نقش الزمان (١٦)
#زينب_المندلاوي.....
مساء الجوري وعطره... 🌹🌹
جمانه..
كظيت الطريق...
مرة ابجي.. ومرة اتعب واغفه...
وحمودي هم كظاها نوم...
تعبت حيل
وصلنا لاهلي... بعد ساعات طويلة...
واباوع لبيتنا... اختنكت..
احس البيت كلشي بي ينعى ويبجي...
ويحجي ذكريات.. حلوة.. والم جديد...
اتذكرت هواي شغلات.. بمجرد وصلت..
هاي الحديقه البرة الي جان يهتم بيها ابويه
وعزيزة على كلبه...
وجان ميقبل احد يلعب طوبه يمها
ومن خوفه عليها سيجها بسيم...
وخلاه سياج عالي...
ابويه بالرغم جان انسان عصبي...
وبالرغم من انه زوجني غصب...
الا انه يبقى ابويه...
رباني وكبرني وتعب عليه...
من اجيهم بعد ما اشوف حمودي
كوله بحظنه...
يحبه هواي ويشم بي ويصيحله
حبيب جدو.. لو وليدي البطل...
عصرت حمودي بحظني.. وهو جان استوه كاعد من
النوم...
حبيبي حمودي... بعد منو يشيلك ويلعبك ويدللك...
وبديت ابجي....
اركان جان ينزل الغراض...
اجة عليه...
فتح باب السيارة ونزل حمودي..
ولزم ايدي.. ومسح دمعاتي
نزلي حبي.. ولتبجين هواي..
هي هاي الحياة... وكلنا نموت...
البقاء لله...
الانبياء ماتو... تردين البشر العادين ما يموتون
اهدي.. والقهر موزين على الي ابطنج..
لزمني ونزلني..
واول مدخلت للبيت...
ذبيت روحي ابحظن امي وكمت ابجي
وهي تبجي.. وتصيح راح ابوج... راح
المدللنا.. وكسر ظهري..
راح شمعه بيتي... يمه جمانه..
اني بلياه ما اسوه...
اخذ الضوه من عيوني وراح...
اوف.....
الموت صعب... صعب جداً...
ومستحيل ينوصف ابكلام...
لا....
...........
مهند..
