💫 ❄ إمـام الجن❄ ّ 💫(كرونيك باللهجة التونسية )

💚❄11: في القبر ❄💚

💚☔💚

                  
ريحة عفن ونتونة كبيرة ، ظلام مد ايدك ماتراها ، بلاصة تضيق بيها ، من كثر الروايح الخايبة حست بالنفس يتسد عليها ، مانجمتش تعرف هي وين ولا اش تعمل وعلاه صاير معاها هكا ، لوجت تراش وجه والا اي حاجة ،صاحت وبكات والنافع الله ، قوات الريحة و جات معاها ريحة نار ريحة حاجة محروقة منتنة ، لمت ساقيها لصدرها ميتة خوف ، ظهر وجه احمر مفطس بكلو مشعر مشوه من اولو لاخرو ، لا تفهم من عينو لا من خشمو ، لا فصيلة لا خليقة ، خزرت لساقو ويدو ، حوافر و توسطهم ذيل ،شعر ملبد مزبل تقول منفخ في الغرم من اول الدهر ، ساعات الصدمة والخوف يقصو اللسان جملة ، قلبها تخلع وقت زادت الوجوه من بحذاها فيها ايلي بجنبها وايلي من فوقها، تخنقت وضياق نفسها ، سمعت ضرب قوي وجاها صوت امها وصوت جهاد،عيطت "خرجوني ، يا امي راهم يخوفو " سمعت صوت بكاه و كلامو ووعدو ووعيدو ، زاد عليها الهم والغمة على قلبها بكات لين معادش للدموع بلاصة ، بدات الوجوه والحوافر تبعد و تغيب عليها ،الحمد الله ،سمعتهم يهمهمو و سمعت صوت ماء يقطر ، جاتها ريحة جيفة و بول ، غطت خشمها وهي ترى في شي مايقبلوش العقل ، جهامة قد طولها مرتين والا تلاثة ، حمراء ، حوافر بظوافر كلب ، وساعت عينها وهي ترى في وجهو ، زوز قرون متاع ثور ملوين وراء رقبتو ، شعر مغطي وجهو فم بلا شفايق ،سنون متراصين كي كوم متاع حجر ، لسان مقسوم على تلاثة اطراف كل طرف في جيهة ، وذنيه مدورين من تحت ڨرونو لاخر رقبتو ، اذا شتقول حيوان لا ، شتقول بشر لا ، هذا حاجة غير ايلي تتخيلو، في لحظة لقات وجهو في وجها ، طاح قلبها وهي تغمض في عينيها وتعيط ،بح صوتها من العياط ،حست بالنار تحرق يدها وساقيها وفخاذها لفوق ، ضغط عليها ، حاجة باركة عليها تحرق فيها كي النار "قال ستجدني ان شاء الله صابرا ولا اعصي لك امرا " ركزت في الصوت ايلي جاها صوت أحمد ،إيه احمد خوها يرتل في القرآن ، خف بدنها و خفت حرقة يدها وساقيها وفخاذها ،حلت عينها لقات روحها في الظلام حتى اثر للشي ايلي راتو، تلفتت وهي تسمع في صوت خوها ،كيف ماتسمع امام الجامع ،بكات بكل روح فيها بكات ، قشعر بدنها رهبة موش من ايلي راتو اما ملي سمعتو ، اية وحدة ، ايه كافية باش خلات الكائن ايلي راتو يذوب ،قعدت على ركايبها وهي تبكي وبدات  تعاود "لا اله الا انت سبحانك اني كنت من الظالمين "  .

❄💞❄💞

كان في حالة روحانية عظيمة ،تقول  فوق السحاب ، قلبو وعقلو وروحو ينطقو بكل حرف من كلام ربي ،الكتاب بين ايدو وهو يرتل من اية لاية ، من سورة لسورة ، من الاول لقى صعوبة وحس بالضيق ، لكن بالشوية بالشوية تلذذ الكلام ،ركز بحواسو الكل ،مع اخر سورة فاق ملي فيه ، قعد.لحظات ساكت وسارح في المصحف ، مايعرفش قداش قعد اكاكا ايلي حسو انو دقايق لكن في الواقع ساعات ، من ليلة لليلة كان المصحف بين يديه وهو يرتل بصوت فيه احساس عظيم ، احساس انك تكون غير اي بشر في العالم ، تتحسس وجود ايلي خلقك ،تفهم كل حرف كلمك بيه ، رحمتو ، دعوتو ، عقابو ، نصيحتو ، عبرتو ، قوتو ،جبروتو ، الحق ، الواحد ، الجبار ،القهار ،الملك ...كل صيفة من صيفاتو كل اسم تفهمو وتعرفو ، تقصار بيه الليالي ويطوال بيه النهار ، يهرب عليه النوم ويتوحش الكتاب .