إلى أين تصل

7

خالي رفعلي حاجبه حتى اسكت

دنگت الحجي گعد گبالي ، استند بإيده على گبر ابنه و سألني ـ الدفتر ابو 100 الي دوم وياه ؟!

رديت عليه ـ اي الي غلافه أحمر ، و الله عمو دوم يحچي بالدفتر وية شخص غريب ما چان يريد عباس ياخذه ، ليش اخذه مني؟

رد الحجي ـ بسيطة اني احچي وية عباس و يصير خير

مسحت دموعي و عدلت عباتي و گمت يعني ما راضي ينطي ، ابوية إذا مايريد يسوي شغلة و ألح عليه يگلي يصير خير

فشلت روحي و خالي ، العالم يردون دفتر ابنهم و اني بلا حق اريد آخذه منهم

رجعت بدون صوت للسيارة ، خالي سلم على الرجال و إجة صعد السيارة واخذنا للإمام

الدرس بدة و كالعادة آني أكثر وحدة يطلعولها اخطاء

حسيت شي نزل على رجلي تصورت يكون "بول" طلعت بسرعة من الامام و رحت للحمامات
كشفت عن ملابسي كلشي ما بيهن مع هذا شطفت و عدت وضوئي

رجعت للصحن لگيت مرأت خالي و بتها زينب يدورن علية ، من شافتني مرأت خالي اجت علية و لزمت ايدي و سألتني بخوف ـ خالة وين چنتي؟

شاورتها ـ ما اعرف حسيت شي نزل على جسمي "نجاسة يعني" فشطفت و رجعت

من بعدت راسي چانت تباوعلي بعتب عبالك مسوية شي غلط ، اخذت ايدي و رجعنا للصحن گعدنا تلاثتنا
اني و مرأت خالي و بتها زينب

گالت مرأت خالي ـ شوفي اني منتبهة عليچ ؛ قبل فترة هم صار هيچ طلعتي من الحمام شريتي ملابسچ و رجعتي غسلتي رجليچ ، و فد مرة عدتي وضوئچ مرتين گدامي ، انتِ عندج وسواس طهارة

زينب خلت ايدها على حلگها و گالت ـ يااا اني هم صار بية گوة خلصت منه

مرأت خالي ضغطت على ايدي و كملت كلامها ـ كلش هواي ناس يصير وياهم ، انتِ لازم بس تقاومين و كله 40 يوم ، شنو يجي ببالچ لاتهتميله و گولي من الشيطان و هو يروح

من گالت كله 40 يوم تذكرت دفتر الشهيد علي من گال "الدِگاگ" كله 40 يوم بحيث چفصتها بوجه مرأت خالي و گلت ـ الدِگااااگ

قوست حواجبها ما فاهمة بس تجاهلتني و گلتلي ـ عيني عليچ ، إذا تتأخرين بالحمام و الله اطبلچ و اطلعچ بيدي خووش
شيگلچ الشيطان عارضي لمن تصيرين زينة

طلعتنا مرأت خالي للسوگ چانت كل ما تراويني شي اگلها ـ ما اقتنعت بي ما اريد

لمن اشترتلي غصب عني فستان و نسقت شال و حذاء وياه ، اشترتلي حالي حال بتها

زينب اشترت دعاديع على گولة مرأت خالي ، فوانيس رمضان و امواعين عليهن رمضان كريم و لوحات

اخذنا تكسي و رجعنا، تلگتنا مرأت ضرغام و صارت تگلب بثيابنا

مرأت خالي طلعت ملابس بت ضرغام و لبست الطفلة