💫 ❄ إمـام الجن❄ ّ 💫(كرونيك باللهجة التونسية )

★12 : "قُلْ إِنَمَا أَدْعُو رَبِي وَلاَ أُشْرِك ُبِهِ أَحَدََا " ★

🌺❄🌺

اذا العقد.مدفون في قبر جدو ، فمضطر يرجع للحومة القديمة وين مدفون ، ماعندوش وقت يضيعو ،حياة تختو مربوطة بكل دقيقة يربحها ، من غير ما يقول لامو ولا حتى يرجع للدار ، طول طلع لحومتو القديمة ، تفكر انو ليه بارشا وسنين حتى ما طلش على قبر جدو ...شافو منسي والحشايش دايرة بيه من البلايص الكل  ... خزر لاجنابو لازم يكون وحدو باش ينجم يحفر ويطلع العقد المدفون اذا راه واحد ...مستحيل يصدق انو يعمل في هاكي باش يخلص اختو من محنتها ، ماكانش عارف انو ...ايلي معاه ،خدام الجان حجبو القبر وحجبوه معاه بمعنى حتى ايلي متعدي ماهوش باش يراه ولا يرى القبر حتى كان تعدى من جنبو، اول ما طبس ينحي في الحشيش اليابس ع القبر تقول ضربو الضو ، رجف بدنو لكل خلاه يبعد خطوات ، بدات يدو تنمل وبدات تتخدر ، عاود قرب ونفس الحكاية صارتلو ،حرك صوابعو لقى روحو موش منجم يحركهم ،بالضبط كيف ايلي صار مع خوه ....خزر لاجنابو مرة اخرى يتعداش حد ....رجع للقبر وللمرة الثالثة قرب منو ...المرة هاذي ريح قوية ضربتو جابتو طايح لوطة ...حس بعظام مدڨدڨة وبالسيف ما وقف ...لازم يلقى حل فيسع ...شنوة باش يعمل ....سلاحو هو اش حافظ من القرآن ...بدى يقرا ويعاود في السور القصير ايلي حافظها ما كانتش بارشا ..اما كانت خارجة من قلبو ...غمض عينو وهو يقرى ويعاود ...حس ببدنو طاير لفوق ...صوت سلاسل تتحرك...ساقين تمشي ...حاجة تحفر في الارض ...حل عينو لقى الدنيا ولات ضباب و القبر معادش باين ...حبى على ركايبو وهو يلوج بيدو عليه ...تعثرت صوابعو بحاجة تشله للجلد اليابس ...هزو وقربو منو يثبت فيه ....ماعرفهوش شنوة ...اما كانت فيه ريحة خايبة و فيه طلامس و اشكال و كتابات غريبة ...زعمة هذا هو العقد...هو بيدو المربوط بحياة اختو ...مافمة كان الضباب داير بيه وعينو مانجمت ترى شي ،...كبش مليح علي لقاه و حاول ياقف ويمشي ...مايعرفش اناهي القبلة واناهي الظهرة ...المهم يمشي ...ضربتو ريح قوية مرة اخرى خلاتو يطيح ، تكمش على بلاصتو وهو يحس في بدنو تدشدش ...عاود حل عينو لقى روحو برا الجبانة والكراهب ماشية جاية ...نفض دبشو وهو ياقف و يلوج في العقد...لقاه في دبشو كيف ما خباه ...ايا باهي توا لازم يرجع للبلاد ويشوف اذا هو ايلي يلوجو عليه والا خاطي ...سعاد هي ايلي باش تعاونو ...بحكم قتلو انها تنجم تقرى وتفسر الرموز هاكي .
💓💞💓

وقف البابلي ووقفت بجنبو غادة...بعد ماخذات قرار انها تتخلى على صيفة الانسية ايلي فيها ...وتكون من الجان في حربو ع الشيطان ...وقفت وراه الوف من وميئات من قبايل الجن ...وقفو جميع قدام جبل كلو حجر ...مانجموش يقدمو خطوة وحدة ...في هاك الجبل بالذات ...تحبست خديجة .
غادة " قريب توفى الليلة اربعين...اذا نجم احمد يكمل الختمة ...انجمو ندخلو لداخل "
شاورلها البابلي براسو موافق ،كملت " شنوة باش يصير بعد...اذا دخلنا"
"حرب الموت ايلي بديناها "
هبطت راسها وهي تحاول تخبي دمعة هبطت بالسرقة...زعمة تنجم تشوف احمد مرة اخرى والا كانت هاكي المرة الاخيرة ...
★**★****★
اخر صفحة من المصحف ...اخر اية ...رتلها وهو معادش منجم يحل عينو ...راسو يدور و الدنيا تدور معاه ...فمة ظلام...واصوات في وذنو خلاتو يفقد التركيز ، شد مليح الكتاب وحاول مايسيبهوش ، بكل قوتو حب يخلي عينو ماتتسكر ...اما ما نجمش لحظات و فقد وعيو ويدو مازالت كابسة ع المصحف .
★**"★***
"هذا هو "
طمنتو وهي تكمل تفسر الرموز ايلي فيه ، تنهد براحة " توا لازم يتخرق موش هكا "
"ايه وفي اقرب وقت "
جبد من جببو و بريكية " هات "
"فاش تعمل ...باش تحرقو هوني "
مستغرب " مالا وين "
"لازم في الداموس ايلي تكتب فيه "
"هيا مالا نمشاو. ...مالازمش نوخرو "
★*"*★****★
كانت تسبح بصوابعها كيف ماعلمها احمد ...ياريت كانت حافظة بارشا سور ونجمت تقراهم ...ياريت حفظت بارشا ذكر توا مستحقتهم ....مازال صوت احمد يوصلها تقول قريب منها ...بجنبها ...مازالت تشوف في الوجوه ايلي تخوف تدور بيها من غير ماتنجم تقدم خطوة ...من غير ما تكون مستنية حاجة كيف هكا ...سكت احمد ...معادش يوصللها صوتها ، بالوقت نڨزت قدامها جهامة حمراء مافهمتش منين راسها والا منين ساقيها ، غمضت عينها وحاولت ماتخبسش ع الذكر ، عاودت حلتهم بالشوية لقات طول في وجها منظر يخوف اكثر من ايلي راتو قبل ، وجه مكشلف بكلو تقول محروق ، سنون مدببة في فم بلا شفايف ...لسان غليظ مقسوم زوز ، ريحة خايبة خارجة منو تقتل ، عينيه حمراء بلا شفر بلا حاجب وبلا حتى بياض ...صاحت وهي توخر لتالي ،حست ببدنها يلصق حاجة سخونة ، تلفتت لقاتو واحد بقرون الثور  واقف في ظهرها ، طاح قلبها من الرعب ، بدات تشوف في مناظر مبدعة مشوهة ...كل واحد جايها من جهة ...خذاوهت زوز كل واحد من يد وهزوها بين هواؤ وفضاء ، تصككت بساقيها وهي تصيح ، حست بالدم يخرج من يديها الزوز ويقطر لوطة ...تلمدو تحتها يلحسو في القطرة ايلي تهبط وهو يدازو شكون يشرب قطرة .....بداو يتفرقو وقت دخل البابلي ومعاه غادة... نجمت تراه ...وعرفتها وتفكرتها ...موش حاجة باش تستغرب منها بعد ايلي راتو وقاعد يصيرلها .
💚❄💚