أنتِ قلبِي

الجُزء الأول|عَودة مُفاجأَة

أنتِ قلبِي
الجُزء الأول|عَودة مُفاجأَة
كِتابة: وصَال
__________

أتعلمون ما هو الحُب؟
هو ذاك الشّعُور الذي يقتحمُ قُلوبكم دون إذنٌ منكم، مُخلفًا وراءهُ عَاصفةً مِن المشَاعر التي لا يمكنكمُ حُكمهَا!
الحُب، لا يعرفُ الحدود و لا يعترفُ بِالعَاداتِ إطلاقًا.
_

|التاسعة و النصف صباحًا|

: جيهان جيهان يا جيهان نوضي تسمعي فيا نوضي

تأففت جيهان و هي تشوفلها مِن تحت الغطاء اللي ملتحفه بيه قبل ما تقول: باهي، باهي توا نوض يا عمتي شويـ
و ما لحقتش تكمل باقي كلامها إلا و عمتها حـولت الغطاء مِن فوق رأسها

زينب: نوضي يا بنت شن هالنوم اللي واكل فِي قلبك هذا؟
تنهدت جيهان و هي تتكي بِظهـرها على السرير الخلف إيديها إمتدو لِـ شعرها تلم فيه فوق قبل ما تقول: أهو نضت خلاص!
زينب: بالك نوضي حناك مِن بكري تنادي عليك و أنتِ هنايا راقدة زي الميت!
جيهان: باهي
زينب تلفتت لـ الباب: خمسة دقائق و نلقاك نايضه، اني بنمشي لـ حوش عمك صالح بنعاونهم عاد اليوم ولد عمك معتصم بِيروح لِـ البلاد و أخيرًا!
هزت جيهان رأسها بِكسل: و الله العظيم فهـمت!
و طلعت زينب عمتها بينما جيهان خشت لِـ الحمام و هي تتأفف بِإنزعاج ..

_

تعالوا نعرفكم عليا شويه بِإعتبار اني يلي بِنحكيلكم قصتي ..
اني جيهان عمري ١٨ سنه عايشه فِي حوش جدي مِن وفاة أهلي يعني مِن لما كان عمري خمسة سنين، ربتني عمتي زينب كأني بنتها مِن بعـد ما روحت لما توفي زوجها الله يرحمه.

عندي زوز عمام، الكبير فيهم أسمه صالح و مرته أسمها نجاة و هي بنت خالته عندهم ثلاثة ولاد و بنت الكبير فيهم أسمه المعتصم بالله و هذا مسافر البرا مِن سنين و ما نذكرش أن شايفته أو نعرفه، و الثاني أسمه منذر و الثالث أسمه مراد و البنت أسمها حياه.

عمي الثاني أسمه ناصر و مرته أسمها أمينة و عندهم زوز ولاد و زوز بنات، الكبيـر بينهم أسمه أيهم و بعدين وسن و بعدها أنس و سمر.

علاقتي بِعمامي عادية و بِأولادهم منذر و أيهم عادية برضو أصلاً ما نقربش فيهم لان واحد منهم خطيب وسن و الثاني حياه، و أنس و مراد علاقتي بيهم زي خوتي و أعز و بِالبنات حياه و واسن علىٰ قد السلام و خلاص و بالنسبة لِـ سمر فَـهاذي مافيش بيني و بينها اي كلام نهائي فِي النهاية بكل اني و ياها زي النار و البنزينة بضبط!

و لو كنتم تسألو على شكلي فَاني عادية جدًا نشبه زي آي بنت بشرتي حنطية مش بيضة و لا سمرة عيوني سواد كبار و رموشي معبية و مكحلـة، شعري طويل و أسود و طولي عادي لا طويلة و لا قصيره، و أهم صفة فيا لساني الطويل و الحمدلله.
و بس هذا كل شيء عليا و الباقي توا تعرفوه بعدين ...

_

جيهان:

طلعت مِن الحمام بعد ما غسلت و توضيت باش نصلي لان فاتني الفجـر اليوم، صليت و غيرت حوايجي و لبست وشاحي و طلعت لِـ الجنان وين ما كانو جدي و حناي مقعمزين يفطروا زي العادة ..
قربت منهم و صبحت عليهم و اني نقول: صباح الخير
جدي حسن: صباح القايلة توا شن هذا كله نوم!
اني رمشت بِبراءة: توا اني شم درت يا حسن هي شوية نوم بس مش حاجه كبيره
حناي حوريه فنصت فيا: بنت شن هالكلام عيب!
ضحكت اني و بوستهم
جدي: قعمزي افطري قعمزي
اني سحبت كرسي و قعمزت: توا عارفني نفطر اني؟
حناي: لكن هكي مش باهي راك رايحة زي التل لا ماكله لا شراب
اني: لا تل لا سو حناي هذا وزني هكي من ربي كان نأكل ما نأكل مش حنزيد و لو شوي!
تنهدت حناي بِحسره و هي تشوف لِـ جدي وقالت: زي بوها الله يرحمه!
جدي نزل طاسه الشاهي مش إيديه و إبتسم و هو يشوفلها: الله يرحمه و يغـفرله
بينما اني إلتزمت الصمت و سكتت!
علىٰ جيت منذر ولد عمي
منذر: السلام عليكم شن حالكم اليوم؟
و قرب منهم و هو يقبل فيهم علىٰ رؤوسهم ..
اني نضت وقفت قبل ما نشوفله و قلت: نديرلك فطور؟
منذر سحب الكرسي اللي بِجنبه: لا لا صحيتي بارك الله فيك فاطر قبل ما نجي جاي!
اني هزيت رأسي بِهمهمة قبل ما نلف نشوف لِـ حناي و جدي وقلت: باهي تمام و صحتين، نستأذنكم توا!