شفته دز رسالة ، قريتها بالاشعارات
ـ زين ليش ما تخليلي مجال أرد و ادافع عن نفسي؟
غلست و مافتحتها ، نزلت و گعدت بالصالة امي تخابر بأختي الچبيرة
دخل مجتبى علينا راحت بته تركض حضنته ، بوسها و انطاها علاگة حلويات
جابتها خولة و اجت تركض علية
فتحتها و گلتلي ـ شوفي عمة بابا شجايب
گلتلها ـ ضميهن بالليل اكليهن
مجتبى سأل امي ـ منو تخابرين
و گعد يمي ، امي فتحت سبيكر حتى اختي الچبيرة تسلم عليه ـ شلونك ابو خولة
رد مجتبى عليها ـ الحمد لله ، خو ما متعاركة وية حمواتچ؟
صاحت اختي ـ لاااا راح اخلص منهن هذا الخميس عقدهن ثنيناتهن بس گول يالله
رد مجتبى عليها ـ حرام تخلن الدعاء بالنص ، خالتي سماح ماخذتهن لولدها شيخلصهن ذني رايحات لجهنم
ضحكت و گمت صعدت لفوگ
ماچذب مجتبى ، أموت و لا اعيش وية خالتي سماح بنفس البيت
باتت يمنا يومين بعرس مجتبى و سوتلنا عسكرية
تگعدنا من الصبح نكرف شغل، تدور شغل البيت تدوارة
طلعت كتب علي فتحت الاربعون حديثاً گلبت بي
لاحتلي ورقة ملاحظات برتقالية
قريتها ʚ القلب حرمُ الله فلا تسكن في حرم الله غير الله ، إصرف الشواغل عن القلب عندما تلتقي بالله ɞ
طلعت دفتري و سجلت دروس الاستاذ و الحلول
سمعت مجتبى يسأل ـ شجاي تسوين؟
رفعت راسي ، دخل و بحضنه بته
باوع لكتب علي المطشرتهن على چربايتي و سألني ـ وين مخلية الكتب ؟
جاوبته ـ فوگ الميز
رفع تك حاجب و سأل ـ ليش؟
گتله ـ ماعندي مكان
مد ايده على بنطرونه يدور على موبايله و هو يگول ـ خو احاچي النجار يسويلچ مكتبة على گدچ ، احسن ما يظلن مطشرات
رديت بتعجب ـ و الله !
خلة بته على چرباية "منى" و گلي ـ اي بس جيبي 25 من ابوچ
گعدت اتاني ابوية لمن إجة ، تلگيته بگلاص ماي
شرب منه و رجعته للمطبخ ، شفت مجتبى طب للغرفة طبيت وراه
لگيت امي تسولفله على عقد حموات اختي
سألته ـ بوية أريد احاچيك؟
رد و هو يسد باب كنتوره ـ شكو؟ گلبچ يوجعچ؟
جاوبته ـ لا أريد 25 الف
سألني ـ شتسوين بيها؟
جاوبته ـ اريد مكتبة ، مجتبى گلي جيبي 25 من ابوي و اسويلچ وحدة
باوع لمجتبى بطرف عينه و رجع تمدد على الچرباية و هو يگول ـ شبي چا هو ماعنده فلوس؟
مجتبى گعد بالگاع و خلة بت بحضنه و هو يرد ـ شكو بوية ، مخلفها و ناسيها حتى ادفعلها
أنت تقرأ
إلى أين تصل
General Fictionنبذة عن القصة بعد علم (سكينة) بعلاقة تشوبها الخيانة بين اقرب صديقة الها و خطيبها (ظافر) تتعرض لأزمة قلبية ينتج عنها مرض قلبي و فشل الكلى فتزرع كلية جديدة من مجاهد بالحشد الشعبي و يبتدي التغيير بحياة و نفسية سكينة بواسطة دفتر المجاهد
