عشق في بلاد حروبها لا تنتهى 2 (طرابلس ياغارقة في الدم)

البارت 4

_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
الحلقة 4
.
.
في الحلقة السابقة
كانت روان تتفرج في وسط الحوش واول ماشافتها طلعت من الدار تجري صيحت:خيرك
وقفت ايلاف وتلفتتلها:شي بس بنخش الحمام
رفعت روان حاجبها:شن بديري
ضيقت ايلاف عيونها:مصح وجهك شن يديرو فيه الحمام هوا تره
روان:ان شاءالله اديري فيه وضيفته مش حاجه تانية
قلبت ايلاف عيونه وتلفتت خشت وسكرت علي روحها وهيا تقرب تفتح في الروشن اللي اول مافتحاته شبحاته واقف وعاطي بظهرة
ايلاف:بست ياحلو
تلفت سفيان وضحك:مجنونة
ايلاف:هههه ستاحشتك
قرب سفيان ومدلها شكلاطه لين ايلاف ولو عيونها قلوب قلوب:امتي جبتها هدي هههه
سفيان غمزلها:خشيت الدكان بسرعة بسرعة عارف حبي يحبها
خدتها وهيا تحضن فيها وتضحك بفرح بشوفته:ياروحي نحبك واللهي
سفيان:حتي اني نحبك
وقبل ماسفيان يزيد يتكلم سمع صوت وراااه:سفيان
تلفت سفيان طول وايلاف من الخوف سكرت الروشن بتقربيع .............

قراءة ممتعة
#البارت_الرابع

تلفت سفيان بصدمة علي صوت لناداه:سفيان
واول ماسفيان تلفتله قرب فارس منه ودفه وخشو لزنقه لبعد حوش ايلاف ، دف سفيان فارس وقبل مايتكلم سمعو صوت خالد وسراج خاطمين .
تلفتو فارس وسفيان وكملو مشي في الزنقه من غير صوت .
شبح سفيان لفارس بحشمه وهوا يحك في راسه:جيت في الوقت المناسب
سكت فارس وماباش يرد عليه لين رجع سفيان تكلم:شكرا
شبحله فارس بطرف عينه ورجع شبح لطريق قدامه:عندك علم لو شدوك خوتها شن كان صار
سفيان:عارف
رفع فارس حاجبه ورجع شبح لسفيان:عارف وتغامر
نفخ سفيان:لا نغامر لا شي اوووف مش عارف شن جيبني اني
فارس:تبيها
شبحله سفيان وهز راسه بمعني اي .
فارس:غير من روحك باش تليق بيها عمي عبد الحكيم مستحيل يعطيهالك وانت ماشي في الطريق هدي
سرع فارس من خطواته وخلا سفيان يشبحله ووقف في مكانه.
__
خدي معتز طاست العصر من امه:صحيتي ، لقيت نرجس متصله بيا
امه(زهرة):اي اتصلت بيا واني نصلي قتلي اتصلت بعزو ماردش بنسأله وينك
معتز:خيرها
زهرة:بجو غدوة يتغدو هيا وخواتك هني
معتز:وقضها في الشهادة تو نسكر داري خير مانلقاها خرابه من مفرخهم
ضحكت زهرة:عيب عليك
معتز ضحك وشرب من العصير وزهرة كملت:شن امتي بتحرك روحك وبتقولي يام هي حددي موعد للعرس
شبحلها معتز وتعبير وجهه تغيرت:مزال مش وقتها توا
زهرة ضيقت عيونها:امتي امالا وقته كل مانفتح معاك الموضوع تقولي مزال مزال عيب هكي ماتحشمنيش قدام خالك ومرته
معتز طلع تليفونه لشرين من جيبه وقال بتهرب:خلاص يمه قلنا مزال ماتشوفيش في وضع لبلاد
وقبل ماتزيد زهرة تتكلم وقف معتز ورد علي تليفونه:ايوا نزار
نزار:اسمع جيب النسخ وخلي عندك الاصليات مرات يفكوهم منا
خش معتز لدارة وقال:اي اي مداير في بالي ، تعرف يابرو مش مطمن بكل
نزار تنهد:واللهي زيك لكن ان شاءالله خير حني نجربو جميع الطرق يانطيحوهم ونفضحو عمايلهم وريحو لبلاد من نهبهم يا نضيعو حني
معتز:ربي يستر ، اني بنطلع جو 7 7:30 وتي روحك نخطم عليك نمشو جميع
نزار:طلعتها سيارتك
معتز:اي امبكري جبتها
نزار:تمام تلقاني واتي وتو نتصل بلولاد نتلاقو قدام الوزارة
معتز:تمام ياقدر تصبح علي خير
سكر معتز من نزار وطلع خش للحمام وغير حوايجه وتكه في فراشه وهوا شاد التليفون ومستغرب كيف فرح اليوم ماتصلتش بيه بكل ، حط علي رقمها وتصل بس يخش عليها انتظار ، سكر وستني دقايق ورجع اتصل بس نفس الشي لقاها انتظار .
سكر علي سنونه بتعصيب وقعمز زين وبعتلها رساله(في من تكلمي الساعة 1 سكري وردي عليا)
وستني شوي ورجع اتصل بيها وهدي المرة مالقاهاش انتظار وردت عليه في اخر لحظه لخلاه يزيد يتكنطى منها ويصيح عليها اول ماردتش:ازح في من كنتي تكلمي اه وعلاش ماترديش علي طول
فرح:تفضل شن تبي
ضيق معتز عيونه وقال بعدم فهم:شني شن نبي هدي
فرح رجعت وقالت بهدوء:يعني شن تبي متصل
خدي معتز نفس وحاول مايزيدش يتعصب عليها:فرح ماتكنطينيش وقولي خيرك وفي من كنتي تكلمي الساعة هدي
فرح:في خطيبي
معتز:فرح تكلمي زين غير مانغير علي الوجه التاني
فرح:حتي اني نتكلم زين وعادي جدا اولا وتانيا ماخصكش من نكلم والساعة كم من تكون اصلا انت
معتز رفع حواجبه:من نكون اني صار ، شني صاير بزبط مليتي مني ولا لقيتي بديل ولا شن
بعدت فرح التليفون وخدت نفس وهيا تحاول ماتوضحلاش انها تبكي ورجعت التليفون علي ودنها وردت:نبي نسألك سأل واحد ولو سمحت جاوب عليا بصدق
معتز:ردي علي سألي قبل في من كنتي تكلمي
فرح:انت خاطب
ضم معتز شفايفه بصدمه ورفع حواجبه وهوا مش عارف شن يرد عليها او شن يجاوب ، سمع ضحكتها المقهورة وصوتها لي فيه بحت العبرة:علاش باهي مكلمني علاش تعشم فيا فيك علاش خليتني نتعلق فيك
مسح معتز علي لحيته وقال:من قالك قصدي مافيش منها الدوة
تعلا صوت بكي فرح لقالت:لا فيه منها فيه ، لا امتي بتقعد تكدب مه سيورك بتتزوج ولا بتخونها معاي حتي بعد الزواج
وعلت صوتها وصيحت:اني نكلم فيك
معتز:فرح اهدي باللهي عليك اني ، اني كنت بنقولك
فرح:وامتي بتقولي ان شاءالله بعد ماتتزوج ولا في ليلة دخلتك باش تكون كسرتي قوية
معتز غمظ عيونه وقال بتنهيده:فرح
فرح عيطت:شني درتلك اني شن درتلك علاش تكافي في حبي وصبري معاك كنت نحطلك في عدر علي اهمالك وبعدك طلع عندك من تهتم بيه من غيري طلع اهتمامك وحبك مش من حقي طلعت حلم ووهم وكدبه
معتز:لا حبي وهتمامي ليك انتي ومن حقك باللهي عليك يافرح اهدي ومن غير بكي خليني نفهمك
فرح:شن بتفهمني ، خلاص خطيبتك فهمتني كل شي اللي بتقوله قالاته هيا عليك
معتز ضيق عيونه:هند اتصلت بيك
فرح:ماعاش تكلمني ولا تسمعني صوتك ولا نبي نشبحك في حياتي كلها ياعزو
معتز:فرح فرح ستني باللهي عليك مات....
وقبل مايكمل كلمته سكرت فرح تليفونها في وجهه وسكرت تليفونها بكل وشبحت لاختها فدوي لقربت حضنتها وتمسح علي شعرها:خلاص ياقلبي مايستهلش دمعة من عينك
قالت فرح من بين شهقاتها:نحبه واللهي نحبه كسرني قتلني
.
اما معتز قعد يفرفش ويعاودلها بس اول مالقاها مقفل حدف تليفونه وشد راسه ويحاول يستوعب ويفكر شن يدير والخوف لي في قلبه انه يخسرها مرعب ، ويخوف هلبا .
رفع راسه وجبد التليفون وخش اتصل علي هند بنت خاله و خطيبته مره تنين تلاته عشرة بس شي شي ماردتش ، خدي نفس وهوا يحاول يتمالك اعصابه وميلوحش التليفون علي الحيط في اعز حاجته ليه من الغيظ ، وخش بعت لهند رسالة (اول ماتفيقي اتصلي بيا طول ظروري)
.
.
قعد معتز طول الليل يحاول يتصل ب فرح اللي يعطي فيه رقمها مقفل وحاول يتصل علي رقم اختها فدوي بس كان ينادي ينادي ومايرد حد ، وكان متأكد ألف في الميه انه شاده تليفون اختها وتشبح فيه يتصل خش علي الرسائل وقعد يبعتلها في الرسائل (باللهي عليك يافرح ردي عليا وخليني نفهمك) (اني مانبيهاش والله مانبيها خطبتها علي خاطر بوي الله يرحمه مسماها بسمي والكلام الفارغ هدا) (فرح اني نحبك انتي وقسم بالله ماحبيت في عمري غيرك) (عارفك تشبحي في الرسائل ردي عليا ياقلبي انتي ردي وماتخليش قهرتي تزيد) (فرح اني نبيك وربي محتاجك جنبي) (سامحيني ياحبي خفت نقولك ويصير زي توا خفت نعترفلك ونخسرك) (سامحيني كان جرحتك لكن ورب العزة الا نحبك انتي ومش غيرك)
كان معتز كل بين رسالة ورساله يتصل ويترجي في ربي انها ترد بس كانت فرح تقري وتبكي من غير ماترد علي مكالماته او ترد علي رسائله.
قعد معتز فايق لا الصبح كان ضايع وحاس روحه تااااعب ومشتت ، ومش خاطره لا في الطلوع ولا في خدمه ولا في اي شي بس ناض بسيف وبدل ونظم امورة وطلع ركب في السيارة وتحرك وهوا يطلع في تليفونه لشرين من جيبه واول ماشاف المكالمه من هند رد طول:ايوا
هند:صباح الخير
معتز:من وين جبتي رقمها
هند رفعت حاجبها وفهمت طول شن قصده بس دارت روحها عبيطه وقالت:شني مافهمتش رقم شنو لجبته
معتز:من غير استعباط انتي فاااهمه عليا كويس
هند:لا مش فاهمه شي
صيح معتز:ماتخلينيش نفصل ياهند كيف تكلمي البنت بصفتك شن اه من عطاك الحق تتصلي بيها
ضيقت هند عيونها وقالت بصدمه:بصفتي شنو ؟! ، اني خطيبتك ، اني كلمتها بحترام وبالإسلوب وطلبت انها تبعد علي طريقنا وعلي ما أضن هدا حقي انه نحمي علاقتنا صح ياولد خالي
معتز:لا مش من حقك
هند:لا حقي
معتز وطي صوته وهوا يستوعب في حاجه وقال:تدوي وكأنها حاجه عاديه نكلم غيرك ، يعني في كل مرة تكتشفي فيها خيانتي تكلمي البنت وتهداديها ولا كيف
سكتت هند لحظه وبعدها قالت:انت تجرح فيا بكلامك
معتز:جرحتك لاني قلت الحق سامحيني فيها لو كان عندك كرامه بعد ماكتشفتي خيانتي ره ابسط شي درتيه انه فسختي خطبتنا
نزلو دموع هند:اني نحبك هدا علاش مافسختش ومانبيش نفسخ
معتز:لكن اني نبي نفسخ بنت خالي علي عيني وراسي وطول عمري نعتبر فيك اختي ومستحيل في يوم نتخيلك مرتي البنت لكلمتيها وجرحتيها هيا بس لنتخيل في روحي معاها اما غيرها لا
وسكر الخط في وجها وهوا يزيد في سرعة السيارة ، وضرب الدومان بيده لسوق بيها بالقوة وبتعصيب وحدف التليفون بيده التانيه علي الكرسي لجنبه وفتح الروشن وهوا يحاول يهداء ، ويحاول ينساها شوي بس مش قادر صوت بكاها صوت لومها وكلامها كله قعد يتردد في مسمعه حاس بجرحها حاس بوجعها ، نفخ وتغير تفكيره في حل للمشاكل اللي جاته بسبب المستنادات والملفات المهمه لبين يديه هوا وصحابه لانه عارف لو ورقة وحده بس من المستنادات لعندهم تطلع اطير مسؤولين وروس كبيرة من كراسيهم ومناصبهم مع فضايح وتخليهم يخشو للحبوس ولو ماصارش هكي هما اللي ح يدبسو وروسهم لبطير.
ضيق عيونه وهوا يشبح من مرايت السيارة علي السيارات العالية والمصفحة وراه وهوا قعد يساوي في لمراية يبي يشبح زين ، بلمح البصر سبقاته سيارتين ووقفو قدامه بمسافه بعيده وجو سيارتين وحده علي يمينه والتانيه علي يساره وزوز وراه وحاوطوه من جميع الاتجاهات ، خفف معتز من سرعته وقلبه بدي يدق ودكر التهديدات لجوه وحس انه التهديدات ولو واقع ، واول ماوقف سيارته ونزلو مجموعة مسلحة ملتمين .
فتح معتز الباب ونزل بستسلام وهوا رافع يديه فوق:ان شاءالله خير ان شاءالله خير
قرب منه واحد منهم ووراه مجموعة:للاسف مش خير
و خبطه بقفا السلاح لين رجع معتز التالي وهوا شاد خشمه وبحركه سريعة شدوله يديه ولفوه علي السيارة وحطو لكليبشات علي يديه وغطوله وجهه وجبدوه من سوريته وحطوه في وحده من السيارات لمصفحة وهوا مش شايف شي ولا عارف شن صاير ولا واعي ب شي غير بالسلاح اللي محطوط علي صدره وهوا يردد في داخله جمله ماقدرش يفكر الا فيها:اشهد ان لا اله الا الله واشهد ان محمد رسول الله ...
__
طلعت آيات من المدرسه وهيا تسلم علي صاحبتها:غدوة نشوفك
خديجه:راك تنسي كراستي
آيات:باهي باهي ماتخافي علي حاجتك ياكبدي
ضحكت خديجه ومشت ركبت في الباص وآيات مشت لحقت علي بنات جيرانها لتروح معاهم علي رجليها ...
تلفتت آيات لسيارة لتلحق فيهم بشوية ورجعت شبحت قدامها بغيظ وقالت:فددني هدا فددني
وشبحت لبنت جيرانهم مودة لقالت:زودها هدا كل يوم يستني فيك كلمي خوك ولا بوك عليه
آيات:لالا فكيني تو مانعدلش عليه تو يمل ويدرق وجهه
مودة:ان شاءالله
آيات:هي باي غدوة نتلاقو
مودة:تمام باي
خشت آيات للحوش وهيا مضايقه من الشاب ليلحق فيها ليه شهر كل يوم يستني لين تكمل دوامها في المدرسه ويتبع فيها بالسيارة لين توصل للحوش لين درهلها كبدها .
خشت آيات وهيا تصيح:مامااااا
طلعتلها امها(سعاد):روحتي ، بدلي وتعالي عاونيني
آيات:سهي قعده ماروحتش
سعاد:قريب توصل هيا وبوك تعالي عاونيني
آيات:باهي
خشت آيات لدار وبدلت حوايجها وخشت دارت عليها الوضؤ وصلت وقبل ماتطلع لأمها فتحت تليفونها اللي اول مافتحاته وتشكل في نت الحوش جوها رسائل من الماسنجر خشت طول علي محادتها هيا وعمر لكان باعت(اني اسف كان أزعجتك ) (لو سمحتي ماعاش تكلميني) (وماعاش تردي علي رسائلي) (ومرة تانيه اسف)
ضيقت آيات عيونها وحست بضيق في صدرها وكتبت بقصد(اول شي مش اني لكلمتك انت لبعتلي) (وتاني شي عقلك سليم انت)
وحطت التليفون علي السرير وطلعت وقلبها عنده وهيا تفكر علاش قال هكي ، ولا قال هكي علي خاطر انها اخت صاحبه وحس انه يخون في اشرف .
نفخت آيات وهيا توتي في الصفرة مع امها لتسقي في الكسكسي ، خشت سهي لمروحة من الجامعة وقالت:السلام عليكم
سعاد:بدلي وتعالي تغدي ونادي بوك هي بنحطو لغدي
سهي:بابا مشي لعمي صالح
سعاد شبحتلها:علاش ان شاءالله خير
سهي فكت خلال وشاحها:فرح مرضت ومن امس ترجع وحرارة يبي بابا يمشي معاه بيرفعوها للمستشفي
شهقت آيات:واني نقول فدوي خيرها غايبة
سعاد:ياكبدي هالبنت شن صارلها نمشي نتصل بأمينه
طلعت سعاد من المظبخ وسهي قربت تشوف في لغدي:جعانه
آيات:بري بدلي نحطو نتغدو ونوضو أشرف يرفعنا لحوش خالتي
سهي:باهي اتصلي ب سناء قوليلها تو تقول خيركم ماقلتوليش
حطت آيات الصفرة ومشت لدار خدت تليفونها وطلعت لجنان وخلت سهي تغير في حوايجها واول مافتحت تليفونها شافت عمر باعتلها ، حست بخوف وفي نفس الوقت ب فرح ووجع في بطنها خفيف وحلو ، خشت للمحادته وشافت رسالته( لا والله مش سليم منك )
بتسمت وهيا ترفع في حواجبها وردت(عفوا شني درتلك اني شن قصدك)
جاها جاري الكتابه طول لين نخلعت وطلعت من المحادته طول بخلعة هههه ، وهيا طلعت من المحادته طلعلها اشعار رسالته(انتي اخت صاحبي وزي وخيتي ماقصدي شي)
شهقت وردت بغيط(اي وانت زي خوي)
عمر(لالالا مش قصدي لا اختي لا شي)
آيات ضحكت وهيا ماعاش فهمت شي من كلامه(ههههه ماعاش فهمت عليك كيف)
عمر(هههههه والله حتي اني مافاهم علي روحي هي)
سهي:آياااااات تعالي تغدي
آيات:هي جاااية
ورجعت شبحت لتليفون وكتبتله(تمام افهم علي روحك وبعدين فهمني) (توا باي)
عمر(خليك وفهمي عليا بشويه بشوية)
بتسمت آيات(ياريت بس ينادو عليا علي لغدي)
وضيقت عيونها وهيا تضرب في جبهتها بكف يدها:شن ياريت هادي واااك انتبهي ياأيات انتبهي
جاها اشعار برسالة عمر(تمام كان هكي بري تغدي مع السلامة)
آيات(مع السلامة)
تنهدت آيات بفرح وتصلت بأختها سناء ...
__
درس محمد سيارته وهوا يتكهه بيديه علي الدومان ويشبح للحوش لبعيد بمسافه مش بعيدة  وسرح وماستاقطش الا لما شاف حد فتح الباب وطلع منه ، زاد ضيق عيونه ودكره كويس من هوا ، قعد يتبع فيه بعيونه وهوا يتمشي في الطريق ويتكلم في التليفون لين اختفي من الشارع ، رجع محمد التالي وتكه بظهره علي الكرسي وهوا يتلفت يجبد في تليفونه لشرين من علي الكرسي لجنبه ويرد:ايوا
احمد(الصقر):شن جو يابرو
محمد:الحمدالله
احمد(الصقر):كويس امالا تعالا للمقر مدام وليت منا وفينا عندنا مداهمه في لمدينه ونبيك انت ترتبها شن رايك
محمد رفع حاجبه:وعليش لا حاضر شوي وجاي
سكر احمد(الصقر) من محمد وتلفت لآسامه ليشبحله:تلعب بنار راك
احمد(الصقر):بالعكس في الحالتين اني الكاسب لو طلع شاطر وفكنا من السيفاو وجمعته وكسبنا منطقه تانيه تنظم لينا ولا طلع حمار وقتلوه وفكوني منه
آسامة رفع حاجه ونفخ الدخان:شكله مش هوين لكن دير بالك منه ياسرنا السيفاو هدا
احمد(الصقر) مسح علي وجهه وقال:خايف علي العيلة منه ازح ناويني المرة هدي
آسامة:برا اشري حوش بعيد في الضواحي وماتقول لحد عليه ورفع فيه العيلة هدا كان يحط حد في راسه يمرمده يعني يمرمده
هز احمد(الصقر) راسه وقال:وهوا هدا لبصير
__
رفع رعد رجليه وحطها علي الكرسي لقدامه وهوا يشبحله بنظره لين خلت خوه التوأم (رائد) يعدل تقعميزته ويتكلم:اني ماخصنيش فيكم وفي اللي اديرو فيه المهم ماتدخلوش في حياتي
فاتح:كيف ماندخلوش انت خونا اكيد نعرفو مصلحتك اكتر منك
ضحك رائد بستهزاء:واللهي
حس رائد خبطه علي كتفه زعزعة عظامه وخلاته يتلفت لخوه لكبير (السيفاو) لشح الكرسي من تحت رجلين رعد وقلبه وقعمز عليه وهوا يشبح لرائد وقال:واللهي الله
رائد تبت عيونه علي خوه السيفاو وقال:وشن هيا مصلحتي لتشوفو فيها نسيب خدمتي المحترمه ولرافع بيها راسي وشاري بيها احترامي بين الناس ونجي نبيع معاكم المخدرات
رعد:لا تسيب خدمتك لا تبيع مخدرات لا فروبي غير سكر علينا ....... وفكنا من الفلسفه ونصائح الاولياء الصالحين متعك ماعاد نبو منك شي
رائد:اني مانتفلسفش ومن حقي ننصحكم انتم خوتي ولديرو فيه انتم وبوي غلط
رعد رقتله ونط وقف وقال:توا حسستني فتحت عيونك علي بوك يخدم في دكان غدائيه ويصرف عليك منه وكبرك وقراك بالفلوس الحلال تي ماهو من لما فتحنا عيونا وبوك متع مخدرات وحشيش وسكير ومعيشنا منه ومن خير النم لطايح تسب فيه توا
وقف رائد:لو كانت نعرف في وقتها الصح من الغلط ره ماخليتش ولا قرش حرام ينصرف عليا
خبط السيفاو الكرسي بيده ووقف شد رائد من ياقت تيشرته من التالي وقال:وين كلامك هدا لما كنت نصرف عليك في الجامعة مه كنت تعرف وواعي ياكلب يامستارضي ولا هدا وين نزل عليك الايمان والخوف من ربي
فاتح:كبر عقلك وأمشي كويس زي ماقالك رعد حني لا قولنالك تعالا اخدم معانا لا بيع هدا ولا هدا غير تعامل كويس وحول فكرة انك بتحول وتسكن بروحك من راسك
ضيق السيفاو عيونه وزاد من ضغظ علي يده علي تيشرت رائد لخاف ، وقال بتعصيب:كيف شني الموال الجديد هدا
رفع رعد حاجبه:هدي جديده غر نطربهولك اني ، قال يبي يحول يسكن بروحه ماعاش يقدر يعيش معنا
شبح فاتح لرعد بتفنيصه لين رعد ضيق عيونه ورفع يديه فوق:شني ، ونبي اقعدو فيها ال...
وطلع وخلا السيفاو يشبح لرائد لقال:مش قلتولي انت حر باهي خلاص اني حر وين مانبي نسكن نسكن
هزه السيفاو بالقوة وزاد قرب منه ويشبحله ورائد يشبح للارض ويسمع فيه بصمت تااام:حر في خدمتك في طلعاتك في مشاويرك لكن طلوع وسكنه برااااا العمارة لاااااااااا
زمط رائد ريقه وماباش يرد لخلا السيفاو يصيح بالصوت العالي:فهمت
انخلع رائد لهز راسه:فهمت
دفه السيفاو بعيد وقال:ويجيب ربي اليوم في الليل مانلقاش واحد فيكم في الحوش
وشبح لفاتح وكمل:لكلام عليك حتي انت
وطلع وهوا متكنطي واول ماطلع شاف رعد واقف علي السيارة ويشبح لطريق ، قرب منه وقال:روح للحوش اليوم نبيكم انت وخوتك
رعد:فوتوني اني
خبط السيفاو علي كتف رعد بالقوة اكتر من مرة وقال:هيا كلمه يارعد
تلفت رعد لسيفاو وقال:تمام
مشي السيفاو وركب سيارته وطلع وخلا رعد يشبحله لين مشي ، ركب سيارته حتي هوا وطلع تليفونه من جيبه وخش علي سجل المكالمات ويشبح في المكالمات الفائته وقعد ينزل ينزل لين شاف رقمها ، ضيق عيونه وتكه علي الكرسي لنزله هلباااا التالي واتصل بيها ، التشرينا الاولا التانيه التالته الرابعة الخامسه وقبل مايفصل انفتح الخط وهوا تكلم بهدوء وسكر عيونه:تعرفي اول مرة واخر مرة تردي علي النمي في اخر لحظه
ضيقت رنيم عيونها:عفوا
رعد:لا عفوا لا نمي ادوي باهي ولا فكيني
ضحكت رنيم بعدم فهم وقالت:قصدي انت غالط في الوقم وخيي
رعد:رنين معاي وله
غمظت رنيم عيونها بالقوة بغيظ وقالت وهيا تحاول تكون هادية:رنيمممممممم ميم ميم
رعد:اللي هوا ، ماعاش تستعبطي عليا وسجلي رقمي
رنيم:واللهي من انت باش نسجل وقمك
رعد:ياعن فيت...... اقلبي وجهك وانتي تجيبي القداد في الامعاء
وسكر الخط في وجها وخلاها فاتحه فمها زي العاده وبعدها تلفتت غمت وجها في المخده وعيطت بالقوة من غيطها منه ...
.
.
.
#يتبع_للبارت_لبعده
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3