أنا نهاية قصتك (باللهجة الجزائرية)

♡ بارت 9 ♡

"لا احد سيعرف الى اي مدى انت تتعب ، فظاهرك المنظم وتفاصيلك الهادئة لا شيء بمقدار التعب الذي تضمره ، ولانك تبتسم كثيرا لن يشعر بك احد"

◇•◇•◇•◇•◇•◇•◇•◇

[ نيرة ]

كنت قاعدة فالبيت على سجادتي وندعي ربي ونبكي ، ما كنتش حايبة الطفل هذا ومانيش حايباتو ، بقيت ندعي غير يموت ، الله غالب الضغط خلاني ندير هكدا والشيطان بقا يوسوسلي ..

حتى دخل يونس كي الثور ..

يونس : مبروك عليا بوليدي ، نحبو يكون ولد باش يكون في علمك !

ما ردتيش كامل عليه وكملت نقرا القران ..

يونس : حا نسميه على بابا العزيز ..

كيف كيف ، كملت نقرا القران وما قيمتوش كامل .. هو تقلق كيفاش يهدر معايا وانا مانيش دايتها فيه

يونس : راني نهدر معاك !! .. اااو وش بيك !!

قربلي وحكمني من الخيمار تاع الصلاة وجبدني ..

يونس : كي نهدر معاك تردي عليا ..!!

نيرة : ما نردش .. والطفل حا نطيحو ، ما نسحقش نرفد وليدك

ما علاباليش كيفاش ولا علاش قلت هكاك !! يعني كانت اكبر غلطة في حياتي .. بصح الشي كامل لي جوزتو هو لي خلاني نرد على روحي ولاول مرة .. مي بيان سور لاسويت مزالت فالطريق

يونس (تبسم بسخرية) : حلاتلك يا لالة ورجعتي تطلقي فسمك عليا لهنا .. عمبالك كي راكي بالجوف مراحش نمسك .. انا نسحق وليدي ، نتي ما تهمينيش قاعيتيك ، جبتك لهنا باش نجيب شكون يرفدلي اسمي وباباك رماك لعندي ..

هدرتو طاحت عليا كي الصفعة .. ايه راهو يشوف فيا مصنع اطفال ، نجيبلو كشما عشرين طفل وهو يكون فرحان ، وانا كي الكلبة في وسطهم ..

يونس حكمني من ذراعي وبدا يكركر فيا ويضربني لوجهي ، ويعيط عليا ويعرش ..
خرجو خالتي جميلة وبناتها يجريو

خ.جميلة : راها بالحمل وشبييك ، تحب تقتل الطفل !!

يونس (يعيط) : يما بعديني ..

كمل يكركر فيا ويخبط فالبلاصة لي لقاها حتى لحقنا لباب الدار ، فتحها ورماني برا حتى طحت على الحجر ، وخبط الباب فوجهي ..
يااا يماا حاوزني من الدار ! وش حا ندير دوكا انا ، وين حا نروح وانا اونسانت هكدا !!
نضت نضرب فالباب ونبكي بالشهقة ..

نيرة : تعيشو افتحو الباب ، تعيشووو ، خالتي جميلة ، تعيشي خالتي خليني ندخل .. احساان ، رحممة ، يووونس ، تعيشووو

ايه رجعت كي المذلولة ، كي البهلولة ، ندقدق عليهم باش يرضاو عليا ويدخلوني .. نذليت مليح وهوما يتفرجو فيا ، والجيران كامل يطلو عليا .. كنت في حالة !! حسيت حياتي بلا معنى ، لي يجي يبزق عليا (حشاكم) ويجوز .. كل واحد دخل حياتي خربها بطريقتو وراح .. شكرا يا دنيا !!