عشق في بلاد حروبها لا تنتهى 2 (طرابلس ياغارقة في الدم)

البارت 10

__
لف رعد الورقة علي لحشيش وقرطسه زين وحطه في فمه وولعة وهوا يجبد منه وينفخ في دخانه بستمتاع
شده بين صوابعة وطلع تليفونه بيده التانية من جيبه وفتحه وهوا يفتح علي جيهة الاتصال ويتصل بيها
رنيم:امتي بتعتقني لوجه الله
بتسم رعد:لما تنطقي الرا
رنيم:ونبي
رعد:ونبي عزيز ، وماعاش تحرقيلي اعصابي وقولي شن جوك
نفخت رنيم:اخي بكل تعوف من اسوء ايام حياتي نعيش فيهم توا
رعد:باهي كويس
سكتت رنيم وهيا اتمتم بس وقفت وهيا تقرب من الروشن:حي لمطو تصب
رعد قعد يشبح لقطرات لمطر اللي علي قزاز السيارة:اي
خشت رجاء فجأة علي رنيم لنزلت التليفون لوطه بخلعة وهيا تتلفتت لرجاء لتصيح:رنيييم زودي لمهند عفلقني ره بلوحه من الروشن
نفخت رنيم:تلوحي من عينك بوي لنور تو تجيه
طلعت رجاء وهيا تنقنق وخلت رنيم لرجعت التليفون في ودنها وتسمع في رعد يقول:رنين من سماك الله لا يربحه ههههههه
رنيم ضيقت عيونه وضايقة :ماما الله يوحمها
تحمحم رعد ووقف ضحك طول وقعد يتلعتم:اه هوا مش قصدي ماكنتش نعرف حلو هوا ره قصدي كنت نتسهوك بس لكن هوا حلو رنين مايشكي من شي
بتسمت رنيم علي ردت فعله وتلعتيمه الواضح وقالت:رنيم مش رنين وشكرا يابوق
رعد:هههه رعد قصدك
رنيم:اممم ومن سماك انت
رعد:بوي الله لا يربحه حتي هوا
ضحكت رنيم:ههههه حلو لكن رررررعد
رعد رفع حاجبه ببتسامه:اوو حتي من الرا طلعت في اسمي
ضحكت رنيم وقالت: عندك خوت
رعد:اي
رنيم:اكيد عندك خو اسمه بوق وله ومطو واكيد خواتك قمو وشمس
رفع رعد حاجبه:لا حولي ولا قوة الا بالله سكري يرحم امك
ضحكت رنيم:هههههه باهي باي
رعد:تعالا جاي وانتي ماتصدقي
رنيم:اووف
رعد بتسم:حلو صوتك زي الفرخات الصغيرات
رنيم:قصدك زي البيبي
رعد:نفس الشي وعيونك احلي
رنيم:ووين شفت عيوني انت
رعد:هداكا اليوم
رنيم:العفو ماتوكز اني من الخوف ماوكزتش فيك لاسامط لا مالح
رعد:ههههه كلامك هلبا علي الجمعية ياحليمه
عيطت رنيم:وااااك من حليمه هدي
رعد تحمحم ووقف ضحك والابتسامه قعده علي شفايفه:حبيبتي لقديمه
رنيم:تسهوك
رعد:واللهي بجديات
رفعت رنيم حاجبها:بالحقا
رعد:اي الله يرحمها
رنيم:اييييح علينا تو بديولي سيناويو ضوبتها سياوة ونطوة وقبتها لباويس والسياوة تفجوت فوقها وضوبها الناتو عاوفه عاوفه السيناووات لزي هكي وياناوي تواهو تتصل بيك توا وتلقا فيك مشغول معاي
رعد قعد يضحك ويسمع فيها وستاكا ماعاش بطل ضحك وهيا قعدت تدوي ماعاش بطلت عاد ...
__
خدي سفيان نفس كبير وهوا يشبح في التابوت لقدامه ، تلفت للشباب لشادينه واحد يمين وواحد يسار وقال:لا لا لا اكيد تبصرو لا ياشباب لا
شحوه جيهت التابوت وصوته تعالا وهوا يصيح:لااااا حولوووو لااااااااا
زادو كتفوه وحطو لكليبشات في يديه وسكروله فمه بالصقه وربطو رجليه بحبل سميييك وحطوه في تابوت وسكرو عليه ، حاول سفيان يعيط يناجي بس اول ماسكرو عليه التابوت سكت طول وبدت رعشت الخوف تسري في جميع أطراف جسمه ، والادرنالين وضغط دمه رقو وهوا يسمع في صوت دقات قلبه في العتمه الموحشه اللي برغم من انه فاتح عيونه بس من الظلااام التابوت ووحشته مش مفرق لو هوا فاتح عيونه ولا مسكرهم ، بدي تدريجيا يفكر في كل شي داره ، في عصيانه وصياحه لامه وفي ظلمه وضربه لبعض المساجين في المقر لكان شاد فيه ، في موتت بوه في لاحظاته مع فارس في طفولته وفي كبره كيف كان يسكر يحشش ويروح يرعش في امه حتي من السبان لطلع من فمه كله ادكرة ، وفي حمزة لمات بين يديه ، لا شعوريا وبرغم برائته من جريمة حمزة بدي يفكر انه هوا لقتله انه ربي بعدبه وخيال حمزة ماعاش بسيبه ، بدي يسأل في روحه علاش قتلته علاش درت هكي ، بدي يهلوس ويفكر في الاخرة في ربه اللي ليه ناسيه سنين ، حس روحه وكأنه بالحق وبجديات ميت وتوا هوا في قبرة ويستني في عداب ربي ينزل عليه ...
#القليل_من_الكتير💔
.
ومن انتم يابشر كي تتجبرو ، من انتم كي تصلتو في ظلمكم وجباروتكم علي عباد الله متناسيين ان من خلقهم خلقكم 💔
.
.
.
.
#يتبع_للبارت_لبعده
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3