لعبة القدر ❤️

2

(الفصل الثاني )
الساعة 4 اتجمعت عائلة سامر المحمدي ع السفرة وقعدوا كلهم ياكلوا وسط مشاكسات من دارين وديجا للميس وطبعا ديجا متتوصاش ف الاكل وخاصة انها متربية مع دارين و بيت دارين بيتها التاني العائلة خلصت غدا و قاموا كلهم غسلوا ايديهم وراحوا قعدوا سامر طلب من الخدم يعملوا قهوة ليه ولكريم وطلع هو وكريم قعدوا ف الصالة يتفرجوا ع مباراة لكرة القدم و بيتناقشوا طبعا المناقشات الخاصة بموضوع الرياضة ، دارين دخلت المطبخ لقت كبيرة الخدم مروة اللي عندها 65 سنة بتعمل القهوة وشكلها تعبان جدا وهتقع دارين قربت منها بسرعة وسندتها ..
دارين : ايه يادادة مالك شكلك تعبان اوي.
دادة مروة : مفيش يابنتي دور برد بسيط بس.
دارين : بسيط ايه يادادة ده انتي جسمك متلج اوعى سيبي اللي ف ايدك ده وتعالي معايا .
دادة مروة : استني بس يابنتي انا بعمل القهوة للباشا الكبير والباشا الصغير.
دارين : يادادة سيبي القهوة انا هعملها تعالي بس معايا . دارين مستنتهاش ترد وخدت من ايديها الفناجين وحطيتهم عالرخام وخدتها و راحوا الاوضة الخاصة بدادة مروة نيمتها وجابت الترمومتر وقاست درجة حرارتها لقت درجة حرارتها 38 دادة مروة بدات تترعش جامد
دادة مروة : غطيني يابنتي انا بردانة اوي .
دارين : حاضر حاضر يادادة حاضر . دارين جابت اغطية كتير وغطت دادة مروة و طلعت فونها واتصلت بديجا تجيلها دقيقتين وديجا جت وشافت حالة دادة مروة قلقت اوي وبصت لدارين
ديجا : مالها دادة مروة يادارين .
دارين : دخلت المطبخ لقيتها هتقع جبتها هنا ولقيت درجة حرارتها 38 وتعبانة اوي لازم ننقلها المستشفى من غير ماحد يحس خليكي جنبها هنا وانا هروح اخد مفتاح عربية بابا واوديها المستشفى وانتي اعملي لبابا وكريم القهوة متخليهمش يحسوا بحاجة .
ديجا : ايوه يادارين بس انتي لسه متعلمة السواقة وباباكي مأكد عليكي متسوقيش عربيات الا ف وجود البودي جارد معاكي للامان .
دارين : ياديجا مش هقعد اتفرج ع دادة مروة كدة هوديها المستشفى وانتي غطي عليا ومتخليش حد ياخد باله وقولي لميريام كمان وهي هتساعدك وقوليلها تعمل القهوة عشان عارفة انك مبتعرفيش تعملي قهوة .
ديجا : حاضر امري لله .
دارين سابت ديجا مع دادة مروة وطلعت ع غرفة باباها ومامتها وخدت مفتاح عربية باباها و نزلت من سكات راحت اوضة دادة مروة سندتها هي وديجا وطلعوا من الباب الخلفي ركبوا دادة مروة ودارين لفت وركبت ومشيت راحت عالمستشفى ، ديجا دخلت وخدت ميريام ع جنب وقالتلها اللي حصل طبعا ميريام اكبر من دارين بس هي ودارين كانوا مقربين جدا من بعض بعد ماديجا حكت لميريام كل حاجة
ميريام : طيب روحي اوضة دارين واقفلي عليكي الباب وشغلي مزيكا ع اساس انكم بترقصوا يعني وانا هروح اعمل القهوة واخلي حد من الخدم يقدمها .
ديجا : حاضر ربنا يستر .
ديجا راحت وعملت اللي ميريام قالت عليه و ميريام راحت عملت القهوة وخلت الخدامة تروح تقدمها سامر بص للخدامة لين
سامر : فين دادة مروة يا لين انا قايلها هي تعمل القهوة انا بحب القهوة من ايديها بتبقى مظبوطة .
لين ارتبكت جامد
لين : اصل ياسامر بيه هي الضغط على عليها فخليتها ترتاح وقولت انا اعملها .
سامر : طب دادة عاملة ايه دلوقتي .
لين : بخير ياسامر بيه انا خليتها ترتاح شوية .
سامر : خير ماعملتي يابنتي طيب روحي وابقى طمنيني عنها كل شوية وهبعت عائشة تطمن ع دادة مروة وتطمني .
لين بسرعة : لا لا لا يابيه .
سامر استغرب : لا ! لا ليه يابنتي ف حاجة انتي مخبياها عليا ولا ايه ؟ .
لين : لا طبعا يابيه بس اقصد يعني بلاش دلوقتي اصل دادة مروة دخلت اوضتها ترتاح شوية .
سامر : خلاص ماشي يا لين لما تصحى قوليلي .
لين : حاضر يابيه تؤمرني بحاجة تانية ؟ .
سامر : لا يابنتي اتفضلي .
لين دخلت المطبخ لميريام
ميريام : كويس كدة يا لين روحي بقى اقفلي اوضة دادة مروة بالمفتاح عشان لو ماما راحتلها تلاقي الباب مقفول وتفكر ان دادة قافلة ع نفسها ونايمة فمتزعجهاش .
لين : حاضر ياهانم . وراحت لين تنفذ اللي ميريام قالت عليه .
نيجي لادم الخدامة طلعت خبطت عليه
ادم : اوووف ميييين .
الخدامة فرح بخوف : انا يا ادم بيه .
ادم : عايزة ايه يازفتة انتي .
الخدامة فرح : مش عايزة حاجة يابيه جيت بس اقول لحضرتك ان مراد بيه صاحب حضرتك تحت .
ادم : طيب نازله غوري انتي من هنا .
الخدامة فرح : حاضر يابيه حاضر . ونزلت بسرعة ادم قام لبس تيشيرت عالشورت اللي كان لابسه ونزل لمراد حضنه جامد وسلم عليه بحرارة و طلعوا الجنينة قعدوا سوا .
" مراد شاب رياضي مهتم بصحته عنده 20 سنة قد ادم واصدقاء من الحضانة ولحد دلوقتي مكملين مراد شعره اسود وعيونه بني وبشرته قمحية شاب عادي زي باقي الشباب بس ليه كايزما خاصة و بيسرق قلوب البنات اللي بتفهم عكس ادم اللي اي بنت بتشوفه بتريل عليه "
مراد : مالك يا ادم افندي لما كلمتك كنت متعصب ليه ؟ .
ادم : ست زفتة دي اللي اسمها دارين بنت انكل سامر صاحب بابا كنت مع رؤى الصبح و .......... حكى ادم لمراد اللي حصل .
ادم : بس ياسيدي ده اللي حصل بس انا مش هسكتلها وهنتقم عالقلم ده بس ف الوقت المناسب .
مراد باصصله وساكت .
ادم : مالك يامراد باصصلي كدة ليه ؟ .
مراد : انت راضي عن نفسك ! ادم انا عارف ان دارين غلطت بس هي اتعاملت مع الموقف كأنها اختك وخايفة عليك والصراحة انا لو مكانها كنت هاجي اجيبك من قفاك واديلك علقة محترمة عالوضع الانت كنت فيه ده .
ادم : نعم !! انت كمان واقف ف صفها انت يامراد ! .
مراد : يا ادم انت عارفني اني بقول الحق مش عشان انت صاحبي اقف معاك حتى لو ف الغلط لا لحد الغلط ومش هعرفك وبعدين بطل تاخد بالشكل شوية دارين عارف ان شكلها مش حلو خالص بس هي ملهاش دخل ف شكلها انت بتعاملها باشمئزاز وكره غير طبيعيين حرام عليك انت متعرفش هي بتبقى حاسة بايه لما بتعمل كدة معاها .
ادم : ولا يهمني ع فكرة عادي طظ هي تستاهل اكتر من كدة كمان ده انا كدة رحيم بيها بس هتشوف انا هعمل فيها ايه .
مراد : ماشي يا ادم انا عملت اللي عليا وسيبت شغلي وجيتلك اول مالقيتك مضايق بس واضح ان مفيش فايدة فيك . وقام مراد وقف
ادم : انت وقفت ليه رايح فين ؟ .
مراد : رايح لشغلي اللي سيبته عشانك .
ادم : ماتخليك شوية يامراد .
مراد : ورايا شغل يا ادم انا ابويا كبر وانا لازم اساعده ف شركته دي الحمل زاد عليه مينفعش اكون سايبه كدة يلا سلام ياصاحبي .
ادم : سلام . ومشى مراد وسليم كان واقف عند باب الجنينة بيبص ع ادم وبيتمنى لو يكون نص مراد ويجي يشيل معاه شغله ويعتمد ع نفسه شوية واخد نفس ودخل تاني .
الساعة 8 جرس الباب رن سامر وعائشة قاموا فتحوا بنفسهم عشان يستقبلوا اصدقاء عمرهم سليم وكاميليا سلموا ع بعض بحرارة شديدة و سامر وعائشة سلموا ع ادم اللي سلم عليهم كويس وبأدب و سليم وكاميليا سلموا ع ميريام وكريم و باسوا لميس الصغيرة ودخلوا قعدوا ف الصالون سامر بص لادم اللي بيلعب ف فونه
سامر : ادم يابني انا بتأسفلك ع اللي دارين عملته معاك هي مكانتش تقصد يابني .
ادم لسه هيرد سليم رد بسرعة
سليم : بتتاسف ع ايه ياسامر انت الكبير بتتأسف لادم لا طبعا متتأسفش وادم عارف ان دارين كانت خايفة عليه ومعجبهاش المنظر فاتصرفت كدة و متحطش ف دماغك حاجة مفيش حاجة حصلت اصلا عشان نتكلم فيها .
سامر ابتسم وقام حضن سليم صاحب عمره وادم طبعا من جواه نار لو طلعت هتحرق الكل .
الساعة بقت 9 ودارين لسه منزلتش وكل ماسامر يقول لميريام تطلع تناديها تتحجج بحاجة شكل شوية والسواق دخل
السواق : سامر بيه عايز مفاتيح عربية حضرتك عشان اغسلها زي ماحضرتك طلبت .
سامر : طيب ياحسن ثواني . وبص لعائشة وكمل حبيبتي ممكن تجبيلي مفاتيح العربية من جوا .
عائشة : اكيد ياحبيبي ثواني . وقامت طلعت اوضتهم ميريام اتوترت ومش عارفة تتصرف ازاي وقامت طلعت لديجا وفضلوا يتصلوا بدارين ودارين فونها مقفول .
عائشة رجعت : سامر انا ملقيتش المفاتيح .
سامر : متاكدة ياحبيبتي انا متاكد حاططها جوا .
عائشة : حبيبي والله مفيش حاجة جوا انا دورت كويس .
سليم : يمكن سيبتها ف العربية ياسامر شكلك كبرت وبدات يجيلك زهايمر .
ضحكوا كلهم
سامر : شوف المفاتيح ف العربية ياحسن اكيد هتلاقيها هناك .
حسن : حاضر يابيه . ومشى مفيش 5 دقايق ورجع تاني بسرعة .
حسن: سامر بيه العربية مش موجودة ف جراج الفيلا ولا ف الفيلا كلها .
سامر قام وقف هو وكريم : يعني ايه يعني ازاي مش موجودة انا رجعت وركنتها ف جراج الفيلا .
حسن : والله يابيه مش موجودة حتى تعالى حضرتك وشوف بنفسك .
سامر قام طلع هو وكريم ودوروا عالعربية وفعلا ملقوش العربية دخلوا الفيلا وسامر متعصب لانه مفكر ان العربية اتسرقت نادى ع كل الحراسة ودخلوله وهم خايفين منه عشان سامر لما بيتعصب مبيشوفش قدامه .
سامر : بقى انتو نايمين ع ودانكم ازاي العربية تتسرق وانتو متحسوش ايه انا حاطط عيال تحرس الفيلا ولا ايه .
عم محمد الجنايني دخل الفيلا وهو بيجري
عم محمد : سامر بيه ياسامر بيه ف مشكلة ياسامر بيه .
سامر : ايه ياعم محمد مش وقتك دلوقتي عندي مشكلة اكبر .
عم محمد : مش المشكلة تخص العربية ياسامر بيه ؟.
سامر بسرعة : ايوه انت تعرف مين سرق العربية ؟ .
عم محمد : يابيه العربية متسرقتش انا شوفت دارين هانم وهي بتركبها وخرجت من الباب الخلفي للفيلا .
كانت الصدمة نازلة ع الكل وادم ابتسم وقال ف سره مش محتاج انتقم انتقامي هيجيلي لحد عندي  سامر بص لعائشة وطلع بسرعة ع اوضة دارين وعائشة وراه دخلوا ع ميريام وديجا وهم واقفين قلقانين سامر بصلهم ودور ف الجناح كله ع داين مش موجودة سامر نزل مسك فونه وعمال يتصل ع دارين فونها مقفول ديجا وميريام نزلوا ديجا لسه هتتكلم سامر زعق جامد
سامر : ولا كلمةةة مش عايز كلمة واحدة انتو فاااااهميييين .
سليم : اهدى بس ياسامر اهدى .
سامر : اهدى ازاي بس اهدى ازاي وانا مش عارف بنتي راحت فين وكمان من ورايا .
سليم قام حط ايده ع كتف سامر سامر بصله وبص ع عائشة لقى عائشة ف حضن كاميليا وبتعيط سامر اخد نفس عميق وقرب مسك ايد عائشة وضمها لحضنها وبيطبطب عليها
سامر : انا اسف اني زعقت اسف ياحبيبتي بس انا زيي زيك مش قلقان غير ع دارين وخايف ليكون حصلها حاجة خاصة ان الوقت متأخر .
عائشة : انا خايفة عليها اوي ياسامر .
سامر : اهدي ياحبيبتي هي هتبقى كويسة اطمني وبعدها وراح للحراس تتحركوا تدوروا ع دارين ومترجعوش غير وهي معاكم وبخير فاهمين بنتي لازم تبات ف اوضتها الليلة دي .
الحراسة بخوف : حاضر ياباشا . واتحركوا من قدامه
الساعة بقت 11 ودارين لسه مرجعتش وعائشة عمالة تعيط وميريام وديجا عايزين يدافعوا عن دارين بس كل مايجوا يتكلموا سامر ميسمحلهمش ويزعقلهم لانه متاكد انها مش بتخبي عليهم حاجة الساعة 11ونص السواق دخل جري وقال دارين هانم وصلت يابيه دارين هانم وصلت كلهم انتفضوا من مكانهم دارين دخلت سامر اول ماشافها كان بيغلى من الغضب دارين قربت وهي حاطة راسها ف الارض وقفت قدام سامر وفضلت ساكتة شوية
دارين : بابي انا ....
سامر مستنهاش تكمل كلامها وضربها بالقلم بكل قوته دارين وقعت من قوة القلم والقلم علم ف خدها وكلهم مصدومين حتى ادم اللي كان فرحان فيها وانها هتتعاقب متخيلش ان سامر ممكن يضربها لان سامر او عائشة عمرهم ما مدوا ايديهم ع حد من اولادهم ووقف ادم مذهول وللحظة دارين صعبت عليه
سامر : لاول مرة احس اني معرفتش اربي بنتي تسرق مفاتيح عربيتي وتخرج ومعرفش هي راحت فين لا وفونها مقفول ورجعالي الساعة 11 ونص بليل دي اخرة دلعي فيكي يا دارين تعملي كدة لا وكمان الهانم المحترمة اختك اكيد عارفة ومخبية علينا وصاحبتك اللي المفروض توجهك للصح اكيد برده عارفة كنتي فين انطقي كنتي فين ؟.
دارين عمالة تعيط ومش عارفة تتكلم ومن صدمة القلم اللي ابوها ضربهولها الكلام مش عايز يطلع ديجا مقدرتش تسكت اكتر من كدة قربت بسرعة وقعدت جنب دارين عالارض وضمتها لحضنها وقالت خلاص بقى يا اونكل لو سمحت كفاية لحد كدة حضرتك المفروض تكون واثق ف تربيتك لبنتك .
سامر لسه هيتكلم ميريام قاطعته بسرعة
ميريام : بابي حضرتك قولت اللي عندك دلوقتي سيبنا نقول اللي عندنا ...ميريام سكتت شوية تاخد نفسها وكملت
ميريام : بابي....دارين دخلت المطبخ بعد الغدا لقت دادة مروة تعبانة اوي وهتقع ودارين سندتها ووديتها اوضتها وقاستلها حرارتها لقيتها تعبانة اوي وحرارتها عالية وهي عارفة ان حضرتك لما تكون بتتفرج ع مباراة مبتحبش حد يجي جنبك فاخدت مفتاح عربيتك ووديتها المستشفى ومرضيتش تسيب دادة مروة غير لما بقت كويسة دادة مروة طلع عندها كذا مشكلة وكانت بتعمل تحاليل واشعة كتير وفون دارين فصل منها ومعرفتش تطمننا عليها .
ديجا كانت ساعدت دارين تقف ودارين باصة للارض ودموعها عمالة تنزل سامر اتصدم واضايق اوي من نفسه ومن تسرعه وانه حكم ع بنته من غير مايسمعها وان بنته كان قصدها خير ومعملتش حاجة غلط سامر بص لدارين وبيقرب منها.
سامر : دارين حبيبتي انا .....
دارين خافت و رجعت لورا وطلعت جري ع اوضتها وديجا وميريام وراها ووراهم عائشة و كاميليا سامر اضايق من نفسه اوي وقعد وحط راسه بين ايديه وسليم قعد جنبه شوية سمعوا صريخ سامر اتفزع وقاموا كلهم جريوا ع فوق ع اوضة دارين لقوا دارين ......
نهاية الفصل الثاني .