part26والاخير
داني وقف مصدوم:ميسون 😧
ابتسمت:يااهلا بزميل الجامعه
داني ضحك وسلم عليها بحراره:كيفك لينا زمان
ميسون:بخير والله صدفه حلوة
داني:بجد ماكنتيش تعرفي اني مالك شركات هدي
ميسون:ابدا اللي سمعته انها للسيد عاصم وليا فتره نبي ندير صفقه مع مجموعه تركيه
داني:حلو هدا بوي عاصم وهدي ميسون صديقتي وزميلتي في الجامعه
ميسون سلمت:وحب قديم طبعا
داني:تفضلي تشربي شي
ميسون:اسبريسو ساده
بدو اجتماعهم وهيا كانت تحكي بثقه واحترافيه بس رغم هدا عاصم ماكانش مرتاح وشاك فيها
بعد تم الاجتماع
داني:ها توا اطمن يابوي ميسون مستحيل ضرني
عاصم:بس انا متاكد
داني:ايي عاد قتلك لو خايف عاشركاتك افصلهم
عاصم:ماتسكرش راسك وانسحب مش رح يضرنا الانسحاب اصلا مشروع اكرم جابلنا ارباح
داني:اكرم اكرم مش حاس انه سيطر عليكم كلكم وحتا على خدمة اللي ليا سنين نحرث فيها
عاصم وقف:هدا خوك والشركات ليه فيهم زيك بالزبط وانت اكثر لانك مأسس فروع بروحك يعني انا ماصدقت انه عقل وريحني شن جاك توا
داني:جاني انكم مركزين معاه وانا الكل فايتني ماحد مهتم بيا وهوا دمرني حرمني من مرتي ومزال واقفين معاه
عاصم:ماحد وقف معاه مرتك بروحك ضريتها وجبرتها تهرب منك فكر فيها كويس الكلمه هدي شن يجبر مرا "تهرب"من الشخص اللي تحبه والصفقه هدي تلتغى
داني:مستحيل نلغيها شركاتي وحر فيهم
عاصم:ماتنساش اني شريك في 45%
داني:الاسهم بأسمي 🙂
عاصم:تمام وطلع
داني وقف عالشباك وحاس روحه مرهق وتعبان من كل شي
سونيا:شفتيه ياعميمه ولا عبرني معقوله حتا كيف حالك ماقالها
فوزيه:معليشي بنيتي شن مزاللكم وتتزوجو
سونيا تنهدت:ماشي
فوزيه:بعدين نوقفو على مطعم وخليكم احكو مع بعض
سونيا:تمام
مصطفى:ها شن رايكم في ديكور المطبخ
ريماس:حلو الحق حتا سونا تحبه اللون
فوزيه:خلاص مالا حط العربون باش مايعطلوش عليك
مصطفى:ودار النوم
فوزيه:هدي عاد شوركم هي ريماس نمشو نتفرجو
مصطفى:تفضلي شوفي اي وحدا تعجبك
سونيا:شوف هدي محلاها
مصطفى:مانحباش الازرق
سونيا:بهي شن بناخدوه
مصطفى:اسود
سونيا:وانا مانحباش الاسود
مصطفى:معناها ابيض ولا سمني
سونيا:تمام هدي البيضا حلوة
مصطفى:بهي دفع عربون وطلعو
فوزيه:وقفلنا على شي مطعم حسني جعت
مصطفى:تمام هي انزلو
فوزيه وريماس قعمزو بروحهم وخلوهم عااساس يتفاهمو
مصطفى خدي قهوة ولا عبرها
سونيا شدت يده:لامتا بنقعدو هكا حبيبي
مصطفى سحب يده:هدا اللي تبيه انتي
سونيا:وانا مش قصدي
مصطفى تعصب وخبط عالطاوله:تلبسي اختك عدسات وطلعيهالي وتقولي مش قصدي في شن غلطت معاك قولي
سونيا تبكي:والله كل اللي فكرت فيه اني نبعدك عاخاطر امك
مصطفى:قتلك امي انا نتفاهم معاها بس انتي تخليتي وبعدتي وجرحتيني وتوا ماتستنيش مني نرجعلك وننسا كل شي ببساطه
سونيا:مالا علاش جيت وحددت العرس
مصطفى ضحك:شن بندير قلبي يموت عليك ومستحيل نتخلا بالسهولة هدي حبي مش لعب وتلفت
سونيا حست كل كلمه كأنه موس انغرس في نص قلبها:هيا بنروح
مصطفى:اطلعي
اكرم:هي كولي هدي
ايلاف:حبيبي خلاص ناس تشوفلنا
اكرم:اي وشن يعني مافيش داعي تركزولي نحبها وبندلعها 😍
ايلاف:كوكي
اكرم:ياروحه وقلبه وحياته كلها هيا حبيبي كولي مني
ايلاف كلتها
رن هاتفه:ايوا بوي
عاصم:نبيك في موضوع ضروري
اكرم:تمام بعد المغرب نجيك
ايلاف:خيره عمو
اكرم:مش عارف هي نعطيك ثاني
ايلاف:لالا شبعت خلاص
اكرم:بهي ناخدلك كنافه ولا كيكه الشكلاطه
ايلاف:حبي عاش خاطري
اكرم:بهي ناخدهم ونروحو بيهم
ايلاف:اوك
سارة:حبيبي خيرك من لما روحت مضايق وماطلعتش من مكتبك
عاصم:تعبان شويه
سارة:شن يوجع فيك
عاصم:راسي صداع
سارة:بهي تعالا ارقد شويه وخود حبوبك
عاصم:لالا بنطلع انا وعمر بعدين ساهل
سارة:بس انت تعبان
عاصم:مش مشكله مانبيش نأجله الولد قصدني
سارة:براحتك استنا نجيبلك الحبوب بس
عاصم:تمام
ريم مقعمزه في بلكونه وتتفكر فيه بكل تفاصيله وقلبها مش سامحلها تنساه حتا لحظه
حسام خش:بنت
ريم:نعم يابابا
حسام:عيلة جدك جو ويبو يشوفوك انزلي
ريم ارتعبت:لا مش نازله خليني
حسام:كلمه هيا نشوفك تحت
ريم اتصلت باكرم:بابي
اكرم:ياعيونه خيرها بنتي
ريم تشهق:هما جو ويبيني ننزل
اكرم:بالله شن هبل هدا
ريم:ارجوك تعالا رهو قالي بيخليني نعيش عندهم
اكرم:اشش اهدي بهي سكري دارك وماتطلعيش مهما صار انا توا بنكلمه واليومين للجايات نكون عندك
ريم:بهي
حسام مقعمز مع عيلته رن هاتفه شاف بلع ريقه بخوف واستاذن:ايوا
اكرم يعيط:انت دماغك شن فيه فهمني عاشنو ناوي
حسام:كيف حالك وحال العيله
اكرم:اقسم بالله لو تنزل البنت لعيلتك ولا تتصل بيا تاني تبكي ننهيك من الدنيا
حسام:البنت بنتي
اكرم:تي بنتك بتودرها يامريض
حسام:اييي عاد الموضوع ليه سنين
اكرم:كلمتي وقلتها وانا بعد يومين جايكم
حسام:تمام براحتك
اكرم سكر عليه
ايلاف:خيرك حبيبي
اكرم:كل مانبعتها لعيالها ترجع مدمره منهم كان نقدر نخليها تنساهم
ايلاف:انت عارف كيف تناسهم
اكرم شافلها:لازم ترجع لداني
ايلاف:بالزبط وهكا تضمن حياتها ديما معانا وجنبك حتا لو مشت زياره بس
اكرم يفكر
ايمن:انستوني كيف حالك توا
عمر متوتر:الحمد لله ياعمي
عاصم:شن امور الخدمة
ايمن:ماشي حالها
عاصم:جايينك في طلب احنا
ايمن:تفضلو وان شالله خير
عمر:انا ياعمي كملت حوشي وجايك طالب بنتك رنا تكمل معاي نص ديني
عاصم:عاجباته بنت خالته ومارضاش يجي يطلبها لين كمل حوشه بس
ايمن:شني
عاصم:حكا مع رامي قبلك بصفته صاحبه بس رفضه بسبب فارق السن بينهم
ايمن:انا رأي مختلف عليه ممكن رامي قال هكا بسبب القصه اللي صارت قدامه وخاف على حياة اخته بس انا بعد كم موقف شفته من عمر متأكد انه رح يصون بنتي ويحترمها زي ماانا صاينها
عاصم:يعني
ايمن:يعني البنت ليك وان شالله تقدر تتحمل دلعها وربي يعينك ماتجي تلوحهالي بعد فتره
عمر ضحك وفي خاطره يقول"تدلع براحتها وكيف تبي المهم جنبي ❤️❤️
ايلاف:نخاف بروحي
اكرم:مايجيك شي ياعمري خيرنا
ايلاف:بهي خليني عند ماما
اكرم:ماما لا
ايلاف: 😔😔
اكرم:تزعليش
ايلاف رجعت للدار وسكرت الباب
اكرم:اووف خدي مفاتيحه وطلع
نمشو لشخص ماخداش نصيب كبير من روايتنا ❤️
احمد مقعمز في مطعم يدخن وطايرتله"ليا فوق شهر هنا قاعد بس لانها قعدا وصلت معاها لدرجه تخطت الحب مع انها ماعطتنيش اي شي يخلي عندي امل بس قلبي تعلق بيها هلبا وهيا تعتبر فيا صديق غدوة بترجع للبلاد كيف بيصير فيك يااحمد اوووف"
قطع تفكيره
لبنى:هالووو وين تفكر
احمد:فيك الصراحه
لبنى:انا 😧ليش مش في مدامتك
احمد ضحك:نقولك شي
لبنى:ايه
احمد:انا لاعندي مدام ولا شي واللي شفتيها معاي يومها بنت خوي
لبنى:بجديات
احمد:والله وانا نحبك انتي وقلبي معاك فكره انك معتبرتني صديق تقتل فيا
لبنى تحشمت
احمد:ماحكيتش هكا باش نضغط عليك او نحرجك بس صارحتك باللي نحس فيه بما انه اخر يوم ليك هنا
لبنى:امم بهي وانا جايه بنتعشى معاك
احمد:احلا عشا شن تبي هي
واستمرو يهدرزو ويضحكو
اكرم:صار هكا عمك داني
عاصم:انا معاش حمل شغل وتعب في نفس الوقت متاكد انه المشروع كله عابعضه كذب وبسببه نخسرو هلبا
اكرم:ولا تحطه في بالك الموضوع عندي قتلي مديرتهم مرا صح
عاصم:ايه وكانت معاه في الجامعه
اكرم:تمام انا بنسافر يومين لي المانيا ونروح نقعمزله
عاصم:مانبيش مشاكل
اكرم:لازم منها المشاكل بس نبيك انت وعمي تنفدو كل شي نقلكم عليه
عاصم:ان شالله خير
اكرم طلع يحكي عالهاتف:تذكرتين لالمانيا نبيهم بعد غدوة
نجلاء:تمام استاذ تصبح عاخير
سهام:اهلين بالعريس
اكرم:مرحب ببنت العم
سهام:كيفك
اكوم:عال العال
سهام:مرتاح
اكرم:اخر راحه عقبالك ترتاحي زي راحتنا
سهام:مش رح دوم نوعدك
اكرم:له خفت الحق
سهام:رح نخليها تطلع من حياتك وتعرف انه ماليك حد في الدنيا غيري انا
اكرم:بري العبي بعيد ياحلوة وخافي على روحك لانه وقت يتعلق الموضوع بي ايلاف مانعرفش حد ركب سيارته ومشى
وصل للحوش
اكرم:فوفتي ياعمري تعالي شوفي شن جبتلها اميرتي
ايلاف طلعت عيونها حمر
اكرم انخلع:خيرك حبيبي كنتي تبكي
ايلاف:علاش كلمتها
اكرم:من هيا
ايلاف وراته صوره في هاتفها"مصورهم حد لما وقف علي سهام"
اكرم:اياه اسرع من النت في ليبيا الحق
ايلاف تلفتت بتمشي
اكرم حضنها:وراسك ياعمري كل اللي صار انها قتلي رح تبعدك عليا قلتلها لما يتعلق الموضوع بيك مانعرفش حد ومشيت
ايلاف:معاش تكلمها ولا ترد عليها هدي تستغل في ابسط فرصه باش تحرقني وانا
اكرم:انتي
ايلاف:انا نغار مانتحملش تقرب منك بنت
اكرم صفر بصوت عالي:ياحليلي عاللي يغار ماحلاه ياناس 😍😍
ايلاف:بارد شن جبتلي
اكرم:شوفي
ايلاف:حي مارشميللو 🤤 نحبه
اكرم:كان تشوفي انا كيف نموت فيك
ايلاف:حبيبي
اكرم:ومستاحشك
ايلاف:بندير العشا
اكرم:ومش جعان انا
ايلاف:بهي بن
اكرم:ماديري شي خليك مركزه معاي بس 😘
ايمن:هيا مشينا
ريناد:مع السلامه
سارة:سلامتكم ربي يحفظكم
ايمن:وين رنا
ريناد:تاخد في كتاباتها تو تلحق
اما فوق
عمر حاضنها:بنستاحشك
رنا زعلانه:شن بيصير فينا
عمر:نوعدك في اقرب وقت رح تكوني ملكي
رنا:نحبك
عمر قربها منه وباسها بهدوء:نموت عليك
رنا:خلي نمشي
عمر رتبلها وشاحها:زي ماوصيتك
رنا:حاضر
عمر:هي انطلقي بنتي العسل
رنا:باي ونزلت تجري باي خالتو
سارة:باي حبيبتي
ايمن اتصل:الو
رامي:اهلين بوي
ايمن:انا في الطريق للحوش تعالا توا
رامي:فيه شي
ايمن:تعالا وتوا نحكو وبروحك
رامي:تمام جاي
رنا:شن فيه بابا
ايمن:ولا شي توصلي طول لدارك بعدين انا نحكيلك تمام
رنا:حاضر
هاتفها يرن ويعاود وهيا راقده
اكرم شافه"مامتي" ضحك وقفل الهاتف
ايلاف:حبيبي
اكرم:ياروح حبيبك
ايلاف:خيرك فقت كم الساعه
اكرم:لا شي هاتفك يأشر عالشحن وتسكر
ايلاف حضناته:خليه غدوة نشحنه ارقد
اكرم ابتسم:احلا نومه غزالتي 😍
سهام:به شن مزعلك مش هادي عمايلك
سونيا:درت هكا لاني نحبه
سهام مركزه في الهاتف:بهي لقطه فسخ الخطبه وفهمنا عاخاطر امه بس اني نطلع بدلك لا هادي هلبا ولو كنت مكانه رهو سيبتك من زمان
سونيا:اووف
رامي:شن فيه يابوي
ايمن كان يهدرز مع ريناد تلفتله:انت فيك عقل ولا ماشي هكا وخلاص
رامي:علاش
ايمن:لما قلت نبي بنت خالتي شن قلنالك
رامي:قلتولي موافقين
ايمن:وليش لما يجي ولد خالتك يطلب اختك ترده لا وتقوله فرق السن بينكم هلبا قداش سنه بينك وبين مرتك ترا قولي
رامي واطى راسه:7سنين
ايمن:لما طلبتها من خوها شن قالك
رامي:هيا ليك
ايمن:شفت فيه عيب يشرب ولا يتبع في دوة غلط
رامي:لا
ايمن:ولد خالتك اللي رفضته راد باله من اختك اكثر منك يا ولدي عمر اللي مش عاجبك مطلع اختك من وسط حادث ومارضاش يحكي لحد
رامي تفاجئ:كيف
ايمن:عمر جاني وطلبها مني وانا عاطيها لانه يا ولدي اختك تبيه وهوا راجل وماينردش نعطيه بنتي وانا مطمن
رامي:انا ماقصديش هكا بس رنا صغيره
ايمن:هيا ادرى بمصلحتها لو ماتقدرش تفتح حوش رهو رفضت. انا نعرفها بنتي وحافظها
رامي:مافكرتش فيها هكا
ايمن:مره ثانيه عد للعشره قبل تتصرف وتوا دور كيف تصلح موقفك قدام ولد خالتك وراجل اختك لانه فاتحتهم بتكون مع بنت خالك محمد
رامي:بالك مستعجل
ايمن:الولد يبي يقرا فاتحتها ويستناها لين تكمل قرايتها مش عيب
رامي:ايه تمام فيه شي ثاني
ايمن:سلامتك
رامي:نستاذن مخلي لينا بروحها
ريناد:سلم عليها
رامي:يوصل وطلع
ريناد:امتا صار هدا كله
ايمن:فتره مش طويله حبيبتي ماحبيتش نوترك لانك تعبانه
ريناذ:ربي يخليك لينا
ايمن ضحك:فكروني بالماضي قداش تعبتني وحدا وطلعت عيوني على مارضت انها تتزوجني
ريناد:هههه حقي نتغلا
ايمن:لا حقك هلبا مش شويه
لينا قعمزت جنبه:حبيبي خيرك من لما روحت مضايق
رامي:مافيش
لينا:متأكد
رامي:اها هاتي القهوة
لينا:صاير شي
رامي:خوك يبي رنا عندك علم!
لينا:لا ماحكاليش
رامي:اممم مالا نقولك فاتحتهم مع عرس سونيا
لينا:بجديات تحكي
رامي:والله
صباح يوم جديد ❤️
اكرم:زي ماقتلك أخرهم قدر الامكان وحول الاسهم خليهم يوقفو عالتوقيع بس انا نحاول مانتأخرش
عاصم:واثق انت
اكرم:ياعيني انا خططي مانراجعش فيها مرتين يا حاج
عاصم:ان شالله خير
خش داني:صباح الخير
اكرم:هي نستاذن بعدين تو ندير عليكم دوره
عاصم:تمام
عمر عالهاتف:كل شي صار ورا بعضه وراجلك فشلني
لينا:مهما كان انا اختك ومفروض نعرف قبلها مش ساد قالتلي رنا انكم تحبو
عمر:خلاص عاد حقك عليا
لينا:ماشي
عمر:بعدين تو نكلمك انا خدمة توا
لينا:اوك حبيبي باي
بهد يومين
اكرم:نحس في دماغي بيتفجر
ايلاف:بتمشي توا
اكرم:لالا خليني نريحلهم راسي عالمزبوط لانه بنديرله عركه مقومة حسام
ايلاف:تعرف نخاف منك وقت تتعصب
اكرم:ماديريش غلط باش مانتعصبش عليك
ايلاف:حاضر
سونيا مضايقه:ها ماما شن رايك
ريماس:انتي بتتزوجي مش انا اختاري اللي يعجبك
سونيا:ماعجبني شي
ريماس:بيجي راجلك يقيس عليك الحدايد
سونيا:به
داني:يابوي وقع وريحني خلي نبدو في المشروع
عاصم:قتلك اعطيني ايام نفكر اظن حقي
داني:حقك بس الكلام ليه فوق الاسبوع معقوله هدا كله تفكر
عاصم:شن بتحكم فيا
داني:لا براحتك وطلع
احمد واقف في المطعم وين ماتعود يشوفها كل يوم وسرحان
لبنى:وين سرحان الحلو
احمد:صباحك
لبنى:صباحو جيت نودعك طيارتي بعد ساعتين
احمد لوح دخانه:توصلي بالسلامه
لبنى:اممم ونبي نقولك سر
احمد:قولي
لبني قربت منه وهمستله:وانا نحبك هلبا ونستنا في اهلك يجو يخطبوني
احمد حس كأنه كهرباء سرا في كل جسمه:بجد
لبنى:والله
احمد:لاحقك عااول طياره
لبنى ضحكت:في انتظارك ومشت
احمد:ااه اخيرا
الساعه 8 رن الجرس والباب يخبط بقوة
اماني:جايه وفتحت
اكرم:يامرحب بخالتنا السمحه
اماني:اهلين انستنا
اكرم:هدي مرتي ايلاف بنت اريج
اماني:حاق ماشالله عليك تشبه لميرا هلبا
اكرم:ايه عارف
اماني:خشو
اكرم بصوت عالي:بنيتي
ريم نزلت تجري ونقزت في رقبته:بابي
اكرم:ياعيون بوك استحشتك
ريم:وانا اكثر والله كيف حالك فوفا
ايلاف:الحمد لله
حسام:نورت
اكرم تلفت:خلونا بروحنا بالله
اماني:تعالو صبايا نشربو قهوة في البلكونه
اكرم قعمز:انت عاشن ناوي
حسام:البنت بنتي وحر شن نقررلها
اكرم:الكلام هدا ينقال لما تبدا دير في الصح بس في حالتك ماتفتحش فمك اصلا
حسام:شن قصدك
اكرم:واضح البنت بتمشي معاي وبترجع لراجلها ووقت تبي هيا تجيك زياره
حسام:قتلك البنت بنتي وانا نقررلها
اكرم خبط الطاوله وفقد اعصابه:وانا خرفتلك وحق اللي خلقني وخلقك لو مزال تفتحه معاها الموضوع هدا قبرك انا نفتحه
حسام:تهدد فيا وسط حوشي
اكرم:ايه نهدد ونفذه تهديدي شفنا رده فعلك زمان وتصرفاتك توا ماتجيش تفتح فمك وتقول بنتي لانه ماعندكش اي حق
حسام:بس
اكرم:كلامي تم ومانحبش نعاود انا لو تقرب منها انت عارف شن بيصير
حسام:شن يقولو عليكم الناس مسيبه عيلتها ودور مع واحد
اكرم:اخر همي كلام الناس وحتا كلامك
حسام سكت لانه عارف لو اكرم فصل عليه احتمال يقتله
اكرم:هيا ايلاف
ريم:مزال بكري
اكرم:جهزي روحك غدوة بنرجعو عندنا مانخدمو
ريم:حاق
اكرم:امتا قلتلك كلمه وماصارتش
ريم:ولا مره ربي يخليك ليا بابي
اكرم:وليا ياعويناته الصبح نجيك تمام
ريم:به
ايلاف:سلام وطلعو
سونيا مقعمزة
مصطفى يقيسلها في الحدايد:معقوله ولا وحدا جاتك كلهم كبار
ريماس:عادي ولدي خودها وبعدين تتنقص
مصطفى:هوا هدا الحل اي وحدا عجباتك
سونيا اشرت على حديده بدون ماتشوفها بكل
مصطفى:اوك هي نستاذن
نسرعلكم الاحداث فات اسبوع كل واحد من ابطالنا غارق في حياته اللي يجهز واللي يخطط واللي مبسوط ويعد في الدقايق واللي تعيس وخايف
داني واقف ويجهز في اوراق الصفقه وهوا واثق انه عاصم بيوقع اليوم
حضرو الكل
ميسون:شن نستنو
داني:اي هي نبدو
جاته ريحتها اللي ادمنها وحاوطاته ركز معاها وتلفت للباب
واذا بها تدخل القاعه بابتسامتها المستفزة بدلتها الانيقه وكعبها الراقي
ريم:صباحكم راحه
ميسون:منو حضرتك
ريم:رئيسة كل فروع شركات "صراف" وشريكة الاستاذ في 45%
داني فاق من سرحانه:نعم
ريم:زي ماسمعت ياروحي
داني تلفت لبوه:شن تقول هدي
عاصم:قتلك رئيسه كل فروعنا وشريكتك
داني:وكيف ان شالله شن شرت منكم
ريم:ابدا يا قلبي بس تحولو الاسهم بأسمي فجأه سبحان الله
داني تعصب:شن تخرفي انتي انجنيتي
ريم:اششش اعصابك ماتخوفش الناس لا ينسحبو
ميسون تحاول تحافظ على ثقتها:شن بيصير توا
داني:بتوقعي
ريم:منو بيجبرني
داني:انتي من جابك وحكالك اصلا
ريم ضحكت واشرتله عالباب
اكرم خش:صباح ورد التوليب 🌷🙂
داني:اييي طبعا كل مصيبه لازم وراها الاستاذ اكرم
ريم:تفظلي اشرحيلي على مشروعك هدوء لو سمحت استاذ داني
ميسون:مدير اعمالي يشرح
ريم:وانا نبي نسمع من حضرتك
ميسون توترت:اي ليش لا
بعد ربع ساعه
ريم:عرض حلو ماينرفضش
ميسون ضحكت
ريم:بس لو كان حقيقي اما لعبه ماليناش فيه نخاطرو بسمعه شركات ليها في السوق فوق 50سنه هكا نغلطو
ميسون:اكيد احنا نحبو نتعلمو من خبرة الاستاذ عاصم
ريم:والاستاذ عاصم مش حاب يعلم حد
داني:هيي انتي ماتصدقيش روحك لو حسيتي بيا نحبك وفرحتي بالفلوس ماتمثليش دور الاميرة
ريم انجرحت بس ماحبتش تبين ضعفها:الثقه مش بالفلوس ياعزيزي
داني:بتوقعي
ريم:في احلامك السعيده المشروع بيخش الدراسه الكامله
ميسون:شن نفهم من التصرفات هدي داني
ريم:تفهمي انك في العد التنازلي لكشف لعبتك
ميسون:وتشكو فينا
ريم عطتها بظهرها:الاجتماع انتهى مع السلامه
ميسون طلعت هيا وموظفينها اعصابها محروقه
داني:هدي اخرتها يابوي تكسرني بالطريقه هدي
عاصم:مافيش حل ثاني
داني:انتي
الكل انسحبو
ريم وقفت قدامه:بعد يتم كل شي نوعدك نطلع من حياتك وكأني ما عرفتكش في يوم خلي في راسك هالكلام واعرف اني اليوم واقفه قدامك لعيون بابي وعمو عاصم وبس
داني كيف بيتكلم شافها طلعت
رنا:طبعا نبي حوشي على دورين نحبش ارضي
عمر:حاضر
رنا:اي والالوان كله اسود وابيض هاللونين يعبرو على داخل الانسان ومكنوناته نص ابيض ونص اسود
عمر:حاضر
رنا:العرس بعد نكمل الثانويه و بتخليني نكمل جامعه
عمر:عيوني ليك
رنا:بتتحملني في كل حالاتي وترفعني لمامي امتا مانبي
عمر:اكيد
رنا:بطلعني ديما وكل سنه بنسافرو في العطله
عمر:حاضر
رنا قربت منه:بتحبني ديما وتصوني لاخر يوم في حياتي
عمر:رح نحبك لين يحطو التراب على قبري
رنا:نموت فيك 😘
احمد:سارة وينك
عاصم:الحمد لله عالسلامه غير سلم قداش لينا ماشفناك
احمد:لاحق عليا توا وين مرتك
سارة نازله:نعم
احمد:اسمعي وتي روحك واجمعي سلفاتك وخواتي بتمشو تخطبولي ماتعطلوش البنت طير مني نقتلكم
سارة:اهدا شويه بهي قلبك بيطلع رهو
احمد:نحبها ليا شهور متعذب اخيرا رضت عليا ووافقت
سارة ضحكت:بهي غير قعمز ربي يهديك
احمد:هاشن قلتي
سارة:شن بنقول امتا ماتبي نمشولها اللي خدت عقلك وخلاتك ياروحي مجنون
احمد ابتسم ويتفكر فيها
في حوش اكرم اصوات عاليه وتكسير واصل لبرا الحوش
ايلاف تبكي:شوفها باي تاريخ هدا قبل عرسنا
اكرم:ماتحرقيليش دمي قتلك دوة كذب
ايلاف:تي فيديو
اكرم:قلت كذب الزح ماعندكش فيا ثقه
ايلاف دفاته:مالقيتش الا هدي تخوني معاها صاحبتي
اكرم:تعرفي الكلبه اللي دايرتها حاتجيك لتحت رجليك وتحكيلك الحق بس اصبري وطلع قربع الباب بقوة
اما ايلاف طاحت تبكي وتتفرج عالفيديو اللي انبعتلها عالفايبر"اكرم وصاحبتها مرح في اوضاع مخله شويه 😅وكان قبل عرسهم بايام"
مقعمزين الكل في الجنان لين سمعو السيارة جايه بسرعه ودرس بقوة
اكرم:وينها الزفته
عاصم:خيرك
اكرم:وينها قلت سهاااام ياكلبه اطلعي
محمد:هيي احترم نفسك شن دايرتلك
اكرم:تي وربي لو ماتمشي وتتأسفي منها وتحكيلها الحقيقه مانبدا الا ذابحك
سهام تبكي:شن درتلك انا
اكرم بيهجم عليها:ديريهم لغيري دموع التماسيح هادو انا يا .....تلعبيلي في حياتي انا تقولي لمرتي يخون فيك تي وربي نسيك في اسمك
سارة:اسكت عمامك واقفين
اكرم:مانسكتش اني قتلك وانتي معاها اكيد واشر على
اريج:معاش لقيت مع منو تكملها
اكرم:ايه بنكملها معاك لعبكم قديم رهو مايمشيش معاي
عاصم:ياسر
اكرم:في ايدكم يوم واحد بس ماتمشوش انتم والزفته الثانيه وتحكولها تحملو مايجيكم
اريج:حسبي الله فيك
اكرم:تي تحسبي من هنا لعام قدام كان خدا منك ربي حاجه ركب سيارته ومشي بنفس السرعه
سارة:شن صايرله هدا
عاصم:مش عارف
محمد:ولدك تمادى هلبا مش ناوي تحطله حد
عاصم:نعرفو اللي صاير قبل
محمد:اعرف براحتك هيا
خدي مرته وبناته وروحو
داني مقعمز بعيد متفرج بس
اكرم رجع للحوش قعمز في الصاله حط يديه عاراسه وحاس روحه مخنوق من كل شي اول مره يتعارك معاها ويحس انها مش واثقه فيه
فاتو 3ايام وهما عانفس الوضع مايحكوش مع بعض بكل هوا يطلع من الصبح وهيا طول الوقت في دار
اريج هاتفها يرن فتحت لما لقاته رقم غريب:ايوا
ايهم يبكي:ماما تعاليلي بيقتلني
اريج انخلعت:ايهم وين انت
ايهم يبكي:ياماما خدوني من المدرسه عندهم سلاح بالله عليك تعالي وانقطعت المكالمه
اريج تفكر اكيد اكرم وراها لين خش عليها
محمود يبكي ولبسه مبهدل:امي خطفو ايهم قدامي ماقدرتش نلحق عليه
اريج:شنو 😨
خش انور:شن فيه
اريج:ايهم انخطف اكيد ولد خوك
انور:شن علاقته بيه هوا
اريج:هوا يبي يحرمني منه زي ما بعد ايلاف عليا
انور:غير اسكتي تعالا فهمني كيف انخطف خوك
محمود:طالعين بنروحو جونا زوز رجاله خدوه قعدت نجري وراه بس ماقدرتش نلحق
انور:وانتي منين عرفتي
اريج:اتصلو بيا
انور:هاتيه الرقم
وطلعو لحوش عاصم
اريج تبكي:ولدك ناوي يخربلنا حياتنا حسبي الله فيكم
سارة:شن فيه خيركم
اريج:اخرتها يتقوا عالصغار الله ياخده
انور:ايهم مخطوف ترا شوفيلي موقع الرقم
ساره خداته تحت صدمتها:ماطلعش شي الباين لوحوها الشفره
طلعو الكل يدورو عليه بس ماليشي اثر استمر الوضع لليل
اريج:ارفعني لحوش ايلاف
انور:ليش
اريج:قتلك ارفعني توا
طلعو ومشو معاها عاصم وساره
ايلاف فتحت:ماما شن فيه
اريج مسحت دموعها:وينه راجلك
ايلاف:اهو داخل
اريج:اكرم
طلعلها:اهلين بعمتي
اريج:راجلك ماخانكش كله كذب فيديو مركباته سهام وبعتناهولك كل شي فبركة
ايلاف:شنو 😧
اريج:ارتحت اهو حكينا الحق ردلي ولدي بالله ماتقتله
ايلاف:شن تقولي
اريج:راجلك خاطف ايهم
ايلاف:بس ايهم عندي من الصبح واهو داخل
اكرم:يامعلم
ايهم:ولد عمي طلب مساعدتي وانا مارديتاش عاخاطر اخت
ايلاف قعمزت عالصالون مصدومة كيف امها فكرت دمر حياة بنتها الوحيده هانت عليها
انور:هي اطلعو قدامي
رجعو للحوش وحكو لمحمد عاللي داراته بنته
اما اريج طلقها انور في نفس الليله
محمد خانقها:وطيتي راسي يا قليله الربايه
سونيا تبكي:يابابا ارجوك خلاص بتقتلها
محمد:وتموت علاش حياتها عقابها تخربي حياش الناس
ريماس:بالله عليك
محمد دفها:تقعدي في دار وجهك نشوفه برا نقتلك واول عريس يجيك رح تتزوجي وطلع
سهام:بالله عليك قوليله مانبيش نتزوج ساعديني
سونيا دفتها:هدي اخرت مصايبك قداش مره ننصح فيك ونقولك ابعدي عليه
ريناد:اسكتي بهي ياوخيتي درتيه بروحك
اريج:يطلقني يتخلا عليا بالبساطه هدي
ريناد:شن متوقعه منه وانتي كيف جاتك الجرأه ديري هكا في بنتك معقوله
اريج 💔💔
يوم جديد ✨
اكرم يدير في قهوته
ايلاف:صباح الخير
اكرم:صباحك
ايلاف:ممكن نحكو
اكرم:لا مستعجل
ايلاف نزلو دموعها:ارجوك انا
اكرم طلع وسيبها
في الشركة
ميسون:لينا اسبوع نستنو بتوقعو معانا ولا ننسحبو
داني:اكيد بنوقعو
خشت ريم وحطت قدامه سي دي
داني:شن هدا
ريم:افتحه وخلينا نتفرجو كلنا
داني خداه وفتحه عاشاشه العرض
كان فيديو من شركة
ميسون:لازم تتوقع الصفقه باي طريقه
فيصل:زي ماشايفه عاصم شاك فينا
ميسون:نحاولو نقنعو داني مش رح نرتاح الا لما يخسرو كل شركاتهم زي ماخسر بوي زمان
ريم:اظن هكا عداني العيب 🙂
داني مزال مصدوم
ميسون صفقت:ابدعتي بجد خصم قوي بما انا انكشفنا حابه ننصحك داني رد بالك في يوم تخسرها لانها سند قوي وطلعت
ريم:وهكا تمينا شغلنا عمو الوراق كلهم جاهزات نردلكم الاسهم باسمكم
عاصم:تسلمي يابنتي ربي يحفظك
ريم:ويخليك تاج فوق راس الكل
طلعو وخلوهم بروحهم
داني:
ريم:قعمز عندنا اشياء نحكوها
داني قابلها
ريم:في الفتره القصيره اللي عشتها معاك قدرت نحفظك اكثر من روحك وعارفه انه علاقتي القويه باكرم مضايقاتك ويمكن. شكيت فينا
داني اذكر يوم تعارك مع خوه وسكت
ريم:خليني نحكيلك سبب علاقتي القويه بخوك
flash back
وقت كان عمري 13سنه ديما نقرا في جنان حوشنا وكنا ساكنين فوق حوش جدي عمي مدمن مخدرات وشرب
في يوم روح مانعرفش شن صارله حاول يعتدي عليا ولما صديته ضربني ضرب عذاب ونتفلي شعري خداني معاه في السيارة عيطت ناديت ماحد عبرني وبوي ولا دورني امي استنجدت باكرم وقدر يلقاني بسهوله لانه عمي داخ ووقف سيارته ولما حكيتلهم اللي صار ببساطه بوي كذبني وضربني لما خوه قاله لقيتها هاربه مع ولد قعدت في صدمة وماقدرتش نتكلم وقت طويل لين جي اكرم وخداني مشينا لتركيا وقعد معاي لين رجعت طبيعيه ردلي قوتي واكثر علمني نكون بارده ومايقدرني حد علمني ديما انا اللي ننتصر ومانسمح لحد يكسرني اي وانتقمت من عمي وسيبت عيلتي لانه بوي تخلا عليا اكرم كان بالنسبه ليا الاب اللي انحرمت منه وماعمري شفتله بنظره ثانيه ولا هوا وديما مهتم بيا وصايني كأني ورده وخايف تذبل فاتوا لو يطلب قلبي وحياتي كلها نعطيه بدون اي تردد. end back
داني:مافكرتش
ريم:ايه عارفه المهم حبيت نحكيلك باش ماتقعدش حاقد عليه لانه بابي يدير اي شي عاخاطر مانزعلش ومانضايقش داني هدا خوك الوحيد سندك صدقني وقت تحتاجه مستحيل يتراجع ماتخسراش ورد بالك من روحك ديما سلام طلعت وخدت معاها قلبه. 💔
فاتو اسابيع وجي وقت العرس"سونيا وريهام وفاتحه عمر"
مشي كله حلو وكيف مايبو وكانو مبسوطين هلبا
وجزء منهم كان زعلان طول الوقت اريج اللي اطلقت وخسرت راجلها وبنتها اللي معاش تحكي معاها بكل 😔
يوم الحفله
خش اكرم للدار شافها لابسه قفطان كبير احمر يلمع طالعه زي الملكات وجمالها خطف عقله
ايلاف:شن رايك
اكرم تلفت خدي ساعته ودخان:كويسه هيا كان كملتي
ايلاف قربت منه:حبيبي ماتبيش تسامحني
اكرم:الولاد يستنو فيا اطلعي بالك
ايلاف خدت عبايتها:بهي
اكرم:البسي نقابك
ايلاف ابتسمت:حاضر
بعد تمت الحفله كل وحدا طلعت مع راجلها
عبدو:ربي يباركلي فيك ياروحي
ريهام:امين
عبدو:خليك شويه معاهم وتوا نجي نركبك
ريهام:حاضر
سونيا خايفه ودموعها ماوقفوش
مصطفى بعد كمل الصلاه:خيرك تبكي
سونيا:انت معاش تحبني
مصطفى:هوا انا نقدر
سوتيا:بهي علاش
مصكفى:توا انتي وشطارتك كيف ترضي راجلك
سونيا:كيف
مصطفى قامها بين يديه:تعالي نقولك كيف
اما في حوش العرس وتحديدا فوق السطح
عمر:اخيرا مرتي وحلالي
رنا:نحبك
عمري باسها وضمها في حضنه:ربي مايحرمني منك ياقلبي
ايلاف طلعت تبكي
اكرم طفا الدخان:خيرك
ايلاف شدت فيه بقوة:تعبت خلاص مش متحمله بعدك عليا حبيبي سامحني نوعدك ماتتعاودش بس ماتبعدش عليا مستاحشاتك كوكي
اكرم في لحظه نسا كل شي وحضنها بقوة:اشش خلاص ياعمري معاش تبكي
ايلاف:استاحشت حضنك
اكرم:اهو معاك حبيبي خلاص
ايلاف:نعشقك
اكرم:تعالي نتفاهمو في دارنا 😍😘
اريج ندمت عاكل شي داراته ومشت اعتذرت منهم
اما سهام بوها زوجها لولد قريبهم اللي جي طلبها وتزوجت بدون عرس وللاسف بدت ترقد على طريحه وتنوض على طريحه وماحد من العيله مدورها
فاتو ايام وشهور وسنين
وفي يوم عيد الفطر كانو الكل متجمعين في جنان حوش العيله اللي لطالما شهد على قصص الحب ❤️✨
اكرم:تي اقلب وجهك يافرخ
رامي:خلي الصغار بلا معيله
اكرم:بنتي مايقربها حد معليشي ممنوعه اللمس
سونيا:شوفي راجلك الاهبل
اكرم يلعب في بنته:مني حبيبة بابي
نادين:انا انا 😍😍
اكرم:سلمها سمحتي
سمعو صوت تكسير خشو يجرو
رنا:ايي رجلي
سارة:خيرك
رنا:تكسرت الطاسه خشلي المرش في رجلي 😭😭
سارة:بهي قعمزي نشوفهالك
رنا:الا مايمسني حد
اكرم يضحك:نادولها المسكن
خش عمر:خيرها بنتي
رنا:عمر 😢😢شوف رجلي
عمر:ترا نحالها المرش خلاص ياروحي
رنا حضناته وتبكي
اكرم:رهو ذوب عليك
عمر:سكر بلا خفه دم
رامي:مابعدك
عمر:عاجبني
رنا:موتو قهر 🙂
ريناد:هيا تعالو القهوة واتيه
طلعو الكل صوت ضحكاتهم العالي وجمعتهم الحلوة
اكرم اللي تعب العيله كلها من لما رجع للبلاد اخيرا استقر ودار عيله شد جزء كبير من الشركات ومزال يحب ايلاف زي اول يوم شافها عندهم بنت والثاني في الطريق
سونيا عايشه سعيده مع مصطفى اللي لقاته عوض عاكل جروحها عندهم بنت
عمر ورنا عايشين في عالمهم الخاص بعاد عالكل ماعندهمش صغار بحجه انهم يبو يعيشو حياتهم
ريهام وعبدو كل يوم حبهم يكبر ومبسوطه مع عزوزتها اللي تحبها ومهتمه بيها زي امها عندها ولد
رامي لينا كل يوم تتأكد انها اختارت صح وتحمد ربي انه ماضاعش منها وقدرت تعوضه عاكل السنين اللي بعدت فيها عليه عندهم زوز ولاد
احمد استقر في مصر بحكم خدمته عايش سعيد مع لبنى
اخر الاسبوع ايلاف جابت ولد
اكرم:حبيبتي بدي عندها خو جديد
نادين:حاق بابي
اكرم:حق ياعويناتي
ريم:حلو خدت مكاني شكلها
اكرم:فرخه استحشناك
ريم:وانا اكثر والله الف مبروك فوفا
ايلاف:الله يبارك فيك
داني:هي نستاذن انا يتربا في عزك
اكرم:نشوفه عندك
يوم الاسبوع ✨
دايرن حفله كبيرة ومحتفلين بالحفيد الجديد
داني:قعدا جميله ومستفزه
ريم تلفتت:وحضرتك مزال زي ماانت
داني:على حطت ايدك
ريم:اممم
داني:مزال زعلانه مني
ريم:ابدا
داني:بهي تتزوجيني
ريم ضحكت:موافقه ❤️
وتزوجو بعد شهر واجتمعو اخر ثنائي في روايتنا ❤️
الحب الطاهر النقي والحقيقي عمره مايتغير او ينقص بالعكس كل مافات وقت رح يكبر اكثر ❤️
الصداقه والاخوه روابط حلوة وجميله وممكن تكون اقوا من الحب والسند اللي ديما يقعد ثابت
النصيب النصيب نصيب حد ماياخده حد لو مهما صار وفاتو سنين نصيبك يجيك لعندك
وديما اوثقوا في عوض ربي وتأكدو انه بيعوضكم باجمل مما تتصورو ❤️
واخيرا نحب نشكر صديق #موسى اللي كان معانا بشخصيه اكرم ونبي من كل شخص قرا روايتي يوجهله دعوة حلوة من قلبه
نتلاقو في رواية جديده lole saad
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
