مبعثر فيك ماللحزن لايشفى

الخامس والعشرون

البارت الخامس والعشرين

سافر سيف..!
بين ألم الجميع.. وصلابة مهره.. اللي.. تلبستها من يوم امس..!

تقابلت مع وليد ومشاري.. ووصتهم.. عليه.. خذت وعود غليضه من مشاري.. ان الولد في امانته.. وانه ينصفها.. لو ألتوت سما في وعدها..
ابتسم مشاري.. :
مهره.. ارقدي وآمني..لو ألتوينا.. احنا ابوي بيرجعه لك.. هذا وعدي لك..!

مهره.. وماكانت مستوعبه حجم العلاقة اللي تكلموا فيها عن راجح وابوها.. بس قالت بعصبية:
مشاري..انا مو مستوعبه شي لامن الماضي اللي بين ابوي وابوك.. ولاشي.. انا علي من الحين.. .. لو سما خبصت نفسيتها.. سيف في ذمتك..
مشاري :
بعيوني..
التفتت لوليد:خالي امانه.. لازم تزوره.  انت وماريا.. تشوفونه وتطمنوني عليه..
وليد:بدون ماتوصين.. انتي بس انتبهي لحالك.. يابنت تطمني لايجيك شي..
مهره بعصبية وصوتها طلع مرتجف:
انا مافيني شي.. بالعكس متفهمه..وذا شي اذا ماصار اليوم بيصير بكره..
سيف.. حسها مع الساعات تشحب زيادة.. وتظاهرها يضغط عليها اكثر.. مسك يدها.. واسند ذراعها..:
مهره.. ايش رايك نروح المستشفى..تشوفك دكتورتك..
التفتت بحده.. :
ليش مستشفى.. ترى مافيني شي..!.
سيف واحتار..
كيف..
كيف يتعامل مع مهره.. ونفسيتها الغريبه..؟!..

غادر سيف.. بعد عناقات مطولة وحبس دموع جامد من الجميع..
عشان مايبكونه..
ولايحسونه بصعوبة الوضع..!
واللي قلل من حدة الرحيل.. عند سيف.. ان نواف هو اللي حمله.. وراح معه المطار معهم هو وفارس..!..

مهره.. كانت واقفه.. متجزله.. من يومين.. بدون بكي.. ولااكل.. واعصاب على المحك..!
بس اسمعت صوت السيارة غادرت..
وكانت واقفه على الدرج الخارجي.. معهم..
اختل اتزانها..
وبسرعة مسكها سيف..
مع اصوات موضي وزينه الملهوفة..
مهره وعيونها شبه مفتوحه.. توقف مره ثانيه:
مافيني شي.. والله مافيني شي..
سيف بعصبية:
مهره.. اكلي لك حاجه.. ولاخلينا نروح المستشفى..
موضي:يايمه مب زين عليك.. تراك شايله روح.. انتي مسئولة عنها..
مهره.. بخفوت.. وكانها تسمع اصواتهم من بعيد:
بنام اشوي واصير زينه..بس تعبت مارتحت من امس..
زينه امسكت ذراعها الثاني :
عشاني مهره.. قبل تنامين اكلي اي حاجه..
هزت راسها نفي. :لمن اصحى..
وخذت يدها من زينه ومسكت ذراع سيف بكفوفها :
تكفى سيف.. خذني  فوق.. احسني بنام وانا واقفه..

*كيف سأغفر لنفسي.. عودة ألمك هذا.. وشدته.. من مثلي يعرف هروبك من حزنك بالنوم.. من مثلي كان ينتظرك ساعات وساعات.. وانتي تعبري عن رفضك للحياة والعيش بالنوم الطويل.. *
خذها.. وساعدها.. دخل معها وصعدوا فوق..!

بلقيس انهارت بكي :
ياعمري يامهره.. والله ماتستاهل كل هاللي يصير فيها..
زينه تطالع حيث اختفت اختها:
الله يجبرك ياخيتي..
وتحشرج صوتها وهي تقول :آاااه عليك يامهير..آااه..
موضي وهي تبكي بعد:
الله يرضا عليكم يابنات.. تماسكوا.. عشانها...
جلست زينه على العتب.. وشردت في الارض.. بصمت..