارس وركبت جنبه ..مسكت رجله تعدلها كان فيها جبيره ..
فارس:
ماكان له داعي يجبرونها ..
مهره: قل الحمدلله .. ان احنا دخلنا ع الدكتور .. حتى لو مو كسر تعورت حيل ..وترضرضت .. لو تركتها بتزيد ..

حرك السواق .. وفارس تكلم بشرود:
الحمدلله على كل شي ..
التفت عليها : مهره .. صدق الحمدلله حتى على الحادث ..
مهره باستغراب : ايه الحمدلله يابوي .. والحمدلله ان الله حفظكم وطلعكم ..
فارس رجع شرد :
تدرين شيقول هيثم ..
عقدت حواجبها تنتظره يكمل ..
قال :تيم ماكانت نيته فيني بس كذا .. زعمه .. اني انا مستشرف .. واني مترفع عنهم وشايف نفسي .. كان نيته لااستويت من الحشيش .. وبعد مانفحط .. وادوخ .. كان بيرمني في استراحه للناس قاضيين .. كان ناوي ..
وسكت وغص بالكلام .. مهره افهمت وانفجعت ..
فارس مصدوم من عقلية تيم وانتقامه .. الشيطاني ..

كمل بصدمه: تخيلي كان ناوي يسوي لي فضيحه .. ويشوه صورتي عاد لمن امووت ..
لاحظت مهره كيف كفه ترتجف ..
وكان يتخيل هوول الوضع لو انه صار ..
مسكت كفه واضغطت عليه ..:
انسى .. الله عالم بنيتك .. وهو اللي منعه ورده .. وسبحان الله هذا هو طايح بالمستشفى ..

مهره تبي تغير الموضوع ..
قامت تسولف معه .. عن شغلات ثانيه .. لمن وصلوا البيت ..!

في الصاله ..
نوف حطت فنجالها ع الطاوله .. وناظرت سيف الصغير : ياحليله .. من ولده ..؟!
جمان : ولد عساف الله يرحمه ..
نوف لسيف: ولد زوجتك يعني .. بس والله يشبهكم ..باين مايشبه امه..
سيف وعارف خبث نوف ودقها في الحكي ...
رفع حاجب والفنجال بفمه.. نزله :
مايشبها احد يانوف .. زينها واجد على ورعنا مايقوى يشيله ..
موضي تنحنحت .. على العيد اللي جابه ..
ونوف انقهرت .. وتغيرت ملامحها ..
بلقيس شالت صحن الحلا تضيف ..:
وحيالله نوووفه ..
نوف : يحييك حبيبتي ..
جمان لكزت سيف وبهمس: الله لايضرك .. لسانك مشرط مايرحم ..
سيف بخفوت : قومي شوفي اي عذر وادخلوا غرفة الضيوف .. قبل تجي مهره ..
جمان: تمام .

قبل ماتسوي جمان شي.. انفتح الباب ..

(مهره)
دخلت وفارس يتعكزني بيد .. واليد الثانيه يتعكز العصا ..
حسيت ان في احد غريب من الهمهمات .. في الصاله الجانبيه .. ونفس الشي قلبي انقرص .. لما سمعت صوت سيف معهم .. :
هلا ابوي حياكم ..
فارس ضغط على كفي بقوه وهمس:
نوف .. هنا ..
وحسيت بيد بارده تعتصر قلبي. ماكنت ابي التقي باي انسانه ارتبطت بسيف .. ماابي اشوف انثى خذته .. اكثر مني ..
بس ابتسمت بدون ارفع راسي عليهم ..لابد من هذا اللقاء ..
تشبثت بذراع فارس .. وكأني بدل ان اسنده .. هو يسندني .. واقبلنا عليهم ..
ووقعت عيني على نوفه ..
موضي بارتياع: ذا جبروو رجله .. اجل مكسوره ..
مهره .. وهي توصل فارس لمن الكنبه وتجلسه:
لايمه .. مو مكسوره .. بس انرضت مره ..الدكتور قال لازم الجبيره تظل اسبوع .. عشر ايام كذا ..
مهره ترفع رجله على طاوله صغيره .. وفارس يقول :
يبالغ .. بس بشيلها ..
مهره : انكتم .. ماراح تشيلها الا لاسمح الدكتور ..
قامت وغمزت لسيف .. :
دخلناه الدكتور وسوينا اشعه ..وجبرناها بعد .. شرايك .. ؟؛
سيف ببتسامه: كفووو ..ابوي ..
مهره التفتت ..على نوف وراحت تسلم عليها ..: اعذريني .. كيفك ..؟!
نوف .. وملامحها تغيرت .. ومهره تفك شيلتها وتجي تصافحها وتبوسها ..
في داخلها ( الآن عرفت لما سيف تغير .. لما صام عنا .. واعرض .. لما تبدلت مفاهيمه وعواطفه .. وكل شيء نحونا ..انا وهيا )..
بلقيس : نوف ..هذي مهره .. مهره نوف ..
لكن نوف .. رغم ارتباكها الا انها ماتخلي حركاتها :
ماشاء الله .. فكرتك خطيبة فارس أول ماقبلتو .. صايرين كابلز ..لايقين ع بعض ..
عقد سيف حواجبه .. وفارس .. دمه بدا يفور ..مقاصد نوف وسخه ..وطرقها ملتوية ..
بس فجعتهم مهره لما ضحكت وقالت ..وهي تلتفت على فارس بنظره :
بالله ..صدق الواحد مايحكم من اول نظره .. انا اول مالمحتك .. وشفت سيف جالس .. فكرتك عمته.. اللي ماجات عرسنا .. طلعتي زوجته .. !
يعني فارس حشم الوضع والا كان بيصرخ : بوووووم ..
بس اكتفى ببتسامه ..
سيف .. احتفظ ببتسامته بداخله .. ومات على شقاوة مهره بالرد ..
الباقين .. وجهم اشكال والوان ..
نوف بصدمه :
انااا .. عمته .. ؟! .. الله يسامحك ..
مهره تشيل عباتها :
يعني قلت لك .. من باب التخمين .. نفس ماخمنتي .. اني الحب حق فارس وانا امه ..
نوف قبضت على كفها بغل ..
ومهره تنادي الخادمه : جوودي ..
وذيك جات ..عطتها مهره العبايه .. : اخذيها لغرفتي .. وجيبي لي سكارف كبير ..
صعدت الخادمه تنفذ ..
مهره وقفت ترتب شعرها بيدينها .. وتنزل بلوزتها على البنطلون ..
سيف : اخبار ذياب .. وش وضعه..؟! ..
مهره ..تجي على نفس الكنبه اللي جالس عليها .. جمان ..قامت .. وتركت لها مجال تجلس جنبه .. مهره : ذياب مسيكين تحت البنج .. والمسكنات .. بس طمنونا على وضعه .. وبعد ماخلصنا من جبيرة فارس .. رجعنا طلينا عليه .. طمنا اخوه انه بدا يتكلم شوي .. بس مارضو ندخل خلاص .. انتهت الزياره .. !

سيف : الحمدلله .. (والتفت لفارس.. رفع حاجبه) : كان نذرت على سلامة خويك .. اذا الله اخرجه من المستشفى..
مهره ابتسمت :
انذر فارس .. على جلده ..
فارس بنص عيون : والله بنذر بس بوهقك ..
سيف ضحك: انذر ابوي .. ونذرك في رقبتي ..
فارس : تشهدون ..!
كلهم : نشهد ..
فارس : نذر لاقام ذياب بالسلامه .. اسوي له عشا بعشر روس غنم .. وفوقها شيك بعشر الاف .. هدية سلامته..

وناظره .. يعني انت اللي وهقت نفسك ..
سيف : تم ..يستاهل خوي ولدي ..
مهره بشطانه: هذا نذر سلامة ذياب .. سيف سلامة ورعنا ..وش له ..؟!
فارس :يوفي لي نذري في ذياب .. وانا مابي شي..
سيف: والله ياهي عاد اجتمعت .. رضاوة وسلامة .. انت الخسران ..
جمان : اطلب ..لاتفوت الفرصه..
فارس بكبرياء .. ويختلس النظر لنوف.. : الله يغنيني ..
شافها كيف تحدق بمهره .. وكنها تبي تقوم تخنقها ..
عرف من مهره من شوي ان ابوه ماكان يكذب .. وفعلا ً كان رايح لحاله ونوف جات هناك ..
تعجب من حركات نوف في سناباتها .. له ..!. واصلا ً لاهو ماين معها ولاشي ..
الا انها فاهمه انه متقبل مهره ولاهو متقبلها .. وهي عارفه هالشي . . من ايام الزواج .. وسناباته ..
فاهي تفكر انه بيعرض الصور على مهره وبيسوي كهرب بينها وبين ابوه ..!
الجلسه كانت متوتره .. الا ان الجميع .. اعطى جو ان الأوضاع عاديه .. مهره .. كانت تحترق من داخل .. وخاصه لما تقول نوف موقف يشاركها سيف فيه ..
التفتت له كانت ذراعه ع الكنب وراها .. كانت لاصقه فيه وكنها تبي تعلم نوف والعالم كله .. ان في النهايه هو لها .. لها لحالها ..
ابتسمت وهو يطالعها ..وحركت شفايفها : بطعنك ..
سيف بيضحك .. بس لمس رمشها بظهر صبعه كنه يوخر شي عالق ..
بس مهره صارت تفهم سيف لما مايقاومها .. يلمسها بعذر .. انو يشيل رمش طايح .. ولا شي عالق ..
فاتوردت خدودها .. يعرف كيف يخرفنها ..
قامت .. وفي تفكير انثوي خافت من الحسد .. ومن العين ..
صبت بيالة ..
خذتها لفارس ..
مدتها له : تقهوى امي .. شفيك مفهي...
خذ الاستكانه .. :سلمتي..(وابتسم ويداعبها): يمه ..
توه بيشرب الشاهي ..انتبه لعيون نوف .. ونظرتها الغريبه ..
فارس : فيه شي .. نوف .. ليه تناظرين كذا ..؟!
نوف باللهجة عتب وغبن ماقدرت تكتم داخلها:
وش كان يضرك .. يافارس .. لو عاملتني كذا .. كله كاش مني .. ولاتطيقني ..
سيف بتحذير : نوووووف ..؟!.
نوف : عادي سيف تسائل .. وفارس كبير وفاهم ..
فارس حدق فيها .. بعدين رفع الاستكانه وطالعها :
الفرق يامرة ابوي العزيزه ..انو مهره نفس الزجاج هذا .. تشوف داخله .. وتعرف وش فيه .. عكس اللي معتم .. وحركاته غير واضحه .. ويلف ويدور . ويقرب عشان مصالحه هو .. وبس ..
عقدت حواجبها .. وبعصبيه: الله .. انا تشوفني كذا .. ؟! ..
ابتسم بسخرية : عمر ابوي ماعطاني مشغول الا لاصار عندك .. والمصيبه .. ان ثاني يوم يكون مايدري عن اتصالي .. لانك انتي بصبعك الكريم تقفلين الاتصال .. وتحطين الجوال صامت ..
ارتبكت ..: من جدك .. شهالاعتقاد ..
سيف انصدم .. من كلام فارس ..
فارس : خلينا من الاتصال .. انا جيت لابوي عند الباب .. وكذبتي وقلتي مشى وسيارته بره .. انا من كيفي ماعلمته .. لأني عارف هو وش بيسوي في اللي يحول بيني وبينه .. عطيتك على جوك .. وماحطيت عقلي بعقلك ..
نوف : الله ذاخرها بقلبك .. ترى كان جد مشى ..
فارس التفت لابوه : انا مشيت واتصلت وقال انه في البيت .. اصلا ًعشان ماظلمك .. كلمته فديو وطلع ببيتكم ..
نوف ماعرفت شتقول .. تحسفت انها تكلمت .. جمان قرصت بلقيس .. وقامو .. من المكان ..
مهره .. اللي كانت واقفه جنب فارس .. كانت بتروح .. مثل جمان وبلقيس ..
بس فارس مسك يدها : لاخليك مهره .. هي تسئل ليه انا معك كذا ومعها كذا ..
مهره بارتباك : خلاص قفل الموضوع فارس .. نوف جايه تتحمد لك السلامه .. امي خل الماضي ماضي .. ويمكن انت فاهم خطأ..
سيف بعصبية وهدوء:
لامهره .. خليه ..خليني اعرف .. وش هالحمول بقلب ولدي ..
موضي :فارس امي ... اكيد نوفه ماتقصد .. يمكن يكون ابوك مشغول .. او عندهم شي ولاش . لاتفهم خطأ..
فارس : انا ماني سفيه يمه ولامتطفل .. ترى معطي ابوي جوه . وكل هالامور ساكت عليها واكثر .. وياما تحملت حركات من نوف واشكالها .. بس في ** كلهم ..
مهره بانفعال: فارس .. !!!
فارس ببرود : هم انبشوني .. وخليهم يسمعون .. نوف تنقهر .. من العز اللي معيشني ابوي فيه .. وتنقهر من كلامه لي .. وتغار .. حتى مره قالت لي .. والله بجيب له ولد .. ينسيه اسمك واسم امك ياولد نجود .. .
سيف قبض قبضته بقوه ..
وفارس هز كتفه: مارديت عليك وقتها .. لان حسيت عقلك صغير .. ادري لو يجيب ابوي قبيله .. يبقى فارس اولهم وفوقهم كلهم ..
نوف : كنت امزح معك .. لاتصير حقود يافارس .. والله ماشوفك الا ولد لي ..

فارس ضحك بتهكم :
عشان كذا ترسلين لي صور ابوي في ادبي .. وهو راقد وهو يدخن .. وغداكم .. ومشترياتك .. وتتغزلين فيه .. وتكتبين ع صور كلام رخيص .. عشان اوريها يعني مهره .. واخرب بينها وبين ابوي . وتعطيني انطباع .. انو الرحله لك .. وهو يكذب علينا انو رايح للمزاد ..

سيف مصدوم من كل هالتصرفات .. والاشياء اللي كاتمها فارس ولايقولها ..هب واقف .. وبحده مكتومه :
نوفه تعالي ابيك .. ..
نوفه بتبكي : لحظه سيف .. والله فهمتني خطأ..

سيف راح ناحية الباب : انا بره .. اخلصي ..
نوف تلف شيلتها وتطلع بسرعه ..
مهره بصدمه:
وش فيك جبت العيد فارس ..خبل انت ..
فارس ببرود: خليها تنقلع .. والله كانت هيا احسن منها .. بعيده ومحترمه .. ولا ذي ساحره .. سوسه .. تمشي ورى مصالحها نفس النمل على السكر ..
موضي وبتعجب :
شهالحكي اللي طلع منك يالهيس ..عنبوك بتخلي ابوك يرمي عليها اليمين ..
فارس : ياليت .. نفتك من عاهه ..
جمان وبلقيس جاوو ..
جمان : يممممه منك .. بعير .. حاقد ..
بلقيس : بس صح كلامه .. خير منهي نوف تتعامل مع ورعنا كذا..
مهره :بس ولوو .. غلط فارس .. ترى هي جايه .. عشانك .. تصرفك أوفر ..
فارس : انا نظامي في عشرين عشرين .. النسف .. ماعاد اجامل احد .. ولا استر على احد .. ولا اراعي احد ...كنت اعتم على اسلوبها عشان ابوي .. اقول مابي اغثه .. هالحين حتى ابوي بغثه ..والله لاصير حصاه ببلعومه ..
توسعت عيونهم كلهم ..
مهره : يووووووووه ...
جمان ضحكت: شفيك صاير،شراني ..
فارس : تعبت وانا اعطيكم وجه .. يوم الله كتب لي عمر .. بصير عقوبه للجميع ..بسوي فيكم النون ومايعلمون..
بلقيس بحماس: كسسسسر يابخت البيوت اللي تكسرها..
......
نواف مع فارس في الغرفه : خبل انت ..فوق شينك قواة عينك .. احرجت الحرمه ..
فارس بلامبالاة وهو ياخذ مسكنات كتبهم له الدكتور:
ماراح اهتم لأحد .. طالما الكل يدوس على مشاعري ..
نواف : شفيك صاير سادي وحقير.. يا**.. ترى ابوك شوي بيرجع لندن .. واقعد تندم على افعالك معه ..
فارس: ماضريت ابوي .. بالعكس .. نورته .. خليه يعرف هالدوده الشريطيه ايش تسوي من وراه ..
نواف : وانت الحين ضامن مهره ..ماتطلع افعالها كلها نفاق وكذب .. وكلها عشان غايه في نفسها..
فارس على سريره جالس يتلحف :
لامو خايف .. شف انا قلبي يدلني .. واعرف اللي يحبن صدق .. واللي مصالح .. انت مادري ليه ماتثق فيها وصاير عدواني معها .. ترى لو يحس ابوي بيزعل ..

نواف شتت نظره: مابيني وبينها شي .. لا عداوة ولارضا ..
ودق رقم سيف : وابوك مقفل جواله .. ياخِ افلامكم ماتنتهي .. كل ليله موسم ..
فارس : خلاص اطلع بنام .. لايصحى سيف الحين يجي يلصق جنبي .. اخاف اقط هالجبيره عليه واموته ..
ابتسم نواف .. وهو يلتفت على سيف النايم .. راح جنبه .. ظل يناظره بحنيه ..
لمس شعره واذانه .. التفت لفارس: شغل التكيف .. الغرفه بارده ..اذان الورع مثلجه..
فارس : حط عليه بطانيه زياده ..الا المكيف الدافي ماتحمله ..
نواف: طيب دفايه .. شي ..ترى شريكك في الغرفه .. بيتشنج ..
فارس :عادي نواف .. في قبعه جنبك لبسه .. مهره تقول عادي .. سيف متعود حتى هي ماتشغل ..
نواف تلفت ..
وخذ قبعه صوفيه .. ولبسه .. وظل جاثي جنب السرير يتأمل ملامحه .. يلمس خشمه وحاجبه ..
فارس غمض شوي وفتح .. :
وش فيك .. ؟!
تنهد نواف ووقف : ولاشي.. تصبح على خير ..
فارس: تلاقي خير..
.........
*همت في الشوارع .. مخنوق .. ماتوسعني الأرض ..
ضيعت فارس .. يتمته بوجودي .. يقترب مني واضمه .. ماقصر معه بشي ..
لكنه بعيد..
نوف من تكون يتصل علي وتعطيه مشغول .. لوكان محتاجني .. لو كان في مصيبه ..!
روحي اهو ..!
لعنت نفسي على كل لحظه دورني .. ولالقاني .. على كل ضيقة صدر كبتها وماقالها ..*

وصل البيت في منتصف الليل ..
صعد لغرفة فارس ..
دخل وقرب من راسه .. جلس جنبه .. باس جبينه .. اللي ملفلف بالضمادات ..
لاحظ المصحف الصغير .. يبين من تحت مخدته ..
سحبه وطلعت معاه سلسله ذهب فيها قلاده كبيره عليها آية الكرسي .. خلاهم بكفه.. تأملهم بغصه ..
مسح دمعته قبل تطيح ..
المصحف اللي تحطه نجود تحت مخدة فارس من يوم انولد ..
واية الكرسي تلبسها اياه عشان تحميه من العين .. حسب اعتقادها ..
ناظرهم ورجع يناظر فارس ..
حدق فيه .. متى كبر فارس كذا .. تأمل شنبه الخفيف ..
لمس وجهه ..وانصدم .. !!
من متى فارس يحلق دقنه ..
متى اول مره مر الموس على وجهه ..
من علمه ..!!!
نواف ..
ولا أبوي .. ؟! ..
ولابداها بلقافه..؟!!!
اففففف .. والله انا قريب حيييل منه .. بس ذي التفاصيل كنت انتظرها ..
كنت ابي اكون فيها .. !
كيف ..
ويني ..ويني عن كل هذا ..!
آااااه يافارس آااااه ..

رجع المصحف وآية الكرسي تحت المخده .. باس خد فارس .. ويده ..:
*خلص هالسنه وماهو كيفك تظل بعيد عني .. والله ماخليك يوم ياولد نجود ..!*

طلع .. وماراح غرفته ..صعد الدور الثالث .. اكيد مهره نامت ومايبي يضايقها..
ولاهو عارف ينام ..
فضل يجلس لحاله ..
يتهاوش مع نفسه ويخطيها ..
اقبل على غرفة المكتبه .. لقى الباب شبه مفتوح.. ونور خافت مبين منها ..
غريب .. هو من قبل روحة دبي ماصعد ..من فاتحها ..؟!
راح دخل.. عقد حواجبه .. وهو يروح يطل في الأريكه ..
مهره نايمه .. ومتغطيه بفروة تبعه ..كان تاركها هنا..
استغرب .. متى مهره عرفت المكان .. ومتى جات .. وكيف لقت المفتاح ..؟!
تنهد .. وقفل الباب وراح جلس على كرسي المكتب ..
حاول مايطلع صوت .. عشان ماتصحى ..
استرخى وعينه عليها ..
مهره .. وفارس .. والضياع ..!
رغم عشقه للأثنين الا انه مو قادر يجمعهم لحضنه ..
ولايستقر معهم ..
ولايعيش حياة طبيعيه ..معهم .. !
قدح الولاعه واشعل سيجار ..
كنشت مهره وافتحت عيونها ..
اللي طاحت عليه ..
جالس بثوب شتوي .. واسكارف اسود .. ووجهه مرهق ..
ابتسم ابتسامه باهته: نومك عالق فاذانك .. قمتي من صوت الولاعه ..
مهره ظلت على حالها تطالع فيه ..
سيف :وش جابك فوق ..؟!
استعدلت ..ودت راسها على الكنب : ليش ماترد .. وين اختفيت كذا ..
سيف ومتضايق .. حرك راسه كأنه مولاقي النفس:
اختنقت مهره .. كلام فارس ذبحني .. عرفت اني بعيييد عنه .. مع ان تدرين انا لاصحيت .. اول اشوف فارس وش راسل .. اول اسمع صوته واذا جيت انام اطمن عليه.. اتابع مواعيده .. حتى وانا بعيد .. يرسل لي معدله اول بأول .. مصروفه مو شهري .. اسبوعي ..باستثناء السياره ماقصرت معه بشي ..
سكت .. ومهره تنتظره يكمل ..
قام ومشى وقف قدام صورة لفارس :
وعاد قلبي .. ممتلي فيه.. ولدي .. نعمة الله علي ..يامهره الدنيا ملكتها يوم شلته ..كنت اضحك وابكي وانا أذن في أذنه.. شي مو صدق بالنسبه لي .. صغير وطايش وجاه ولد ..
مهره ابتسمت ..وبحنية:
ماحد ينكر ..انا اللي اموت على علاقتكم سوا .. وقربكم ..احب كيف تحبون بعض ..كيف تفهمون على بعض من العيون ..الكيميا بينكم تجنن..

سيف جاء مشى ناحيتها ومعاه صوره لفارس ..وعمره يمكن خمس سنوات ..
جلس قدامها .. طالع الصوره وتكلم :
مره في بداية سفراتي لندن .. بعد وفاة نجود .. فارس ظل مع امي .. واهلي هنا .. غبت حوالي سنه ونص ورجعت ....

ناخذكم لذاك اليوم ..
جاي من السفر .. جلس واخذ فنجال قهوه : جمان وين فارس .. ؟!
جمان : على جيه .. ماخذته امي معها بيت عمي فهد ..خالتي سلمى ذايب قلبها عليه ..وهذه تلح تقول خلوه عندي ..
سيف بنص عيون:
ولدي مايربى الا عندي .
جمان : بالله عليك .. طاير عنه سنه وشوي .. وتشرط ..
سيف: اهم شي شعوري انه في حضن امي يريحني ..
انفتح الباب .. ودخلت موضي ومعها فارس بو خمس سنين ..
استعدل سيف بسرعه ..وبشوق : فارس حبيبي ..
التفت بلهفه وشهق .. وعيونه تتوسع :
باااااباااااا ...
اسرع وركض وطب في حضنه .. ضمه سيف وكنه بيدخله في ضلوعه .. بوسه ..
وفارس يتعلق فيه .. مو مثل الطفل لما يبعد عنه الاب او الام فتره .. يحس بشعور الحياء .. او الشرهه .. او حتى النسيان .. !
*بعد ان عانقته .. وبكى داخلي وانا اشم رائحة نجود فيه ..تشبثت فيه .. وظللت مغمض عيني .. وفارس يدخل وجهه في عنقي .. ظللنا هكذا ..في اعظم علاقه .. اني بابا .. والد هذا الطفل الجميل.. ضممته بتملك .. حتى اني غرت من ان تكون امي امه وابي اباه .. هذا الشيء لي أنا .. اعطتني اياه فقيدتي وروحي وذهبت ..لا احد يشاركني صغيري ..فارس لي وحدي *

رفع فارس راسه .. وببتسامه جميله كفوفه على وجهي:
حبيبي .. بابا ..انا مبسوووووط.. متى جيت ..

في تلك اللحظه ايقنت اني اهملت فارس .. اتسعت عيناي .. وانا ادخل يدي في شعره الذي طال ونزل عن عنقه .. واتخذ الطريق لظهره.. وغرته اللتي اخفت حاجبيه..
ملامح فارس جميله .. ودقيقه .. وعيناه كبيرتان .. ذو بشره بيضاء .. وغمازه ..
قلت بصدمه:
عنبوكم .. الولد صاير بنت ..يمين بالله ماعندكم سالفه ..يمه ليش ماحد خذه الحلاق ..
موضي بشرهه:
شف لاتقعد تسوي فيها مهتم .. ولا ماهو عاجبك .. عجزنا.. تعرف شلون عجزنا .. مايبي يحلق الا معك .. ابوك وداه .. عمامه .. فرفرو فيه في حلاقين المجمعات كلها .. يبونه بس يحلق .. ولدك سوا النون ومايعلمون .. حالف مايدش المقص راسه .. جده فهد وخاله .. خذووه .. اصلا ً ام شاهين مسكينه كل ماشافته .. جابت المقص بتعدله .. يخشب ..من الصياح .. عاد انا اللي حلفت ..ياتجي تحلقه .. ولايظل ..

سيف .. يطالعه .. ويجمع في شعره بغبن .. وفارس مفهي .. قاعد يسمع ولايدري شسالفه ..
جمان : يعني عذراً سيف .. بس احيان والله اربطه له.. يكسر خاطري .. عيونه أكلها الشعر..

سيف رجع يحدق فيه .. ابتسم بغصه: ليه بابا .. ماحلقت .. مخلي شعرك نفس البنات ..
فارس يلعب بقلم ابوه في يده:
انا ماروح حلاق .. لمن تجي بابا ..انا اقص شعري.. انت تقص شعرك .. مابيهم كلهم .. بعدين حلاق يقص اذني .. معك مايقصها ..

سيف يطالعه ..
وفارس منزل راسه ويحاول يفتح القلم .. وكل شوي يشيل شعره بظهر كفه لما يخربش عيونه ..ويرجع للقلم .. وجعه قلبه .. ورجع ضمه بقووه وهو يهمس بذنه: آسف يبه ..آسف!!*

تنهد بعد ماكمل السالفه لمهره .. اللي تستمع بإنصات .. ابتسمت : ياعمري شهالعند .. ممسكه غلط لازم معك ..
مد سيف لها الصوره : بذمتك . ماكنه بنت ..
خذتها .. وانصدمت يجنن فارس في الصوره .. بس حيل بنت شعره ناعم وطويل ..
ضحكت:
يهبل ... يمه كيوووت ..
ابتسم : مارتحت من سفرتي .. شلته وطلعت للحلاق .. وجبته وانا حالقه بالمكينه .. امي زين ماجاتها جلطه .. كانت توصي فيني انو بس بالمقص .. وخل غره .. ومادري ايش وطيرته ..بينت عيونه وجبينه .. ذاك يامهره اول لحظه احس فيها باني اهملته ..من بعدها قمت احرص بجنون على ادق تفاصيل حياته ..
بس بعد هالسنوات .. اكتشف ان في اشياء كثير فاتتني ..
مسكت كفوفه:
لاتلوم نفسك .. انت ماهملت فارس .. رغم الغياب .. سيف فارس متعلق بمبادئك .. مؤمن بأولوياتك .. كلامك حلق في اذنه .. ويهمه رضاك .. الطيش والعناد .. لاتعده اهمال ..فارس في مرحله تغيرات ..بس والله متربي وكفو بالنسبه لعيال جيله ..

شرد : مغبون والله .. اتخيل نوف .. تصرف فارس وهو يكون محتاجني .. تخيلته وصل للبيت وانا داخل وراح ولاشفته ..
رفع راسه: ولاعاد انها تهدده بضنا وانه بينسيني اياه ..
مسك جبينه بتوتر: لا وانا اضربه بالحزام ومو عارف السالفه بالضبط ..
مسكت يده : سيف ابوي..لاتقعد تقلب في هالامور خلاص ..انت موجود .. وفارس .. يمديك تعوض كل شي ..
رفع راسه وبقرار: ايه عشان كذا قررت .. يخلص فارس هالسنه وباخذه هو وانتي وسيف .. ونروح لندن ونستقر هناك ..
توسعت عيونها :
ريلاكس سيف .. وش هالقرار .. ؟؛
هز كتفه :
انا اقدر استقر هناك بحكم شغلي ..وانتوا عايلتي انا .. ماله داعي اصير بديره وانتوا بديره ..
قام .. ومهره توترت .. القرار كبير ..
وهي اللي قامت تخاف من البعد والغربه ..
ماحاولت تناقشه في الموضوع ..
خاصه هو نفسيا ً تعبان حده .. !

راح يشعل حطب في مدفئه جداريه ..
وهو ساكت ..
مهره تراقبه .. وهو يرمي الحطب ولهيب النار ينعكس على وجهه ..
ضمت ركبها وهي فوق الكنب القريب ..
التفت عليها : قولي لي .. وش جابك فيذا .. كيف عرفتي المكان .. ؟!
ابتسمت : فارس .. قال انك بتجي وتصعد هنا.. لانه عارف انك متضايق .. ؟!
اما كيف عرفت المكان وانت بدبي .. فارس جابني .. لما شافني ابي كتب..واعجبني المكان وحبيته ..وقررت حتى انا لابغيت انفرد بنفسي اجيه ..
ببحه: طيب لابغيتي تنفردين بنفسك .. ترضين تاخذني معك ..

اعتدلت وطقطقت فخذها وبحنية العالم : تعال ياعين مهره ..تعال عندي .. يابعدهم

راح لها .. وحط راسه على فخذها .. غمض عيونه ..
*اذا كانت مهره مشتته ألف ..
فاهو مشتت مليون . ! *
راحت تداعب شعره .. وذقنه .. تسولف معه .. تركته يفضفض .. ويقول اللي في خاطره ..
ظلو كذا لمن نام..حطت مخده تحت راسه و فردت الفروه عليه .. !
توها تحركت بتمشي ..
ناداها وهو فاتح الفروه جنبه : تعالي نامي هنا ..
مهره: بضيق عليك خلاص نام وانا بنزل .
عيونه شبه مقفلين : تعالي ولابنزل معك ..
جات جلست جنبه وانسدحت وظهرها على صدره .. وذراعه تحت رقبتها.. ضمها ..وهمس: انا فدا ريحتك ..
قشعرت لأنفاسه .. وهمسه ودفئه ..
اشتاقت لقربه ..
من قبل مايمشي دبي .. ماضمها كذا .. ونامو سوا ..

اغمضت عيني .. في اكثر محيط آمن في الحياه ..
محاصره بذراعيه .. وقدمه ..
وكأنه يخاف ان افلت منه ..!
الى اي مدا ستصبر ياسيف..
واصبر أنا ..!
إلاهي .. كن معي .. !
......
شاهين في البايكه .. في الصباح بدري ..
كان فاتح الجوال .. وغاده صورتها ع الشاشه وتكلمه سناب ..
كانت تبكي .. وجالسه ع الأرض : بموت شاهين .. ضايقه فيني ..امي حالتها تتدهور .. الدكتور احبطني ..

شاهين : طيب اهجدي يابنت لايجيك شي .. اطلعي من المستشفى شوي ..روحي بيت خالتك غيري مكان ..
غاده : ماقدر والله .. انام بغرفة امي .. واداوم من هنا ...ماقدر اخليها ولالحظه .. اخاف تموت وانا مو جنبها ..
شاهين : لاتقولين كذا .. الاعمار بيد الله ..
التفت ولقى جمان واقفه متكتفه .. وعليها شال كبير .. تكلم :اخليك غادة .. سلام ..
وقفل الاتصال ..
جمان واقفه .. قرصها قلبها .. وهي شافته رجع من بره وظال يكلم ..
بس حاولت تتعوذ من الشيطان ..
وتبعد هالهاجس..
ابتسم لها .. كانت تحدق فيه .. طفى السياره ونزل .. وشايل كيس :
جهزتي الليمون ..؟!
ابتسمت:جهزته.. السبانخ بالجبنه.. على طول تذكرني بايام الخطوبه .. لما تجيني الصباح ..
خطف منها بوسه:
يعني طلبتيه عشان قرب زواجنا ..
جمان هزت كتفها : يمكن..
اسندت جبينها على صدره :
من ثلاث سنوات .. ماستشعرت هالايام ولا راجعت الذكرى ..
شاهين خذها بذراعه ..
لعن نفسه .. وتواصله القليل مع غاده ومواساته لها..
في الوقت اللي قلبه ممتلي بس في جمان .. والوقت اللي اختارها وبس ..!
بس ضميره يجلده ..
على غاده.. مو حُب .. بس انسانه حبها ..في يوم.. ومحتاجه وقفته الحين ..!

............

دخل سيف غرفة فارس ..
ولالقاه كان في دورة المياه ..
جلس على سريره ينتظره ..
شوي وطلع .. وباين متروش.. انتبه لابوه .. وحاول يشتت نظره وهو يجلس على كرسي جانبي .. وانثنى عشان يفك الكيس المربوط على الجبيره ..
قام سيف وجثى قدامه .. وبدا يفكها : جدتك رابطتها ..؟!
فارس : ايه جاتني وانا بقص الجبيره .. خلاص ابا اتروش .. يكفي شعري مو عارف اغسله .. والا ماتشيلها وحطت علي هالكيس ..
سيف شالها : لاتستعجل عليها يبه ..
بلع فارس ريقه وظل ساكت ..
لبسه سيف شراب على الرجل السليمه وشبشب..
فارس حس بغصه .. وابوه ياخذ بلوفر دافي ويلبسه اياه .. ويمشط شعره اللي مبين من الضمادات ..
ابتسم سيف وهو ياخذ عطر ويعطره .. وبحنية:
يلا ننزل ..
هز راسه ايجاب وخلاص بيبكي ..كأن الوقت مامر ولاكبر .. سيف من قبل واذا كان موجود هو يسبحه ويلبسه ويمشطه .. ويعطره ..
وقفه .. وشال العصا .. وتوه بيمشي تارك فارس يتعكز ذراعه ..
شده فارس وببحه:يبه.. !
سيف لف له: روح ابوك ..
فارس اندفع لصدره وقام يبكي بصمت ..
ضمه سيف .. وهو اللي همس :
آسف يبه .. والله آسف..

تأسف منه اول ماهمله وطال شعره ..
وتأسف منه يوم حس انه اهمله الحين ..!
.......
بالضحى والشمس كانت دافيه مهره وولدها وفارس ..كانوا بره ..
سيف واقف يرسم على جبيرة فارس .. ماظل حرف m الا كتبه ..
فارس : خلاص ياورع .. بيفكروني احب وحده اسمها مرام .. ولامريم ..
ضحكت مهره وبيدها مجموعة ورد : انا وسيف قصة غرام لاتنتهي .. ترى يكتب حرفي على كل شي ..
فارس : ليته يكتبه صح .. شوفي كم مثلث يسوي ..
مهره : ماعليك .. مع الوقت بيضبط ..
طلع سيف وهو يكلم جوال .. بانجليزي .. وباللكنه بريطانيه : لاتستمري باتهامي في اهماله .. وكأنه يسمعني.. اخفضي صوتك ماريا ..عليك اللعنه .. تكادين تخرجين من الهاتف ..
توجه لفارس .. ومد الجوال له : كلم ماريا .. انجلطت ..
ابتسم فارس .. وصدم عيشة مهره .. كيف جايب اللكنه البريطانيه نفس ابوه .. :
مرحباً ماريا الجميله ..
ماريا : اوووه .. لقد انخفض لديا الضغط والسُكر .. خفت عليك حقا ً ايها الوسيم الصغير..
ضحك : انا بخير .. حادث بسيط ..اشتقت اليكِ..كيف حالك..
ماريا : حبيبي انت .. اترقب قدومك .. لدينا الكثير لنفعله معا ً..

مهره تطالع فارس .. بعدين سيف اللي جلس جنبها ..: هذي ماريا .. اللي مارضيت تقول لي من تكون ..هاك اليوم؟!
سيف يسوي نفسه ماتذكر : بالله .. متى ..
مهره .. ترتب الورد بين يدينها وبغيره: وماشاء الله ماينه على فارس ..
سيف ضحك .. وهو ياخذها بذراعه:
وانتي لو تعرفتي عليها بتحبينها..
مهره : مابي اتعرف على احد ..اشبع فيها انت .. لا ومخليها تكلم فارس .. والله عيب ..
فارس : اكيد في الاجازه كالعاده ..حسناً عزيزتي .. نلتقي..
مهره تغلي ..
لمن قفل فارس ..
مهره تهاوشه :والحين انت ماتستحي جالس تتكركر مع هالغريبه ..لا وتوعد فيها ومشتاق لها ..
والتفتت على سيف: وانت الشيخ جايب الجوال بنفسك له ..
توسعت عيون فارس قال وهو يضحك:
مهره ..هذي ماريا زوجة خالي وليد .. كبر ابوي ترى ..من جدك .. عمر معها ..
شهقت مهره وهي تلتفت لسيف وبقهر وهي تقوم :
ورب الكعبه ماعندك سالفه ..
ضحك وهو يمسكها: تدوخين وانتي غيرانه ..
مهره بقهر : اتركني ياعديم الإنسانيه .. يالمريض .. وبالله عليكم انا من متى في بيتكم ليه ماحد قال ان مرت خالكم اسمها ماريا ..
فارس : امي ماتقول الا الانجليزيه .. هههههههههههههههههههه وبالعاده اصلا ً مايجي طاري خالي وليد منسي ..
التفتت لسيف وهو يضحك ..على شكلها ..
صاحت فيه : مبسوط على خيبتك .. والله قلة حيا ..انا احصلها من حريمك ولابعد من مرت خالك ..
سحبها وجلسها جنبه .. مسكها بقووه : مرت خالي يالمريضه انتي .. صديقتي ماهو حبيبتي ..
توسعت عيونها .. وهي تلتفت :
صديييييقتك ..!!!!!!!!! ... ايش الفري اللي انتوا عايشين فيه ..
فارس يضحك عليهم :
مهره .. ماهو كذا خفي غيره .. ولا بتموتين بالندن ..علاقات ابوي واجد .. مير ماريا مرة خاله ..
مهره تتفلت : من قال بروح معه ..يروح لحاله ..والله قلنا انفتاح .. بس ماهو كذا عاد ..
سيف : والله طلعتي بزر .. اعقلي ..

رن جوال سيف .. رد فارس لان الجوال عنده:
خير وش تبي داق .. ؟!
نواف يطل في الجوال : داق على ابوك .. انت اللي وش تبي .. ؟!
فارس: اقصر الهرج وش بغيت ..
نواف : انا وجدك بنروح المزرعه دام الجو دافي .. تعالو هناك.. وحتى الغداء جدك مسوي ترتيبات له ..
فارس : ورجلي .. اجل بفك الجبيره واجي ..لازم اطب بالمسبح ..
نواف : يا ** خلها مكانها... ولا بكنسل الروحه .. المهم قل لجدتك .. ماردت علي ..
فارس : تمام ..(وقفل).. يبه .. نواف وابوي سعود بيروحون المزرعه .. ويبون نجي كلنا .. وابوي مرتب للغداء..
سيف الصغير بحماس : نلوووووح للصان ..>>الحصان ..
سيف :ليش لاا .. خلونا نروح ونغير جونا ..
والتفت : ها مهره ..؟!
مهره: والله الجو جميل .. نروح ليش مانروح ..
.........
في المزرعه ..
وقت اللي جاو كان نواف نازل في المسبح ..فارس توجه له وضحك وهو يتعكز العصا :
حيوان .. تبي تقهرني ..
نواف رش عليه ماي : والله بالنيه.. اطلع قبل تجي .. بس ماش .. موية العين حاره اكفختني..
سيف الصغير بحماس : ابي اسبح ..
مسكه سيف : لابابا .. برد عليك ..
نواف : جيبه .. المويه دافيه ..
سيف: ماترضى امه ..
نواف: جيبه بس ..
سيف يتفلت : والله بسبح .. ادني أوبه ..
سيف : طيب وقف ..
جثى قدامه .. وفكك ملابسه ..
فارس بقهر : هالحين حتى هالجروو.. بينزل وانا لاا ..
سيف مد الملابس لفارس : امسكهم.. وانكتم لاحق .. حتى انا بنزل ..
فارس بقهر : اييييييش ..!!!!!!
مهره كانت داخل .. تشيل عبايتها .. بلقيس بحماس :
مهره شوفي .. سيف ..
*التفت .. للابواب الزجاجيه في الصاله واللتي تطل للمسبح ..سيف شايل سيفي من كفوفه .. ويمرجح فيه ... ناحية المسبح وهو يضحك ..
نواف ماد يدينه ينتظر..
وسيفي.. يضحك ..
اقتربت انظر بمشاعر غريبه..
لوهله انظر لنواف وكأنه عساف .. وان الله مده بالعمر .. ويلعب معه الآن .. !
خفق قلبي ..
وكدت اشهق وسيف يرميه في المسبح ..ونواف يلتقفه .. وينزله في الماي ويطلعه ..
ابتسمت بحنيه .. لضحكات سيفي .. الذي كان يتيم ..
لديه ثلاث اباء الان .. كل منهم يحتويه ويسعده ..
شردت في سيف .. وهو ينزع جاكيته .. وتشرته ..
تأملت تفاصيله .. احمرت وجنتي ..معقول .. وضعي مع سيف .. !
معقول ..اني اراه بهذا الشكل صدفه .. معقول ان سيف مطابق لفارس احلامي .. وانا بعيده عنه ..
اي بشريه داخلي يمكنها ان تبعد كل هذا البعد *

قفز سيف .. بلقيس بحماس :
بطلع اصورهم .. تعالي نطلع مهره ..
مهره: روحي انتي .. شوي وبجي ..
طلعت بلقيس ..
ورجعت مهره تتأمل سيف ونواف وهم يلعبون سيف ..
انفتنت باللحظه .. !
انفتنت بسيف .. !
في داخلها شي تحرك .. انُ لااا .. ماراح تخلي العمر يمضي ..كذا .. !

سعود وموضي في المطبخ .. تسمع اصواتهم وضحكهم.. وهم يجهزون للبربيكو.. !
ويتغزلون في بعض باللطافه ..
رجعت تطالع سيف بحب ..
ابي اشيب وانا معه .. كيف ..؟!

راحت .. عند الشنط اللي جابوها .. تطلع ملابس لسيف ..
فجأه انفتح الباب .. ودخل نواف .. كان مستعجل وهو يكلم جوال .. وماسك منشفه ينشف راسه : اصبر بجوالي الثاني .. برسلهم لك وانت اطبعهم ..
مانتبه حتى لمهره اللي جالسه ..
كان يصعد الدرج ..
مهره اللي التفتت لاارادي عليه .. توسعت عيونها برعب وصدمه وهلع ..
وهي تسكر فمها ... عشان ماتصرخ ولااحد يسمع شهقتها ..
نواف في كتفه اليمين وخلف رقبته اثار حرق ..قديم ..خفيف .. بس مهره تعرفه .. تعرفه لأنها هي اللي حارقته ...
امتلت عيونها دموع .. خافت تنهار .. وأحد يحس ..

راح عقلها لذيك اللحظه ..
*مهره بعصبيه وهي تبكي: الله يلعنك ياعساف .. على قد ماانت قاهرني ..
عقد حواجبه ..
وتركها تبكي وتقول كل اللي تبيه .. بعدين قام وبلامبالاه .. : لاتتقطع احبالك الصوتيه .. انا بروح انام ..تعبان حدي ..
دخل المطبخ ولحقته .. :كان واقف فاتح الثلاجه ويشرب ماي ..
مهره بكل غلها وغضبها ..
خذت الرتوه اللي مركبه على النار .. وصفقت الماي اللي فيها على كتف عساف .. صرخ بألم : ايش سويتي يامجنوووونه ..
مهره ببرود : والله اشوي عليك ياولد سعود ..
مسك رقبتها وكان بيخنقها ..بغضب :
قد اللي سويتيه .. قدها..
مهره بحقد وهيستيريا: والله ولو بيدي المووت كان هديته عليك ...*

توسعت عيونها بجنون ..
طلعت من الباب الثاني .. تعمقت في المزرعه .. اختنقت ومو عارفه تتنفس..!!!
........