أنا نهاية قصتك (باللهجة الجزائرية)

♡ بارت 23 ♡

ملاحظة ::
اقراو البارت لي جاز باش تتفكرو واش صرا وتقدرو تكملو ..

◇•◇•◇•◇•◇•◇•◇•◇•◇

[ نضال ]

كنت عاجز اني نتحرك ولا ندير اي حركة وحدخرا ، بعدما شفتها فاللوك هذاك ، شغل ملايكة قدامي ، الريق وماقدرتش نبلعو ، شفت يما وخالتي لتم مي تجاهلتهم وماقدرتش نكوف روحي ، وكملت غايس فيها ، فجمالها ، فالحشمة لي كانت مرسومة على وجهها ، فالرعشة تاع يديها ، في عينيها لي كانو مكحلين وتخلطو مع اللون الازرق لي يذوبني ، مع خدودها لي تنفخو هاذ اليامات وكانو ملونين بالغوز الكلاغ ، في شفايفها الصغار لي كانت تعض فيهم .. حبيت لوكان نخبيها فصدري ، وحتى واحد مايشوفها ، حسيتها جوهرة ماشي لازم الناس يشوفوها ولا يخزر فيها اي راجل وحدوخر من غيري انا ..

يما : يا المصيبة !! اتحرك ، الناس يستناو فينا !

فقت لروحي واخيرا وقدرت ندير حركة ونقرب من يما ، رفدت الصوالح عليها وانا عيني مابعدتش على نيرة لي كانت تسعل وتسقم خيمارها باش تكوف الحالة ..

خرجو يما ورنا وخالتي وبناتها قبلنا ، وانا ونيرة وراهم ..

نضال (همستلها) : جامي شفت طفلة شابة كيما شفت اليوم ..

حبطت راسها وماقالت والو ..

نضال : يهدر معاك مجيد ، اليوم نكسرلو راسو ..

نيرة (خزرت فيا) : تعيش نضال ، اليوم تاع فرح خلينا من المشاكل ، تعرفني كيفاش دايرة وانا ....

سكتت وحشمت وحبطت راسها ..

نضال (تبسمت وهمست) : نتيا وشنو ؟ تحبيني ؟

زادت حبطت راسها وزيرت على يديها ، ضحكت على ردة الفعل تاعها لي ديرها كل مرة نحشمها .. وخرجنا من الدار ..

رحنا انا ويما ورنا ونيرة فطونوبيل ، وبابا وبهاء فطونوبيل ، ومجيد وخالتي وبناتها فطونوبيل ، وفالطريق لحقونا عمي فضيل ومرتو وزينب وكرم ، وزادو زوج عماتي ..

[ نيرة ]

لحقنا للدار تاع العروسة ..
حبطنا بالزغاريت ، سلمنا قبل على فاميلة نضال لي راحو معانا ، ومن بعد دخلنا لدار العروسة ، وسلمنا عليهم وقعدنا فالصالون .. كنت بزاف فرحانة لبهاء ، سورتو كي كنت نشوف الفرحة لي فعينيه فهاذ اليامات اللخرين كي كنا نوجدو ..
وبيسك من عاداتنا تدخل الطفلة الصغيرة لي تكون كاينة من فاميلة العريس عند العروسة تسلم عليها وتهدر معاها ، جات يمات العروسة لعند نرجس (بنت خالة نضال الصغيرة) لي كانت قاعدة قدامي ..

يمات العروسة : وسمك يا البوبية ؟

نرجس : انا وسمني نرجس

يمات العروسة : هايا ارواحي معايا تشوفي العروسة ، (خزرت فيا) هايا معاها بنتي باش ماتخافش ..