روايه ألم

الحلقه ٥

رواية ألم

الحلقة 5

نرجس كانت مستغربه  من السمعتو وبتحاول تتقبل الكلام  ، مسحت دمعتها النزلت من تأثرا بقصه صفا وحاولت تستجمع قواها عشان تبدا هي في الكلام

_ لظروف أبوي وشغلو البيتطلب بيتنقل من بلد لبلد واكترو في قطر  ،  قررنا نستقر في قطر  ، أنا وامي وحبوتي أم أبوي .

هناك لاقيت أول صديقه لي أو الكانت صديقه لي  ، بنمشي مع بعض واي شئ بنعملو سوا ،لدرجه بقيت زي أختها .

دخلنا الجامعه سوا ،لكن ما في نفس التخصص ، لانو كنا مقتنعين إنو  أي زول وقرارو وما ضروري نتأثر ببعض في رغباتنا .

بعد فتره لاقيت شاب اسمو عدنان ، في البدايه ما كنت بستلطفو  ،  بمرور الزمن أعجبت بيه  وفي الاخير بكلامو الحلو لي ومدحو حبيتو .

حبيتو وحباني وعلاقتنا إستمرت مع بعض وجا إتقدم لي .
إتخطبنا وكان لمصلحتو الخطوبه دي لإنو كان بيتعامل مع أبوي في الشغل.

بعد مده من خطوبتي لاحظت لصحبتي بقت تنفر مني وبقت ما تتكلم معاي زي الاول ،  حاولت إتكلم معاها بس كان بتتجاهلني بكل معنى الكلمه .

سألت كل الناس الحولينها والممكن يعرفو الحاصل معاها شنو ، بس كلهم كانوا بيردوا لي بنفس الشيء  ،ما بيعرفوا حاجه .

إتأثرت شديد فمهما كان هي صديقتي الوحيده لأكتر من أربعه سنه ومونساني في غربتي .

كنت بشكي لعدنان وبحكي ليه إنها اتغيرت مني وما عارفه السبب شنو

_عدنان ، تفتكر صحبتي إتغيرت معاي كدا لشنو ؟ وفجأه كدا !!؟

_يا نرجس خلينا من سيرة صحبتك دي وأنسيها ما دام ما دايراك هي  ،إنتِ كمان خلي عندك كرامه.

_كيف انساها يا عدنان ! دي صحبتي شديد وما معرفه كم يوم دي سنوات بحالها.

_نرجس خلينا من السيره دي وشوفي ليك أي صحبه تانيه ما حبكت للبت دي .

_ تمام يا عدنان

_ انتِ زعلتي ولا شنو؟   أنا كل همي إنك ما تشغلي بالك بيها  وأنسيها  ، أصلا ما بتستاهلك ، ما بحب زعلك  لأنك  حبيبتي وروحي  ، مش كدا ؟

زمان لمن يدّلعني ويقول لي كلام الغزل ابتسم وأرد ليه زي كلامو  ، لكن الا المره دي ،حسيت إني كشيت من الكلمه ، ما  حاول يساعدني ولا يقيف معاي في لحظه زي دي .

رجع قبلي السودان بكم شهر ،  ليه فتره قبلي أصلا  عشان ديك كانت زيارة بس لقطر .
تلاته شهور من هو سافر وبتواصل معاه بالتلفون ، أما صحبتي قلت أديها فترة  وأخليها لحدي ما ترجع براها .

في يوم أبوي قال لينا

_أنحنا بعد دا نرجع السودان بلدنا  ، أنا هسي عندي شغل لاسبوع ،بعدو يكون البيت جهز وتجوا  بعدي .