لعبة القدر ❤️

23

لعبة القدر
( الفصل الثالث والعشرون )
دارين كانت بتسمع كلام ادم ودموعها بتنزل زي المطر هي اتجرحت منه كتير بس هي حاسة بصدق كلامه ونظراته ادم مد ايده ومسح دموعها وبصلها ،
ادم : ارجوكي متعيطيش مش عايز اشوف دموعك عايزك دايما بتضحكي بتضحكي وبس .
دارين بصاله وساكتة ؛
ادم : حبيبتي متسكتيش كلميني ارجوكي.
دارين بعد سكات دام 3 دقايق ؛
دارين : ...... انا عايزة انام .
ادم : حاضر ياحبيبتي حاضر .
وقرب ادم شال دارين وراح للسرير حطها عالسرير وغطاها وباس راسها وهيقوم مسكت ايده هو بصلها هي بصتله ومتكلمتش واخدت ايديه ف حضنها واديته ظهرها هو ابتسم ونام جنبها وحضنها من ظهرها وضمها ليه هي حست بالامان والاحتواء وراحت ف النوم ع طول وهو لما لقى انفاسها استقرت دفن وشه ف رقبتها ونام ع ريحة برفانها اللي بيحبه .
الساعة 6 المغرب :
الاتنين صحوا ع جرس الباب دارين بصت لادم نظرة تساؤل اللي هو يعني مستني حد ادم فهم نظرتها ؛
ادم : مش مستني حد ياحبيبتي هروح اشوف مين وجاي ارتاحي انتي متقوميش هاه.
دارين هزت راسها ادم قام طلع عشان يفتح الباب طبعا كان بلبس الشغل بتاع الصبح فتح الباب واتفاجئ بالعائلتين قدامه فضل واقف مبلم بيحاول يستوعب لميس جريت عليه ؛
لميس : حمووووووو اتم "لغة اطفال بقى"
ادم ابتسم وشالها وباسها ؛
ادم : ياعيون عمو ادم انتي وحشتيني اوي .
سامر : ايه مش هتدخلنا ولا ايه !
ادم : لا ازاي اتفضلوا طبعا .
ووسع ادم ودخلهم وقفل الباب وقعدهم ف الصالة ؛
سليم : انت لسه بهدوم الشغل لحد دلوقتي ليه !
ادم بص لنفسه وبص لسليم ؛
ادم : اصل جيت وقعدت مع دارين اساعدها ف شوية حاجات وكانت عايزة تنام فشيلتها ونيمتها و غصب عني روحت ف النوم انا كمان .
سليم ابتسم وهز راسه سامر بص لادم ؛
سامر : دارين بنتي فين !!
ادم بصله ولسه هيرد دارين جت من ورا ادم وهي مبتسمة وردت هي ؛
دارين : انا هنا اهوه ياحبيبي .
دارين كانت لابسة ده :

سامر شافها وابتسم وقام وقف وفتح ايده ليها عشان تدخل حضنه و لسه دارين هتقرب من سامر ادم مد ايده لوسط دارين وضمها لحضنه وبصلها وقرب منها وهمس ف ودانها ؛
ادم : انا بغير هاه كلمة حبيبي عايزها ليا وبس المرادي مفيش عقاب ع انك قولتي حبيبي لحد غيري عشان اول مرة و اخر مرة هاه انا عايز اي كلمة حلوة منك تبقى ليا انا وبس .
وقرب باسها من خدها وابتسم وسابها هي خدودها احمرت جامد وبصت ف الارض تحت نظرات الكل ليهم دارين قربت لسامر وحضنته وهو حضنها جامد وبعد فترة بعد وبصلها ؛
سامر : قوليلي انتي كويسة ومرتاحة وانتي هنا !
دارين ابتسمت : ايوه يا بابي متقلقش والله انا كويسة اوي .
سامر قربلها واتكلم بصوت واطي بس الكل كان سامعه برده ؛
سامر : طب قوليلي كان بيقولك ايه ف ودنك الحيوان ده !
ادم : ايه ده انا بتشتم ولا ايه لا بص ياعمي خد بالك انا جوز بنتك هاه .
سامر : ياعم اقعد اتنيل بقى عايز انفرد ببنتي شوية .
ادم : تنفرد ببنتك ايه يا سامر بيه حرام عليك ياعم ده انا اللي جوزها ومش عارف انفرد بيها اقسم بالله .
كلهم ضحكوا جامد حتى دارين مقدرتش تمسك الضحكة وفضلت تضحك ادم بيضحك وعيونه بتراقبها ومتعلقة عليها و ع جمال ضحكتها و بطل ضحك وقرب منها حط ايديه الاتنين ع اكتافها ؛
ادم : حبيبتي كفاية ضحك عشان متتعبيش .
دارين بصتله وتدريجيا بدات تبطل ضحك وهزت راسها وابتسمت ابتسامة صغيرة وهو ابتسم ع ابتسامتها ..
دارين سلمت ع عائشة وسليم وكاميليا و راحت لميريام وديجا ولين وسلمت عليهم وحضنتهم وسلمت ع كريم ومراد ويوسف وقعدت ولميس ف حضنها طبعا ؛
ادم : احمم ااا تشربوا ايه بقى !
عائشة : ولا حاجة يابني .
دارين : لا ازاي ولا حاجة لازم تشربوا حاجة طبعا ياماما ف كل حاجة هنا عايزين تشربوا ايه هقوم اعملكم .
ادم : لااااا تقومي ايه لا طبعا انا هعمل كل حاحة خليكي مرتاحة انتي ومتتحركيش فاهمة انا مش مستعد اخسرك لا انتي ولا ابننا.
دارين خدودها احمروا جامد وبصت ف الارض الكل ابتسم..
ميريام : طب خلاص لا انت ولا هي احنا هنقوم نعمل حاجة نشربها وهناخدها معانا تقعد بس ومش هتعمل حاجة .
ادم : وعد متخليهاش تعمل حاجة ياميريام !
ميريام : يابني انت هتخاف ع اختي اكتر مني !
ادم بص لدارين و رد ؛
ادم : ايوه ياختي هخاف عليها اكتر منك لو هي اختك فهي الروح والاكسجين والقلب اللي بينبض بحبها والعقل اللي بيفكر فيها دي هي سبب وجودي ف الحياة .
مراد ويوسف وكريم ف صوت واحد : تيررااااارااااااراااااااا بوووووووم بوووووم .
وقعدوا يضحكوا جامد ادم بصلهم بوعيد ليهم وسابهم وراح خد كرسي وحطه ف المطبخ و رجع شال دارين بلميس اللي ع حجرها و دخلها المطبخ قعدها عالكرسي وميريام وديجا ولين وراه هو قعدها وبصلها وابتسم وباسها من راسها ؛
ادم : متعمليش حاجة عشان خاطري .
دارين هزت راسها : حاضر و... هدومك عالسرير خش غير هدوم الشغل دي .
ادم ابتسم : حاضر من عيوني دقيقتين واكون مغير هدومي.
وباس ايديها وقام راح اوضة النوم يغير دارين ابتسمت وبصت للميس وبتلاعبها و ميريام وديجا ولين بيبصوا لدارين ودارين حاسة بنظراتهم وبتحاول تتجاهلها وفشلت ؛
دارين : اوووووف طيييب اسالوا !
ديجا : ايه اللي حصل من اول ماجيتي هنا ؟
ميريام : ومعاملته معاكي عاملة ازاي ؟
لين : وايه النظرات والهمسات دي ؟
دارين : لاااا اهدوا عليا كدة هحكيلكم كل حاجة حاضر .
دارين باست لميس و نزلتها من ع رجلها ولميس طلعت تلعب دارين بصتلهم وخدت نفس وحكتلهم كل اللي حصل وكل اللي اتقال من ساعة مافاقت لقت نفسها هنا مع ادم وسليم لحد ماصحيت من النوم قبل مايجوا وخلصت كانت ديجا وميريام ولين باصينلها وساكتين .
دارين : بس كدة ده اللي حصل .
ميريام : الموضوع محير اوي .
ديجا : بصراحة اه ولو فعلا الكلام اللي بيقوله ده يبقى مظلوم وكل ده تخطيط رؤى فقط .
لين : صح كدة بس ....هتسامحيه يادارين ؟
دارين بصتلها فترة وخدت نفس عميق ؛
دارين : معرفش يا لينو معرفش .
ميريام : دارين متشغليش بالك الفترة دي بالتفكير عشان انتي حامل ولازم نفسيتك تكون كويسة ومتكونيش مضغوطة اتفقنا ياحبيبتي !
دارين : حاضر هحاول ياميرا.
ديجا : يلا بينا نطلع .
كلهم ف صوت واحد : يلا .
ميريام وديجا شالوا صواني المشروبات وخرجوا بيها و وراهم دارين ولين .
دارين : ايه اخبار تحضيرات كتب الكتاب ؟
لين : مش عارفة اعمل اي حاجة من غيرك عشان كدة هأجل لحد ماتولدي .
دارين ابتسمت : يامجنونة عايزة تأجلي لحد ماولد 7 شهور بحالهم يامفترية الواد هيطير كدة .
لين : هو يقدر ده انا كنت دبحته فيها .
فضلوا يتكلموا ويضحكوا و راحوا قعدوا طبعا ادم كان غير وطلع وقاعد معاهم دارين بصت لجو ؛
دارين : جو انتو بجد اجلتوا الفرح وكتب الكتاب عشاني ؟
يوسف : طبعا يادارين انتي بتتكلمي ف ايه هو احنا نقدر نعمل خطوة من غير ماتبقي موجودة معانا يعني !
دارين : يا يوسف 7 شهور كتير اوي عليكم انا عايزاكم تتجوزوا واطمن ع لينو انها معاك .
يوسف : دارين انا ولين متفقين خلاص .
ادم : طب انا عندي حل حلو .
كلهم بصوله ؛
يوسف : ايه هو !
ادم : نحدد كتب الكتاب الاسبوع الجاي والفرح زي مانتو عايزين بعد ولادة دارين اهوه عالاقل نريح دارين وف نفس الوقت نطمن انكم ادبستوا ف بعض ومفيهاش تراجع ومنها كمان نخلص من موضوع كتب الكتاب و وكيل لين اللي هو باباها.
دارين : فكرة حلوة جدا وانا موافقة عليها .
لين : اه بس انت مقولتلناش برده يا ادم انت عملت ايه معاه ؟
ادم : ومش هقول انتو اللي عليكوا تتبسطوا وبس اي حاجة تانية سيبوها علينا احنا ولا ايه ياجو !
يوسف : وهو انا ليا كلام بعدك ياصاحبي !
ادم ابتسم وخبط ع ظهر يوسف .
غيروا الموضوع وقعدوا يتكلموا ويرتبوا واتفقوا ان كتب الكتاب هيبقى يوم الخميس يعني بعد يومين وقعدوا شوية ومشيوا كلهم عالساعة 11 عشان دارين ترتاح حبة وقام ادم و دارين سلموا عليهم و وصلوهم لحد الباب وكان ف همسات بين ادم ويوسف ومشوا وادم قفل الباب و دارين كانت وراه .
دارين : كنت بتهمس انت ويوسف ف ايه !
ادم بكدب : ولا حاجة شوية حاجات ف الشغل .
دارين : يا سلام شغل برده !!
ادم : اه شغل ويلا بقى يا دودي هانم عالسرير عشان ترتاحي انتي وقفتك كدة غلط عليكي وعالبيبي .
دارين ابتسمت وحطت ايديها ع بطنها وهزت راسها ادم ابتسم وشالها ودخل بيها الاوضة نيمها عالسرير وغطاها وقعد جنبها ع طرف السرير وباسها من راسها هي بصتله ؛
ادم بابتسامة : ثواني وجايلك .
وخرج ادم راح المطبخ صب كوباية حليب ورجعلها تاني قعد جنبها ؛
ادم : يلا اشربي الحليب ده كله .
دارين بملامح تقزز : نعممم لا طبعا حليب ايه اللي اشربه ده وحش اوي .
ادم : انتي بتهزري يادارين هو ايه اللي لا لازم تشربيه عشان مفيد ليكي وللبيبي .
دارين : بس انا مبحبهوش ومش هقدر اشربه وحش اوووووووي .
ادم : لا مفيش حاجة اسمها كدة لازم تشربيه كله يلا .
دارين بصتله برجاء ادم بصلها ؛
ادم : قولت يلااا.
دارين خدت نفس ومسكت الكوباية منه وبصتله ادم بصلها نظرة مش هتهربي وهتشربيه دارين نفخت وسدت انفها بايد والايد التانية مسكت الكوباية وشربتها كلها مرة واحدة ادم بصلها وضحك ؛
ادم : طفلة والله طفلة .
دارين شربت وبعدت الكوباية واديتهاله وملامحها تقزز برده ؛
دارين : شربتها كلها اهوه كدة كويس .
ادم : ايوه كويس اوي وع فكرة من هنا ورايح كل يوم بليل ف كوباية حليب هتتشرب .
دارين : نعممممممم انت بتهزززر هو انا صغيرة !!
ادم ابتسم وخبط بصوبعه ارنبة انفها ؛
ادم بحنية : هتفضلي اميرتي الصغيرة العمر كله يا كل ما املك .
ومسك ايديها وباسها دارين خدودها احمرت جامد ومعرفتش تتكلم هو ابتسم وقام راح المطبخ حط الكوباية ورجع جه نام جنبها عالسرير و ضمها لحضنه ومطفاش النور .
دارين : ادم انت مطفيتش النور ليه ! انت مبتعرفش تنام غير والانوار مقفولة .
ادم : مطفيتهاش عشان انتي بتخافي من الضلمة.
دارين : بس انا.. ف حضنك .....تقدر تطفيها .
ادم باصصلها ومصدوم دارين اتكسفت من نظراته ودفنت وشها ف حضنه هو بدا يبتسم تدريجيا وكان مبسوط اوي باللي دارين قالته لان معنى كدة انها شايفاه امانها وحمايتها مد ايده طفى الانوار وضمها لحضنه جامد وفضل صاحي لحد ماطمن ان انفاسها استقرت ونامت بصلها ؛
ادم : بحبك ...مش هسمح انك تضيعي مني تاني انا اسف ع كل حاجة و برده بحبك .
وباس راسها وغمض عيونه وراح ف النوم .
عدى اليومين وجه يوم الخميس يوم كتب كتاب لين ويوسف طبعا العائلة كلها اتجمعت ف فيلا المحمدي ترتيبهم لليوم انهم هيكتبوا الكتاب وهيسهروا سهرة عائلية زي زمان احتفالا بكتب كتاب لين ويوسف .
لين كانت متوترة جدا وتوترها مضاعف عشان هتشوف ابوها اللي اخر مرة شافته كان عندها 6 سنين وهو مفكرش حتى انه يسال عليها ابدا .
دادة مروة طبعا موجودة ومبسوطة جدا ببنت اختها اللي ربيتها وكبرتها ودلوقتي بقت عروسة جميلة وهتتجوز راجل مفيش زيه .
ع الساعة 6 كان الكل موجود ف الفيلا ' سامر وعائشة وسليم وكاميليا ونبيل ومريم وميريام وكريم ولميس وديجا ومراد وادم و دارين وطبعا لين ويوسف'
الساعة 7 ونص باب الفيلا خبط لين اتوترت لانها عارفة ان ده باباها قامت وقفت وخايفة من مقابلته دارين مسكت ايديها وقعدتها ؛
دارين : اهدي يالين كل حاجة هتعدي متخافيش.
لين بصتلها وهزت راسها .
ادم قام فتح لقاه بصله من فوقه لتحته ؛
ادم : كويس يافتحي جيت ف معادك.
فتحي بسماجة : طبعا يابيه هو انا اقدر اتاخر ع حضرتك برده .
ادم : اه ياخويا ماهو كله بتمنه وهو انت بتعمل حاجة لله ف الله كدة عالعموم هتخش هتقعد زي الكرسي مسمعلكش صوت هيجي الماذون هنكتب الكتاب وتغور خالص والا بقى انت عارف هعمل ايه هقدم الملف كله اللي عندي وساعتها هتاخد يا مؤبد يا اعدام ولا ايه رايك انت !
فتحي : وع ايه بس ده كله يا بيه هعمل لحضرتك الانت عايزه وهغور خالص مش هتشوف وشي تاني ابدا ولو صدفة حتى .
ادم : ماشي لما نشوف احنا كنا نقدر نجوزها من غيرك عادي ع فكرة بس هي من حقها عليك انك تبقى موجود ف اللحظة دي اتفضل ادخل.
فتحي بصله ودخل ؛
^فتحي راجل خمسيني طوله متوسط شعره اسود ع جوانبه شعر ابيض ومن النوع اي حد يبصله ميرتاحلهوش وكل همه الفلوس والمخدرات اللي بيتاجر فيها^
دخل فتحي و وراه ادم فتحي بصلهم طبعا باين ع الكل الشموخ و الزوق الرفيع فضل ينقل نظراته بين البنات لحد ماعيونه وقعت ع لين من نظراتها عرف انها هي دي بنته بصلها ؛
فتحي : انتي لين ...بنتي !
لين عيونها مدمعة بصتله وهزت راسها .
هو ابتسم بدموع مزيفة وفتحلها ايده لين بصتله وقامت وقفت وقربت منه وحضنته .
ادم كان فاهم اللي فتحي بيحاول يعمله بيحاول يستعطف لين عشان قدام يعرف يستغلها فبص ليوسف يوسف فهمه وقام قرب من لين وخرجها من حضن فتحي بهدوء ؛
يوسف : تعالي ياحبيبتي اقعدي كلها نص ساعة ومش هتبقي محتاجة حضن غير حضني .
لين بصتله وهزت راسها يوسف خدها وقعدها جنب دارين وبص لفتحي بتحذير فتحي اتوتر وبص لادم لقاه باصصله نفس البصة دور وشه بسرعة وراح قعد ع كرسي وساكت .
مفيش نص ساعة جه مأذون العائلة وقعد ويوسف وفتحي حطوا ايديهم ف ايدين بعض وبدوا يكتبوا الكتاب بعد شوية وقت اخر جملة اتقالت "بارك الله لكما وبارك عليكما وجمع بينكما في خير" ديجا شدت المنديل بتاع كتب الكتاب والفيلا اتملت زغاريط طبعا يوسف بص للين وقام قرب منها وحضنها ولف بيها فتحي باصص عليهم وقام وهيقرب من لين ادم مسكه ؛
ادم : ع فين !!
فتحي : ااااااا هسلم ع بنتي قبل مامشي .
ادم : لسه جاي دلوقتي بعد اكتر من 15 سنة فاكر تسلم ع بنتك فتحي انا حذرتك وقولتلك الملف هيوصل للبوليس لو حاولت تعمل اي حاجة و بعدين انت اخدت تمن زيارتك دي ولين لو مش عارفة حقيقتك فجوزها عارف و احنا كلنا عائلة واحدة وصدقني مش هتسلك مع حد فينا .
فتحي اتوتر وبلع ريقه : انا اسف ياباشا والله انا بس كنت بحاول اعملها ذكرى حلوة .
ادم : متشكرين لذكراك الحلوة دي يلا اتفضل العربية برا مستنياك هتوديك مكان ماجيت .
فتحي هز راسه ومشى .
يوسف نزل لين وبصلها وابتسم وقرب باس راسها وايديها الاتنين ؛
يوسف : خلاص بقيتي مراتي وبتاعتي انا بس .
لين ابتسمت وخدودها احمروا ؛
لين بكسوف : ادبست فيا العمر كله .
يوسف : صدقيني مفيش احلى من دي تدبيسة.
لين ابتسمتله وبتبص ع ابوها ملقيتهوش استغربت يوسف خد باله اخد نفس ؛
يوسف : مشى خلاص .
لين : من غير مايسلم عليا !
يوسف اخد نفس عميق هو مش عايز يصدمها ويقولها انه واخد تمن الزيارة دي هي مفكرة ان ابوها اتغير عن زمان و بقى شخص كويس ؛
يوسف : معلش ياحبيبتي يمكن وراه شغل مهم .
لين بحزن : اهم من بنته ؟!
يوسف : حبيبتي عايزة تنكدي ع نفسك ف يوم حلو زي ده ليه بس .
وباس ايديها و غمز لدارين دارين فهمته وجت هي وديجا وقعدوا يشغلوا لين ف الكلام ويتوهوا عن موضوع ابوها ويهزروا ويتكلموا والماذون مشى طبعا .
مراد قرب من ديجا ؛
مراد : حلوين اوي يوسف ولين مش كدة !
ديجا : اه اوي لايقين ع بعض .
مراد : اه واحنا كمان عقبالنا .
ديجا بصتله بصدمة : ايييه قولت ايه !!
مراد : بقول بحبك .
ديجا خدودها احمرت واتكسفت جامد واتوترت .
ديجا : يااااا داااااارييييين فيينككك يلا نحضر الاكل انا جعاااانة .
وسابته بسرعة وهربت من قدامه .
مراد ضحك جامد ؛
مراد لنفسه : مجنونة والمصحف مجنونة حتى وهي ف لحظة رومانسية همها ع بطنها برده ربنا يصبرني ايه الوقعة دي بس ياربي .
ادم من وراه : وقعة جماعية دي مفيش بعدها قومة خلاص قفلت ع كدة .
مراد بصله : انت هتقولي دول مأنتمين كلهم مع بعض ربنا يستر علينا دول لو يتفقوا علينا نروح ف شبر مايه ع طول.
يوسف : انت بتقول فيها .
كريم : اخرسوا عشان ميسمعوش حاجة دول ليهم ودان ف كل حتة بيعرفوا منين الله واعلم ويوسف انت تتلم خالص انت لسه مدبس حالا و اي كلمة هتقولها مش كويس ليك خااالص هتتحسب عليك ف محكمة الاسرة والمحكمة العليا والله .
ميريام : كريييييييم .
كريم : ايوووووه حبيبت قلبي جااااايلك .
و راح كريم بسرعة لميريام وادم ومراد ويوسف واقعين عالارض من الضحك ؛
مراد : يلا الله يرحمه .
يوسف : كان راجل طيب والله
ضحكوا كلهم وراحوا قعدوا وبداوا سهرتهم العائلية الحلوة اللي مليانة دفا وهزار وضحك ..
نهاية الفصل الثالث والعشرون.