💫 ❄ إمـام الجن❄ ّ 💫(كرونيك باللهجة التونسية )

★8 :أحمد ...شقاعد يصير !؟ ★

🌺💜💚🌺

حطتلهم العشاء و قعدت معاهم ،كانو ميتين جوع و دخلو فيها عربي وسوري ،نهار تعب صافي ،قعدت تخزرلهم وهوما ياكلو ويعبو حاطة يدها تحت دڨنونتها ،الشاهية محلولة ماشاء الله،غمضت عينها تقول حاجة مستها ،بدات يدها ترعش وتكبس بدنها يبست فم على الكرسي ،جرالها احمد ،شدها حس ببدنها متصلب رشها جهاد بالماء ،خرجوها من الكرسي و مددوها لوطة ،لكن بدنها زاد تصلب و يبس و صوابعها نزلو على وجها ندبوه "أحمد شبيها ،شبيها تعمل هكا " سأل جهاد وهو موش فاهم "شدلها يدها تخليهاش تخبش روحها تو نجي" قام وخرج يجري ووراه صوت خوه" وين ماشي ،شباش نعمللها انا تو " حاول يكتفلها يدها ،نجمش ،تخيل انت قوتها ومرا وهو راجل ومانجمش ،حاول يسيطر عليها ،قعد يناديلها باسمها في بالو دايخة ،جاء لبالو جدو ،كي كان صغير كان يراه هكا ييبس و و بتبربص لوطة ،وقتها بوه كان يقرالو القرآن ،جاء لبالو للمعوذتين"قل اعوذ برب الناس" "ملك الناس" "اله الناس" "من شر الوسواس الخناس"" الذي يوسوس في صدور الناس" "من الجنة والناس" وتحرك بدنها بكلو ،وتقلبت على وجها وبدات تصيح وتصيح ،خلاتو يقص على التلاوة ،قدام صياحها سكت مانجمش يكمل يقرى ،دخل أحمد ووراه سعاد و غادة ،زادت صوابعها تكبسو ،وبدنها بدا لونو يتبدل تقول الدم تحصر ،عاطي على الازرق ،قعدت على يمينها سعاد و غادة على يسارها ،خزرت لبنتها ايلي شردت في الهواء،بالنسبة الجهاد ها الشي جديد ،اما احمد فعادي المهم يفهمو ايلي قاعد.يصير "تسلسلت يديها وساقيها "
"أحمد جيبلي طرف ماء "
جرى أحمد و جبدلها دبوزة ،خذاتها وبدات اتمتم ،ركز جهاد على فمها فاش تقول ،تسحر هاذي،ركز شوي وحاول يعرف الكلمات "باسمك اللهم ارقيك " يعني موش كي هاك الجماعة تكعويصة و تبلبيزة،هاذي قداه من مرة يفهم منها كلمة وايات ،بدات خديجة تنين بالقوي،كيما واحد يتوجع ،مازال بدنها يابس ، خذات الماء وغسلتلها وجها و يديها ،بدات تأن بالشوية،و بدات شوفرها ترعش و تحلت عينها ،تخزر قدامها تقول فمة حد تخزلو وتثبت فيه،تلمست غادة صوابعها وهزت عينها لاحمد وتبسمت ،تنفس بىاحة وهو يرى في اختو تحاول تقوم تقول مابيها شي ،جهاد ايلي فمو تحل وماترد ،كان قاعد على ركايبو وقت خلاه أحمد وخرج وتوا قعد ومد ساقيه ،عينو ما تنحتش من على سعاد ،شنوة ها المرا "هيا عاونني نهزوها لبيتها لازمها ترتاح ،توا باش ترقد ولازمها ترقد والا بدنها يتعبها"
شدوها جهاد واحمد كل واحد.من ايد ووقفوها "شفتو" قالتها خديجة وهي تثبت في عينين خوها الكبير"شكون"
"راجل ،يشبه لبابا'
شفت بابا !؟" سألها مرعوب
"إيه"
وصلو بيها لبيتها ،حضرلها جهاد الفرش و سعاد و احمد مدوها ،في الوقت ايلي هوما لاهين بيها ،غادة حاولت تلم البلاصة والثحون ايلي تكسرت ،وقت كملت لمت هزت راسها وقلبها طاح،شافت نجمة واقفة قدامها"شتعمل هوني انت "
"،طا !؟ انا ..احمد و..."
"انت واحمد !؟ ياخا انت لاباس جاية في ها الوقت لداري وفي غيابي و انت تعرف فيها زوز عزاب"
"طا احمد هو .."
"،لا حلو ،اسمع نقلك انت وامك و حروزات وبخوراتكم وجنونكم الزرقة ماتنجموش تخلو واحد من اولادي يتبعكم ،يا ديني مارضى حد.بيك و قعدت في رقبة امك من فعلكم،وماتقولوش غابت عشرين عام معناها تعدوها عليا ،نعرفكم ،معادء نحب نراك مع احمد يا سحارة فهمتني ،اخرج عليا"
كانت شادة كاس مكسر نيتها اطيشو ،لكن جات نجمة ،وهي تسمع في كلامها ،شدت روحها بالسيف باش ماتردش عليها ،كبست عليه بصوابعها ،ماكانتش حاسة بالجروح ايلي تعملو في كف يدها وصوابعها ،والدموع ايلي هبطت ،وقت سمعتها تقلها اخرج عليا ،خلات الكاس يطيح من يدها وخرجت لقات أحمد وامها وجهاد قدامها،هبطت راسها وخرجت تجري ،قداه وجعها ها الكلام ومااخيب نظرة العباد وحكمهم عليها ،والكلمة كي تدور تدور بلا حساب .