[[Completed]]ကောင်းကင်ဘုံသို့ ကြွလှမ်းစံမြန်းနေသည်၊ မနှောင့်ယှက်ရ။ ADND

အခန်း (၁၀၄) နေရာမှားနေသည် အခန္း (၁၀၄) ေနရာမွားေနသည္

ကုန်းဟုံ "..."

ဆရာနှင့်ဆရာဦးလေးတို့ကား တောင်ပေါ်မှနေ့ရက်များမှာ ပျင်းစရာကောင်းလှသည်ဟုထင်မိကြသဖြင့် လုပ်စရာကိစ္စလေးများ ရှာလိုကြခြင်းများလော။

###

ကျိုဖုန့်ဂိုဏ်းက အရှေ့အရပ်တွင်တည်းခိုလို့နေသည်။ တောင်သခင်ကျိဟယ်တစ်ယောက် ဝင်းတံခါးမှထွက်သွားစဉ်ကတည်းက လင်ယွဲ့ခမျာ မျက်နှာသာသာယာယာကိုမရှိဘဲ ဖြစ်လို့နေခဲ့သည်။ အခြားဂိုဏ်းသား(၃)ယောက်က လင်ယွဲ့တစ်ယောက် စိတ်မရွှင်ကြောင်းသိကြသဖြင့် သူမကိုသွားရန်မစရဲကြပေ။ သူတို့ ခြံဝင်းအတွင်း ရပ်လျက် ဓားများနှင့်လေ့ကျင့်လို့နေကြသည်။

မကြာမီ ယွင်ဟွာဂိုဏ်းမှတပည့်တစ်ယောက်ရောက်လာကာ ယနေ့ည စားသောက်ပွဲရှိကြောင်းလာပြောလေသည်။ သူတို့အားလုံးတက်ရောက်ရန် သဘောတူလက်ခံလိုက်ကြ၏။ ယုန်းမြို့တော်မှအစားအသောက်များမှာ အံ့ချီးလောက်ဖွယ်ရှိကြောင်း သူတို့ကြားဖူးနားဝရှိခဲ့သည်မှာကြာလေပြီ။ အစားအသောက်ကောင်းများနှင့်ပတ်သက်၍ ဆန္ဒပြင်းပြင်းထန်ထန်မရှိကြသော်လည်း မျှော်လင့်ချက်တချို့တော့ရှိကြလေသည်။

မကြာမီ၊ တောင်သခင်ပြန်လာသည်ကို သူတို့တွေ့လိုက်ရ၏။ သို့သော် မည်သို့ကြောင့်မှန်းမသိ သူ့ကြည့်ရသည်မှာ နည်းနည်းစိတ်ဓာတ်ကျနေဟန်ရှိသည်။ တောင်သခင်ကျိဟယ်၏မျက်နှာအမူအရာကိုမြင်လိုက်ရသည့်အခါ လင်ယွဲ့၏မျက်နှာပေါ်မှ စိတ်ဓာတ်ကျနေသည့်ဟန်မှာ လျော့ကျလို့သွားလေသည်။ ဆရာဦးလေးကိုထိုသို့မြင်လိုက်ရပုံထောက်လျှင် လက်ထပ်မင်္ဂလာကိစ္စမှာ သဘောတူလက်ခံလိုက်ခြင်းမရှိသည့်ပုံပင်။

"လင်ယွဲ့" ကျိဟယ်က စိတ်လက်ချမ်းသာလို့နေသည့်မျက်နှာထားပိုင်ရှင်လင်ယွဲ့ကို ခေါ်လိုက်သည်။ "စိတ်စွမ်းအင်အရှင်သခင်ဟွမ်ကျုံးက ကျုံ့ရှီပဲဆိုတာ မင်းသိလား"

"ဘာကြီး" လင်ယွဲ့က သူမနားများကိုမယုံနိုင်လုနီးနီးပင် ဖြစ်သွားရ၏။ သူမ၏အံ့အားသင့်တုန်လှုပ်သွားသည့်အမူအရာကို ဖုံးကွယ်ခြင်းငှာမစွမ်းနိုင်ဘဲဖြစ်သွားလေသည်။ "ဟွမ်ကျုံးက စိတ်စွမ်းအင်အရှင်သခင်ကျုံ့ရှီလား"