- مريم : علِي ممكن تِهدي ؟
= علِي بغضب : أهدي إيه ؟ بقولك بقالهم أكتر من شهر مختفيين ماحدش عارف هما فين واتقوليلي أهدي ؟'' سِكتت مريم مش عارفة تقول إيه ؟ .. ''
- مريم : ماهو عصبيتك دي مش هتنفع
= علِي : أنا قلقان عليهم أوي ، مش عارف ممكن يكون حصلهم إيه
- مريم : إن شاء الله خير ، إدعيلهم
= علِي بحزن : يارب يكونوا بخير
- مريم : طيب بقولك إيه ، ممكن تنزل صور ليهم هما الإتنين علي الفيسبوك وتكتب عن إختفائهم والناس هتدخل وتعمل شير وإن شاء الله هنوصل لحاجة
= علِي : أتمني ..'' أكتر حد كان زعلان عليه علِي هو زياد ، مش بس عشان صاحب عمره ، لا عشان زياد وحيد ومالوش حد ، يُعتبر علِي كل أهله ..''
- هشام : زياد ..إنت كويس ؟
= زياد : لأ .. جسمي إتهري من الكهربا'' وسِكتوا هما الإتنين ، كان مربوطين ومعميين عنيهم ماحدش عارف يتحرك ولا حد شايف حاجة ، كانوا في أوضة ومعاهم كذا حد زيهم ..''
= زياد : إحنا بقالنا أكتر من شهر عالحال دا ، إحنا هنفضل نتعذب كدة كتير ؟
- هشام : الله أعلم .. إدعي إن إحنا نتحول لمحكمة بسرعة
= زياد بحزن : هي لسة فيها محكمة ؟
- هشام : أكيد'' رجعوا سكتوا تاني ، لحد ماقال زياد ..''
= زياد : هشام !
- هشام : نعم
= زياد : هو إحنا كدة مستقبلنا ضاع ؟'' قبل مايرد هشام عليه سمعوا صوت بيقول ..''
- مستقبلك ضايع من زمان
= زياد بإستغراب : إنت مين ؟
- أنا راجل ! ، راجل عجوز ..ضاع مستقبله من زمان ، من أول ماخاف من إنه يقول كلمة حق في البلد دي ، خاف ينطق .. اللي يقولوا عليه كنت بقول عليه آمين من غير أي تفكير ، وأنا عارف إنه غلط ..عارف إني بوافق علي الظلم ، خوفت أقول الحق ! ..خوفت علي نفسي وعلي أولادي وعلي بيتي ، خوفت يحصلي زي اللي بيحصل للناس اللي بنشوفهم في التليفزيون .. عملت زيي زي غيري ، حطيت الجذمة في بوقي وسكت ! ، لحد ما مات ليا إبن ! ، مات علي إيد واحد من الظلمة اللي واكلين البلد ! ، ماعرفش يسكت زي ماسِكت أبوه ، ماعرفش يبلع كلمة الحق ..كانت واقفة في زوره ، وراح فيها ، وقتها عرفت إني كنت السبب في موته ، سكوتي اللي موته ..الذنب ذنبي أنا ! ، وإتكلمت ..قولت دا ظلم وإفتري وحرام ..قولت مش هاسكت تاني ، مش هاقبل الظلم علي أولادي الباقيين ..وياريت نفعت كلمة الحق .. شنقوا إبني التاني ، وبنتي إعتقلوها ، ماعرفش ممكن يكونوا بيعملوا فيها إيه دلوقتي .. وأنا زي مانتوا شايفين ، هنا !'' إتأثر أوي هشام وزياد باللي قاله الراجل دا ، ولاده التلاتة راحوا بسهولة ! وبطريقة توجع القلب ..تدبح ! ..''
- اللي بيسكت بيضيع واللي مش بيسكت بيضيع ..اللي ماشي جمب الحيط بيضيع واللي ماشي في نص الشارع بيضيع ، الكل ضاع وبيضيع وهيضيع ، لا اللي فضلت كلمة الحق في بوقه مانطقهاش فلت ..ولا اللي إتكلم فلت ، جايين نصلح إيه دلوقتي ؟ نصلح بعد ماسكتنا زمان والظلم إتمكن ! ، مابقاش حد يعرف يقف قصاده ..إنت ضايع يابني ومستقبلك قبلك ! ، إنت ضايع من وقت ماتولدت في البلد دي ..من زمان أوي
YOU ARE READING
حكايتنا سوا
Short Storyدي ممكن نعتبرها قصة قصيرة أو نوفيلا للكاتبة هالة أحمد و بإذن الله هنشر القصة مرة واحدة و متقلقوش هي جميلة جدا و هتعجبكم..