💫 ❄ إمـام الجن❄ ّ 💫(كرونيك باللهجة التونسية )

★🌺5 : انت شكونك !؟🌺 ★

💚❄💚

من غير مايشعر عدى يدو اليمين على وجهو يمسح في العرق ،فيسع مافاق علي صار ،بسط كف يدو ،حرك صوابعو ،كبس بونيتو عاود بسط كفو ،تلمس يدو وذراعو ،يدو تتحرك وتنحى التنميل ،يدو رجعت لاباس ،وقف يتلفت كي المجنون ،يدو لاباس ،الحمد الله ياربي ،حركها لفوق ولوطة موش مصظق ايلي صار ،تلفت لدار غادة ،شنوة ايلي صارلو غادي ،قهوة ،داخ ،فاق يدو لاباس ،فمة ان في الحكاية ،نفخ براحة كبيرة الحمد الله واكاهاو .
رجع للدار لقى امو وخديجة يستنو فيه
"ياوليدي وينك ماتهزش على تاليفونك ،جهاد خرج يلوج عليك "
"قتلي جهاد " جبد تاليفون لقى بارشا ابالات "اووو،ماشلقتش بيهم "
"وين كنت احمد ،عمي كان هوني ،وقال ايلي من غدوة انت و جهاد في الارض قال حق بوكم وهو مستعد يعطيكم بايو ،قصدو باينا "
"هايل ،صاحب واجب" قالها برميان معنى وهو يطلب في جهاد "اه وينك ،....باهي...ايه في الدار ...تبطاش"علق وحط تاليفونو على الطاولة " هاو قريب يوصل "
"هي وين كنت " وشوشتلو خديجة ،جرب حرك صوابعو براحة "شنوة لمعة العينين هاذي،تكونش طخت لوف " خزرلها مفجوع"الافلام باش تهبلك يا دكتورة"
تنهدت خديجة"زعمة انجم نكمل الاعوام ايلي مازالو "حط يدو على اكتافها" بقدرة ربي ترجع و تكمل قرايتك وتكون احلى اخت واحلى دكتورة " تبسمت للحلمة المزيانة "نهز الكيسان للكوجينة ونجو نحكو ،اوكيتو "
"باهي "
قعد براحة كبيرة وامو باهتة فيه ،زعمة هذا الكل خاطر رجعو للبلاد ،تفجعت على صوت الصياح من الكوجينة ،قام أحمد مفجوع ومشى لاختو ،لقاها باركة لوطة وتبكي ومغطية وجها "خدوج ،شبيك شصار " هزت راسها ،اول ماراها وخر لتالي ،وجها مخبش تقول ظوافر قطوس والا كلب وصلو حتى لرقبتها "شنوة ايلي في وجهك "
"مانعرفش ،فمة خيال خرج ودزني بقوة لين طحت "
وساعت عين امها "خيال !؟"
"تلقاها قطوسة نڨزت وانت هولتها "
"قتلك خيال اكحل لا تفهم لا راس لا ساق لا يد منو ،في لحظة دزني و طحت "
دق قلبو بين ضلوعو ونبهو عقلو من حاجة قاعدة تصير "أمي حط شوي بخور في الدار وارمي شوي ملح في تراكن الدار وغدوة نجيبو نعملو حزب لطيف "
"الدار مسكونة" سألتو اختو " فمة جروح على وجهي " شافت الدم في يدها" بارشا جروح "
"لا لاباس ايجا نداويلك ،تخبيشات وبرا ،ايا اهدى يعيش الزين وتخممش "
"الدار مسكونة ،احمد قلي مسكونة "
"لا ،اما الدار عندها بارشا مسكرة

🌺❄🌺

دخل جهاد ،لقى الجو مكهرب وريحة بخور "فمة زردة والا دورتوها زاوية"
"اشششس اختك ماصدقنا لربي رقدناها"
"شفمة امي ،الاومور موش هي ظاهر،تقليش قامت تصيح كي المرة ايلي فاتت "
"والله يا وليدي شي يخبل ،في الكوجينة قامت تصيح وقالت رات خيال "
ضحك جهاد " لا بنتك ياسر مهلوسة"
"والتهلويس حللها خاريطة في وجها بالجروح " تقلب وجهو موش فاهم " الخيال ايلي راتو دزها و خبشها في وجها اللطف تقول قطوس"
"ياها نرمال ايلي تحكو فيه ،خيال وخبشها و زيدو قولولي جنون و جن عاشق و بخرطوط و فلسوت "
"باسم الله المانع الستار ،يزي بلا لعبك وبلا تجلطيمك ،سمي باسم الله "
"باسم الله الرحمان الرحيم ،يا امي تصدق في ها الخرافات "
"الخرافات سي جهاد موجودة في القرآن،وربي هبط سورة كاملة اسمها " الجن"
"يا خويا يا باهي ،هوما موجودين اما يدجلو بيهم ياسر ،هوما على رواحهم واحنا على رواحنا ،لا يدخلو فينا لا ندخلو فيهم و...." ايلي سكتو وضيعلو البوصلة هو انو شاف خوه يحرك في يدو نرمال ،قعد حال فمو ،فهمو شبيه وعلاه سكت " بالكي عندها صلة بالخيال " اقترح على خوه
"شنوة ايلي عندها صلة" استفسرت امو ايلي موش فاهمة شي "لا شي امي ،ع الدار " خبى عليها جهاد ،لكن الحكاية بدات تدور في مخو بالرسمي .
في دار غادة وسعاد صارت حاجات اخرين ،بعد ما خرج من عندهم احمد ،شدها كريز بكاء وامها تسكت بالسيف هدتها وقالتلها اخر مرة نعملو ها الشي ويقعظ سر بيني وبينك ايلي عملناه ليوم ومعادش تدخل روحك في شي ،قامت لبانو الماء باش تهزو ،خذاتو بين يديها وثبتت في الماء ،شافت فقاعات الهواء مازالو "امي،ايجا شوف" قبل ماتوصل امها شافت عفسة ساقين تمشي حذاها ،تقول حد مايتراش يعفس بساق كلها ماء ،ساق مدورة قعدت بلاصتها مبلولة ،شهقت امها وبدات تقرا في ايات و سور و جبدت بنتها ليها "شنوة ريت ،قلي شنوة ريت"
"امي ،ماشفتوش ،ريتو يمشي "
"كيفاه!؟" عقدت حواجبها و شدت بنتها من يدها وكركرتها وراها وسكرت الباب وراهم ،جبدت كتاب و حلتو ،قعدت تقلب فيه ورقة ورقة وبنتها تخزر للهواء تقول تثبت في وجوه ماتتراش "أمي"
"شنوة "
"يحكاو "
حبست ايد امها على تقليب الاوراق "فاش يحكاو " جبدت ورقة و خذات ستيلو وبدات تكتب وتخط وحدها دواير و خطوط ونجوم ومثلثات ،و ارقام وبعد حبست وخزرت لامها ايلي وجها شحب وهي تقرا في الرموز"غااادة ،بنتي باش يسيل الدم مرة اخرى "
شهقت بنتها وحطت يدها على فمها برعب .

💚❄💚

تعدات ليلة كلبة على الام وبنتها ،ليلة لا ذاقو نوم ولا عرفو راحة ،ايلي قالتو سعاد شي رعبهم و قتلهم خوف ،استنات النهار يطلع باش تخرج فمة بلاصة في مخها لازم تمشيلها ،حلت الباب ومشات خطوات ،سمعت صوت ساقين وراها ،حد يجري ،تلفتت مفجوعة لقاتو احمد "انت "
"صباح الخير ،فجعتك"
"شوية "
"سامحني انا قعدت نعس على بابكم باش تخرج لازم نحكاو ضروري "
"بخصوص شنوة "
"ايلي صار امس في داركم "
شحب وجها واصفار "شنوة صار "
"قرب منها و لمعت عينو بغش" انت تعرف شنوة صار"
"ايلي صار دخت و احنا فيقناك " شدها من ذراعها وكبس عليها "احكي شصار وبلاش كذب "
"اي وجعتني راك "
"شتحكي والا لا "
"باهي باهي سيبني"
سيبلها ذراعها "نستنى فيك تحكي "
"باهي ،تبعني واسكت وماتحكي حتى كلمة وايلي باش تراه تتحملو وتمشي وكلمة لا "
"شتقصد"
"شتجي معايا والا لا هذا التفسير الوحيد ايلي انجم نعطيهولك "
"باهي"
تبعها وهي تهبط الطريق وبعد تدخل بيست عربي ،وبداو يبعدو على العينين ،وقفت وخزرت لوطة "شفت فم ،وين الهبطة"
"مغارة"
"داموس"
"متاع الحرب"
"كل حد اش يقول ،المهم انا وانت شندخلو فم "
"اه"
"خايف "
"" لا "
"مالا هيا "
شدتو من يدو "كيما وصيتك بايلي ترى وبايلي تسمع ماتتأثرش ،اقعد كالم و الحس لا "
هبطو ناحية الداموس ،وقف متردد قبل مايدخل وراها "دزتو باش يدخل ،ضربتو ريحة ناتنة متاع جيفة ،سكر خشمو وتبعها ،قعد يخزر قدامو ،موش يشوف كان في خيال غادة قدامو ،ياسر ظلام و الريحة عمال تقوى والبلاصة عمال تزيد تضيق بيهم ،سمع صوت خيل تجري ،سمع صوتها وهي طايرة ،صوت ريح تصفر تقول في غابة والا ارض مهجورة،تبدل الصوت وجاه صوت بومة تقول تندب ،تحمل وسكت رغم انو باش يموت بالخوف ،جاه صوت تصفير قوي قريب يطرشو ،كبس على صوابع غادة ايلي ما تحركتلها حتى شعرة ،بدا الضو يدخل بالشوية وبانلو طريق كلو حفر و طين ،خزر لوطة للارض لقاها تزلق ،هز راسو شاف زوز نساء ڨمرة في زينهم،ياخذو العقل كل وحدة جايتو ،غمض عينو وحلها شاف جبانة وفوق قبورها الموتى هازين يدهم للسماء ،بكفنهم الابيض و عظامهم وهوما هازين يديهم ،عاود غمض عينو وحلها ،شاف غادة قدامو تتبسم وتقرب منو ،قعد يثبت فيها شبيها ،وهي تقرب منو " (قُلٍ أعوذ برب الفلق)(من شر ماخلق) غمض عينو ،وسرح في الصوت ايلي جايو "(من شر غاسق اذا وقب) (ومن شر النفثات في العقد )(ومن شر حاسد اذا حسد) حل عينو لقى غادة قدامو " شبيك " غمض عينو مرة اخرى"رجع داخ ،شباش نعمل معاه هذا" عاود حل عينو "يعني انت صحيح موش نستخايل"
"تستخايل ،فايق انت ،شو احنا وين خرجنا من الداموس " وشوشتلو
تلفت على اجنابو ،بالرسمي خرجو !؟
"شنوة قاعد يصير ،فسرلي ،باش نهبل ،انا نحلم ،نستخايل ،متت وفي عالم اخر "
"اششش هات يدك ،هات ماتخافش " كبست على كفو وضغطت بصبعها الكبير ،حس بالتنميل مرة اخرى،جاه صوت سلاسل ،صوت حد مربوط وقاعد يتحرك وكل مايتحرك يخرج صوت السلاسل يصم الوذنين ،حل عينو "شنوة هذا،انت ماكش نرمال ،انت جنية ،بنت جان " بعد عليها و مشى ،خلطت عليه دزها "اعوذ بالله من الشيطان الرجيم "
"مانيش شيطان راو " قالتها بغش " عبد كيفي كيفك "
"لا يابنتي ،برا اكفيني شرك ،اخرج مني يعيشك "
"يزيتش تو ،قتلك انا بشر كيفي كيفك "