أنتِ قلبِي

الجُزء الرَابع|إِعتِرَاف

أنتِ قلبِي
الجُزء الرَابع|إِعتِرَاف
كِتابة: وصَال
__________

"كل النساءِ أحاديثٌ بلا سند، و أنتِ أنتِ حديثٌ لابنِ عباسِ"
_

كانوا البنات مقعمزات علىٰ وحده مِن الطاولات تحت المظلة و هما يهدرزو فيما بينهم و يضحكو

لما إبتسمت سمر و هي تشوفلهم و قالت: هيا نوضو نعمو يا بنات؟ مادام الجو مزال ما سخنش و الشط فاضي نوعًا ما!

غيرت حياة عيونها عنها بِتنهيدة و هي تشوف لِـ البحر و قالت: انتو امشو لكن اني مش ماشية ما عنديش خلوق!

رفعت واسن حاجبها بِإنزعاج و هي تشوفلها و قالت: مبردك حياة هيا نوضي معانا نغيرو جو و بعدين ليش جايين احنا؟ باش نقعمز مثلا ما هو جايين باش نغيرو جو و نفرهدو على رواحنا!

تأففت حياة بِتنهيدة و هي تشوفلهم قبل ما ترد عليها و قالت: و الله ما عندي نية واسن بِاللهِ عليك خليني فِي حالي توا لما يخطرلي توا نمشي بس توا بِاللهي عليك فوتيني!

زفرت واسن أنفاسها و هي تهز فِي رأسها قبل ما تشوف لِـ اختها اللي قالت: أنتِ من الصبح مش عاجبتني جوك مش علىٰ بعضه شن في؟

سكتت حياة و ما ردتش عليها و هي تتنهد قبل ترمش بِعيونها و هي تشوف لِـ معتصم اللي قرب مِن مكانهم و هو يشوف لِـ حياة و قال: حياة تعالي نبيك شوية!

إحمرت حياة بِخجل و هي تشوف لِـ خوهَا قبل ما تمرر أنظارها بين بنات عمها و هي تستأذن منهم و هي تمشي وراءه لين وقف معتصم فِي مكان بعيد عنهم نوعًا ما و وقفت هي وراءه و هي تشوفله كيف قال: تعالي أوقفِي بِجانبي تعالي!

رمشت حياة بِخجل منه و هي تحط فِي إيديها علىٰ بعض قبل ما تمرر توقف بجانبه و هي تنزل فِي رأسها بِخجل شديد منه بِمجرد ما نطق و هو يقول: أنتِ عارفة ليش مَناديك صح؟

هزت حياة رأسها بِهدوء و هي ترد عليه و قالت: اي عارفة!

همهم معتصم بِسكون و هو يثنى فِي إيديه وراء ظهره قبل ما يشوفلها بِطرف عينه و بِحاجب مرفوع و هو يقول: كويس معناها أكيد عارفة إن الوضع اللي شفتك فيه أنتِ و أيهم غلط و لا؟

توترت حياة اللي بلعت ريقها بِإرتباك واضح و هي ترد عليه: بس هو فِي الشرع زوجي يعني مش غلط وقفتي عليه و بـ ـعدين هـ ـو ما دار شيء غلط!

ضيق معتصم عيونه بإبتسامة جانبية و هو يشوفلها و قال: أنتِ قلتيها فِي الشرع و نكذب عليك لو نقولك إنّ اللي داره غلط لا هو فعلا زوجك و طبيعي بس فِي العرف و في العادات و التقاليد اللي داره أكبر غلط! فكرة وقوفك معاه وراء الحوش و بدون علم و لا واحد مِن خوتك حاجه غلط و أظن إن حتى هو لو شاف اخته واقفة مع خوك وراء الحوش كان حيدير ديار لان غلط! اني معاك هو زوجك فعلا و مسؤول منك مادام أنتِ خشيتي ذمته، بس مع هذا انتو لِلآن مازالتو فِي حكم المخطوبين مش معني لو قارى فاتحته يعني خلاص هو حر فيك و اللي بيديره و يبيه يصير! حطي في بالك حياة مادام صارش إشهار لِـ الساعة هاذي يعني انتو مش متزوجين لو يدير ما يدير حلال ربي اي و اني عارف و هو عارف و الكل عارف بس مع هذا مافيش ضامن انكم حتقعدو مع بعض سنين! هما يبدو متزوجين سنة و عشرة و عشرين و في لحظة و ضحاها يطلقو! فَما بالك إنتو اني ما نحاسبش فيك و واثق فيك و عارفك لان لو مش عارفك ما كانتش سكتت و استنيت لين نكلمك بروحك! بس نبيك تعرفي ان وقفتك اللي وقفتيها امس معاه غلط يبيك و يبي يجي يشوفك فهميه ان باب الحوش مفتوح ليه و إن احنا نوقفو فِي العتبة و هو يخش الداخل! بس جو الدغاريق و الحفر ما تربيناش عليه و مش مستعدين عليه فهمتيني!