عشق في بلاد حروبها لا تنتهى 2 (طرابلس ياغارقة في الدم)

البارت 5

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
الحلقة 5
.
.
في الحلقة السابقة
التشرينا الاولا التانيه التالته الرابعة الخامسه وقبل مايفصل انفتح الخط وهوا تكلم بهدوء وسكر عيونه:تعرفي اول مرة واخر مرة تردي علي النمي في اخر لحظه
ضيقت رنيم عيونها:عفوا
رعد:لا عفوا لا نمي ادوي باهي ولا فكيني
ضحكت رنيم بعدم فهم وقالت:قصدي انت غالط في الوقم وخيي
رعد:رنين معاي وله
غمظت رنيم عيونها بالقوة بغيظ وقالت وهيا تحاول تكون هادية:رنيمممممممم ميم ميم
رعد:اللي هوا ، ماعاش تستعبطي عليا وسجلي رقمي
رنيم:واللهي من انت باش نسجل وقمك
رعد:ياعن فيت...... اقلبي وجهك وانتي تجيبي القداد في الامعاء
وسكر الخط في وجها وخلاها فاتحه فمها زي العاده وبعدها تلفتت غمت وجها في المخده وعيطت بالقوة من غيطها منه ...
.
قراءة ممتعة
#البارت_الخامس

فتحت إيلاف عيونها بخلعة وهيا تسمع في دوشه البرا ، حولت اليرغان وطلعت من الدار تجري وهيا تنادي:رواااان
قربت ايلاف من باب الحوش واول ماشافت روان لفاتحه الباب وتبيت وهيا تندب في خدودها قربت تجري وهيا تسأل:خيرك شن فيه
روان:خوك حمزة مداير عركه مع ولاد الميدان وجايينه للحوش
ايلاف:ولاد شن تي مش المشكله مع مالك وحلوها
روان:خوك هدا بجيبنا الجلطه مهناش روحه وقال سراج الفرخ جاب صحابه وهجمو علي حمزة في الملعب
شهقت ايلاف وهيا تقرب تبيت من الباب:جاب ربي امي في حوش جدي كان هدا رعشت
روان شحت ايلاف وسكرت الباب:تعالي حسهم جو تو يكشخو علينا
خشو لصالة وايلاف تلفتت لروان:تليفونك حسه يشرين
خشت روان تجري لدار وردت علي تليفونها:الو يمه نعم
نجيه:وين حمزة نتصل بيه مايردش
خبطت روان علي راسها وطلعت لإيلاف لواقفه في الصالة وردت علي امها:نسي تليفونه في الحوش ومشي لنادي
نجيه:وبوك وينه
روان:مانندريش اكيد تلقيه مع عمي فتحي برا يهدرز
نجيه:اول مايروح حمزة قوليله يكلمني قلبي مش مرتاح
روان:حاضر
نجيه:وديرو لغدي لخوتك اونا تلقي اللحم في لفريز جابه بوك اول أمس
روان:حاضر سلميلي علي حناي وخالتي
سكرت روان وهيا تشبح في حمزة لخش ووراه بوها وسراج و خالد لسكر الباب وأشر لإيلاف لجت تجري قربت من حمزة اللي خشمه ينزف ومحصل بوكس علي عينه لين مزرقه وقال:بري جيبي سبيريتو
روان:تو نجيبه اني
خشت روان للمظبخ وهما قعمزو في الصالة وايلاف دموعها نزلو طول لما شافت حمزة كيف مضروب .
شد حمزة يد اخته وقال:مافيا شي اسكتي
مسحت ايلاف عيونها وهزت راسها بمعني باهي
عبدالحكيم:احمد ربك لخشو فيها لكبار وسلكت ، اعقل ياحمزة الفرخ انت مش قده راهو متع مليشيات راهو متع دوة فاضيه راهو خوته ناحيين يديهم من ربي اسمع لكلام وحط عقلك في راسك
جت روان ومدت الاسبيريتو لإيلاف لشبحت لحمزة لمنطقش ب ولا حرف
سراج:وعلي التليفون اهو عندك وكان تبي واحد تاني حني نشرولك لتبيه
حمزة:هوا مش موضوع تليفون
خالد:لا موضوع لا قصه ياحمزة حني مانبوش المشاكل خلي دعوتك تقلبه وخليها علي ربي
__
.
.
رفع محمد حواجبه:بدل ماترمو في لفلاويس علي الاسلحة كنكم ماتاخدو تمويل لناس اللي واكلها الجوع
شبح آسامة لأحمد(الصقر) لتكه علي الكرسي مكتبه والسانه ارتبط من كلام محمد ، تحمحم وقال وهوا يحاول يظاهر بهتمامه:اكيد وحني زي مانخصصو في المادة للأسلحة لدافاع علي الناس اللي واكلها الجوع نخصصو في فلوس باش نوكلوها
بتسم محمد بستهزاء:وين ماحقيت شي نا
ضحك آسامة وشبح لأحمد (الصقر) وقال:رد
تحمحم أحمد(الصقر) وقدم بكرسيه من المكتب:المهم المهم مش وقتها الدوة هدي
ضحك محمد وشبح لآسامة لرقصله حواجبه بضحكه وشبح لأحمد(الصقر) لكمل:بعد 17 فبراير بنهجمو علي تاجر مخدرات نبيك انت لتهتم بالموضوع ومنها نشوفو مهراتك
محمد:وعليش لا ، تمام
هز أحمد(الصقر):كويس ركز معاي لانه حني شغلنا جنائي تقدر تقول زي الشرطه الجنائيه
محمد:اي مشاءالله انتم في كل شي مخشاشين خشومكن
رفع أحمد(الصقر)حاجبه:مش عارف علاش حاسك تتسهوك هلبا
محمد رفع حواجبه زي أحمد(الصقر) وقال:حشومه ياراجل
تعلت ضحكت آسامة لمقعمز جنبهم بصمت وماسكتش غير لما أحمد(الصقر) تلفتله بتفنيصه خلاته يرفع يديه:اسف كملو
تحمحم أحمد(الصقر) وتخطا تسهويك محمد وكمل:هدا التاجر قديم هلباا من ايامات النظام السابق ومن شطارته ماحد قدر يوصله برغم معروف مكانه وين بس ماحد يقدر يمسه لانه عنده معارف هلبا في الدوله والناس كلها تحبه وماتسئلنيش كيف لانه بروحي مش فاهم
محمد:لالا عادي من ليبيا يأتي الجديد كمل
بتسم أحمد(الصقر) وكمل:تقدر تقول سوق الجمة وتاجوراء كلهم في جيبه من غير لمدينه اللي لايد فيها وقدره عالي في طرابلس هلبااا ، وبرغم من فئة الناس لتحبه هلبااااا عنده اعداء كتر شعر راسك
محمد:ومنهم انت
هز احمد(الصقر)راسه:اي منهم اني ، وللاسف درنا اكتر من مداهمه عليه وقدرنا نقبضو عليه بس كان من تاني يوم يطلع بسهوله
محمد ضيق عيونه:فيه ناس رابحه في جرته
احمد(الصقر):اي وناس هلباااا في الدوله رابحه معاه وناس هلبا رابحه منه
آسامة:دكي هلبا ويلعب في لعبته صح ههههه طبعا في الطبيعي الولد يورت من بوه صنعة الحلاقه ولا صناعة حاجه باهيه اما هوا ورث من بوه تجارة المخدرات
محمد هز راسه ببتسامه وشبح لأحمد(الصقر)لقال:اسمه السيفاو عنده اربع خوت والأربعة يخدمو معاه بس ماحد يعرف اشكالهم او صفاتهم ، وهدي ح تكون مهمتك الاولي حني مانبوش السيفاو بس نبو حتي خوته لانه السيفاو مستحيل يطيح مدام خوته وراه
وسكت احمد(الصقر) وهوا يشبح لمحمد لسكت فتره بعدها رفع راسه وشبح لأحمد(الصقر) وقال:كان المداهمات نفعت معاه ره قدرتو تمسكنه من اول مداهمه
ضيق آسامه عيونه:شن قصدك
اتكه محمد بمرافقه علي ركاب رجليه وقال:المداهمات والسلاح والضرب مايجيبوش راس واحد كيف السيفاو التكتيك والعقل هن لجيبوه
احمد(الصقر):وكيف
محمد بتسم:مش هدي مهمتي وتبو نوريلكم مواهبي خلاص تمام
شبح احمد(الصقر) لآسامه لرفع حواجبه بأعجاب من كلام ورزانة محمد .
__
نقصت مريم علي الطنجرة وتلفتت وهيا ترد علي روان:وينه توا
روان:قعد في داره هوا وايلاف
مريم:ربي يهديه وخلاااص وياخدله حقه هوا عنده الحق ره
روان:نعرف بس توا في وقتنا وفي وضع بلادنا حتي ليدفل عليك تقوليله بارك الله فيك وتبوسله راسه فوقها ، بدي القتل ساهل يامريم
مريم:والله حق ربي يهديه وخلاص
روان:خالتي قعده في حوش جدي
مريم:لا مبكري شوي كيف روحت قالت خالتي نجيه قعده
روان:اي جاب ربي لقعده غادي وماحضرتش لعراك كان هدا رعشت
خشت رانيا تجري:مريم زودي كلمي سامح يبيش يخليني نتفرج
حولت مريم التليفون من ودنها وصيحت:سااااااااامح وربي كان ماطير تقرا لمتحانك لما نجيك بجريده خضره
سمعاته وهوا يصيح:واااااك وااااك
مريم:علي راسك ، وانتي بري ونقصي خلي امي ترقد شوي
مشت رانيا وخلت مريم ترجع ترد علي روان لتضحك:اضحكي اضحكي مش مجربه مه
روان:لا مجربه حتي اني عندي زوز عفاريت وتوم فوقها هههه
بعدت مريم التليفون من ودنها وهيا تشوف في احمد(الصقر) خش عليها انتظار ، رجعت وردت علي روان بسرعة:سكري سكري احمد خش عليا انتظار
روان ضيقة عيونها:اراك مرتاحه منه ياوخيتي
مريم:ماعاش تقولي هكي خيرك هكي
روان:بري بري اصلا هدا لبجيب اخرتك زيك زي الفرخة ايلاف
مريم:باي باي وانتي تجيبي الوسواس
سكرت مريم من روان وردت علي احمد(الصقر) قبل مايسكر:الو حبيبي
احمد(الصقر):في من تكلمي ساعة
مريم:في بنت خالتي
أحمد(الصقر):متأكده
مريم ضيقت عيونها:شن قصدك شاك ولا شن
أحمد(الصقر) تنهد:لالا ماتاخديش عليا المهم ستاحشتك لا المليون
مريم:والله
احمد(الصقر) بتسم:واللهي الله هههه شن رايك غدوة نجيك للجامعة
مريم سكتت شوي:اممم تمام بس هدي المرة من بعيد
__
.
.
#الداخل_مفقود_والخارج_مولود
حولو من علي وجه معتز لغطاء اللي ليه اكتر من 5 او 6 ساعات مغطي علي وجهه ، نزل راسه وغمظ عيونه كردت فعل من ضي اللامبه الخافت بعد مدة طويله قضوها عيونه في الظلام لغطاء ، قعد يرمش في رموشه ويفتح في عيونه ويسكر وهوا يحاول يفتحهم زين ويشبح لراجل لملتم بلبسه العسكري لواقف قدامه ، تحمحم وهوا يشبح في الراجل لقدم وحط قدامه ورقه وحس بحد وراه يفتح في لكليبشات لشنجت يديه ، ...:فيه نسخ منها
رفع معتز عيونه لراجل لملتم وماردش ، رجع الراجل وكرر سأله بهدوء:فيه نسخ تانيه من لوراقي هدي
معتز:اي وفيه بلاوي اكبر من لي في لوراقي هدي
واول ماكمل معتز كلامه رفع الراجل يده لي لاف عليها حبل غليط عدت لفات وضربه بيها بالقوة لدرجه من ضربه وحده بس انجرح خد معتز وخشمه نزف ، صيح معتز وهوا يشد في خشمه:مش من حقكم تضربو هدا تحقيك مش مكان لتعذيب
قرب الراجل وشد معتز من شعره ورجع راسه بالقوة للخلف وخنقه من رقبته بيده التانيه لين معتز تأوه بالقوة وهوا يشد بيديه فوق يد الراجل لخانقه بيها، ...:تو تشوف التعديب علي وصوله
ودفه طيحه بالكرسي علي الارض وصيح:زودو علقوه من رجليه
قام معتز روحه وهوا يشبح في زوز شباب ملتمين جوه وهوا حاس انه الجاي أسوء لا محال ، واول ماشدوه فك يديه منهم وقعد يصيح:حولو من عليا شن حني قعدين في عهد العبيد حولو ونبي نوكل محامي شن السبب باش تجيبوني هني فهموني اني شن مداير
قربو الشباب وشدوه باالقوة وسكروله فمه بلصقة وهما يركلو فيه برجليهم ويضربو بيديهم وهما يسبو ، دخلوه لدار مظلمه وكلها سلاسل حديد وفيه سلاسل حديد ونهيتها كورات حديد كبيرة ، قعد معتز يشبح حولينه ومن خوفه الطبيعي اللي بيطلع من اي شخص لما بشوف الدار هدي هفت من تعفيره لشباب لشدوه من يديه زين وفجأة حس بزوز شباب تانيين شدوه من رجليه وقاموه حيت قعد معلق في الهواء ، زوز شادينه من رجليه وزوز شادينه من رجليه ، وبعدها علقو في رجليه زي لكليبشات وطلقوه خلوه معلق من رجليه رأساً علي عقب ، كان يبي يصيح بس اللصقه اللي علي فمه كان نوعها قوي وقد مابللها بدفاله وبعدها بالسانه باش تتحول بس شي شي ، قعد يقيم في راسه اول ماشباب لشادين يديه بعدو وهوا يشبح فيهم كيف جابو تلاته كورات حديد موصله ب سلاسل طويله ، وخدو هدي السلاسل لموصله فيهم وحطوها في يديه والتالته حطوها في رقبته لاول ماحطوها ماعاش قدر يرفع راسه لانه اول مابيرفع راسه ح يتشكل وكان عارف لو رفع رقبته بالقوه ح يكون حتفه الموت لا محال وكسر رقبته ، اما يديه ف حتي هما مش قادر يقيمهم .
ماليشي دقيقه بس علي الوضع هدا وحاس الدم كله نزل لراسه وحاس بدوار ورزن في راسه وعيونه حاسهم بيطلعو من مكانهم ودقات قلبه زادو بشكل غير طبيعي ...
#هدا_القليل_من_الكتير
__
.
.
نزار:تي رقمه مقفل والمستنادات والإتباتات كلهم عنده
نفخ عبدالرحمن وهوا يمسح علي جبهته ويشبح للوزارة:ازفت وين مشي هدا مش وقته الساعة 12 تسكر الشكاوي وطعون
نزار تنهد وتلفت لرامي لواقف يجرب يتصل ب معتز بس من غير فايدة .
نزار:ماتحاولش علي الفاضي
رامي رفع راسه شبح لنزار وقال:اول مرة يديرها قبل ديما نلقو فيه قدامنا
سكت نزار شوي وشبح لعبدالرحمن لنتبه وقرب منهم
نزار غمظ عيونه ورفع راسه وقال بصوت واطي:ان شاءالله لا
رامي:زعما داروله حاجه
زمط عبدالرحمن ريقه بخوف وشبح لنزار لواقف يفكر ...
__
تلفتت وهيا ترفع في حاجبها:تبي رعد يطقطق رقبتك بين عشرين امالا
نفخت وهيا تلوح في التليفون البيلا علي السرير:ازح تقول عايشين في مقبرة شن هدا مش معقوله حتي التليفون بدرقه تي حتي قطن اللي المفروض عيب وحرام نقول نبي نشريه والمفروض ننزل ناخده بروحي نفصح ونقوللهم اشرولي قطن مش عيشه راهي مش عيشه ياحنين
خدت حنين التليفون و وقفت وهيا تتاكد انه صامت وقربت من سريرها لجنب سرير اختها وقامت طرف لفراش وحطاته بين لفراش ولوحت السرير وتلفتت وهيا تقعمز:حتي اني فديت زيك ومليت وبنطربق بس تحملي سيورة بنتزوجو وبنطلعو من حبس الخوف والرهبه هدا
ضحكت بستهزاء وقالت:اي علي اساس العرسان طابور علي حوشنا ، باللهي تره فكيني من وهم الزواج من بيرضى ياخد اخت تجار مخدرات تره قوليلي ولا تحسابينا في مسلسل تركي ولا فيلم هندي بحارب الكل باش ياخدك فيقي سلم اختي يضل اسمنا مربوط ب اسم بوك وخوتك وب اسم تجار المخدرات
حنين ضيقت عيونها ووقفت وهيا تنهض في لحوايج لكانت اطبق فيهم:ساجدة باللهي عليك خلاص مداما عارفه مصيرنا كيف علاش كترت الدوة ووجع القلب ارضي باللي حني فيه واسكتي
ضربت ساجدة رجلاها علي الارض وهيا تسمع في صوت امها(احلام)تنادي ، وقفت وهيا تطلع من الدار وترد علي امها لتنادي:نعم
احلام:زودي انتي واختك وتو للعشي خوتك اليوم بيتعشو هني
نفخت ساجدة وخشت للمظبخ من غير اي كلام زايد وهيا تنفخ وتعاود ، طلعت الدجاج من لفريز وطلعت الخضرة من التلاجه .
خشت حنين عليها:حسه رائد جي ادعي رعد مايجيش كان هدا بينصبها هوا وياه
ساجده:ياناري رائد ديما هوا ليتهزب برغم كلامه وتفكيرة اعقل منهم كلهم
طلعت حنين البطاطه من السلة وشبحت لساجده:تعرفي يسخف فيا برغم الضيق لعايشين فيه حني والفدد من حبس الحوش بس هوا مضرر اكتر منا
سمعو صوت علاء و فاتح لخشو يضحكو ويهدرزو واول ماشافو امهم احلام مقعمزة في دار المعيشه هيا ورائد قربو منها وباسو راسها بدور وقعمزو جنبهم ...
صيح فاتح للبنات:هي انتي وياها ديرونا قهوي
نفخت ساجدة وهيا تقلب في عيونها:خدم خدم مش خواتهم
نخزتها حنين بالموس بشويه علي كتفها:مستاحشه لعرايك انتي ديري واسكتي
دارت ساجدة القهوة وطلعتهالهم ورجعت خشت للمطبخ ، وهيا تقرب من الروشن وتشبح لزحمت الناس تحت ...
ساجدة:السيفاو ورعد لوطه
حنين:نهار اغبر يتلمو خوتك اعرفي فيه مناقشات بتلم علينا العمارات كلهم
تنهدت ساجدة وهيا تشبح لسيفاو ورعد ..
رعد:مانعرفش قداش ليا ماعاش كلمته
رفع السيفاو حاجبه:ونعم القول والله
رعد رفع كتافه:تبيني نكدب وبعدين علي اساس بوي لما نتصل يرد عليا زي قلته هاتفه
السيفاو:مش عدر عاود اتصل بيه هوا غدوة بيروح اتصل بيه اليوم قبل مايروح
سكت رعد وماردش علي السيفاو لتلفت ومشي وهوا يكمل في كلامه:زود خلينا نركبو
طلع رعد تليفونه لشرين ومشي ورا السيفاو بس اول ماشاف من تفجأ وقال:ارد علي الهاتف ونركب
تلفتله السيفاو وهوا يمشي:ماتتعطلش
بتسم رعد بستهزاء:حاضر بابي
ضحك السيفاو ومشي وخلا رعد يشبح للمكالمه و لتشرينه خش لرقمها وتصل ، ومن اول تشرينه ردت طول:الو
رعد:يلويك غلطي انمي ازح تقول نكلم في فرخة سنتين
ضيقة رنيم عيونها:شني تبي ها
رعد:ورب القعبة تبي نتشه في مكان باهي انتي
رنيم شهقت:احتوم نفسك ياسخيف
رفع رعد حاجبه:ونبي اما انتم اكفر منكم مافيه
رنيم:شن قصدك انت شن قصدك اه
رعد:انتي لتصلتي ب.... شني تبي
رنيم تحمحمت:هوا اني مش قصدي غلطت فيك
رعد:صدقتك هلبا هاتي غيرها
رنيم:وحقوبي هي لغلطت انت وبابا نهايت وقمكم 71 نبي نتصل بيه اتصلت بيك هدا علاش سكوت طول ك.....
قطع عليها رعد وهوا يخش للعمارة ويركب بالدروج:باهي باهي انم صدقتك ازف مكتر ام دوتك صوتك مزعج ازح
رنيم:احتوم نفسك تقدو تسكو ماحد جبوك تسمع صوتي
رعد بتسم:ياحليلي علي الكرجه ، نبي نفهم حاجه تو انتي في جميع الكليمات الرا طالع في القطار السريع الا في اسمك زي السلحفاء وتنطقي فيه
بتسمت رنيم علي كلامه:ماخصكش
رعد:ياعن شكلك انم حتي اني فاضي معاودلك مه
رنيم:وسكو من شادك
وقف رعد قدام شقتهم:سلامتك ماحد يقدر يشدني اني لكن ماخاطريش نسكر
رنيم:بس اني نبي نسكو
وقبل مايرد رعد انفتح باب الشقه وطلع فاتح:رعد
نزل رعد التليفون وتلفت لفاتح:خيرك
فاتح:زود انزل لرشيد جيبلنا شيشة مشروب
رعد:عندك مكاسير انزل بروحك
اتكه فاتح علي الباب:ناقصك ربايه
رفع رعد حواجبه وكيف بيقوله كلمه اكبر من راسه بس ركز علي التليفون وانه رنيم علي الخط وقال وهوا يتلفت وينزل ورفع يده وقال:مش علي سواد عيونك غر جعان
ضحك فاتح وخش مستغرب من ردت فعل رعد لنزل ورجع حط التليفون في ودنه:ايكو وينك
رنيم:ايكو شني
رعد:الايكو متع المستشفيات
رنيم قلبت عيونها:واااااك ياوبي وااااك
ضحك رعد لين خلا رنيم تتحمحم وهيا تبتسم من ضحكته ...
__
.
.
فتحت آيات عيونها علي وسعهم وشهقت:احلفي
مسحت فرح دموعها وحولت الكمادات من علي راسها وهزت راسها:بنموت حاسه روحي
سهي:يمشي ان شاءالله ربي يقهره ويوجعه زي ماقهرك يابنية خالتي ريتي الحيوان الكلب مش ساداته خاطيبته
آيات:فتحتي تليفونك
سهي:رد بالك تردي عليه الكلب كان اتصل رد بالك
فرح زادو دموعها نزلو وقالت بالعبرة:رسائله تقهر عترف انه خاطب قالي يبيني وخطب بسيف بس
آيات:بس شني
خشت فدوي عليهم بصفرة الشاهي ، ضيفتهم وقعمزت وهيا تشبح لآيات لردت وقالت نفس كلمتها:اي بس شن يافرح
شبحت فرح لفدوي لتنهدت وقالت:حاولت تتصل بيه زي لحمارة بس تليفونه مقفل من الصبح
شهقت سهي:والله ماعندك كرامه هي ولا تكسابيها
فرح:لالالا مش عارفه حاسه وكأنه صايرة معاه حاجه مش عارفه بس قلبي مش مطمن
سهي:تي لقلب ليقلبه مايرده وانتي مازال تفكري فيه
فدوى:خرفت قبلك بس شي شي
آيات:قصدي شن بعتلك هوا في الرسائل
تلفتت فدوى وخدت تليفونها وفتحت علي رسائل معتز وعطاته لأيات لقعدت تقرا هيا وسهي ...
__
مسحت زهرة علي وجها وهيا تشبح لبنتها نرجس:المغرب ادن وقعد مايردش قلبي يانرجس قلبي يابنتي خوك مش من عوايده يقفل تليفونه
خشت اخت معتز الوسطيه (هناء) وهيا تقرب من نرجس:ارقامه كلهم يعطو مقفل
خبطت زهرة علي رجليها:والله لا خوكم ابصر شن فيه من ال7 لا توا مافيش خبر عليه الا وفيه حاجه
هناء:اهو تو نتصل ب عبد الباسط خوي نشوفه بالك يلقا حل خلاص يمه ان شاءالله مايكون الا خير
طلعت نرجس وهيا تتصل براجلها:ايوا يونس وينك
يونس:اهو شوي وجايك وتي روحك
نرجس:لا زود ره عزو من الصبح طالع ولا توا ماروحش وتليفوناته مقفل قبل شوي جو صحابه يسألو عليه قالو كان عندهم موعد في الوزارة كلهم مشو الا هوا مامشالهمش
يونس:لا حولى ولا قوة الا بالله وين بكون اكيد يامقتول يا محبوس من لعمل ليدير فيه
عيطت نرجس بأعصاب ودموعها نزلو:يونس مش ناقصاتك ره روحي في خشمي تعالا كب تجي تشوف الوضع وكان هدا اسكت لا اني ناقصه ولا امي
نفخ يونس وماباش يزيد يشريها معاها وقال:تمام تمام اهو جاي
__
تنهد فارس وهوا يسكر في سيارته:نفختيهم ياحبي تي توا كيف مروح كيف بنخطم عليك
نفخت نهي:واااك اني قتلك من الصبح تعالا اليوم مستاحشاتك بنشوفك
بتسم فارس:سلمها لمستاحشتني حاضر غدوة نجيك اليوم فوتيها واللهي راسي بيطربق
نهي:تمام خلاص
فارس:ماتزعليش ياحبي انتي غدوة نعوضهالك
نهي بتسمت:باهي خلاص نخليك تتريح بس فليل بننفخلك راسك
فارس ضحك:هوا فيه ليل بعد هليل
نهي:هههه اي اي فيه سلملي علي خالتي هلبا
فارس:وحتي اني سلميلي علي خالتي وعمي مسعود
سكر فارس من نهي وخش للحوش وهوا يسمع في تهدريز في المظبخ ، قرب وهوا ينادي:يمه
ماجده:تعالا تعالا
خش فارس للمظبخ وهوا يشبح في امه لمقعمزة علي الكرسي وتشبح لنادين هيا وفاطمه ويضحكو .
واول مانادين شبحت فارس تحمحمت وخدودها ولو حمررر .
بتسم فارس وقال:اشيه اشيه اليوم عندنا الغلا واختها
ماجده:هههه اي سلمهم دارو لعشي
فاطمه:اليوم كول وتلدد ياحنه
فارس:ههههه لا هوا من الريحه باين حتي من النوم طار لكن هوا من مطيب قبل
ماجده:الزوز الحق ماقعمزو
فاطمه تحمحمت وشبحت لنادين بطرف عينها وقالت:هوا الحق نادين واني المساعده
فارس:هههه اوووو هوا هكي شكله اليوم بنرقدو في الطبي
تلفتتله نادين وضيقت عيونها:وعلاش نص لتاكل فيه من تحت يديا من امتي ارقدت في الطبي ولا في المجد حتي
ضحكو عليها وفارس قرب وهوا يقرصلها في خدها:ياااام السااان انتي محرفك
ضحكت نادين وخدودها من الخجل بيطربقو من كتر ماهما حمر.
ماجده:كلمت خوك
تلفتلها فارس وهوا يطلع في تليفونه من جيبه:لالا اهو بنتصل
طلع فارس من المظبخ تحت انظار نادين لملاحظها وحب يحسسها انه ماتعنيلاش اكتر من اخت وتلفت لأمه قبل مايطلع وقال:تسلم عليك نهي
ضيقت نادين عيونها وتلفتت لفاطمه وفكت منها الموس وقعدت تقرض في البصل بغل ...
ماجده:سلمها ياحنه
مشي فارس وخش لداره وهوا يتصل ب سفيان لرد:ها وينك مش مروح
سفيان:لا بروح
رفع فارس حاجبه:غريبه
سفيان بتسم:اهو بنتم موضوعي هني ومروح
فارس:موضوع شن
سفيان:بنحول للشرطه القضائيه وبناخد تعين وبعيد علي الدوشه لكنت فيها وريح امي باش اروح نرقد في الحوش
فارس ضحك:تطور مشاءالله
سفيان:مش قتلي حسن من روحك
فارس:ماتخيلتكش بتسمع لكلام هههه كان هدا ره من امتك قلتهالك الكلمه
ضحك سفيان:مصحك هي اهو مروح
.
.
.
#يتبع_للبارت_لبعده
زعما شن بصير في الحلقه الجاية ، سفيان بيلقا فرصه باش يحسن من روحه زي ماقال وبفرح امه بقراره هدا ، وزعما معتز شن مراجيه في هدا المكان المرعب ، ومحمد زعما شن الفكرة لتلود في راسه باش يوصل لسيفاو .....
واللي قارين الجزاء الاول من الرواية #عشق_في_بلاد_حروبها_لا_تنتهي1 (الفثنه والثأر) ح يكون فاهم شن بصير لسفيان 💛
#الياقوته
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3