إلى أين تصل

31

اخذت جنطتي، حضنتها و اني أرد ـ ما زعلت بس خاف اتأخر

قاطعني ـ عليمن مو السيارة للـ 2 و نص يلا تطلع

ما خلالي حجة فسكتت، شفته دنگ و يباوع لإيدية الجاي يرجفن فضميتهن بعباتي

سألني عباس ـ ذاك اليوم گلتي انتِ متحسنة، و ابن عمچ جاي يقهرچ شنو قصدچ؟

ابتسمت و صرت احچي وياه من كل گلبي ـ بيوم الي سوينا ايكو طلبت من مولاي يدعيلي، شكيتله شلون ظافر يعيرني بمرض گلبي
و من رحنا الدكتور گال كلشي تمام و هسة اني بدون علاج لحد نهاية الشهر

رد ـ على كيفچ خل افهم

ذكر صاحب الزمان فِرج روحي صرت احچي وياه بدون خوف ـ ما اعرف هم الاطباء منو يشوفه يگول كلشي طبيعي عبالك شراينها الأصلية مو مال عملية

صفن لحظات يلا گال ـ هنيالچ هالقرب منه، چا انتِ شگد طاهرة گلب

ابتسمت و رديت عليه ـ بعد الي شفته منه خلص صرت متأكدة يسمعني
و لو اني مآذيته بذنوبي ، والله حتى لو طلعت ما متعالجة ماراح ازعل المهم يسمعني و مايتركني

هز ايده و گال ـ الله شاف الغرور و العُجب و التكبر بكياني فخلاچ بطريقي ، من چنتي تردين دفتر علي چنت استهزأ بيچ و اگول ما تفتهم شي تالي...

قاطعته ـ لا و الله انت مؤمن و أحسن مني و حتى علي يگول ...

رفع اديه يسكتني و گال ـ خلص خلص خل نتفق محد يمدح الثاني، المرحوم علي بشر نظيف و يشوفني هالشكل من نظافة گلبه

علي دخل هالطريق متأخر بس هو مشة بي بسرعة مو طبيعية لإن ماچان قاصد غير ربه
و انتِ همين گلبچ چان نظيف و رب العالمين شاف بيچ خوف و حب له و قلة ذنوب فجابچ لهالطريق

رديت بسرعة ـ لاااا شگد عندي مشاكل، اني بسرعة اصير عصبية و شنو يجي على لساني احچي

ابتسم و دنگ يحرك خاتمه و يرد ـ خاصة من ينجاب اسم هنادي

رجعت الرجفة و گلبي صار طبل ، تمنيت اي شي يصير و يشردني منه
و ذني منى و إسراء لزگن جوة غير يطلعــــن

صعدوا رياجيل طبگو طبلتين و گعدو گبالنا ، واحد منهم شايفته وية ظافر يمكن موظف وياه ظل يباوع علية

عباس انتبهله و گلي ـ تعاي اگعدي بمكاني

گام عباس و إجة أخذ مكاني و اني رحت بمكانه، ما خلالي مجال الم ملازمي هو شالهن و انطانياهن

بس گعدت بمكانه سألني ـ هذا الي ورانا تعرفي؟ يقربلچ؟ شكو يباوع عليچ؟

التفتت و باوعتله هو نفسه صاحب ظافر فگتله ـ اي عباس، هذا صديق ظافر

سألني عباس ـ و شكو يباوعلچ؟

ضميت ملازمي لصدري و گتله ـ خل تجي منى و نروح ، خاف يوصل خبر لظافر و يروح يگل لمجتبى، انت اصلاً شكو تحچي وياية هنا اي شي تعلمنياه علمني بالتلي