شفت الحياه في عيونك

الجزء الثامن و الستون (٦٨)

مساء الخير يا جميلين ..

كيفكم اخباركم ؟ اسفه لتأخيري عليكم بس تعرفون الوضع صاير حوسه و زحمه مع هذي الاوضاع و الدراسه و الاختبارات و فوق هذا النوم ..

اتمنى ان حالكم افضل بكثير و اتمنى منكم تعذروني

فرحوني بتعليقكم على الجزء و التصويت

\

تناظر فيه و هيا ضايقه فيها الدنيا .. بعد اللي صار لها غير نفسيتها و خلاها تعيش هل يومين بقلق و خوف و فوق هذا تحس بالضيق من ناحيه بعده عنها و شغله عنها او الضيق اللي تحسه بالوحده لعدم وجود احد من اهلها حولها في هذي الفتره

يالتفت عليها و هوا يعدل الكبك في يده - ورد

ورد رجع لها تفكيرها و هيا اللي ماسحت انها كانت سرحانه و هيا تناظر فيه - نعم

احمد - فيك شيء؟

ورد تجمعت الدموع في عينها و شتت نظراتها عنه - اكذب اذا قلت لا !

احمد قرب لعندها و جلس جنبها بخوف - شفيك ؟

ورد نزلت نظراتها و صارت تناظر في المفرش اللي يغطي رجلها و رجعت رفعت عينها اليه - لا تروح الدوام

احمد عقد حاجبه - ليه ؟

ورد - احتاجك تكون جنبي .. ما ينفع صالح يشيل الشغل عنك ؟ والله بموت من الضيقه و بموت من الوحده و احس مو طايقه نفسي و ألم جسمي و ثقلي و النفسيه فوق هذا تعبانه مرره

احمد يناظر في عينها اللي تجمعت دموعها فيها و هوا بداخله حاس بتغيرها و ضيقها

ورد تكمل بغبنه - محد جنبي .. ولا تقول لي مريم .. انا عارفه انها مو مقصره بس احس بختنق خصوصا انت بزياده منشغل عني و ما احس باهتمامك و ما احس لك حولي !

احمد سكت فتره يفكر بعدين قال - تبين تروحين عند اهلك بالشرقيه ؟

ورد توسعت عينها بصدمه - كيف يعني ؟

احمد يمسح على شعرها و يبعده عن وجهها - انتي لاحظتي شغلي و الزحمه اللي عندي هل فتره و ما اوعدك انها راح تخف او ان الوضع يتغير لان احنا نمر بفتره صعبه بالشغل .. و انا مقدر اشوف حالتك تسوء و مقدر اسوي لك شيء و هذا اللي اقوله بالغصب عني مقدر اتحكم في اللي قاعد يصير .. و عشان كذا اذا تحسي انك ما راح تتحملي و تحتاجي عنايه و انا اخاف ما اكون جنبك وقت حاجتك لي في اوقات اصعب .. اخذك عند اهلك افضل مو؟