أنتِ قلبِي

الجُزء الخَامس|أرغبُ بكِ!

أنتِ قلبِي
الجُزء الخَامس|أرغبُ بكِ!
كِتابة: وصَال
__________

"يا سرَاب التِّيِه يا برق المُن يا جنون الليلِ فِي كفِّ الغسق"
_

|بعد مرور إسبوعين، الأثنين الساعة العاشرة صباحًا|

جيهان:

كُنا مقعمزين علىٰ سفرة الفطور اللي خلوني نقعمز عليها معاهم بِالسيف لما إنفتح الباب و خش مِن وراءه معتصم بِشطنته اللي كانت على كتفه و حطها بِجنب الباب و هو يتنهد و معالم الإرهاق طاغية علىٰ تفاصيل وجهه ..

قبل ما يقرب منا و هو يشوف لِـ جدي و حناي بِإبتسامة شخص مُتعب و هو يسلم عليهم بِكل هدوء، و تلفت بعدها بِإتجاه عمتي اللي إبتسمت فِي وجهه ما أن قرب منها و هو يقبل فِي رأسها بِهدوء شديد قبل ما يبعد و هو يشوف لِـ حناي اللي قالت: تعالى قعمز أفطر معانا، نوضي جيهان جيبي لِـ ولد عمك فنجان قهوة و تعالي!

رمشت بِهدوء و اني نشوفلها قبل ما نضيق عيوني بِمجرد ما شفته كيف تلفت يشوفلي بِإبتسامة خافته سرعان ما لحظتها علىٰ مُحياه و هو يرد علىٰ حناي: اني نبيكم تعذروني لان مش حنقدر نفطر معاك تعبان و نبي نرتاح شوية!

عقدت عمتي حواجبها و هي تشوفله بِإنزعاج قبل ما تنطق و هي ترد عليه: غير قعمز أفطر و بعدين ساهل!

نفى هو بِرأسه بِكل هدوء و هو يتنهد قبل ما يمشي بإتجاه الشنطة اللي حطها بِجنب الباب و رد عليها قبل ما يختفى فِي الممر: و الله ما قادر توا حاس نفسي تاعب نبي نأخذ دوش و نرقد و بعدها ساهل، نستأذنكم توا!

و إختفى فِي الممر بِهدوء تحت أنظارهم و أنظاري اللي رجعت تفكرت كل شيء نسيته فِي هالأسبوعين هذو!

قبل ما نوض و نخليهم و اني نفكر فِي كل شيء نسيته أو تناسيته و رجع ثاني بِمجرد ما شوفته ..

_

"أميلُ نحوكِ و التنصيصُ يجذبُني حتى أشُدّ على التنصيصِ أقواسي"
_

|فِي مكان ثاني|

كانت مقعمزة داخل وحده مِن المظلات اللي بكراسيهم و اللي كانت منتشرة علىٰ طول الممر اللي هي فيها و بين إيديها كان فِي شيت لِـ المحاضرة الجاية تقرأ فيها بِهدوء و تركيز و هي تشوف فِي عناوين و روؤس محاضرة اليوم شن!

بدون ما تركز فِي الشخص اللي قعمز بِجوارها و هي متوقعته صاحبتها اللي مشت تجيبلهم فِي قهوة!

إلاّ إن رائحة العطر النفاذة و اللي كانت رائحة ذكورية خلاتها ترفع رأسها بِعقدة حواجب و هي تبلع فِي ريقها إستعدادًا لِـ التهجم علىٰ الشخص اللي قرر يخفف دمه و يجي يقعمز بِجنبها!

لكن كلماتها ماتوا بِداخل فمها ما أن شافته قبل ما تتنهد و هي تقلب فِي عيونها عليه و قالت: يا سبحان الله كان تقولي هالعادة الغريبة متاع التقعميز بلا كلام و لا سلام امتى تبطلها؟