حكايتنا سوا

'' الحلقة الأولى ..💛 "

'' مش أي حد نقول عليه صاحب ، ولا أي صاحب ممكن يتساوي بأي حد ، ويابخت اللي عنده صاحب يكونله عكاز لما يُقع ، يكونله ضهر لما ينحني ، يكونله عوض عن أي مُر ..''

- مريم : البنات إتأخروا أوي

'' ردت يارا ..''

= قولتلك يامريم نقولهم المعاد الساعة 11 الصبح علي مالكل يجهز هيوصلوا الساعة 2 ، مش نقولهم المعاد 2 يوصلولنا بقا علي خمسة

'' ضحكت وقالتلها ..''

- مريم : معلش بقا صحابنا ونستحملهم
= يارا : صُحابك إنتي ياختي ، أنا كان إيه اللي رماني علي الشلة السودة دي ، حلّني بقا علي ما نور تِجهز دي عايزالها ساعتين لوحدها ، وإسراء تخلص خناقها مع عُمر اللي بقا مُعتاد ، والبرنسيسة دينا علي ماتاخد الإذن من سي روميو بتاعها
- مريم بضحك : خلاص ياستي بقا كلها نصاية والكل هيجي

'' يارا ..
هي أقرب واحدة في الشلة لمريم ، رغم إن مريم تعرف دينا ونور وإسراء من قبلها بسنين ، لكن هي أكتر حد شبهها فيهم ، رغم إن يارا أكتر حد برده مختلف عنها بكتير ، مريم مُختمرة ..يارا بشعرها ، مريم بتحاول علي قد ماتقدر تلتزم بالدين ..يارا عايشة حياتها وليها صُحاب ولاد ، وتتوالي الإختلافات ، لكن فاهمين بعض ..إتعرفوا علي بعض في الجامعة من سنة أولي ..ماكنش ليارا صُحاب خالص ، عشان كدة قررت مريم تعرفها علي صحابها وهما حبوها أوي علي قد ماهي حبيتهم ، وضموها للفريق ..''
'' خمس دقايق ولقوا نور جت ، أول ماشافتها يارا قالت ..''

= يارا : إيه دا ، إيه التهريج دا ؟ نور أول واحدة توصل من الثلاثي المرح ؟ ، القيامة هتقوم ولا إيه ؟
- نور : ياخفة ! ، تصدقي أنا غلطانة إني صحيت بدري عشانكوا ؟
= يارا : هو كدة بدري ؟ أحيه
- نور : دينا وإسراء لسة ماجوش ؟
= يارا : إنتي شايفة إيه ؟

'' نور ..
كانت أقرب واحدة لمريم في ثانوي ، لكن إختلفوا ! ، إختلفوا من وقت مانور قررت تقلع الخمار وترجع لحجابها العادي ، اللي حالياً بقا يكشف أكتر مابيستر ، وإختلافات كتير بينهم حصلت ، ولإن مريم كان عقلها صغير وقتها كان بالنسبالها دا المُحطم لصداقتهم ، وحالياً هي ندمانة علي قرارها دة ..حست إنها لو كانت وقفت جمبها زمان ماكَنتش نور بقت بالشكل دا دلوقتي ، ماقصدش الشكل الخارجي أو علاقتها مع ربنا بشكل عام ، لكن حالتها النفسية اللي حالياً إتدمرت كلياً بسبب علاقتها مع حسام ! ، اللي كانت مرتبطة بيه من أيام ثانوي لحد الجامعة وبعد الجامعة كمان ، حوالي 7 سنين وهما مع بعض ، سابوا بعض من حوالي 9 شهور ، ودا كان قرار من نور علي سبب تافه ، ماكنش في نظر مريم أو البنات عموما غير كدة ! ، اللي يضيع كل الحب دا عشان سبب أياً كان ، يبقي فيه مشكلة ، مريم بتحمّل نفسها الذنب معاها ، ماكنتش ليها الصديق اللي المفروض كان يقف جمبها من البداية ..من أيام ثانوي ، من أول مرة جت حكتلها عنه ..''