بسمة غضبان

توضيح

اتمنى من اي شخص يقرأ الي راح اكتبه يحس و يخلي باله ويه كل كلمه ..

انتو غالين و اهلكم غالين و اطفالكم غالين .. لا تكونون سبب باذيتهم بطلعاتكم الي مو ضروريه

بما ان عندي ما حبيت انصحكم و اوضحلكم
طبعا اني ممرضه قبل ايام  دخلت عمليه لمريض ما اعرف بي كورونا اصلا ..

لكن للاسف بعد العمليه بوقت و تحديدا قبل يومين  يالله عرفنا انو بي الفايروس ..

اني حاجره جهالي و حتى زوجي على كد شغله و يرجع ما نطلع ولا نستقبل بعد بسبب الوضع و الحالات الي شفناهن كبال عيونا
اداوم بمستشفى اهلي و ما اقترب من ردهة مرضى الكورونا ..

اطفالي صغار عندي اكبر طفل عمره 11 سنه و اصغر طفل عمره سنتين

اني ما خايفه على نفسي بس اطفالي اني ليل نهار منشغله بيهم بالاضافه الى ابو زوجي و امه كبار بالعمر ..

اتمنى من اي شخص يقرا البارت يتحذر
الوضع خطر و ما يتسيطر عليه ..
اني رغم كل الوقايه و الحجر لكن طلع التحليل ايجابي

فكرو باطفالكم باهلكم و خاصه باهلكم لان اذا لا سمح الله صار عليهم شي الكبار مراح يتحملون نهائياا

طرق الدفن مراح تخلي احد بعد يشوفك و كلشي صعب
و خاصه احنا بالعراق الوضع كلش ميساعد اكثر من ما الكل يتصور

تروح مستشفى حاله مزريه جدا ..
الحال متازم لدرجه كلولي بالحرف الواحد
" ما عدنه مكان تريدين تموتين تعالي هنا و اذا تردين حجري نفسج ببيتكم و اشتري من مالج الخاص جهاز تنفس او اوكسجين و عالجي نفسج بس لا تبقين "

يابه جهال و ام زوجي جبيره بالعمر و اني ملامستها شلون
" بالتحليل ما طلع اذا تازم حالتها عود ننطيها اوكسجين قابل شبيدنا شنسويلها "

و اذا اريد الحجر مالتهم بغرفه من احدى المراقد للمصابين لازم ادفع باليوم 75 الف و اني اشتري الاوكسجين و حتى الفراشات .
زين اني اكدر انطي الفلوس .. بس الما عنده منين يجيب ؟

اذا هي الكمامه جانت تنباع بسعر رخيص جدا و وره الازمه صارت الكرتونه ب 50دولار

🙏🏻 الزمو بيوتكم ولا تطلعون ابدا لخاطر عوائلكم تره العراق عامه و المرض خاصه ميرحم
لا تستهانون الوضع كل يوم ديصير خطر زياده

و اتمنى منكم الدعاء لان كلش محتاجه دعائكم الي فتره عصيبه .. و اتمنى تبروني الذمه اذا قصرت بشي ..