Hate Poem Written With Love࿐

[5]

အသက်အရွယ်အားဖြင့် သူတို့နှင့်မတိမ်းမယိမ်း သို့တည်းမဟုတ် ရွယ်တူလောက်တော့ရှိပေလိမ့်မည်။ အနက်ရောင်လက်ရှည်အင်္ကျီအား တံတောင်ဆစ်ထိခေါက်တင်ထားပြီး ဖြူစင်ကြည်လင်သည့် အသားအရည်နှင့် ထူးခြားစွာပနံသင့်နေသည်။ ခန့်မှန်းခြေအားဖြင့် အရပ်အမောင်းသည် ရှင်းနှင့်အတူတူလောက်ရှိနိုင်ပေသည်။ တောက်ပ၍ မဟူရာထက်နက်‌သော လှပသည့် မျက်ဝန်းတစ်စုံကို ပိုင်ဆိုင်ထားပြီး မျက်တောင်များက သွယ်လျဖြောင့်စင်းနေကာ ထိုမျက်ဝန်းအား ပို၍တောက်ပစေလျက် ညို့ငင်ဆွဲဆောင်နိုင်သော ဓာတ်များကိုဖြည့်တင်းပေးလျက် ရှိနေပေသည်။ မျက်နေအနေအထားသည်ကား ရှည်သွယ်၍ ဥပတိရုပ် လွန်စွာကောင်းပေသည်။ စိတ်ဓာတ်ခိုင်မာမှု၊ ယုံကြည်ချက်ရှိမှု၊ လေးနက်တည်ကြည်မှုတို့ကိုလည်း အတိုင်းသား ခံစားနေရသည်။
ဆင့်ကတော့ ထိုသူ့ကိုမမြင်ဘဲ မှန်အပြင်ဘက်ရှိလောကကြီးဆီသာ အာရုံရောက်လျက်ရှိသည်။

"ကျွန်တော့်နာမည်က ပြဒါးရံ ပါ။ ကျွန်တော်က အလုပ်ကိစ္စကမ်းလှမ်းထားတဲ့သူပါ"။

မိတ်ဆက်ပြီးချိန်တွင်ထိုသူက ရှင်းနဲ့ ဆင့်တို့၏ မျက်နှာချင်းဆိုင်တွင် ဝင်ထိုင်လိုက်သည်။ ထိုအခါမှ coffee ဆိုင်အပြင်ဘက်ကို အာရုံရောက်နေသည့် ဆင့် ခန္ဓာကိုယ်အတွင်းသို့  ဝိဉာဥ်ပြန်ဝင်လာဝင်လာသည့်အလား စကားစတင်ပြောလာခဲ့သည်။ ဆင့်က ရှေ့တည့်တည့်မှာထိုင်နေသည့် လူကိုကြည့်လိုက်ချိန်တွင် ရင်းနှီးကျွမ်းဝင်မှုရှိနေဟန် သို့တည်းမဟုတ် မြင်ဖူးနေဟန် ခံစားချက်အနည်းငယ် ရရုံမှတစ်ပါး မည့်သည့်နေရာတွင် တွေ့ဖူးမြင်ဖူးခဲ့သည်ကို စိုးစဥ်းမှမမှတ်မိပေ။ စိတ်ထဲ၌အမှတ်မှားနေတာပင်ဖြစ်မည်ဟု ကိုယ့်ကိုကိုယ် သတိပေးလိုက်ပြီး နှုတ်ခမ်းပါးတို့ကို ဖွင့်ဟကာစကားပြောလိုက်သည်။

"ခင်ဗျားပြောပုံအရဆိုရင် ကျွန်တော်က ခင်ဗျားတို့ company ရဲ့ပင်တိုင် model ဖြစ်လာပေးရမယ်ပေါ့"။

နူးလည်းမနူးညံ မာလည်းမမာကျောသောအသံသည် စကားဝိုင်းအတွင်း ပျံ့နှံ့ဖြတ်သန်းသွားသည်။စကားပုလ္လင်များခံကာ သွယ်ဝိုက်မနေတော့ဘဲ မေးလိုက်သည်။