أنا نهاية قصتك (باللهجة الجزائرية)

♡ بارت 26 ♡

"بينما كانت تريد ان تصرخ بحرارة ، تظهر على شفتيها ابتسامة باردة"

◇•◇•◇•◇•◇•◇•◇•◇•◇

ع.مختار (بالعياط) : مالف نجيب الدراهم للدار ، ولادي جامي مسوهم ! جيتي نتي زعما قافزة يااك ! دخلناك لدارنا وكليتي معانا ورقدتي فالشمبرة مع بنتي ! فاللخر هكدا تجازينا ؟ يا طفلة الدراهم ماشي تاعي تاع السيد ، ترجعيهم دوووك !! تجبديهم من السما ولا من الارض !

حسيت واحد عطاني بصفعة .. هكدا مالا ؟ دوك رجعت سراقة ؟ تتهمني بلي سرقتك عمي مختار ؟ نتا تاني كيما الناس لخرين ، ماترحمنيش ؟ .. بقيت نخزر فيه برك والبؤبؤ تاع عينيا يرعش وقلبي يخبط ويديا يرعشو .. ماعرفتش واش نقولو ولا واش ندير ، بقيت ساكتة برك نخزر فيه .. حتى الدموع وماجاوش فعيني ..

نضال : بابا يهديك ربي ، ماهيش هي لي داتهم

ع.مختار : شفتها بلي ماهيش هي ؟

سكت نضال وبقا يخزر فيه .. بقيت انا نخزر فلخرين كشما يهدرو كشما يدافعو عليا ، والو ..

نضال : ماشفتهاش بصح ماهيش هي ، انا علابالي

ع.مختار (بالعياط) : نضال بلع وماتزيدش تقلقني !! (خزر فيا) ياا بنادم مع شكون راني نهدر ! الدراهم تخلقيهم دووك ! راني نهدر مع جد والديك !!

نيرة : مانيش انا لي ديتهم ..

ع.مختار : اييه ، وكي قلتيلي هكدا رايح نامنك ! يااا ربي والله غير نشكي بيك ! مانيش نتمسخر ! انا مختااار ماتجيش نتيا ما تسواي وااالو تلعبي معايا !

نيرة : عمي ، نحطلك يدي على المصحف ونحلف بلي ما ديتهمش !

ع.مختار : وزعما رايح نامنك ؟

حكمني من التريكو ديالي وزير عليا وبق يكركر فيا لبيت رنا ..

ع.مختار : اخرجي من داري دوك ، مانقبلكش دقيقة لهنا يا السراقة ، يا نكارة الخير ..

جاو كامل فكوني منو ..

بهاء : بالعقل بابا تعيش ..

ع.مختار : وشمن عقل !! الطفلة سرقتنا ونتا تقولي بالعقل !

ط.صليحة : ماكاين حتى دليل يقول بلي هي لي داتهم !

ع.مختار : اييه صح صح ، الدراهم عندهم الرجلين وراحو يمشيو وحدهم .. (بالعياط) اخرجييي من داااري

دخلت نجري للبيت ، رفدت كابتي وعمرتها بقشي ، باسك حتى القش لي شراتهولي طاطا خلصتها فيه يعني كلش تاعي .. طميت كل حاجة ودموعي كانو ناشفين ، انا وتخلعت فروحي .. مالفة نقلب الحالة بالبكا ، مي دوكا دمعة ماحبتطش ، شغل والفت الظلم ..

وقفت عند باب البيت ، لقيتهم كامل لتم واقفين ماعدا عمي مختار ..

بهاء : منك صح رايحة تروحي ؟