عشق في بلاد حروبها لا تنتهى 2 (طرابلس ياغارقة في الدم)

البارت 8

_
_
#عشق_في_بلاد_حروبها_لا_تنتهي
#طرابلس_ياغارقة_في_الدم
البارت 8
.
في الحلقة السابقة
شبح عمر الرسالة وماردش لين آيات ضيقت عيونها وكانت بتكتب بس طلعت وقالت:ارزني ارزني
ونفخت وسكرت عيونها وهيا اضم في يداها لبينهم التليفون قدام وجها وقالت بترجي:يااارب يبعت يااارب يرد عليا توا توا ياااربي يااااربي
رن صوت رسالة المسنجر لفتحلها عيونها طول وخلاها تفتح التليفون بسرعة وخشت شافت رسالته(نبيك انتي تستاحشيني زي مااني مستاااحشك) (ومستاحشك هلباااا فوقها هي) ...

قراءة ممتعة
#البارت_التامن

قلبي يتألم يااخي ، وعقلي لا يريد الاستعاب علي فرقاك ، وروحي لا تقوم الرغبه في الذهاب إليك 💔
.
.
حط يديه علي وجهه وحط راسه علي تراب القبر اللي قعد مندي وجديد وقعد يبكي وصوت بكاه يعلا:الله يرحمك الله يسامحك الله يتبتك عند السوأل الله يغفرلك الله يوسع عليك قبرك الله ينور عليك قبرك الله ينزل رحمته ونوره ومغفرته عليك
كان عبدالحكيم يبكي ويدعي حس بيدين ولده رؤوف حاوطو كتافه وقاله ودموع في عيونه وبعبره في صوته:ربي يصبرنا يابوي ربي يصبرنا علي فراقه
جي سراج وخالد وساعدو رؤوف وقامو بوهم اللي قعدت الناس كلها تقرب تعزي فيه وتحضن فيه تبكي علي حالته وعلي فرقة ضناه ، صح جايين وممكن اللي في حاس بأحساسه والي فيه واجعة حاله ، لكن عبدالحكيم كان في حالة لا يرثى لها حاس روحه وكأنه خيال وكأنه روح من غير جسد، وكأنه روحه هايمه في جيها وجسمه في جيها حاس روحه خفيف ومش سامع ومش شايف حد غير حمزة شريط حياة ولده بدي يمر قدامه ضحكاته حركاته ريحته وضماته ليه ونقانه لما يبي حاجه صوته يرن في ودنه وهوا ينادي فيه يااابوي ، كيف كيف امس كان ينادي فيا واليوم اني لنادي فيه لكن الفرق انه اني جاوبته بس هوا خلاص مش ح يرد عليا ولا ح يجاوبني 💔
.
.
مسح رؤوف دموعه بكم جيوطيه وهوا شاد بوه من يده وحاسه مش بوعيه واول ماحس بيد علي كتفه تلفت طول وهوا يشبح في محمد اللي لما شافه ماعاش قدر يتمالك روحه وسيب يد بوه لجي سراج شده في مكانه وهوا تلفت لمحمد وحضنه وقال من بين دموعة:مصعبها يامحمد مصعبها ماحسيت بنارك الا لما جربتها
طبطب محمد علي ضهر رؤوف وقال:كلنا ليها ماتحرقه بدموعك كان الدموع ترد الميت ره نا من زمان رديت خويا ادعيلة بالرحمه وربي يتبته عند السؤال هضا لبيفيده توا
بعد رؤوف وهوا مطبس راسه ويمسح في دموعة:الله يرحمه ويتبته عند السؤال الله يرحمك ياخوي
طبطب محمد علي كتف رؤوف ورجع حضنه وبعد شد يده وطلعو ورا سراج وخالد لشادين بوهم قدام المقبرة ورؤوف مابطلش وهوا يتلفت يشبح لقبر حمزة ، سامحني ياخوي سامحني دفنتك بيديا ، سامحني ياقطعة مني دفنتك وطالع مسيبك ومش عارف لو كنت صقعان عطشان جعان مش عارف مرتاح مضايق ولا زعلان ، سامحني علي خاطر مانقدرش نساعدك لانه خلاص وليت لمكانك وماتقلتش ضيافتك علي الدنيا لمسخة 💔
__
.
.
ضيق رعد عيونه وشبح لعلاء:وشن ايدير في الجامعة ماشي يعاكس ولا .....
علاء:وين نندري علي امه اكيد فيه حد يخصه في الجامعة
هز رعد راسه وبعدها تلفت لعلاء وقال:وباه كان فيه حد يخصه
رفع علاء كتافه لين خلا رعد يرفع في حواجبه:اسمع اللي ماوصلش فينا فوته الصقر حشره ومايقدرش يديرنا شي ف فوته ومادخلش عيلته في المشاكل اللي بينا
علاء:اكيد مش ولد حرام باش ندخل خواته ولا خوته لكن لو دار حاجه هكي ولا هكي يلوم روحه ماعاد نعرف حد بعدها
رفع رعد كتافه:اكيد بعدين مايلومش حد ، اني ماشي
علاء:وين وين اليوم عندنا هلبا توصيلات
شرين تليفون رعد لطلعة من جيبه ويشبح لرقم الغريب ليتصل بيه ، شبح رعد لعلاء:تو نجي وتي لبضعة انت
علاء:تمام
طلع رعد من المخزن ورد علي التليفون:ايوا من معاي
جاه صوت:مافيا
رعد:اي من وين لقيت رقمي ومن عطاهولك
آسامة:اكيد رقم واحد يجيب الحاجه لمليحة فيسع مايتشرتع في السوق
رفع رعد حاجبه:واللهي كان عندك المني اكيد بتاخد الحاجه لمليحة
.
.
وقفت نور المكنسه علي الحيط وتلفتت بتعيط علي رنيم بس اول ماشافت رجاء جاية تجري كتمت عيطتها وهيا تشبح لرجاء لجت وقفت:اسمعي نور في مسأله رياضيات مش عارفه نحلها بكل توا توا تعالي حليهالي
عيطت نور:هوا واجبك ولا واجبي
رفعت رجاء حاجبها:وعادي وكان ساعدتيني وبعدين اني من امتي نطلب منك
نور فتحت فمها:قولي امتي ماتطلبيش
رنيم خشت بينهم:خلاص خلاص من غير عوايك
وشبحت لنور وكملت:بوي ساعديها عيب اختك طلباتك
رفعت نور حواجبها وزبطت انه رنيم تتهرب منها وقبل ماتتكلم سبقتها رنيم لتخطتها وخدت المكنسه وهيا تكمل في الكنيس في الممر وسط الحوش وخلت نور تتنهد وادف في رجاء وهيا تحاول ماتصيحش:هي بري قدامي
مشو نور ورجاء ورنيم قعدت تكنس وهيا تفكر في كلام رعد وحاسه روحها بتموت من القهر ، حست تليفونها يهز في جيب التوته ،طلعاته وهيا تشبح في رقم خالتها لردت عليها طول:الو خالتي
ردت خالتها(ميسون):تي وينكم من اصبح نتصل ارقامكم خارج التغطيه
رنيم:اي مه الضي هاوب من 7 الصبح علينا
ميسون:الله يقطعهم من علي الدنيا وجاكم
رنيم:فوقت جيانه وياماته السود قعد ماجاش والله اتلجنا توا كيف ولعت الكانون من الصقع
ميسون:باهي اللي هربلكم في الصبح تو دورنا حني فليل
رنيم:والله زي بعضه زي ليل زي نهاو نبوه اي شن حال حناي ستاحشتكم هلباااا
ميسون:الحمدالله من امس وهيا تقولي اتصلي بالبنات انشدي امتي بجونا
رنيم:تو نقول لبابا يوفعنا الجمعة هدا كان خدي تصويح من الست الهانم ههههه
ضحكت ميسون:ياعطيهالك وين نور
رنيم:الو خالتي الووو مانسمعش فيك وه
ميسون نفخت وهيا تنادي:ايوا رنيم الو الو
وفصلت التغطيه عليهم
رنيم:وااااك مش وقتها ياوبي امتي بجي المنجوه
وقبل ماترد تليفونها في جيبها رجع اتصل ، ردت طول:الو خالتي وه انتي ماعنكش تغطيه
بس اول ماسمعت تحمحيمه وصوته:ماتسكريش
زمطت رنيم ريقها وكيف بتبعد التليفون وبتسكر في وجهه رجع رعد وقال:اسمعي اني مش متعود نكلم لبنته ومانعرفش كيف نخرط معاكم من الاخير مش قصدي نسبك راهو نسيت روحي نحساب روحي نكلم في واحد من صحابي
رفعت رنيم حاجبها:عدو اقبح من دنب ، وماتقنعنيش اني اول بنت تكلمها
رعد:اخرطي ياحليمه ، ومن قالك نقنع فيك وجعنك ماعاد صدقتي اني قعد نبرر علي سباني بس
رنيم:باهي وبعدين شن تبي مني علاش تكلم فيا اساسا انت علاش علقت مش خديت تليفونك وعطيتني تليفوني خلاص سيبني في حالي
سكت رعد لين رنيم ضيقت عيونها ورجعت قالت:الو
رعد:ماخصكش المهم لما نتصل ردي
ضحكت رنيم بتنقنيق وبستفزاز:واللهي توه احلف
رعد:ياعن...
وسكت وهوا يغمط في عيونه وقال بسرعة ويتخطه في السبه:اهو ريتي انتي لتخلي في ام امي نسب ماعاش تستفزي فيتي
رنيم صيحت بتوشويش خوف حد يسمعها:وباش استفزيتك وبعدين علي الاقل مش قعده نسب فيك ونجوح في الدوة زيك
نفخ رعد:انفختي امهم ياحليمه قلنالك مش قصدي فوتي الموضوع عاد
رنيم:تي من حليمه هدي اسمي رنيم رنييييييم ياانت اسمي و ن ي م
رعد:زي بعضه حليمه زي رنين
تنهدت رنيم بتنقنيق لين خلت رعد يضحك وقال:وبالمناسبه اسمي رعد مش انت
ضيقت رنيم عيونها وردتهاله:ماتشوفتش بيك بكل بكل بكل يابوق
ضحك رعد وفهمها تردله فيها هههه ...
__
.
.
سهي:تي هيا نوضي
آيات:متحشمه وحق ربي ماتجيش نقوله واللهي فيه واحد يلحق فيا وحدفلي رقمه والله عيب
سهي:باهي شن بتسكتي تي قوليله خير ماتندمي بعدين
هزت ايات راسها:تي خلينا نستنو شوي بالك يسيبني في حالي لما يلقاني مش معدله واصلا شبحني لما عفست علي الرقم ومشيت وخليته طايح علي الارض
رفعت سهي راسها:مش عارف والله كان مازال كلمك مايكساب درة كرامه لكن خلينا نشوفو
اتصل تليفون سهي جبداته من السرير وردت وهيا تطلع من الدار:ايوا سناء شن جو
اتكت آيات وهيا تجبد في تليفونها وتفتح فيه وتخش علي محادتها هيا وعمر وتشبح في رسالته لمبكري لقعده ماردتش عليها من كتر التوتر والخوف والصدمه لجتها ، نفخت وهيا تقرا فيها وتضحك بفرح ، واول ماشافاته افتح وطلعلها اون لاين ، وشفاته يكتبلها طلعت طول وهيا تشبح قدامها وخدودها ولو حمر والابتسامه بدت من الودن لا الودن ، غمظت عيونها وخدت نفس كبير وطلعته وهيا ترجع وتشبح لتليفون وخشت علي محادته ولقاته بعت رسالة(اسف لو ازعجتك ب كلامي الفاضي) (شكلي تقلت في بصارتي)
ضيقت آيات عيونها(اممم عرفتك تبصر اصلا) ونفخت بالقوة وقالت:كلب والله كانك تبصر حق
وشبحت لرسالته لوصلت(وكيف عرفتي)
آيات(حسيت)
عمر(وربي ماك حاسه بحويجه)
آيات رفعت حاجبها(كيف)
عمر(شي)
آيات(انت مستفز هلبا)
عمر(زيك)
آيات(لا اني مش مستفزه علي الاقل كلامي واضح مش زيك كل مانبي نستفسر علي كلمه تقولها تقولي شي)
عمر(اممم)
آيات نفخت وهيا كان تلقا تطلعله من التليفون وتخنقه بداها الزوز ، كتبت وهيا متعصبه(نستأذنك)
عمر(باهي تمام)
آيات(تي شن هوا لتمام)
ضحك عمر وحسها تعصبت(علي شن تبي تستفسري هي مش ح نقول شي)
آيات زادت ضيقت عيونها وكتبت طول(شن قصدك ب والله ماك حاسه بحويجه)
عمر(قصدي ماكنتش لا نبصر لا شي واني مستاحشك بالحق وفي هلبا حاجات نحس فيها اتجاهك) (آيات)
زمطت آيات ريقها وحاسه بنبضات قلبها بدو يزيدو وبطنها بدت توجع فيها ، ردت عليه طول(نعم)
عمر(اني نفكر نجي نخطبك)
رفعت آيات حواجبها وكتبت(شني)
عمر(نبي نجي نخطبك)
حطت آيات التليفون علي السرير بشوية ووقفت وهيا تسكر في باب الدار واول ماتلفتت وشبحت لتليفون قعدت تنقز وترقص وتضحك زي المهبولة ، وفجأة انفتح عليها الباب ومن الخلعة ضربت رجلها في حاشية السرير بقوة قوتها لين عيطتها عيطه لمت بيها الحوش كله عليها ...
__
.
.
هدا تاني يوم علي التوالي ومعتز قعد في الشيلا اللي حاسها زي القبر حاس روحه مخنوق ومايفكرش الا في الاشياء السيئه ، في غلطاته في سيئاته وعيوبه ، فتحو عليه الباب وحطوله مكرونه زي امس ورجعو سكرو عليه ، شبح معتز اللي ليه تلاته ايام ماكلاش بكل وبدي الجوع ينهش من جهده، شح الصونيه وهوا يشبح للمكرونه وبدي ياكل بسيف باش مايطيحش اكتر ماهوا طايح ...
.
.
غمظ سفيان عيونه بتعب وهوا يرجع يفتح فيهم ويشبح لشباب لملتمين لفكو لحبال من رجليه اللي مش حاس بيهم من كتر الضرب ، ...:نوض البس بوتيلك
ضيق سفيان عيونه وساعد روحه ينوض بيديه وكان يبي يلبس بوتيله العسكري بس ماقدرش من كتر الجلدات لحصلهم علي رجليه شبح لشاب وقال:مش قادر نلبسه
شحه الشاب:امالا اطلع هكي
مشي سفيان بسيف وهوا حاس بكل خطوه وكأنه يعفس علي الجمر ، واول ماطلع من الغرفه لكان فيها حاوطوه هلبا حراس ، قعد سفيان يشبحلهم وفي خاطره يقول ، حايطين بيا تقول مجرم حق ، ضحك في نفسه علي روحه وقال ، واني مجرم في نظرهم اصلا ، شوف نهايتك وين ياسفيان ، شوف عمايلك وين خلاتك توصل
واول ماوصل لمكتب الضابط خشاشوه شرطيين
بس اول ماخش جت عينه في عين سراج اللي وقف وكان بيهجم عليه لو ماشدوشي خالد ورؤوف لقاله:اعقل ياسراج
صيح سراج:تي قعدين تدوو علي العقل واللي قاتل خوي قدام عيوني يا...... وربي ماك راجل وقسم بديني ماك راجل تقتل عيل استقويت علي عيل
قعد سفيان يفك في روحه من الشرطيين اللي شادينه من يمينه ويساره وصيح:اني ماقتلتش حد
وقف الضابط:سكر فمك
شبح سفيان فارس وخالة معاذ لواقفين في الجيها التانيه وقال:والله يافارس ماقتلته وحق الله ماقتلته كنت نبي نساعده وربي ماقتلته اصلا شن بيني وبينه الولد
عيط الضابط:سكر فمك قتلك
شبح سفيان لضابط لتلفت لرؤوف وكمل:اضبط تصرفات خوك انت راهو فيه هلبا شيلات فاضيه
ورجع شبح لسفيان وقال:قول افادتك لقلتهالنا قدامهم وراه حط في دماغ اي تغير ح يوديك في ستين دهية
زمط سفيان ريقه وبدي يحكيلهم شن صار بس للاسف ماحد صدقه ماحد اصلا يصدق المظلوم ، وبدات في بلاد مافيهاش تحقيقات حقانيه تحقيقات اطلع الحق من الباطل ، وقضاء يتعامل بدلائل والعدالة ...
__
.
.
فات الوقت وادن لعشي اللي اول ماسمعة محمد وقف وهوا يطبس علي رؤوف اللي اول ماروح من الحبس وهوا يفكر في كلام سفيان وفي عيونه اللي تبين صدقه وترجيه اللي نابع من القلب ، بس اول ماحس بمحمد لطبس عليه وقال:تبي اي حاجه اتصل بيا مايردك شي
شبحله رؤوف بعيونه الدبلانه:خيرك مازال الوقت
محمد:بكرا مولي ان شاءالله مغير عندي مشوار مهم اليوم
هز رؤوف راسه وسلم عليه ومحمد طلع وهوا يرد علي تليفونه:ها كيف حالك ياالغلا كله
ضحكت امه:الحمدالله ياباتي شن حال لعزاء ورؤوف
وقف محمد قدام سيارته:انقولو الحمدالله بكرا جايين وله
رقية:اي ان شاءالله نا وجدك وسالم الظهر نوصلو
محمد:تلقوني قدامكن
رقية:ان شاءالله
محمد:هي ماتبي شي ياقليبي
رقية:نبي سلامتك
سكر محمد من امه وركب سيارته وهوا يتجه للمقر ...
.
.
حط آسامة رجله فوق الطاولة ورد علي بوه:تي باهي مروح مروح
عبدالله:توا الدنيا ليل وتخوف واكيد فيه بوابات
ضحك آسامة:ماتخافش ياحويج مه اني منهم وفيهم البوابات هدو هههه
عبدالله:ماتشيطليش ريقي نوض روح تو اهو نستنا فيك
نفخ آسامة:باهي باهي اهو مروح
سكر آسامه من بوه وهوا ينزل في رجليه من الطاوله ويوقف يشبح لصقر لقال:اسمع كلام البابا ايوه هههه
آسامة رفع حاجبه:تي اسكت ياراجل فددهم لكن ماعنده غيري ياناري طول اليوم قعد بروحه
احمد(الصقر):برا برا
تلفت آسامة وقال وهوا يفتح في الباب:هي نشوفوك صقوره
واول مافتح الباب لقي محمد قدامه بتسم آسامه:اوووو مطقوق شجو
بتسم محمد:والله ياسحليه ماشيه لمور
ضحك آسامة وضرب محمد علي كتفه:جوابك ديما واتي ازح ، هي تصبحو
محمد:كنك مازال بدري
آسامة:لالا اني وراي شباني ياكبدي الساعة 10 يبيني قدامه
محمد:حي علي الهيبه هربت
آسامة حك راسه:ههههههه ياعن شكلك نقص صوتك تصبح علي خير
مشي آسامة ومحمد خش لصقر:السلام عليكم
احمد(الصقر):وعليكم السلام
قعمز محمد وقال:نبي الشباب لقلت لك عليهم
رفع احمد(الصقر) حاجبه وتكه بضهرة علي الكرسي:من قالك قعمز
ضيق محمد عيونه وقال:راسي
أحمد(الصقر) هز راسه وشبح لوطه وبتسم:اممم راسك باه هي اوقف
رفع محمد حاجبه:وكان مانبيش نصبي
أحمد(الصقر)شبحله وصيح:اني قتلك اوقف شن تحساب روحك انت
ضحك محمد ومسح علي جبهته ووقف وشبح لصقر لقال:مرة تانيه ماعاش تتصرف علي راحتك اكتر من اللزوم
ورفع راسه لمحمد وكمل:وفوتك من الشباب ولكلام الفاضي اني موكلك في مهمه شكلك فايتها وشكلك اصلا واحد وهمي وسريبك فاشل
قعد محمد ساكت لين الصقر كمل كلامه:نا ساكن في شقة السيفاو
رجع الصقر شبح لمحمد وقال:كيف
محمد:وهوا لضيفني فيها وحقيت خوته كلهم وعرفتهم
وبتسم وحط يديه في جيوبه وكمل:وكلا نزيدك من الشعر بيت ودرت زيارة للمكان اللي فيه نص بضعتهم ممكن
احمد(الصقر) وقف وقال بندهاش:وامتي هدا كله عرفته اني مالياش يومين قتلك عليه
محمد هز راسه وقعد يشبح لصقر لضحك وجي قرب منه وكيف بحط يده علي كتف محمد بس وخر محمد وقال:الراجل طيب
وضحك وهوا يرجع في شعرة بيده التالي وكمل:لنقني بنسيبها لكن وبنعدي نخدم معاه ههههه
وشبح لصقر وغمزله:علي الاقل هوا ضامنه مايقوليش امته نصبي وامتي نقمعز
تحمحم احمد(الصقر):وبرا كان قدرت
محمد:وشني رايك الوهمي ولسريبه فاشل لقدامك يقدر
احمد(الصقر):تي خيرك انت نبصر اني وانت قلبتها جديات زود قعمز كان تبي ، شكلكم يامتعين الشرق ماعندكمش في جو لبصارا
هز محمد راسه بضحكه وهوا يشبح لصقر لرجع قعمز علي كرسيه وقال:قولنا علي مكانهم باش نلقو القبض عليهم ومدابينا بعد 17 فبراير طول
محمد:لا مازال
احمد(الصقر):شن مازال مادام جبت ماكانهم خلاص
محمد:كنه تفكيرك محدود ، لكيف السيفاو يقدر يطلع خوته كيف ميطلع روحه في يوم وليله ، نحنا مانبوش نمسكوهم هم بس ، نحنا نبو نمسكوهم هم وبضعتهن
رفع احمد(الصقر) حواجبه علي كلام محمد المقنع او مش المقنع اكتر ماهو مزبوط ميه في الميه وقال:تمام دير لتشوفه ، وتقدر تاخد الشباب لتبيهم
هز محمد راسه وتلفت طلع وسكر الباب وراه بس ادكر حاجه رجع فتح الباب ودخل راسه وقال:ها صقورتي
رفع احمد(الصقر)راسه وشبح لمحمد لغمزله وكمل:فكنا من ابراج المراقبه تمام
وسكر الباب وخلا الصقر يضحك:واللهي لا صدق آسامة مطقوق هدا
وضيق عيونه وقال بضحه:مدكا امه ازح كيف عرف انه نبي نبعت حد يتبعة ...
.
.
.
#يتبع_للبارت_لبعده
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3
.