أنا نهاية قصتك (باللهجة الجزائرية)

♡ بارت 24 ♡

**** غدوة من ذاك ****

[ نيرة ]

نضت صباح ربي بكري مع الفجر .. خرجت توضيت وصليت صلاتي وجيت رايحة نقرا القران بيدما ناضو كامل .. حتى نسمع دقديق خفيف فالباب ، نضت فتحت ، لقيتها زينب قالبة شفايفها كي البومة ..

نيرة : صباح الخير ؟

زينب : معليش تجي معايا دقيقة ، عندي هدرة معاك ..

استغربت منها .. خرجت معاها بلبسة الصلاة ، خرجنا للتيراس .. بقات واقفة عاطيتني بالظهر وانا واقفة نستنا فيه تنطق

نيرة : وشبيك ؟

زينب (دارت عندي) : واش راكي ناوية اه ؟ حايبة بالسيف تبيني روحك لنضال ؟ معليش هو ما يحبكش ؟ معليش تباركاي ما ترمي روحك عليه ؟ انا وياه مخطوبين يا وسمك ! رايحين نتزوجو ! ما بين الرجال تاع العالم كامل لقيتي غير نضال ؟ نضال يحبني انا وانا نحبو ، وعرسنا مابقالوش ، اخطيه يا بن عمي !

بقيت باهتة فيها ، ماعرفتش لا الطفلة هبلت ولا خبطت راسها مع الحيط ولا ماشربتش دواها ولا وشبي جدها ! صح صح ماعرفتش وش نقول فذيك الدقيقة ! حيرتني !

قلبت عينيها ونسفت كي الحنش وجات رايحة .. درت ليها وخزرت فيها مزالني مخلوعة .. قلت سور معلابالهاش بلي علابالي بلي راهم يمثلو .. انا نفضل ما نديرش عليها باسك مرات نحسها طفلة صغيرة مخروطة من عقلها !

......

بعد القهوة تاع الصباح مع العايلة .. وبيان سور انا كامل الوقت نخمم غير فهدرة زينب ، قلبي ماهوش مريح من جهتها تماما ، وحاسة بوسواس يقولي بلي هي تحب نضال .. يا ربي ونكون غالطة برك ..

ط.صليحة : نيرة وش بيك بنتي ؟

نيرة (تبسمت) : لالا والو طاطا ..

رفدنا لمواعن كامل .. لبسنا قشنا وخرجنا رايحين للغابة وين كاين التليفيريك .. مع لي سمعت بلي رايحين لتم نسيت شوية زينب وتحمست صح ..

.... طلعنا بالطونوبيل لنص الجبل ، وكملنا à pied .. كنا نمشيو ونقصرو انا والشبيبة ، ومرة على مرة نتصورو .. شفنا الزواوش ، الارانب ، الغزالات من البعيد برك ، مناظر صح صح هايلين .. وقدرنا نشوفو البحر بعدما ارتفعنا مليح فالجبل ..

شوية ولحقنا لوين التليفريك ..
قررنا نركبو انا ونضال وبهاء ورنا في واحد ، طاطا صليحة وزهرة وزينب وكرم في واحد ، وعمي مختار وفضيل ماحبوش يطلعو وقالك رايحين يستناونا التحت ..

زينب : تاااني لهنا نيرة تطلع مع نضال ؟

خزرنا فيها كامل .. وش بيهااا ؟؟ ياا ربي وش بيها ؟ زعما تحبو ؟ علاش هكدا ، راها كل مرة تخسر عليا الجو والفرحة ، لازم تنكد علينا ! اوووف ..

نضال : زينب وش بيك ؟ كشما دارتلك نيرة ؟ عندك مشكل معاها ؟ باينة بلي تطلع معانا باسك حنا نعرفوها ، هكدا تكون الاز معانا ! وش بيك ؟