عشق في بلاد حروبها لا تنتهى 2 (طرابلس ياغارقة في الدم)

البارت 2

_
_
#عشق_في_بلاد_حروبها_لا_تنتهي
#طرابلس_ياغارقة_في_الدم
البارت 2
.
.
في الحلقة السابقة
قلب رعد التليفون وهوا يشبحله وبعدها ادكر وهوا يضرب في رجله في الحيط:يابنت ال.... ياعن...
صاحبة:تي خير امك وانت حشيشتك تسب
رعد:برا يا... حتي انت
وتلفت مشي وهوا يسب ويلعن في البنت لنخبط فيها امبكري ، لحقه صاحية:تي تعالا ياكلب خيرك
رعد:دبرلي حد ياليمة يفتحلي ال... هدا ....
وهوا قعد ماكملش جملته شرين التليفون فتح رعد الخط طول وهوا يسمع في صوت بنت:الو
رعد:لواا يلويك ان شاءالله وعصاء علي ....... جيبي ام ال...... الهاتف ياكلبت لكلاب

قراءة ممتعة 💛
#البارت_التاني

حين يكون اللقاء الاول غريب ، وغجري ، وصادم ، لا تستغرب بأن تكون العلاقة غريبت أطوار 😶
(الياقوت)

وسكت شوي وهوا يراجي في الرد ويسمع في صوت توشويش خلاه يصيح:الوووو ياعن.... قعد نخرف اني مع حيط
جاه صوتها اللي راعش وفيه نبرة خوف وتوثر بس كان طفولي وكأنه بيبي لتتكلم:لو سمحت ماتسبنيش الغلط منك انت لو ماخبطنيش وه ماصاوش التلخبيط هدا كله
ضيق رعد عيونه وقال:اني نكلم في عيل ولا شني صاير تي عطيني حد كبير نخرط معاه
فتحت رنيم فمها وهيا تشبح لنور لردت عليه:اسمع خوي لو سمحت ربي يسترك دنيا واخرة حني غدوة بنجو ناخدو التليفون
رعد:لالالالا لا غدوة لا بعد غدوة توا نبي ..... تواا
نور:توا مانقدروش علي خاطر روحنا حني مش في تاجوراء
رنيم:حني غدوة بنمشو ، نجو حني وخالتي وناخدوه منك
رعد خدي نفس وهوا يحاول يهدي وماعاش يسب وقال:تمام غدوة غدوة لكن وربي كان ماتجو وربي لما نقلبها فوق روسكم
زمطت رنيم ريقها وشبحت لنور لقالت:لالالا خوي غدوة بأدن الله جايين
رنيم:ولو سمحت ماتفتحش التليفون فيه حاجات خاصه
رعد غير صوته و عجبها:فيه حاجات خاصه
ورد تكلم زين وبصوت عالي:تي حرام فيك الهاتف انتي يافرخة ال..... وماعاش تتكلمي خلي اختك لكبيرة تتكلم ياعيل اسمعي انتي يا التانية
فتحت رنيم فمها وكيف بتتكلم سكرتلها نور فمها وقالت:نعم نعم خوي
رعد:الساعة 5 لعشية وفي نفس المكان لخبطت وجه النعامة فيه نلقاك وأهو قلتها يجيب ربي وماتجوش
وسكر التليفون في وجهم وخلا رنيم تفك في يد نور من علي فمها وتعيط:مصح وجهه الكلب الحيوان لمسخ هدا اني عيل اني فوخة اني وجه النعامة الحيوان
نفخت نور:شنو رايك تتصلي بيه وتقوليلا لكلام هدا باش يفتح تليفونك وينشر صورك
ضمت رنيم شفايفها ودموعها نزلو بخوف:ياوبي علااش اني علااش والله كان تسمع بينا موت بوك لما تقتلنا اني وياك
طاحت نور علي سريرها ومسحت علي وجها:نقصي حسك خير مايطلعونا وحده من عفاريتها وفكري بفكرة تخلي أسماء تخلينا نمشو لخالتي
وهيا قعده ماكملت جملتها و انفتح الباب عليهم بالقوة لين ولت قعمز مخلوعة ، ورنيم درقت التليفون تحت اليرغان وهيا تشبح لأختها لمن بوها بخوف
ونور صيحت:خيرك ماتعرفيش تفتحي الباب بشوية
رفعت رجاء حاجبها:وعلاش شني اديرو انتم من شن خايفين
رنيم:وانتي شن خصك اطلعي وسكوي الباب
رجاء:مشاءالله طلعلكم السان مشيتو لحوش خالتكم يوم والسان ولا هك طولة تو تشوفو كان مازال مشيتو
شبحو رنيم ونور لبعض بخوف ورجعو شبحولها.
وقفت نور طول وشدتلها يدها:لالالا تعالي شويه نبصرو حني واللهي هههه خيرك فيسع ماتحرجي
وشبحت نور لرنيم لوقفت وقربت منها وهيا تجي في بالها فكرة:ماتحوجيش حني نبصوو واصلا كيف كنا بنادوك بنقولولك حاجه
رفعت رجاء حاجبها وهيا تفك في يدها من نور وقالت:شني هيا الحاجه
شبحت نور بعدم فهم لرنيم لقالت وهيا تتحمحم:هوا كنا نفكوو اني و نور بما انه عيد ميلادك السبت علاش مانمشوش غدوة لخالتي ميسون ونطلعو نهيجو في تاجوواء
رجاء شبحت لنور لبتسمت وكملت الكدبة:اي قلنا نغيرولك جوك كان ماتبيش عادي غر فكرنا فيك انك ديما بروحك وكدا يعني تغيري جو
سكتت رجاء شوي وقالت:تو نقول لماما عادي تمام
ضحكت رنيم وتنهدت براحة وقالت:بري قوليلها توا شوفيها بسرعة
رجاء:خيرك مستعجله حاسه فيه من وراكم حاجه
نور نفخت بالصوت ورجعت قعمزت علي السرير:خلاص خلاص يارنو بلاش منها حني نبو نفرحوها وهيا شاكه فينا
رنيم:اي علي واحتك
رجاء قالت بسرعة:لالا مش قصدي خلاص تو نمشي نقولها ونجي نقولكم
وتلفتت مشت تجري وخلتهم يطقو في يديهم في بعض علي الفكرة.
رنيم:ان شاءالله تمشي علي خيو
نور:زعما نقولو لخالتي
رنيم:لالا خلينا نشوفو قبل لو صاو شي غلط بعدها نقولولها
__
حول حمزة السماعات وحط التليفون علي الكرسي وفوقه السماعات وحول جيبوطيه وحطه فوقهم وخش للملعب وهوا يهرول ويرفع يديه لصاحبة لصيحله:ميسييي هههه دفااااع دفاااع تعالا نبوك
خش حمزة وقعد يلعب شوط تنين تلاته ، وبعدها طلع وهوا ياخد من صاحبه في شيشة لمية:نفسي انقطع
صاحبة:حتي اني شكلي اليوم خلاص غدوة عندنا مدرسة
حمزة بزع امية علي يده ومسح علي وجهه بيها واول مافتح عيونه وشبح قدامه وصيح:هي ماااالك
تلفتله مالك مخلوع وهوا يشبح فيه جي يجري:ها يابرو شنو الجو
حمزة قرب علي الكرسي وجبد جيبوطيه ومالقاش تليفونه شبح لحمزة وقال:انت خديت تليفوني
مالك:شنو بندير بيه بناخده اني كيف وصلت
حمزة:تي شبحتك بعيوني
رفع مالك يده ودف حمزة لنخبط بصاحبة لواقف وراه.
مالك:تي برا غادي ماخديت شي
قرب حمزة وشده من سوريته وعيط:تي طلع التليفون ياوهمي شبحتك بعيوني اني
رجع مالك ودف حمزة وضربه بوكس علي وجهه وبدو فيها عراك والناس خشت والملعب انقلب فوقي لوطي.
__
حدف معتز التليفون وقال:ياراجل كل الوزارات سكروها في وجهي ازف كل مانمشي لمسؤول يطلع احرف من لقبله وكان لقيت واحد كويس يقولي اني عبد مأمور ولا يقولي مانبيش نخشش روحي في مواضيع خاسرة وتجيب راسي
تنهد نزار:اني فشلت ياولاد حاس كل لدرناه مشي علي الفاضى والتهديدات بدت تزيد اول شي عبدالرحمن وتو عزو وبعدها اني وبعدها رامي
رامي شبح لمعتز:باهي خلينا نجربو نمشو لمحامي نشوفو البنود الموجزة اللي تعاقب اللي زيهم
معتز:تي اما محامي بيقبل يخشش روحة في الدوامة هدي اول مابتفتح فمك وبتقول أساميهم بيعتدر منك وبيقولك لا ومش بعيد يلزك من الخوف
تنهد عبدالرحمن:اني ماعاش نقدر نكمل خايف يديرو للعيلة حاجة مش بعيده عليهم الحاجات هدي
شبح معتز لتليفونه لقامه وهوا يرد:الو يمه
امه:شن معطل نخليلك عشي
معتز: لالا اهو مروح
سكر معتز من امه ووقف:اني تصبحو علي خير
نزار:نوصلك
معتز:لالا تو نروح حتي علي رجليا
رامي:شني صار في سيارتك
معتز:غدوة قالي تعالا خودها من الورشه
رامي:باهي ان شاءالله تمشيلك القدام بعد الخبطه
معتز:ان شاءالله هي تصبحو علي خير
طلع معتز وهوا يلبس في جيبوطيه وطلع تليفونه من جيبه وتصل بفرح:الو واخيرا عبرتني
ضحك معتز:هههه حسستيني مانكلمش فيك بكل
فرح:وايه انت ماتكلمش فيا الا دقيقتين بالله تو هدو ينحسبو
معتز:سامحيني يانور عيوني لكن والله مشغول هلباا وكل يوم طالعتلي مصيبة
تنهدت فرح:اني قتلك ياعزو سيب عليك السريب هدا قلبي مش مطمني والله تحسابهم بخلوك في حالك وانت معاك مصايبهم وياماتهم الغبر دور علي خدمة تانيه وسيب عليك هدا كله
معتز:باهي هدي خدمتي اني اكاديمي شني تبيني نمشي نخدم في ورشة سيارات ولا نبيع الخضرة
فرح ضيقت عيونها:وبرا والله لما نشجعك بيع الخضرة ءأمن علي الاقل
معتز:ماصدقتي انتي عاد خلاص فوتي وخليني فيك وقسم بدين الله مستاااااحشتك هلباااا
فرح:ههه حتي اني هلبااااااا
ضحك معتز:وربي وجودك مهون عليااا يابنت خليك جنبي ديما
بتسمت فرح بخجل وهيا تتنهد:نحبك اني مستحيل نخليك اصلا
__
درس عمر سيارته قدام أستراحة أحمد وشبح لاشرف لفتح الباب ونزل الحاجات لجايبيينهم وطبس لعمر من الروشن:هياا انزل
عمر:هي تو نلحقكك عندي مكالمة
اشرف:تمام يابرو كمل كمل غرامياتك
ضحك عمر وشد تليفونه وهوا يخش علي المسنجر ويشبح في ردها لخلاه يبتسم(اي عرفتك من صورتك )
خش وكتب:شن جوك
حط التليفون لوطه وهوا يمسح علي وجهه وقال:شن ادير ياعمر شن ادير هدي اخت صاحبك ازح
قطع علي كلامه صوت وصول رسالة في المسنجر لخلاه يشد في التليفون ويشبح في رسالتها:الحمدالله وانت
عمر:بخير الحمدالله
بعتها ورفع راسه لطقطيق علي الروشن وصوت لجاه:تي ياسرك غرام ونزل ياراجل
سكر عمر شاشة تليفونه طول وبتسم وهوا يفتح في الباب وينزل يسلم علي أحمد (الصقر) وقال:شن جو ياراجل عاش من شافك
طبطب أحمد (الصقر) علي كتف عمر:تعيش وتشوف هي يستنو فيك الداخل
تلفت عمر وسكر السيارة:هي
أحمد(الصقر) :خش خش لاحقك
خش عمر واحمد (الصقر) قرب من السيارة لنزل منها آسامة.
أحمد(الصقر):شن صار يابرو تمام لمور
آسامة:راسه كاسح انم قال مايبيش يزعج حد وعنده وين يبات
أحمد (الصقر) ضيق عيونه:ال...... شكله بتعبني هلبا هالشرقاوي
آسامة:تي طقه وحده في راسه وريح راسك شكله واحد مستارضي
أحمد(الصقر):لالا نبي نخدم بيه قبل
تخطي آسامة أحمد(الصقر):دير لبديره لكن شكله هوا لبيكون سبب طيحتك اني بنخش مستاحش بوختي
خش آسامة وخلا احمد (الصقر)متكي علي السيارة ويفكر ، قص علي تفكيرة صوت تليفونه لرفع يده واول ماشاف الاسم بتسم ورد:ها يانور حياتي
ضحكت مريم:شكلك مستاحشني
احمد(الصقر): لين خلاااااص وسبحان الله ديما تتصلي في الوقت المناسب
مريم:الله
أحمد(الصقر):ههه والله حبيبتي الحلوة شن ادير
مريم:شي والله كيف كنت ندير في لعشي وتو نوتي في حوايجي لغدوة
أحمد (الصقر) ضيق عيونه:حوايج شن شني قولنا حني مش عباية
نفخت مريم:تي حوايجي كلهم واسعات مافيش فرق بين العباية والبس
أحمد (الصقر) رد بعصبية:مريم وربي غدوة نجي ونلقاك لابسه الشلتت الزايد لما نشركه عليك
قلبت مريم عيونها:باهي باهي وانت ماتتفهمش
احمد(الصقر):ايوه هكي اسمعي لكلام
مريم:ياريت تسمع في كلامي زي مانسمع في كلامك
احمد (الصقر) ضحك بتسهويك:علي اساس مش حاطيني خاتم في صبعك
مريم:هههه لا حاطاتك خلخال في رجلي فرقة حالي باللهي
احمد(الصقر) :ههههه باهي هي قولي لتبيه اني فيه
مريم:سيب الخدمه هدي ودوشتها وفكنا من الحرب
احمد (الصقر) تنهد بعيطه وهوا يسمع في الشباب لعيطو وقال:واااااااك وضي هرب كيف كيف ماتبينيش نحارب هي توا
مريم ضحكت:هههههه احسن
احمد(الصقر):هههه هي ياعيوني تو نشوفك تصبحي علي خير
__
لصقت روان اللصقة علي جرح حمزة اللي الغضب طالع من عيونه ويسمع في بوه لقال:خلاص ياحمزة الله لا يسامحة في التليفون لكن فوته ياولد هدا مانطولوشي خوته وهوا يديهم في الملشيات حني مش قدهم
حمزة:تي كيف يابوي تبي نسكت علي حقي تي خداه قدام عيوني وكدبني وفوقها يسب فيا
رؤوف:افهم ياحمزة مش موضوع حق ولا غيرة كلنا عارفين هوا لخانبه لكن حني مانبوش مشاكل خلي تجي في التليفون ونسكرو فمنا خير ماتجي في روحك
حمزة:غر تجي خير مانسكت وتقعد حازه في قلبي
سراج:اي يابوي خلينا نشدوه ونعطوه طريحة نباش لقبور وربي بعدها لما يسربط كل لعنده
خبط خالد سراج علي ظهرة وقال:اسكت انت ياعيل
رؤوف هز راسه بأسف علي سراج وبوهم قال:لا تشدوه لا تقربوه اهو قولتها اني كلمه الموضوع مات في وقته وزمانه خلاص
رؤوف شبح لحمزة:وعلي التليفون غدوة نرفعك لتاجوراء وخود التليفون لتبيه
سكت حمزة وهوا يشبح لإيلاف لجت قعمزت جنبه وتمسله في جرحة والدموع في عيونها .
__
بتسم محمد وهوا يقعمز علي السرير ويحول في التليفون علي ودنه التانية وقال:كلا عادي ياراجل كيف هنا كيف عندك كله واحد
رؤوف:والله عليك حق يامحمد تي خليني نجيك وفكك من تشحيط الفنادق
محمد:بارك الله فيك ياروفه وربي راجل ماتفكرش هي ليلة وفراقها صبح وخدية شقه في بالخيرة بكرا معديلها بنتم فيها
رؤوف:تمام غدوة نجيك نمشي معاك
محمد:ماتعبش روحك ياسر لعندكن
رؤوف نفخ:لالا جايك ومنها نجيب حمزة معاي مانبيشي يقعد في الشارع بعد العركة ياراجل شكله ناويه الولد
محمد:تم ياعشيري جيبه تو نكلمه بالك كلامي معاه يسقمه
رؤوف:تمام ياغالي
سكر محمد من رؤوف وهوا يحدف في التليفون علي السرير وخدي الدخان والولاعة من الكمادينو وطلع للبلكونه ويفكر ، ولع سبسيه لجبد منه وشده بين صوابعة وطلع الدخان من خشمه وتفكيرة كله في المجرم لقتل خوه وكيف بيلقاه وياخد بتأره منه .
__
تاني يوم الصبح....
قعمزت مريم وهيا تشبح لصاحبتها:ندي صورتيلي الشيت
ندي:هوا شوفي اول شي الحبر لقيته تم وتاني شي الضىء ماشوفنا خليقته بكل لتوا جي قبل مانجي بدقيقه بس
نفخت مريم:وحني توا كيف هرب عاد الشتاء جي بيبدو في برادة الضيء
شرين تليفونها لرفعته وردت بضحكة:الو
أحمد(الصقر):وينك اني في المكان للمرة لفاتت قعمزنا فيه
مريم وقفت:هي جيتك
سكرت مريم ووقفت تساوي في وشاحها.
ندي:جي
مريم:اي هي ماشية
ندي:تمام تلقيني في الكفيتيريا كملي وتعالي
مريم هزتلها راسها بمعني باهي وتلفتت مسرعة وطلعت لأحمد (الصقر) لكان مقعمز تحت المضلات لقادم الجامعة ، بتسمت وقربت:السلام عليكم
تلفتلها أحمد (الصقر) وبتسم:وعليكم السلام ياعيوني
مدت مريم يدها وسلمت علي أحمد (الصقر) لباس يدها وهوا يبي يشدها بيده التانية بس فكت يدها وقعمزت بعيد عليه شوي وقالت:فكينا تو نديرو الشبهه
ضحك احمد(الصقر):تو جايك من قطع الرقبه وبتحرميني حتي من لمست يد
مريم رفعت كتافها:انت جاي تشد يدي ولا مستاحشني
احمد(الصقر):الزوز وربي مسيب لولاد والخدمه والدنيا مقلوبه وجيتك نجري
رفعت مريم:اممم ياريت تسيبها بكل وتسمع كلامي
احمد(الصقر):ايح عليا علي السيرة اللي ماعد بت تكمل تي فوتي خدمتي توا
مريم:لا مانفوتهاش خدمتك خطيرة وكلها قتل يااحمد اني مانبيش يركبك لحرام ولا تولي زي لسبقوك وقلبك وضميرك يموتو
احمد(الصقر):تمام يامريم غيري الموضوع وخلينا فينا توا
مريم تنهدت وسكتت شوي وهيا اطبس وملاحظه علي نظراته لي ماحولهمش منها وقالت:باه لو في يوم من الايام اطريت تختار بيني وبين خدمتك من تختار
سكت احمد (الصقر) وطبس راسه وهوا يمسح علي لحيته لين مريم ضيقت عيونها ووقفت:تمام ياأحمد تمام فهمتك
وكيف بتمشي احمد شدها من يدها وجبدها خلاها ترد تقعمز علي الكرسي جنبه وقال:تي خيرك انتي تو من كبر عقلك بنسيبك انتي علي خدمة زي هادي اكيد انتي يابنت الناس اني شاريك بس خلي توا الامور تمشي ويجي يوم ونسيبها
بتسمت مريم علي كلامه وهزت راسه:تمام نشوفو
__
قرب فارس وباسها من خدها وبعد شبحلها كيف تحشمت وقال:واااخيرا شفتك ازح امتي بيفوت الشهر وتولي مرتي
ضحكت نهى ودفاته:مجنون وخر تو يجو يشوفونا
فارس:ويجو حني مخطوبين
رفعت نهى حواجبها:والله اول مرة نعرف تي وخر حني في الجنان
ضحك فارس وقرب كان بيبوسها من خدها بس خشت نادين وفاطمة هادين خلوه ينهرع ويوخر من علي نهي لين لاحظوهم وتحشمو.
فاطمة:السلام عليكم
بتسمت نهى:وعليكم السلام
زمطت نادين ريقها ووجها تغير وهيا حاسه بنااااار داخلها لما شافتهم هكي ، شدت يد فاطمة وقربت من الباب:خودو راحتكم قصينا عليكم
بتسم فارس وقال:منورة دودة
ماشبحتلاش نادين بكل وهيا اطق في الباب الحوش بغل واول مافتحت ماجده الباب خشو وهما يسلمو .
تلفتت نهى لفارس:شوفت وله كيف غارة واللهي لتحبك هي
نفخ فارس:وسواس وسواااس فكيك من الوسوسه الزايده وخشي تو بعدين نجي لولاد يبوني
__
فتح رعد الورقة وحط فيها حشيش ولفها بمهارة تامة وهوا يحط فيها في فمها وولعها وقال وهوا يجبد منها ويطلع فيها من خشمه:علي امي تو نكلمها وهي عارفه ..... ولد ال..... هدا اني وياه مانتفاهموش ياعلاء
مسح علاء علي وجهه وهوا يجبد في طرف لحشيش لي في فم رعد وحطه في فمه وجبد منه:خليه عليا عارفه جوه مش زي جونا بوي اليوم بروح تعالا فكينا من اسألته تعرفه كيف يكبر في المواضيع
نزل رعد كرسي السياره التالي وجبد طرف لحشيش وقال:خليه بوي لاهي في عنبه اني خلوني امتا مايقولي دماغي تو نجي
نفخ علاء بستسلام وقال وهوا يفتح في باب السيارة:مانعرفش راسك هدا شن يقولك ، المهم راك تنسي بضعة الزبون علي الكرسي التالاني برا توا وصلهاله
نزل رعد طقيته علي وجهه وقال:باهي تبخر توا
نزل علاء وسكر الباب وخلا رعد يجبد من لحشيش ويولع في السيارة ويطلع في تليفون رنيم من جيبه ويشبح ، Norita💕 يتصل بك .
رد طول:ايوا
جاه صوتها:الو خوي اني بعدين بنطلعو باش نتلاقو وين ماتفقنا
رعد نفخ:تمام تمام ماتنفخيهمش
وسكر عليها الخط ومشي لمشوااره اللي اول ماوصل طلع تليفونه البيلة وتصل:الو اني في لمدينة وين مكانك ، تمام عرفته ، شن لابس ، تمام ماتوقفش عليا نمدهالك في طريق وعدي في حالك يابرو
سكر التليفون ودرس سيارته قدام الميدان ونزل وهوا يلبس في برنوسه فوق طقيته لنزلها علي وجهه و جبد كيسة سوده وحطها في بطنه وسكر عليها سريتت الجيبوطي وحط يديه في جيوبه وخش بين زحمت الناس واول ماركز علي شخص لابس تي شرت ابيض وطقية حمرة ويدور بعيونه علي حد ، فتح سريتت جيبوطيه وطلع الكيسه وهوا ماشي والولد جاي مدهاله من غير مايركز عليهم حد ولف ولا لسيارة وركب ولعها وهوا يحول في برنوسه ويحول في طقيته للوحها علي الكرسي لجنبه وتحرك بسيارته وقوي المسجل علي اغنية .............
مش لاقي روحي رايح بين صفحات كتابي ..
كل البيبان طقيت ماعرفتش وينه بابي ..
شاك وادي الغربان طريق كله عراقيل ..
ارواح متسخرة تخلي الساهل مستحيل ..
شجرة الدم قطعة منها عرفي ..
ماتلومنيش خود مكاني تو تقدر ضرفي ..
ناس مريضه يلعبو في علم الغيب ..
قطع رزاق ونصيب ..
لا يعرفو حرام لا عيب ..
نفسيات كلها نياب فبعض تتحسس ..
زعما بعكاس فاته خطواه يتلمس ..
تقول مش منهم فيهم ، راحتهم شقاي ..
قلوبهكم مرضي ، دعوة امي دواي ..
فبحر الضلام ، ركبتو نفس القارب ..
صفحات كتاب واحد عنوانه سم عقاارب ..
انكويت انقرصت ، غرسة في لحمي سني ..
خود بعد شوف طريقي بت عني ..
ياسهر اللايالي ، يانبع الهواء ، جرحي ياحبيبي مش لاقي دواء .............
.
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3
اسم الأغنية / ليلة من غير قمر لـ mc zofree