وبشر الصابرين

البارت الثالث والعشرون

مرحبا ....

/// وبشر الصابرين ///

 البارت الثالث والعشرون ...

.....

لسان حال ايفان ....

...وينك؟ 

عفت هذا العمر بعدك..

 عفت درب ما يجيلك ...

عفت عالم ما تحكمه عيونك...

 وينك؟؟ 

يا فرح يومي وأمسي 

يا دفى نبضي وهمسي 

كل دقّه في خفوقي 

كل لحظة فيها شوقي

 تحترق بلهفة عيوني 

وينك؟!!

........

اجتي امها وكالت ..

ام ايفان :بنات من هسة معزومات العرس بعد شهرين وانتن اول الناس تعرف حتة اريدجن وياها وياها بالتحضيرات ..

لافين :ضلينا صافنين اني وسوز وايفان صدمتها اكبر

ومتكدر تحجي لان خطار بعدهم .. لزمت ايدي وعصرتها وحجت بصوت ناصي ..

ايفان :ابقن وياي لا تعوفني ... 

لافين  :ما اعوفج ... بس اهدي اشوية بعدين نفهم 

ايفان: احساس صعب لا تكدر تحجي ولا تكدر تعارض بهلحظة كرهت الكل احسهم باعوني . والاكثر الي خطبني هم ميريدني شلون راح نعيش سوة... 

الدنيا صارت تخنكني ... ليش كل هذا يصير وياي...

لافين: وضع ايفان مبين صعب .. ما متفاهمين وثنينهم مغصوبين ... وثنينهم واكعين بموقف كارهين بعض ... وكل هذا بشهرين راح ينجمعون ...

من يمي شلت هم شلون حيعيشون سوة ... شلون راح يتراهمون ويكونون بيت ويصيرون اسرة ...

مشت الايام بين تحضيرات عرسها... جانت بدون رد فعل او تنطي رأي .. جانت تتحرك ويانا مثل الواحد الماأيس من حياتة سلمت امرها وتنتظر لحظة فرج من احد .. مثل الطير المسجون مسلم امرة لرب العالمين .. وينتظر احد يحن عليه ويفتحلة القفص..

خاصة هية انخطبت وتم كلشي .. وعدنا ميصير بنية تفصخ الخطوبة .. بسرعة يصير بيها عيب .. ميكولون ما تراهمو لا يحسسوها فد شي عار ... لذلك ايفان صارت مثل بلاع الموس لا تكدر تتراجع ولا تكدر تستمر اكثر لذلك سلمت امرها 

ايفان: مشت الايام بدون مااحس بيها ..جانن البنات وياي ما عافني ابد ... يمكن وجودهن الي صبرني هلمدة . 

ماحسيت على روحي غير من تاكدت اليوم الزفة ..

ماعرف شلون وصلنا بهليوم .. غيث ماشفتة ابد غير بيوم الخطبة ... لا مر ولا سأل .. وحتة لو سأل مراح احس بي لان كارهتة كره العمة ماانسة ضربتة الي بيوم وفاة جلال ..من شمرني بالكاع .. ماخلاني اشبع من جلال .. ضليت حاقدة عليه لحد منسيت السالفة ..

لافين :ولج يلة بعدج صافنة راح نتاخر ع الصالون مضل وكت 

ايفان: علواه يخلص الوكت ويخلص عمري ويا 

لافين: حبيبتي ... رحت حضنتها ... لا تسوين هيج خل نفرح اشوية ملينا من الحزن   شوفي هسة تقهرين نفسج او متقهريها هوة العرس هيج صاير صاير .. وهاي ليلة العمر تونسي اشوية اعتبريها حفلة عادية وحاولي تغيرين جو صدكيني راح تفكين شوية 

سوز :شكد مراح تحجين ميفيد حجيت وياها قبلج نفس الراس اليابس..

لافين :يلة كومي خل نفرح ... كمت اصفك واهلهل وسوز تطبل.. 

اشوية فكت وضحكت 

ايفان: ضحكت ويا البنات مدري اضحك على سوالفهن لو اضحك على روحي لو على حياتي الي مدري شلونها ..

لافين: رحنا للصالون وهناك تذركت اسألها ...

اكلج ايفان شنو هلسنة تداومين لو لا ....

ايفان : طبعا اداوم  ..

لافين : زين عبالي مغلسين ..

ايفان : لا لتخافين شرطت على اهلي اذا ميقبل اكمل ابطل ..

لافين: اي وشكال 

ايفان: وهوة مهتم اصلا الحجي بيد اهلة كالو بكيفها تكمل او لا 

لافين: الله يهديكم حبيبتي 

ايفان: اخاف اكلج انشالله ... لان ماريدة حتة  ماريد اشوف وجه 

سوز: اي وهسة يجي اليوم الي تصيحين بي احبه احبة 

ايفان :امداني اذا اكول هلكلمة 

لافين: ايييي نشوووووف نشوووف 

ايفان :كافي لا تلعبون نفسي 

خلصنا صالون واجوي اخذونا ...وصلنا دك وركص ودبكات.. وبيتنا متروس كلها فرحانة الا اني .. الكل فرحان الا العريس والعروس ... والله اذا السالفة اسولفها لمخبل يصحى  ... 

جانت الحفلة بالقاعة بعد ما تجمعنا ابيتنا 

جانت الحفلة كلش فخمة لان جانت امكانيتهم كلش زينة فصار العرس ملكي وحيل حلو ويلوكلها ..

لافين:  صارت الزفة واشتغلت دبكات الزلم ... وصارت الهوسة اكبر .. اجواء فرح مو طبيعية اضحك وافرح لا اراديا بس من اشوف ايفان تنكسر فرحتي بيها قبل جان كلبها حزين هسة روحها مكسورة وحزينة ..

احاول افرحها اني وسوز من نشوفها بدت تصفن لان اعرفها تكعد تقارن .. وراح تتذكر جلال .. واني اليوم ماريدها تذكرة 

.....

ايفان ....

اجوي زفوني لشخص غريب علية  لا اريدة ولا يريدني ... 

اخذوني لبيتهم واحس روحي راح اروح انذبح ... 

طبينا هوسو اشوية وركصو وفرغولنا البيت  بقو بس امه وابوه اخوانة الي ماعرفهم شكد اصلا بس سمعت خوان عندة ... 

طببونا للغرفة ..

هنا دكات كلبي تقرة فوك الالف ... رجفة بكل جسمي ... اني ليش قبلت بهلشي ... شلون كدرت اسوي هيج ... طبينا للغرفة واني صافنة وانتظر ذبح روحي ..

.. اشوية وطلع بدون ميصير اي حجي  بيناتنا ...

طبك الباب حيل ... فزيت من الطبكة صارت هوسة جوة ... رحت يم الباب قريب اسمع شكو ..

ابو غيث: انت وين مولي  ..

غيث :شعليكم بية 

ابو غيث :وين رايح وعايف مرتك 

غيث: انتها دوري من البداية كتلكم ماريدها.. وهاي ردتوها وجبتها يمكم ..

جنان: صخام الصخمني انت شتحجي ولك ..

غيث : اعرف شتريدون تحلمون اخذها مرة الي لو تصير وياي بنفس الفراش 

ايفان :سمعت صوت باب برة .. اشوية وطبت امه تبجي وتتعذر

جنان: عليج الله باجي امسحيها بوجهي ولا تحجين لاحد لخاطرنا احنا عيب بحقنا كدام اهلج 

ايفان: كمت ابجي متحملت زين ليش زوجتوني اله اذا مرايدني ولا اني اريدة .. كمت اشهك من البجي حسيت روحي بغربة 

جنان: كومي ماما بدلي وسبحي ارتاحي  الله يهدي الج وتهدي النفوس

ايفان: مجاوبتها .. رحت طبيت للحمام جان بلغرفة بللت جسمي اشوية احس ارتاحيت لان الجو جان حلو شهر الثامن من سنة 2005

يومين اني مااشوفة وبس اسمع صوتة جوة يتعارك ويا اهلة كل عركاتهم جانت علمود يصعد وينام بالغرفة يمي .. 

جنت ما انزل لان استحي وباجي جنان الة تجي هية تصيحني انزل من غيث ما موجود تفاديا للمشاحنات .. ومرات تصعدلي الاكل .. 

شعور صعب تحسيت روحج ما مرغوبة بهلمكان وما تكدرين تروحين لان تخافين من حجاية العالم الي ما ترحم ...

وراها لليل سمعت امة تسولف ويا هية وابوه ..

جنان: عيب ابني شيكولون عليك العالم مو رجال ما اخذ  مرتة ..

غيث: كتلكم من البداية ماريدها مااحبها ..

ابو غيث: ابني صوتك .. روح لمرتك وكافي حجي زايد احنا طالعين الصبح نجي الكة البشارة منك والا اطردك واحرمك من كلشي وتحرم طبة البيت وشوفتنا ..

ايفان :صار هدوء  وصوت باب احد طلع ..

اشوية وصعدتلي امة ..

جنان: بنتي رجلج راح يجي تحضر احنا راح نطلع ونعوفكم تاخذون راحتكم .. ماوصيج سمعي كلامة ولا تعاندي خل تفض بس هليلة تحملي ..

ايفان: هزيت براسي ودموعي عشرة عشرة ...

راحت امه وما تحركت من مكاني ... ماريدة ليش اتحضرلة وهوة اصلا ما اجة .. اني هم  مابقيت انتظر كبل رحت مددت بفراشي جنت لابسة كلابية مال نوم ربع ..احب انام بشي خفيف....

غفيت وحسيت على صوت الباب  مال الغرفة انفتح فزيت جان اشوفة هوة .. جان شكلة غريب ويصفن بوجهي حتة يركز ..

اجة يمي ريحتة كتلتني .. 

هاي شنو الريحة .. لعبت نفسي ..

غيث: اعذريني خاتون خاف متقبلين ترة شارب ومتونس لا تطيرين المزاج .. كومي خل افض شغلتج ..

ايفان: اشو مان علية منو كلك اني اريد ..

تقرب علية ولزمني من ركبتي ..

غيث: ولا اني اريدج .. وشربت كل هلشررب حتة اكدر اتقبل اصعد واشوف وجهج ..

ايفان: دفعني وكام يحاول  وياي واني  اقاوم يضرب بية راشديات .. توسلت بي بس عوفني ..

حباب عوفني لا انت تريدني ولا اني اريدك ليش تكسرني ...

جنت احجي ويا حايط .. . جان عبارة عن حيوان .. مارحمني ... ولا شاف وجعي.. ولا سمع صرختي واني استنجد .. واتوسل حتة يعوفني ... ابشع شعور من تتعرضين للاعتداء  .. حيوان اعتدة علية .. 

خلص مني ودار وجه ونام ... ماهمة النزف الي صار وياي ... جنت غركانة بدمي .. اون الليل كلة .. بطني تتطكع .. كام دفر الغطة وعاط ... 

غيث :شلووون منام احنا اليوم .. 

ايفان :الحكني راح اموت .. كمت انزف... مجاوبني ... لبس ملابسة وطبك الباب ...... 

ضليت للصبح انزف رحت كوة امشي احس روحي خوت ... 

واخذت تلفوني وكوة اشوف ... شفتها الساعة عشرة الصبح ..

بيمن اتصل .. ماعندي رقم احد من اهلة .. وماريد اهلي كرهتهم وحقدت عليهم ...

اتذكرت اخوه ليث .وهم جان زميلي بالكلية ويانا ... قبل اول يوم الي يمهم انطاني رقمة كال اذا تريدين شي من برة كولي  اجيبة بدربي...

طلعت رقمة ودكيت ...

ليث: الو هاي ايفان .. 

ايفان :ليث راح اموت ....مكدرت اكمل .. وكع مني التلفون ...

حسيت راح يغمة علية  ونفسي لعبت .. رحت زحف للحمام اول ما وصلت ضلمت الدنيا بية ....

............

ايفان :فتحت عيوني ...

اني بالمستشفى ... شديصير ... اني شجابني ... ضليت اتذكر...

بس اتذكر اصوات جانت .. من طبيت للحمام فقدت اشوية .. بعدين كمت اسمع صوت باجي جنان وليث فوك راسي .. اسمع اصواتهم وصوت باجي تبجي وتصيح .. راح تموت شيلها ....

ضليت ابجي  بسكتة ودوعي تحرك خدي من الجرح الي سبببة الي غيث ..

..........

لافين ...

جان يوم عادي مثل اي يوم ... عطلة وكأبة .. اتصلت على سوز .. وضلينا نسولف ..

اكلج والله شتاقيت لايفان .. اشو الكلبة راحت وبعد مسألت علينا ..

سوز: يمعودة تلكيها نايمة بحضن زوجها هسة .. وتصيح ماريدة ماريدة ...

لافين :لا والله بالي يمها اشو اختفت لا اتصلت ولا كالت ..

سوز :يلة مابقة شي للسبعة ونروحلها ...

لافين :يلة خل اسدة اروح اشوف شسوي ويا امي 

سوز :اخذي راحتج يلة ولي لج ..

لافين :ولي انتي يعوبة وسديتة بوجها واضحك ... 

دروح على امي وجان اتذكر ام ايفان كلت اسأل على ايفان هم اعرف اخبارها .. 

اتصلت وطول هواي يلة جاوبت ... جانت تبجي .. 

الو عمة شبيج شصاير.. 

ام ايفان: ولج صديقتج راح تموت ايفان بالمستشفى راح تموت .. 

لافين: سديتة منها وجسمي يرجف ... مافهمت شكو ... اتصلت كبل على سوز وكتلها .. رحت اركض على امي ..

ماما الحكيلي ... 

شيرين: شكو يستار .. 

لافين :.. ماما ايفان بالمستشفى ماعرف شبيها امها تكول راح تموت ... كمت ابجي ..

شيرين :ماكو شي ماما صيحي على اخوج احمد اليوم بلبيت ... خلي ياخذنا اني وياج ..

لافين: سويت الدرج شبختين ..ووصلت لغرفتة دكيت الباب وطبيت  جان بس هوة بالغرفة ...مرتة جانت جوة تنظف ..

احمد ايفان بالمستشفى ... ما خلاني اكمل كبل حجة ..

احمد: لبسي عما اشغل السيارة ..

رحت لبست مدري شنو جريت .. ورحت اركض لكيت امي كاعدة بالصدر.. مشينا بالسيارة جان احمد يكول...

احمد: بيا مستشفى .. 

لافين :مادري ..

احمد :غير تسألين ... يلة سهلة ..

لافين :طلع موبايلة ... واتصل على واحد من اخوان ايفان جان صديقة لاحمد .. عرف اسم المستشفى .. 

حباب مر على سوز تجي ويانا ..

رح لبيتهم خطي لكيتها واكفة بلباب تنتظر وعيونها دم وترجف مثل حالتي ..

وصلنا للمشتسفى الدنيا كلها  هناك اهلها وعيالها كلهم .. رحت اركض لامها ..باجي احجي شبيها ايفان .. 

حجتلنا بالمختصر انو متعرضة لنزف .. بس التفاصيل عند ايفان ... الكل يريدها تصحة .. اخوانها متحلفين يريدون يعرفون شبيها .. لان شكو الموضوع مو مال عروس .. لان صارلها يومين من تزوجت .. والغريب رجلها مابين .. اشوف امة تلوب .. واخوه ليث يتصل عليه ومبين عصبي.. 

شفتة حجة بالموبايل وسدة بعصبية .. وصاح لامة .. ما منعت نفسي من اتسمع عليهم .. لازم اعرف شصار ..

ليث: يمة ابنج بسليمانية دايح هناك

جنان :عززة اشوداه هلكلب.. 

ليث: ولج مو بس هاي رايح ويا صاحبتة ... يكول مو رادوني اتزوج شريفة خل الشريفة يمهم اهم شي اني بحضن الاحبها .. 

ولج يمة اكلة مرتك وضعها خطر راح تموت تدرين شيكلي اذا مقهور عليها اخذها الك .. بربج هذا شتحاجي ..

جنان :لا تكول لابوك يروح يصير بي شي...

ليث :هوة بس ابوية دشوفي خوانها شلون حادين سنونهم عليه .. هاي بس شاكين لعد لو يعرفون ويتاكدون هوة ورة السالفة الله يستر شيصير.. 

لافين: رحت بدون مينتبهون واشرت السوز .. حتة تجي .. حجيتلها الصار .. بس ضلينا ساكتين وما تناقشنا بالوضع لان البينا مكفينا ... 

جان وضع ايفان كلش صعب وخطر خاصة ضالة من الليل تنزف وحسب مكالت الدكتورة متعرضة لجروح خطيرة ومبين صاير اعتداء عليها .. هلشي سولفتة النا ولامها  وام غيث لان ميصير ابوها لو اخوانها يسمعون حتة متصير مشاكل.. 

من طلعنا اخوانها يسألون شكو شكو .. شبيها 

جاوبهم ابو غيث عمي سوالف نسوان .... 

جاوبهم واحد من خوانها.. بسيطة يصير خير خل تطلع ايفان وتحجي الصار بوكتها نتحاسب..

طلع دكتور من يم ايفان وكال محتاجين دم ...راحو اهلها  يحللون .. طلع ابوها .. يطابق بس ميكدر يسحب لان عندة امراض ..

رحنا كلنا  احنا الباقين عسا ولعل بينا واحد يطلع ... 

بس الحمد لله طلع حماها دمة يوالم دمها ويكدر يتبرعلها ... ماكال باطل ... راح وسحبو منة..

اجة وجه اصفر وخلوه يرتاح جنت اباوع على وجوه اهل غيث ... ماعرف محبة بايفان لو خوف على ابنهم لا يصير بيها شي وتوكع براس ابنهم ... 

ضلينا ننتظر ... بس جان وضعها حيل صعب وفاقدة الوعي تماما .. 

ضلت فاقدة ..ماذكر اشكد يمكن يومين او اكثر  .. بس الي اذكرة خوفنا لا تروح من ايدنا لان هية بنيتها ضعيفة .. وعدها فقر دم ونازفة هواي ... كلها التمت عليها ..........

وراها كال الدكتور صحت تكدرون تشوفوها ... 

طبينا كلنا فد طبة ... مامصدكين .. سودة علية مبينة باجية هواي عيونها حمر وتناشغ.. من شافت اهلها دارت وجها وكامت تبجي اكثر..

ابوها سألها بنتي شصار ... 

ايفان .. كمت ابجي وتذككرت كلام عمي اول ماصحيت .. جنت ابجي وطب .. 

ابو غيث: بنتي اني جيتج .. قبل  لااهلج يدرون انتي صحيتي .. لان طلبت من الدكتور انو احجي وياج قبل  لاينطيهم علم ... 

بنتي اخوانج حادين سنونهم على ابني .. بس اريدج تمسحيها بشيبتي .. وكولي اي شي .. والي تريدي يجرالج بعدين .. 

ايفان: انقهرت من شفتة يحجي بقهر وخيبة من ابنة الجبير ... 

اطمن عمو .. مراح اكول شي.. 

صحيت على صوت بابا.. 

ابو ايفان: بنتي كولي شصار وياج ..

ايفان :بابا مصار شي .. مثل اي عروس .. صار عندي نزف . 

ابو ايفان: لعد رجلج وين .. ليش مابين .. 

ايفان: مو هوة ... .. ااااا شسمة كال هوة مسافر .. ومن طلع ما جان ... ااا يدري بية اني انزف واني هم عبالي شغلة عادية واستحيت اكلة .. 

ابو ايفان: بابا اذا اكو شي احجي ..

ايفان :باوعت لعمي ونظراتة خوف لا اكول شي غلط .. 

لا بابا اطمن .. اذا يصير شي انت اول من يعرف ..

....

لافين .. جانت ايفان من تحجي ويا ابوها  نظراتها تتنقل بين عمها وابوها  حسيت اكو شي والمحقق الي بداخلي مااكدر اقاومة ... رحت تحمد تلها بسلامة ..

قربت يم اذانها همست .. لا عبالج اعوفج تمشيهن علية ترى اعرف كلشي .. شفتها دمعت عيونها .. كتلها يلة اني اروح للبيت اعوفج ترتاحين ... 

كلها كالو يلة عوفوها ترتاح ... كلها طلعت وبقت امها وعمتها وعمها .... 

رجعنا احنا  واخذنا ويانا سوز مثل مجبناها رجعناها ... طبيت للبيت وكبل للحمام ... سبحت ونمت لان تعبانة تعب فضيع 

.....

ايفان ..

كلهم طلعو وبقت امي وباجي وعمي ... جان يمي امي جانت تعرف بالي صار لان من طريقة  كلام باجي وعمي وياها وهمة يواسوها ويذمون بابنهم كبالها عرفت  كايليها ..

ماما انتي تعرفين الصار مو ... هزت راسها بندم ..

شفتي ماما لوين وصلتيني كلى بسببج ... كلة بسبب انانيتج .. بسبب غرورج .. كل حجاية والثانية ماانطيج لعمامج .. لو عمامي جان احد منهم تجرأ يسوي هيج .. 

ام ايفان: كافي بنتي لا تشعلين كلبي اكثر ..

ايفان: لعد وكلبي ... وكلبي اني مو يطفي نارة ويعالج كسرتي .. من اعتدة علية مثل حيوان بري .. وفوك كل هذا شارب وريحتة تكتل . اتوسل بي حتة يرحمني .. حتة يعوفني ماهمة الوجع وصرخاتي .. 

مكفاه الي سواه عافني متمددة وغركانة بدمي ... ودار وجه وراح .. تعرفين شحيست حسيت روحي بنت شارع .. اخذ حاجتة وشمرني ماهمة شصار وياي ..

جنان :... كافي بنتي كافي لا تحركين دمج بعدك مو زينة ..

ابو غيث: بنتي اهدي والي تريدي يصير.. 

ايفان: اني اريد تطلكوني منة مثل ما زوجتوني الة ... غصب بكيفة اني ماريدة بعد ومستحيل اتقبل شخص همجي مثلة بحياتي......

يتبع ......

لا تنسو التصويت .. وكتبولي  توقعاتكم للبارت الجاي شنو ...

تحياتي Aseel   

احبكم