شعر ..شعبي.. قصيده ..دارمي..بذيه ..زهيري..قصه وشعر.. قفشات شعريه

❤....قصه وشعرر. ...

السلام عليكم غوالي. ..

..........

(هاي قصه على شكل شعر دارمي بين شخصين كان اكو شخص يوكف يم مدرسه مال بنات وينتظر وحده يحبها يوميه يراقبها ويوم من الايام حب يصارحها بحبه الها)
وكاللها
حني يبنت الناس مرة اعلة حالي***صدكيني آنة اهواج وانتي بخيالي
ردت عليه البنيه بعصبيه وكلتله
لاحن ولا اهواك ماعرفك آنة***لاتحجي بعد وياي كافي ميانة
رجع صاحبنه المغرم و كللها
ما اكدر آنة انساج صرتي انتي روحي***وبلمسة ايدج هاي تذبل جروحي
رجعت البنيه وكلتله وهي ضايجه
امشي يخوية وروح والعن ابليسك***مو سلعة آنة وجاي ياخذني جيسك
وصاحبنه المغرم رجع كللها
مو سلعة انتي ادريج انتي حياتي***واتمنة يمج كون يحصل مماتي
البنيه ضاجت وكررت عليه كلمة اخويه حتى يحس وكالتله
كافي يخوية وروح وابتعد عني***تلكة بنات هواي حتى احلة مني
بس مافاد ويا صاحبنه المغرم وتعرفون الولد  وكللها
من بين كل الناس كلبي يريدج***وسلمت هاي الروح ياحلوة بيدج
البنيه هم كررت عليه كلمة يخوي عليه حتى يعوفها وكلتله
أيس يخوية وروح لاتاذي كلبك***ماريدك وماريد ياخذني حبك
صاحبنه المغرم وهو حزين و كللها
هيجي يبنت الناس صعبتي امري***دمرتي حلم الروح ضيعتي عمري
البنيه ضاجت وتعصبت وكلتله
ماريدك وماريد كربك الية***آخر كلامي وياك حبتك حية!!!
صاحبنه المغرم مافاد بي الحجي وكللها
اقبل كلامج هاذ بس ما اعوفج***يومية اجيج هنا ويومية اشوفج...!!!!
ثاني يوم هم شافته البنيه بس البنيه بدت الكلام ويا وكلتله
ها خوية شو رديت شنهي القضية......مافاد حجيي وياك ذيج المسية
جاوبها صاحبنه المغرم وكللها
رديت الج مشتاك صدكي يحلوة........عتني عليج الشوك مو بيدي كوة
طلعت البنية تحب الصراحة!!! وكالت
سولفلي قصتك كول حلوة الصراحة.....انتفع بيهة هواي واشعر براحة
سولفلها المغرم بصراحة وكللها
حجيي الصريح وياج آنة هويتج........واليوم اجي خطاب واتعنة بيتج
وتعرفون بنيه وتسمع بواحد يخطبها وجان تجاوبهعليه بحنيه وتكله
هلكد يعيني تفيض شوك ومحبة......طيب وعلى الاخلاق كلبك تربّة
صاحبنه المغرم دينتظر الجواب منها وكللها
ها يبعد الروح ما جاوبيتي.......كافي شلع كلوب كولي رضيتي
جاوبت البنيه لان سمعت خطوبه بيها وكلتله
والله رضيت اهواك اسرني حبك.......واتمنى اعيش وياك واتمنى كربك
وبعد ما اتعلقت بي البنيه غاب عليها اسبوع متعرف اي شي عليه وبعدين شافته وكلتله
وينك يابعد الروح ما تكلي وينك....مو تدري صار اسبوع ما شايفينك
رجع صاحبنه العاشق رد عليها وكللها
ادري انتي صار اسبوع ماشفت صورتي....مرت عليه ايام شفت انه موتي
ردت عليه البنيه وكلتله
سالم يابعد الروح انت وحياتك..... والله انه اموت الروح لو جت مماتك
صاحبنه العاشق رد عليها كاللها
روحي ويا روحج دوم مشدودة فد شد....وحبج سكن بحشاي واتعده كل حد
ردت عليه البنيه وكلتله
محد سكن بالروح بس انت وحدك....لو تدري صار اسبوع موتني بعدك
صاحبنه العاشق رد عليها وكللها
ما ابعد وما روح ما اريد اعوفج ....لن عيني عميه تصير لو ما اشوفج
ردت عليه البنه وكلتله
شما تروح بعيد ابقى انه اريدك .....والكلب يامحبوب سلمته بيدك
صاحبنه العاشق رد عليها وكللها
كلبج جبير هواي يسلملي كلبج ....ومهما يصير بعاد ابقى انه احبج
وبعدين اتزوجو وعاشو حياة سعيدة