إلى أين تصل

6

رفع ايده و اشر على مرأت عمي ابو ظافر و گلي ـ عمي المرأة تحلف بالقرآن ما مسويتلچ شي ليش تتهموها؟ هاي هية تابت ، الاخوة بهذا العمر و يتعاركون لإن توهمتي

مرأت اخوية واگفة يم الباب و ترد على عمي ـ خالي و الله تقرا دفتر الميت الي انطاها اعضائه و تباوع افلام رعب أكيد هيچ تتخيل ، بس هم يكبرون السالفة

التفت عليها مجتبى و صاح بيها ـ انتي بعدچ هنا اطلعي برا

عمي جر إيد مجتبى و گلة ـ عيب احترمنا

مجتبى سِحب ايده من عمي بكل قوته و رد ـ عمي هاي ما تستاهل احترام ، ذاك اللسان تمده على امي

ردت مرأت اخوية ـ و الله يستاهلن يتهمن العالم و هن مدري شيسون ، تقرا كتب موتى و من تتخيل تعالوا خالتي مسويتلها عمل

سألني عمي ـ يا دفتر هذا؟

مسحت دموعي و عدلت گعدتي و اني ارد عليه ـ دفتر مذكرات قريت منه صفحتين و خذاه استاذ علاء دزاه ابن عم المتبرع يريده ، كلشي ما بي لا سحر و لا شي يخوف حچي عن أيام القتال بالجبهة و راح يصير اسبوع من اخذوه

خالتي "سماح" گعدت يمي و خلت راسي على صدرها و هي تگل لعمي ـ و الله نسوانكم مسويات شي و احنا إن شاء الله ناخذها للسادة ، عايفين ام السحورة و واگفين على بتنا المسكينة تحاسبوها 

رجعت الهوسة و العرك و هالمرة يمي

ظافر رفع صوته ـ أريد اگول شي ، ادري كلكم ما تردون تسمعوني بس هي حچاية حق

صكيت سنوني و اني اراقب كل كلمة تطلع منه ، شلون حبيت هيچ بشر ! شلون تصورت راح اعيش وياه !

كمل كلامه ـ امي من خلت السحر داخلة و گاعدة يم الكنتور بحيث عبايتها مغطية الفراغ بينها و بين الكنتور ، مادة ايدها بجنطتها من تحت العباية و مطلعة العلاگة و شامرتها ورة الكنتور

رفع اصبعه و اشر على الموجودين يلا كمل ـ كلكم شفتو سكينة مغمضة عيونها غير عمي و ابوية الگاعدين گبالها و حاجبين عنها امي
ما واحد فكر شلون شافتها من خلت السحر ؟

خلة عينه بعيني و سألني ـ سكينة شلون شفتيها؟ و لا تتهربين من السؤال بحجة ما اريد احچي وياك

البيت كله يباوعلي حتى خالتي ندستني و تگلي ـ احچي

دنگت و جاوبت بتردد ـ صح مغمضة بس شفت كلشي حتى شذرة محبسها

ابتسم ظافر مسهتزأ و أشر علية و هو يگول ـ هاااا و تگلولي ليش عفتها بتكم مريضة لو بيها شي ، شلون تشوف الشغلة و هي مغمضة بتكم لو مخاوي...

ماخلاه مجتبى يكمل ضربه على وجهه
وگعه بالگاع و گعد على صدره يريد يضربه بعد

الولد جروا مجتبى عنه و الباقيين طلعو ظافر برا ، بس ياريته سكت و هو بالصالة يصيح ـ و الله البت بيها شي و هم ضامين