Love Trap (COMPLETED) Published by PHR

3

HANGGANG sa paghiga niya nang gabing iyon ay hindi maalis sa isip ni Serena si Robb Orlando. Hindi siya makapaniwalang kinasuklaman niya ito sa unang araw pa lang ng pagkikilala nila.

Isa siyang mahinahong tao. Wala siyang natatan-daang tao na pumukaw ng galit niya maliban kay Robb Orlando. At aakalain ba niyang pagbibintangan siya nitong nagkakainteres sa kayamanan ni Lola Emilia? Kayamanang hanggang sa mga sandaling iyon ng pagtatagpo nila ay hindi niya alam!

Nakatulugan na niya ang inis niya rito. Kaya ganoon na lamang ang gulat niya nang kinabukasang nakahanda na siya sa pagtungo niya sa shop sa Puerto Princesa ay panauhin niya ang lalaking laman ng isip niya ng sinundang gabi.

"Ano ang kailangan mo?" she asked icily.

Hindi na siya magtataka kung paano nitong nalaman kung saan siya nakatira. Ang lupang kinatitirikan ng bahay ng tiyahin niya ay halos nasa boundary na ng lupain ni Lola Emilia.

Ang singkit niyang mga mata ay lalo pang naningkit habang tinitingnan ito mula ulo hanggang paa. At wala siyang pakialam kung obvious dito ang ginagawa niyang pagsuri.

Nakasuot ito ng asul na turtle-necked at long-sleeved sweatshirt na angkop naman sa napakalamig na klima ngayon sa Sta. Fe. Ang kupas nitong maong ay hapit at tila babaeng nakayakap sa mga binti nito. The wretched man, she was forced to admit, was oozing with sex appeal.

"What a transformation from the young woman I met yesterday!" mahinang bulalas nito na pumukaw sa pagsusuri niya.

Kunsabagay ay may katwiran namang mamangha ito. Kahapon ay wala siyang ipinagkaiba sa basang seagull na iniligtas nila. Subalit ngayon ay maayos na nakasuklay ang hanggang balikat niyang buhok. May polbo siya at coral lipstick—na siya nang kabuuan ng makeup niya. Ang suot niya'y dilaw na blusa at puting cotton pants at sandalyas.

Hindi marahil siya makapapangalahati man lang kung ihahambing sa mga babaeng napapaugnay rito sa ibang bansa pero hindi niya ikinahihiya ang sarili niya.

Maganda rin naman siya sa sarili niyang paraan. Ang ninuno niya sa bahagi ng ama ay Chinese. Bagaman ikawalong bahagi na lang ang dugong namana niya ay malakas iyon. Maputi siya at makinis. At bagaman nasa slim side siya ay may hugis ang katawan niya sa tamang lugar.

Edukada rin naman siya at mula sa mabuting pamilya. Pero natitiyak niyang hindi nito iniisip iyon. Sa paningin ng lalaking ito ay isa siyang babaeng nagmamagandang-loob sa abuela nito para sa sariling kapakinabangan.

"Ano ang kailangan mo, Mr. Orlando?" muling tanong niya sa tonong kasinlamig ng panahon.

"Hindi mo ba ako papapasukin?"

Magandang asal lamang ang nagtulak kay Serena para papasukin si Robb. Umatras siya mula sa harapan ng pinto upang makapasok ito. "Sampung minuto," she said haughtily. "Kaya kung ano man ang sadya mo'y sabihin mo na kaagad at kailangang nasa shop ako bago dumating ang ibang deliveries ko..." Pinagkrus niya ang mga braso sa dibdib.

Sinuri nito ng tingin ang bahay niya. Kung ihahambing sa bahay ni Lola Emilia, dalawang doble ang laki ng bahay na iyon na minana niya sa namayapang tiyahin. Dalawang palapag na moderno ang kayarian at may tatlong malalaking silid sa itaas. Ang silid niya na siyang dating silid ng tiyahin ay may sariling banyo.

Ang mga kasangkapan sa bahay na iyon ay de-klase at mamahalin. Katunayan, isa sa magagandang bahay na maituturing ang bahay niya sa bayang iyon.