الفصل الثامن عشر
______________
رد عليا بهدوء مميت
عمار: جوابك وصل! مكنتش..مكنتش حابب الطريق يوصل بينا لهنا..والحته دي..بس الحاجات دي مبتحصلش بالعافية.. أنا عايز راحتك سواء في قربي منك أو.. أو العكس.. انتي..أنتي طا
بلعت ريقي وأنا بسمع كلامه..وكل مايقول كلمة أحاول أمنع دموعي إنها تنزل..!..لحد ماكان هينهي الموضوع بأكمله...محستش بنفسي غير وأنا بمنعه عن الكلام وإيدي فوق بوقه وملامحي كلها هلع وفزع...بص ليا بصدمة..محستش بيه غير وهو بيشدني لحضنه..الحيوان المتحرش اللي بيستغل كل فرصة عشان يقفش فيا دا...صحيح كنت متوترة ومفزوعة من حركته..لكن في نفس الوقت ابتسامة غبية احتلت ملامحي..أنا مبسوطة!!
زقيته بعنف وأنا بتكلم بشراسة: أنت استحلتها ولا ايه
ابتسملي إبتسامة واسعة بقت أسلوبه في الأونة الأخيرة..قرب تاني..فزقيته تاني..كشر بملامحه: أنتي مش فرفوشة كدا ليه!
فرح: أنت بالنسبالك الفرفشة ازاي أصلا
عمار: كتيير..كلمة حلوة..هدية حلوة..مسكة ايد تدفي البرد دا..ابتسمته زادت..أو
فرح: اخرس..اخرس يا عمار..أنت تفكيرك كدا ازاي..افتكرتك محترم
رفع حاجبه: أنتي واخدة عني فكرة وحشة جدا..ايه علاقة الإحترام بدا..دي حاجه ودي حاجة..
غيرت الموضوع: طب افتح الباب بقي
عمار: ليه كدا ماكنا ماشيين حلو اهوه..
فرح: افتح يا عم عايزة أشوف هند وأسئل معـ.. معـ.. معتصم..أنت بتبصلي كدا ليه
جز علي سنانه وابتسم ابتسامة مخيفة : لاء خالص..بفكر ازاي أقتل معتصم دا...
ابتسمت بتوتر: والله معتصم طيب..دا زي أخويا
بص ليا وكأنه افتكر حاجة..مسكني من لياقة هدومي وهزني واتكلم بنبرة شبه صراخ
عمار: وسيباله ايدك..أمال فين كلمة متحرش اللي كنتي ملقباني بيها...لاء وشدك لمكتبه..عايزة تقعدي في مكتبه يابت!. لاء ولوحدكم
فرح: أنت ليه محسسني انك قافشني في شقة مفروشة..دا مكتب لدكتور وفي مستشفي
همس ليا بنبرة تخوف: إياكي ثم إياكي ألاقيكي واقفة مع زفت معتصم دا لوحدك
فرح: معتصم!..دا زي أخويا
بص ليا بنبرة مكر: طب ماتخليني زي أخوكي زيه واهو الباب مقفول وهو مشغول مش هيجي والكنبة عريضة وتسع من الحبايب ألف
فرح: عمار أنت..أنت قليل الأدب والله..أنت اتجننت
عمار: أنا مش مجنون بس أي حد هيشوفكم هيتخيل نفس الفكرة دي
رديت عليه بعنف: لاء مش كل الناس دماغهم قذرة كدا
عمار: جبيلي واحد من الناس دول مفكرش كدا!..فرح دا مش حوار نديله اهتمام بس لو سمحت حطي حدود ربنا بينك وبين معتصم لو سمحت ممكن
هو..هو عنده حق منكرش ان معتصم في يوم من الأيام نبرته رقت معايا ونظراته مختلفة لكنه اتغير بعد جوازه....أومأت له بهدوء
عمار: اتفقنا؟
ابتسمت له: اتفقنا
عمار: والله يابنتي مش عارف انتي مش موافقة ليه مالكنبة حلوة اهي
فرح: عمار!
عمار: سكت عمار اهوه
معتصم كان زي صديق ليا..كان بيساعدني في أغلب أمور حياتي واللي كانت الدراسة والمذاكرة..فكرة انه كصديق معدش هيبقي موجود مؤلمة..اه لو..لو! ليه لاء..اتكلمت بإندفاع: عمار ايه رأيك نبقي صحاب
بص ليا وضيق عنيه..بعدها بحلق باستغراب: صحاب!
ابتسم ابتسامة واسعة: وليه لاء..بس صحاب بأنهي معني
فرح: صحاب يا عمار عشان تعرفني كويس وأعرفك كويس بعيد عن موضوع الجواز واهو كتب الكتاب يحل لينا
عمار:،دا معناه انك مقتنعة بكتب الكتاب
فرح:عمار بلاش تفكرني باليوم دا
عمار: طب والله كان يوم عسل لحد..بص ليا باشمئزاز..لحد مانكدتي عليا فيه
كان في سؤال في بالي..فسئلته من غير تزويق: عمار أنت حسيت بإيه لما سمعت كلامي يومها
عمار: اشمعني
فرح: مش عارفة بس جه في بالي السؤال دا
اتنهد وخد نفس طويل: ليه السيرة دي
اتكلمت بإحراج من نفسي قبله: حاجة في نفس يعقوب
عمار: كنت مخنوق وقتها مش منك لأني توقعت كدا بردو..كنت مخنوق لأني فرضت عليكي حاجه زي كدا وكنت فاكر اني كدا بقربك مني من غير حواجز أو أي حدود..بس بردو ليه
افتكرت تخيلي لرد فعله وقارنت بينه وبين الحقيقة اللي عمار بينها قدامي..ساعتها حسيت بإمتنان لعمار وقتها..ابتسمت ان علاقتي بيه اتحسنت..
فرح: صحاب؟
ابتسم ليا ابتسامة صافية: صحاب..فتح دراعه.. نحضن بقي
ضربت ايده: عماررر!
عمار: قلب عمار
حسيت بحرارة في الجو والحاجات اللي بحس بيها في بطني وأنا معاه..زادت أكتر وأكتر
فرح: طب افتح بقي
عمار: حاضر
لسه بيفتح الباب لقي معتصم بيخبط علي الباب..معتصم سحب ايده واتكلم: ايه دا أنتم كنتم لوحدكم جوا
عمار اتجاهله: ازيك يا دكتور
معتصم: امم كويس منورنا يا حضرة الظابط..
طلعت ورا عمار وسألت: هند عاملة ايه دلوقتي
معتصم التفتلي: هي حاليا محتاجين نبرمجها ونفهمها ان المرض النفسي مش عيب نهائي..وانها لازم تتعالج انتي قلتي انها عندها ولاد صح
فرح: اه تلاته ولدين توءم وبنوتة
معتصم: هي كانت زميلتك او تعرفيها مجرد صداقة جديدة ولا قديمة
فرح: لاء زميلة ليا وصداقة قديمة بردو..أقدر أشوفها
معتصم: معتقدش انه له لزوم نهائي دلوقتي
عمار: طب احنا هنمشي بقي..اتشرفت بمعرفتك دكتور معتصم
معتصم ابتسم بمجاملة: الشرف ليا طبعا اتمنى تكررها
عمار: أكررها والمستشفي لاء الموضوع مش هيبقي حلو خالص
معتصم ابتسم: لاء متقلقش
عمار ضحك: لاءوفي الحالة دي أقلق..أنا عريس وعايز اتجوز..لسه مدخلتش دنيا
معتصم: ربنا يوفقكم
عمار بنبرة حسيتها ليها مغزي: ويوفقك مع اللي تختارها
معتصم سكت وبعدها كمل: ان شاء الله
عمار التفت ليا: يلا
فرح: يلا
خرجنا من المستشفي وركبنا العربية..حسيت اني زي الفراشة..من غير قيود أو أفكار تقيدني..
عمار: هتروحي المستشفي
فرح: لاء نبطشيتي بليل
عمار: طب وأنا كمان مش هروح الشغل النهارده زيك..اشمعني أنتي
بصيت له بصدمة: بسهولة كدا
عمار: يابنتي أنا ليا بردو معارف ومفيهاش حاجة تزويغ النهاردة
فرح: أنت زوغت قبل كدا؟
عمار:،مش كتير بس اه
فرح: اه..طب بما تزوغ هتعمل ايه
عمار: شكلك غبية صح..أنتي هتزوغي وأنا هزوغ يبقي هيجمعنا تزويغة واحدة..ودا ليه؟
فرح: ليه؟
ضربني علي جبيني بخفة
عمار: عشام نخرج سوا
فرح: وقلت لبابا
عمار: لاء دا دورك انتي بقي يا بطة
أنا أقول لبابا أنا خارجة مع عمار لاء دا..دا
رديت بنبرة هلع
فرح: مستحيل طبعا انت بتهزر..ياعمار؟!
عمار: فرح انتي مراتي يعني مش بنعمل حاجة حرام زائد ان عمي محمود مش هيرفض بس قوليله
بس..خليها تيجي من طرفك المرة دي
مركزتش في بقيت كلامه بد ماركزت في كلمة •مراتي•..حسيت بإحساس جديد وكأني حابة أسمع الكلمة دي تاني وتالت..حسيت بالتوتر من تفكيري..بصيت مع عمار اللي مركز مع كلامي..ورددت بتوتر
فرح: بس بس..هقوله ايه
عمار: هتقوليلو يابابا يا سكرة
فرح: لاء والله هقوله ياسكرة
عمار: أيوا اسمعيني زي مابقولك كدا..ياسكرة أنا خارجة مع جوزي النهارده مترنش علينا كتير بقي..وسيبنا علي راحتنا
بصتله باستنكار ورديت بشراسة: أنت بتهزر يا عمار..عايزني أقول.. أقول لبابا..أنت أكيد بتهزر..لاء لاء قوله أنت
مسح علي وشه: كنت عارف انك جبانة..أنتي خايفه من والدك؟؟!
فرح: لاء مش خايفة بس أنا بتكلم عن الفكرة..بص كلمه أنت
عمار: هتكلميه يا فرح و يلا بقي متاخرناش
مسكت فوني علي مضض: الو..الو يابابا
بابا: الو..في حاجه
اتكلمت بإندفاع: بابا أنا خارجة مع عمار
بابا: امم خلاص مشكلة
بس الموضوع سهل للدرجة دي..كمل كلامه
بابا: بس اديني عمار شوية ممكن
رديت باستغراب: حاضر..
بعدت التليفون: بابا عايز يكلمك
عمار: هاتي
عمار خد التليفون..وفضل بيسمع وبعدها ضحك من كل قلبه..ضحكته كانت..كانت مميزة أول مرة أسمعه بيضحك مم قلبه..سرحت فيه تلقائيا.. أول مرة أخد بالي من ملامحه..بشرته قمحاوية علي سمار خفيف..هيئته مش أوفر لاء شاب عادي..بس بالنسبة ليا كنت دايما شايفاها فيه حاجة مختلفة..حاجة من نوع تاني!..معرفلهاش اسم ولا تصنيف!!
فوقت من سرحاني علي عمار: اتفضلي تليفونك
ابتسم ليا: هاه نخرج
فرح: ماشي بس خليني أعدي علي البيت بس أظبط أموري
عمار: كنت لسه هقولك بردو..تمام..
وصلنا البيت..وطلعنا بالأسانسير..قدام الباب..
عمار: هرن عليكي..ماشي
فرح: ماشي
فتحت الباب بالمفتاح..سمعت ماما وصوتها بيقرب
ماما: أنت جيت يا أحم..جيتي بدري يعني
فرح: نبطشيتي بليل..أنا هدخل البس
ماما: تلبسي ليه؟
فرح: خارجة مع عمار
ابتسمت ابتسامة واسعة: طب ادخلي البسي
فرح: هما الولاد فين
ماما: البنوتة نايمة لكن الولاد قاعدين قدام التليفزيون بيتابعو كرتون
اتنهدت بحزن: طب وهما عاملين ايه
ماما: الواد اللي اسمه حسن كل..لكن التاني محطش في بوقه لقمة..الواد ساكت كدا ومش بيتنطط زي أخوه..بحاول أرفه عنهم بعصير ولا حلويات ولا حاجة..فدخلت عملت كيكة ليهم..وبردو واحد كل والتاني مرديش
لمعت في راسي فكرة..ابتسمت: ماما هتلاقي غيارات في شنطتهم..لبسيهالهم عبال ما ألبس أنا
ماما: ليه؟
فرح: اسمعي بس الكلام ياسوسو يلا يا حبيبتي
ماما ردت بصدمة: سوسو!!
كتمت ضحكي بالعافية وسيبها لصدمتها
دخلت أوضتي..وغيرت هدومي..بصيت لنفسي في المراية حسيت ان لبسي كله فورمال..مينفعش خروجة أو غيره..قعدت بحيرة أفكر..بس ملقتش اجابة..طلعت لماما وسئلتها بخنقه: ماما أنا لبسي كله رسمي مينفعش خروجات خالص
ماما: ودي حيرة أما انك خايبة.. عندك دولاب أختك لسه شارية من يومين هدوم جديده..مش بتبطل شري..خدي حاجة منهم
ابتسمت ابتسامة واسعة ودخلت علي دولاب هنا..لقيت هدوم..لقيت فستان بس بزراير من قدام قمشته خفيفة لونه لون السما وهي صافية وكمان واسع بحزام من الوسط باللون الأبيض..لبسته وفتحت أخر زرارين عشان الحركة ولبست جينز..لقيت طرحة مشجرة أرضيتها من نفس لون الحزام وكوتش أبيض وساعة من نفس اللون..لبستهم وبصيت للمراية برضا..حسيت اني صغرت سنين وكأني..كأني من سن هنا.. لو الشغل له فايدة..ففايدته انه حافظ علي جسمي.. بصيت علي التسريحة جذبني ملمع شفايف وردي خفيف..ايه يعني مايضرش..حطين منه مع تنت..وقفت بثقة وأنا بلف قدام المراية..طلعت بره وكلي ابتسامة ثقة..
فرح: ماما
ماما اتلفتت ليا وبحلقت بصدمة..ورمشت بعينيها أكتر من مرة..
ابتسمت عليها: ايه حلو
ماما قربت مني ولففتني: يخربيت كد..أنتي عملتي ايه في نفسك
فرح: ايه وحش!
ماما: قولي ايه اللي مش حلو..اتبدلتي..طلعت البت هنا قادرة بردو..قعدانها قدام مواقع الموضة طلعت بفايدة..أنتي هتخرجي كدا
رديت باحباط: اه
ماما: لاء أنا لازم أبخرك من عين زينات وبناتها
.هو أنتي بتلبسي زي البناات كل يوم..كملي لبس العيال لحد ما أرجع..لقيت حسين لابس أما حسن كان لسه ملبسش..وطيت البسه
حسن بانبهار : ايه دا يا خالتو انتي حطة روج زي بتاع ماما
فرح: ايه رايك يا أبو علي حلو
حسن:جميل..قرب مني وباسني..ماما لما بتحط أنا ببوسها وهي بتبوس حسين..عشان هو مش بيحبه
ابتلعت ريقي بألم: وحشتك ماما يا حسين
حسين: كتير كتير..عمرها مانامت بعيد مش معانا..كانت دايما بتنام معانا حتي لما كنا عند ابن عنات
ضحكت علي كلامه: ابن ايه؟
حسن: ابن عنات..ماما كانت دايما تقول ربنا ياخدك يابن عنات انت وأمك ال ال نسيتها!
فرح: خلاص مش مهم دلوقتي..يلا نمشي
تليفوني رن: الو
عمار: يلا
بصيت لماما اللي جاية: اسبقني يا عمار دور العربية أنا جاية حاضر
عمار: ماتتأخريش ها
فرح: حاضر..يلا بقي
عمار: سلام يا بطتي
همست: سلام
ماما وقفتني أنا والولاد وبخرتنا يجي عشر مرات
خدت الولاد وركبنا الأسانسير
حسن: هو احنا رايحين فين ياخالتو
فرح: أنت تحب تروح فينو
رد بحماس: الملاهي..هتبقي خروجة حلوة خالص يا خالتو
فرح: خلاص نروح الملاهي
بصيت لحسين الساكت: وانت ياسونة حابب تروح فين ياسونة
حسين: اي حته
فرح: يعني مش عاوز تروح الملاهي أو المول..أو غيره
حسين: اا
بلعت ريقي..ونزلنا من الأسانسير..خطر في بالي فكرة..نزلت لحسن وشوشته: أنت عارف عمو بتاع امبارح صح
حسن: اه
فرح: اجري هتلاقيه في عربية حلوة..قولو خدني الملاهي ياعمو وحيات أبوك الاهي تتجوز
حسن: هيودينا الملاهي؟
فرح: اه طبعا اجري أنت بس
حسن ابتسم..وجري بحماس..وأنا بصيت لحسين الجامد..وطيت وشلته عله يتكلم..لكنه فضل ثابت
..طلعت علي عمار لقيته واقف بيبص ليا بغيظ وحسن عمال يتنطط وماسك رجله:
خدني الملاهي ياعمو وحيات أبوك الاهي تتجوز..
خدني الملاهي ياعمو وحيات أبوك الاهي تتجوز...خدني الملاهي ياعمو وحيات أبوك الاهي تتجوز.. خدني
عمار صرخ: ماتبس بقي!
حسن وقف شوية وبعدها كمل تاني:خدني الملاهي ياعمو وحيات أبوك الاهي تتجوز..خدني الملاهي ياعمو وحيات أبوك الاهي تتجوز
عمار بص ليا بغيظ: خلصيني من المصيبة دي
ضحكت علي منظره..وناديت: حسن يلا يا حبيبي علي العربية..يلا بسرعة..
عمار لف وركب..وأنا حطيت حسين ورا..وركبت جمبه
عمار: هنوديهم فين
بصيت له: هنوديهم!..لاء احنا مش هنوديهم في حته
عمار: حد هيجي ياخدهم يعني
فرح: لاء
رف ليا حاجبه وبص ليا: امال ايه
ابتسمتله ابتسامة واسعة: هنتفسح مع بعضينا
عمار مسح وشه بعنف وبص ليا بغيظ وغضب..!
في الملاهي
بصيت لحسن وحسين: نبدأ بايه الأول
حسن بابتسامة بريئة: كلهم كلهم حلوين يا خالتو ..
بوسته: يا حبيبي أنت
عمار: ما أنتي بتعرفي تبوسي اهوه
بصيت له بغيظ: عماررر
عمار: بلا عمار بلا بتاع
فرح: أنا من رأيي نتقسم ونرجع تاني..أنا وابو علي وأنت وسونة
عمار: نعمممم!
فرح: تؤتؤ..عمار عيب!..يلا ياابوعلي
حسن بحماس: بلا يا خالتو..
مسكت ايده وطلعت لساني لعمار وهو بص ليا بغيظ..
لفيت أنا وحسن كتير. حسن طيب جدا وسهل يتضحك عليه..وطفل كدا في نفسه..أما حسين تحس انه مكبر نفسه..مابيلعبش كتير..مش بيتنطط عشان حاجة عايزها!..راجل كدا في نفسه!
اتصورت أنا وهو كتير وقابلنا عمار ووقفنا عند النافورة واتصورنا بأوضاع مختلفة..مرة مع عمار..ومرة مع حسن..ومرة مع حسين..والعكس.. وكمان اتحركنا بحرية..وشوية وعمار بدأ يفك معانا ويتجاوب..بالعكس دا كان بيشدنا وحسين بردو بقي يتنطط زي الأطفال..وبقي يقول انه جعان وعايز وعايز زي اخوه..اتغدينا وهيصنا..وعمار شغل مهرجاناات..ورقص معاهم وهما رقصو..جه الليل ومعاها احتكت كوتشات العربية بالأسفلت..ارتدينا علي أثر الفرامل..بصيت للولاد لقيتهم في سابع نومة
بصيت لعمار المبتسم وهمست: شكرا علي اليوم الجميل دا
عمار: المفروض أنا أشكرك..أنا ماتبسطتش كتير قد ما اتبسطت النهاردة بجد
ابتسمت..عمار: تدوم
فرح: هي ايه
عمار: الإبتسامة الحلوة دي
ارتبكت: يلا نطلع
عمار: يلا
شيلت حسين..وعمار شال حسن..وبابا فتحلنا الباب.. وعمار دخل الولد علي السرير
عمار: يلا تصبحي علي خير
فرح:وأنت من أهله
عمار: تعوزي حاجه
ابتسمت: لاء عايزة سلامتك
..قلعت الولاد كوتشياتهم..أما هدومهم فمعرفتش..قعدت قدام التسريحة وأنا بقلع حجابي وشردت في اللي حصل طول اليوم..والابتسامة الهبلة دي مش مفارقاني..لقين تليفوني بيرن..فتحته من غير ما اعرف مين:الو
انتفضت علي الصوت اللي سمعته ووقفت..وكررت
بضحكة من بين دموعي اللي نزلت : سهيلة!
#يتبع
#عمر_بيبتدي
#FarahElDesoky
______
تفاعل بقي يا بشر..في حفظ الله ♥
