اختنگت و زادت سرعة نبضات گلبي و الجهاز صار ينطي اشعار
ابوية گام و إجة يمي يسألني شبية، و اخوية طلع ركض حتى يصيح الطبيب
مرافق عباس هو و هذا الولد وگفوا يم الباب و مرافق عباس سأل ابوية ـ يمنا طبيب بغرفة عباس نصيحه؟
رد عليهم ابوية ـ ياريت و الله
راح نفس الولد "ابو العلاکة "يصيح الطبيب ، خليت ايدي على اذني بس كون ما اسمع صوته
الطبيب إجة هو و الممرضات وحاچاني ـ ها سكينة خيرچ شعندچ؟
وخرت ادية عن اذني و گتله ـ بس طلعني من هالغرفة كلشي ما أريد
دخل اخوية و طبيبي وياه
أول ما فات طبيبي سمع كلامي فبسرعة التفت على امي و گلها ـ حجية شتفقنا؟
امي استغربت و جرت عبايتها عدلتها يلا ردت عليه ـ محد حاچاها، هسة چانت تاكل كلشي ما بيها !
دنگ طبيبي علية و سألني بهدوء ـ اكو احد مضوجچ ؟ اكو أحد متصل بيچ؟ انتِ مو زغيرة بنية شابة و عاقلة لازم تتعلمين تواجهين البشر مو تكبتين مشاعرچ
باوعت للولد" ابو العلاگة" بعده واگف بالباب
اشرت عليه و گلت لطبيبي ـ خل يطلع هذا
فتح الولد عيونه على وسعهن و رفع ايده لفوگ و گال ـ و حق علي بن أبي طالب ما اعرفها
هز الطبيب راسه للولد حتى يطلع و الشاب الثاني هَم سحب ايده خذاه و راحوا فاتوا لغرفة المريض "عباس"
نظراتهم خنگتني ، اني مو مخبلة و الله سمعت صوته
و الطبيب يگل لأهلي هذا "اكتئاب بعد العمليات الصعبة"
اكو مرأة تعرفت على امي بالمستشفى و كل عصرية تجي يمها
چان بيومها تگل لأمي ـ بتچ هاي محسودة لو مسويلها عمل
و امي الله يوفقها ما خلت شي ما گالته عن ظافر و شلون صارت المشكلة
ابوية صار يجي يحچي و اني ما ارد عليه حتى ما اباوع بوجهه مگضيتها عليهم بچي
حتى الطبيب النفسي ما سولفت وياه
آكل و انام ، افتح نت هدى بس تسولف و اني اقرأ و ما ارد عليها
خلصت الشهر هيچ الى أن اجانا خالي الچبير من النجف
أخذ ابوية و طلع، فد شوية و رجع گل لأمي ـ تعاي حجية
اخذها و عافوني وحدي
ثواني و فات ابو "صاحب الأعضاء"
نزيت من شفته ، خالي الچبير واگف يم الباب لوحلي و رد الباب ورة الرجال
گعد الحجي على الكرسي گبالي و اني صرت احرك كعب رجلي على الفراش من التوتر
باوعت بعينه ابتسم و سألني ـ شبيچ عمو؟
دنگت ابچي
گلي ـ شنو بعدج ضايجة من مرأت ابني ؟ سولفلنا عباس ابنيتنا مو قصدها تراويچ حلقتها و الله حيل ندمانة
DU LIEST GERADE
إلى أين تصل
Aktuelle Literaturنبذة عن القصة بعد علم (سكينة) بعلاقة تشوبها الخيانة بين اقرب صديقة الها و خطيبها (ظافر) تتعرض لأزمة قلبية ينتج عنها مرض قلبي و فشل الكلى فتزرع كلية جديدة من مجاهد بالحشد الشعبي و يبتدي التغيير بحياة و نفسية سكينة بواسطة دفتر المجاهد
