أنا نهاية قصتك (باللهجة الجزائرية)

♡ بارت 13 ♡

[ نضال ]

كانت تاكل وانا نخزر فيها .. مقدرتش نبعد عينيا عليها وهي تضحك هكاك بهذيك البراءة .. حسيتها طفلة صغيرة كي تشوف الحلوى .. كانت تضحك وتتبسم لاول مرة قدامي .. للحظة حسيت روحي ظلمتها بالحكم لي عطيتو عليها ، بصح انا مزالني منعرفش حكايتها ومنقدرش نحكم عليها لا مليحة ولا ماشي مليحة !!

سعيد كان يخزر فيا ويتبسم من التحت للتحت .. وانا ماشي فعقلي قاع ..

.....

كملنا الماكلة ، ورحت خلصت ورجعنا للشركة ..

نيرة : سمحولي نروح لصال دو بان ..

سعيد : ايه هاوليك على اليمين ..

راحت هي ، وبقينا انا وسعيد واقفين نستناو فيها ..

سعيد : وااش خو ؟

خزرت فيه ، غمزلي وضحك .. خلاااص حا يظل عقابي دوكا !

نضال : ما تبداش سعيد .. الحاجة لي راها في مخك غير ابدا تمحي فيها ، باسك الطفلة مزوجة وراها اونسانت .. هاذي ماهيش قاع حاجة تاع قصرة ولا تمسخير ، شرف الطفلة راهو فاللعب ..

سعيد : ما قلت والو ..

تبسم ودور وجهو .. خي سامط ! هذاك لي بقالي غير نحب وحدة مزوجة ، وزيد ما نعرف عليها والو ، وشفتها زوج مرات فحياتي .. انا راني ندير معاها الواجب برك كوني راجل ، ماحبيتش يدنالها ولا يضربها ويستقوا عليها ..

كملت نيرة ورجعت لعندنا .. غير جينا طالعين ، صونا التيليفون تاعي ..

نضال : الو يما ؟

يما (خايفة) : نضال تعيش وليدي ، رنا حكمتها لاكريز كيما موالف والدوا تاعها كمل .. ازرب جيبلها الدوا ، بهاء ما حكمتوش ..

كوبيت عليها وانا متوتر ، رنا سور تكون في حالة دوك ..

سعيد : خير خو ؟

نضال : لازم نرجع للدار .. ايا نيرة نلحقك معايا ..

رحت نجري وهي تبعتني ، وركبنا فالطونوبيل وديماريت طاير ..

نيرة : وش كاين؟؟

نضال : رنا حكمتها كريز تاع asthme (مرض الربو) ودواها خلاص ..

نيرة : خااه !!

كملت نجري ، حتى لحقت للفارماصي وحبطت جبت الدوا خفيف خفيف ورجعت للطونوبيل ورحت للدار ..

حبطت وجيت حا ندخل ، حتى تفكرت نيرة ..

نضال : نيرة ايا معايا للدار ، ومن بعد نروح معاك نحكي مع الثور هذاك ..

خزرت فيا وعاودت خزرت فدارهم ، ورجعت جات معايا ..

دخلنا للدار ، وطلعنا نجريو لشمبرة رنا ، لقيتها فالسرير تسعل وماشي قادرة تتنفس وشايدة فصدرها ، ويما قدامها تحاول تهدنها ..
رحت ليهم ، وعطتيها الدوا ، دارتهولها يما وبقينا نستناو .. شوية وقت وبدات تتكالما ولاكريز تجوز ..