الحلقةة الخامسةة
#الحلم_يتحقق
(في الحوش )
مبروكة كيف ناضت من النوم فطرت وخشت الدار طلعت قفطانها الجديد وعلقاته
وحطت حداه كندرتها الجديدة ....وتت الاكسسورات ع جنب ....واختاره حتى الزمالتو الي تبي تحطة ....خلت كل حاجة واتية عشان متحوسش بعدين
طلعت الاستشوار وبدت تستشور في شعرها ومازال تبي تستشور لامها بعد تكمل
(في الجامعة )
غابت صفاء ربع ساعة وبعدها جت للمدرج كان شبه فاضي مافيش إلا بنتين وثلات شباب
لوجين : طولتي
صفاء : انصاصك ياحنه اخرني وابتاع الكافتيريا يعلق عليا قالي انصاص بانيه ع الصبح
لوجين وهي مرفعه حاجبها : كان قتيله بفلوسي ياحنه
صفاء : عارفتيني منحبش انرد
لوجين بهزوه : فقمه اصلك
صفاء : اسمسمي وانتي ساكته
لوجين فتحت أول نص وقعدت تاكل فيه وصفاء حداها تشرب في النسكافيه
لوجين : بعد خطرها مقتليش شن تبي في هديل
صفاء وهي تضحك : هضا ياحنه خويا صهيب عاجبته هديل وقالي نبيك تحكي معاها وتعطيها رقمي
وهنا لوجين جتها صدمه قوية ...والنص طاح من يدها قعدت مفنصه عيونها ومستكه
كانت تحساب صهيب معجب بهديل عادى يعنى مش درجة رقم والجو هضا شكله كبد بسرعة
صفاء وهي تبحت في لوجين : كنك شن فيه
لوجين بصوت قريب تبكي :تحكي من جدك انتي
صفاء وهي مش فاهمة : شنو !!!
لوجين :خوك يبي رقمها جديات !!!! ليش يعني
صفاء : قالي عاجبته ويبي يتعرف عليها وكان لقاها مناسبه يأخذها
لوجين زمطت ريقها ومش قادره تدوي والنص طايح على كترها وملبزه الدنيا ....حطت راسها على طاوله وقعدت تبكي بالعبره المره هاذي كان موجوعة جديات حست قلبها انكسر الإنسان الي تحبه ومحبتش غيره قريب يرتبط بوحده غيرها
صفاء تلخبطت ومعاش عرفت كنها لوجين تبكي قعدت تسكت وتحاول تفهم منها بس مافيش فايده ...لوجين تبكي والطلبه إلى في المدرج يبحتو بقصقه وخاطرهم يعرفو شن صاير
وحده من الطالبات وهي نازله تبي تقصقص
سألت صفاء : كنها تبكي
صفاء وهي تهز في كتفها : مش عارف
البنت : بالك عندها حالة وفاة
صفاء : لالا ماعندها شي بس شكلها مضايقة شويه
البنت : يمكن صاحبها سيبها
صفاء وهي تبحت في البنت : لالا هي اصلا مش مصاحبة
YOU ARE READING
الحلم يتحقق ( روايات ليبية )
Romanceقصة كفاح بنت ليبية بدينة للوصول الي الرشاقة و أيضا الوصول الي حلمها الذي انتظرته طيلة حياتها ؟ فما هو حلمها ؟ و كيف كانت قصة كفاحها ؟ للكاتبة : تهاني إدريس
